-རྒན་མོ་ཞིག་གི་སྐད་ཆ་ལས་འཕྲོས་པའི་གཏམ།
གཅན་འོད་འབར།
དེ་རིང་དཔའ་བོ་ཞིག་གི་སྐུ་ཕུང་ལ་སྐྱེལ་མ་བྱས་རྗེས་ཕྱིར་ལས་ཁུངས་སུ་ལོག་སྐབས་ལམ་འགྲམ་གྱི་ཟ་ཁང་ཆུང་ཆུང་ཞིག་ཏུ་ལས་གྲོགས་འགའ་དང་མཉམ་དུ་སྐོོམ་ཆུ་འཐུང་དུ་སོང་བ་ཡིན། དེ་རིང་གི་ཉིན་མོ་འདི་ཧ་ཅང་མྱ་ངན་ཆེ་ཞིང་ཤིན་ཏུ་གཟི་བརྗིད་ལྡན་པའི་ཉིན་མོ་ཞིག་ཡིན་པ་མ་ཟད་ཚ་བ་ཆེ་བའི་ཉིན་མོ་ཞིག་ཀྱང་རེད། དེ་རིང་གཙུག་ལག་ཁང་གི་ལམ་འགྲམ་ན་ཡོད་པའི་རྒྱ་གར་གྱི་ཟ་ཁང་ཆུང་ཆུང་དེར་ནམ་རྒྱུན་དང་མི་འདྲ་བའི་བོད་མི་མང་པོ་ཞིག་འཛོམས་འདུག་ལ་ང་ཚོས་ཀྱང་མངར་ཇ་དང་སྐོམ་ཆུ་སོགས་བསྔགས་རྗེས་དེ་རིང་གི་ལས་འགུལ་འདིའི་འགོ་མཇུག་བར་གསུམ་གྱི་སྐོར་ལ་གླེང་མོལ་བྱེད་བཞིན་པའི་སྐབས་ཤིག་ལ་ངའི་ལས་གྲོགས་བུ་མོ་ཞིག་གིས་ཟ་ཁང་གི་སྒོ་འགྲམ་བརྒྱུད་གཙུག་ལག་ཁང་དུ་ཕྱི་དྲོའི་སྨོན་ལམ་ལ་འགྲོ་བཞིན་པའི་རྒན་མོ་ལོ་ལོན་ཞིག་ལ་ཇ་འཐུང་དུ་ཤོག་ཅེས་ཟ་ཁང་དུ་སྐད་བཏང་བྱུང། (རྗེས་སུ་རྒན་མོ་དེ་ངའི་ལས་གྲོགས་བུ་མོ་དེའི་ཤ་ཉེ་ཞིག་ཡིན་པ་རྟོགས་བྱུང་།) དེ་དང་བསྟུན་ངས་ཀྱང་རྒན་མོར་དེར་གུས་ཉམས་ཤིག་དང་སྦྲགས་ཁོ་མོར་ཞིབ་བལྟ་ཐེངས་གཅིག་བྱས་དུས། གཟུགས་པོའི་ཁོག་སྟོད་སྒུར་ཞིང་ངོ་གདོང་གཉེར་མས་གཡོགས་པ། ལག་ཏུ་འཁར་རྒྱུག་བཟུང་ནས་གོམ་པ་འཁྱར་འཁྱོར་སྤོ་བའི་ངང་ཚུལ་ལས་ཁོ་མོ་ལོ་ན་བདུན་ཅུ་བརྒལ་ཡོད་པ་ཚོད་དཔག་བྱེད་ཐུབ་ལ་ཁ་ཚོན་ཡང་གཅོད་ནུས། མོ་ཟ་ཁང་དེའི་སྒོ་ཐེམ་འཛེགས་དུས་རྐང་པས་ལུས་པོ་མ་ཐེགས་པར་ལོག་གྲབས་བྱས་པས་ངའི་ལས་གྲོགས་བུ་མོ་དེས་ལམ་སེང་སྒོ་འགྲམ་དུ་སོང་ནས་རྒན་མོ་དེ་ཡང་གིས་སྐྱོར་ཞོར་ནང་དུ་བསུས་བའི་ངང་ཚུལ་དེས་ང་ལ་ནམ་རྒྱུན་བོད་མིའི་སྤྱི་ཚོགས་ཀྱིས་ཁ་གཅིག་གྲགས་དང་སེམས་གཅིག་ཐོག་གིས་བགྲང་བཞིན་པའི་རྒན་པར་གུས་བཀུར་དང་གཞོན་པར་བྱམས་སྐྱོང་ཞེས་པའི་ཡབ་རབས་བཟང་སྤྱོད་ཀྱི་གོམ་གཤིས་ཤིག་ཡོད་པ་དེ་དྲན་གསོ་བསླངས་བྱུང་ལ།
