ཨ་རིའི་ཝི་སི་ཀོན་སིན་ས་གནས་སྤྱི་མཐུན་ཚོགས་པ་དང་གཞོན་ནུ་ཚོགས་པ་གཉིས་ནས་སྣེ་ཁྲིད་དེ་བཀའ་སྤྱི་དང་དབུས་གཞོན་ནུ་སོགས་ཀྱི་བཀའ་དགོངས་བཞིན་དཔའ་བོ་དཔའ་མོ་རྣམས་ཀྱི་བཀའ་དྲིན་རྗེས་དྲན་བྱ་ཆེད་ལོ་གསར་དགའ་སྟོན་གྱི་རྣམ་པ་གང་ཡང་མེད་པའི་སྒོ་ནས་ལོ་གསར་ཚེས་གཅིག་གི་ཆུ་ཚོད་དགུ་དང་ཕྱེད་ཀ་ནས་རི་དྭགས་ཚལ་དགོན་པའི་ནང་མི་མང་བཞི་བརྒྱ་ལྷག་འདུ་འཛོམས་ཀྱིས་རྒྱུན་སྲོལ་རོལ་དབྱངས་དང་ཚོགས་གཙོ་ཁམས་ལུང་སྤྲུལ་སྐུ་མཆོག་གིས་སྤོས་ཀྱི་དུད་པའི་མཆོད་སྤྲིན་དང་བཅས་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་དྲངས་ཏེ་བཞུགས་ཁྲིར་འཁོད་མཚམས། གཞོན་ནུ་ཚོགས་པས་གོ་སྒྲིག་བྱས་པའི་ཚོགས་རྫས་ལེགས་པར་བཀྲམས་རྗེས། དགེ་བཤེས་བཟོད་པ་བཞུགས་ཁྲིར་འཁོད་ཅིང་། དགེ་འདུན་པ་དང་མི་མང་ཡོངས་ནས་བླ་མ་མཆོད་པའི་ཆོ་ག་འདོན་བཞིན་ཚོགས་མཆོད་རྒྱ་ཆེན་པོ་ཞིག་ཕུལ། ཚོགས་མཆོད་གྲུབ་རྗེས་མི་མང་ཡོངས་འདུ་འཛོམས་ཀྱིས་དགོན་པའི་མཐའ་ནས་བསང་གསོལ་གཏོང་བཞིན་ལྷ་རྒྱལ་འཐེན་ཞིང་།
བོད་རྒྱལ་ལོ་ཞེས་པའི་འབོད་སྒྲ་སྒྲོགས་བཞིན་བསང་གསོལ་གྲོལ། དེ་རྗེས་ཆུ་ཚོད་དང་པོ་ནས་བོད་མི་མང་གི་ཆེད་རང་ལུས་མེར་སྲེག་བཏང་བའི་དཔའ་བོ་དཔའ་མོ་རྣམས་རྗེས་དྲན་ཆེད་པར་རིས་འགྲེམ་སྟོན་དང་། གློག་བརྙན་གཟིགས་འབུལ་བྱས་པར་མི་མང་འཚང་ཀ་ཤིག་ཤིག་ངང་ལྟད་མོ་ལྟ་བཞིན་ཉིན་དང་པོའི་མཛད་རིམ་གྲོལ།
ཚེས་གཉིས་པར་བོད་རིགས་སྤྱི་མཐུན་ཚོགས་པའི་དཔལ་འབྱོར་འདུ་འགོད་ཚོགས་ཆུང་གི་གྲ་སྒྲིག་འོག་འཁྲབ་ཁྲིད་པ་འཕྲིན་ལས་རྣམ་རྒྱལ་གྱིས་འགོ་ཁྲིད་དེ་་མེར་སྲེག་་ཅེས་པའི་གཏམ་བརྗོད་ཟློས་གར་ཞིག་ལོ་དགོང་དྲོའི་སྐབས་སྨི་ཌལ་ཊོན་སློབ་འབྲིང་གི་ཚོགས་ཁང་དུ་འཁྲབ་སྟོན་བྱས། འཁྲབ་སྟོན་པ་རྣམས་སྤྱིར་བཏང་མང་ཚོགས་རང་ཡིན་ལ་ཁོ་ཚོས་དུས་ཚོད་ཐུང་ངུ་ཞིག་གི་ནང་ལས་བྲེལ་ཆེ་བའི་བར་གསེང་གི་དུས་ཚོད་དེ་དག་བེད་སྤྱད་དེ་སྦྱོང་བརྡར་བྱས་མཐར་འཁྲབ་གཞུང་མགོ་རྔ་ཚང་བ་ཞིག་ཕྱི་མི་དང་བོད་རིགས་ལྟད་མོ་བ་རྣམས་འཛོམས་པའི་མདུན་དུ་འཁྲབ་སྟོན་གསོན་ཉམས་ལྡན་པ་ཞིག་བྱས་སོང་། གོ་རིམ་ལྡན་ཞིང་ནང་དོན་ཟབ་པའི་འཁྲབ་གཞུང་དང་འཁྲབ་རྩལ་ལྡན་པའི་འཁྲབ་སྟོན་པ་རྣམས་ལ་ལྟད་མོ་བ་རྣམས་ཀྱི་ཡིད་སྨོན་ཤོར་ཏེ་དགའ་བསུའི་ཐལ་མོ་ཤུགས་ཆེར་བརྡབ། དཔེར་ན། རྒྱ་དམག་གིས་བོད་པའི་གྲྭ་བ་ཚོར་ཉེས་རྡུང་ཤུགས་ཆེར་གཏོང་བའི་སྐབས་བོད་པའི་བུ་གུ་ཚོས་སྐད་ཅོར་རྒྱབ་སྟེ་་ཝེ་རྒྱ་མི། ང་ཚོ་བོད་པ་ལ་ག་རེ་བྱས་ནས་རྡུང་གི་ཡོད་་ཅེས་དང་། གྲྭ་བ་ཤིག་རང་ལུས་མེར་སྲེག་གིས་གྲོངས་སོང་བར་འཁྲབ་སྟོན་པ་རྣམས་མྱ་ངན་གྱིས་དངོས་སུ་ངུ་བཞིན་ཡོད་པ་མ་ཟད། ལྟད་མོ་བ་རྣམས་ཀྱིས་ཀྱང་ངུ་ངག་གིས་བཞིན་གདོང་ཀླན་པར་གྱུར་བ་སོགས་ཀྱིས་ཉིན་གཉིས་པའི་མཛད་རིམ་གྲོལ།
ཚེས་གསུམ་པའི་དགོང་དྲོ་ཆུ་ཚོད་ལྔ་དང་ཕྱེད་ཀའི་སྟེང་གཞོན་ནུ་ཚོགས་པས་སྣེ་ཁྲིད་དེ་ཝི་སི་ཀོན་སིན་གཙུག་ལག་སློབ་གྲྭའི་དཔེ་མཛོད་ཀྱི་མདུན་ཐང་ནས་མར་མེ་ཁྲོམ་སྐོར་གྱི་མགོ་ཚུགས་ཏེ་བྱང་ཆུབ་སེམས་མཆོག་མ་ངག་ལ་གྱེར་བཞིན་ཁྲོམ་གཞུང་རྒྱུད་མངའ་སྡེའི་གྲོས་ཚོགས་ཁང་གི་མཐའ་བསྐོར་རྗེས་མི་མང་རྣམས་ཕྱིར་དཔེ་མཛོད་ཀྱི་མདུན་ཐང་དུ་འབྱོར་མཚམས་གཞོན་ནུ་ཚོགས་གཙོ་མགོན་པོ་ལགས་ཀྱིས་བཀའ་སློབ་དང་བཅས་ཉིན་ཆུ་འབྲུག་ལོའི་བོད་དོན་ལས་འགུལ་འདི་ལྟར་མགོ་བརྩམས་སོང་།།
གནས་ཚུལ་མཁོ་གཏོང་བ་གཅན་ཡེ་རྒྱམ།