འདི་ལྟ་བུའི་གོམ་གཤིས་ཡག་པོ་ང་ཚོས་སོ་སོའི་མི་ཚེའི་འཚོ་བའི་ཁྲོད་དུ་མི་ཉམས་རྒྱུད་འཛིན་གྱིས་ལག་ལེན་བྱ་རྒྱུ་ནི་ཅི་འདྲའི་གལ་ཆེན་ནང་གི་དོན་ཆེན་ཞིག་རེད་ཨང་སྙམ་པའི་ཚོར་བ་ཞིག་ཀྱང་ངམ་ངམ་ཤིག་ཤིག་གི་སྐྱེས་སུ་བཅུག་བྱུང། རྒན་མོ་དེ་ཟ་ཁང་དུ་སླེབས་རྗེས་ང་ཚོས་མོ་ལ་མངར་ཇ་ཞིག་དང་ཞོག་ཁོག་བག་ལེབ་ཅིག་བསྔགས་པ་ཡིན། ཁོ་མོའི་གཉེར་མས་གཡོགས་པའི་ངོ་གདོང་རྔུལ་ཆུས་བརླན་ན་ཡང་ཐང་ཆད་པའི་ཉམས་སྣང་ཅི་ཡང་མེད་པར་སྤོབས་པ་དང་སེམས་ཤུགས་ཀྱིས་ཕྱུགས་པའི་རྣམ་པ་དེ་ལས་ང་ཚོས་ཁོ་མོ་ང་ཚོ་གཞོན་པ་ཚོ་དང་འདྲ་བར་རྒྱལ་གཅེས་དཔའ་བོ་དེའི་ཕུང་བོར་སྐྱེལ་མ་བྱེད་དུ་སོང་བ་ཤེས་ཐུབ་ལ་ད་ཡང་རང་འགན་རང་འཁུར་དང་རང་ནུས་ཅི་ལྕོགས་ཀྱིས་ཉིན་གུང་གི་ཟ་མ་ཡང་མ་ཟས་པར་ཕྱི་དྲོའི་སྨོན་ལམ ་ལ་འགྲོ་བཞིན་པ་རྟོགས་བྱུང་། འོན་ཀྱང་གློ་བུར་དུ་རྒན་མོ་དེའི་འོད་མདངས་དབེན་པའི་མིག་ཟུང་ལས་མིག་ཆུ་ཁྲོམ་ཁྲོམ་བཞུར་བ་མ་ཟད་ངུ་སྐད་འདྲེས་མའི་སྐད་ཆ་ལྡབ་ལྡིབ་ཅིག་ཀྱང་ཁ་ལྕེ་མི་དག་པའི་ངག་ནས་བཤད་བྱུང་། ཁོ་མོའི་སྐད་ཆ་དེ་ནི་རང་གིས་རང་ལ་ཤེས་འཇོན་ཅི་ཡང་མེད་ཁར་ད་དུང་རྒྱལ་ཁབ་ཀྱི་རྩ་དོན་ལ་ཕན་ཞིང་མི་རིགས་ཀྱི་བདེན་དོན་ལ་སྨན་པའི་ལས་འགུལ་དང་ངོ་རྒོལ་སོགས་སུ་བོད་མི་ཕྱིངས་དང་འདྲ་བར་འཛུལ་ཞུགས་བྱ་མི་ཐུབ་པར་དམོད་མོ་དང་ལས་བདའ་བྱ་ཀྱིན་པ་དེ་རེད། ཁོ་མོས་བཤད་དོན་ ”ངས་ནི་འཐབ་རྩོད་བྱ་དགོས་བསམ་པ་སེམས་པས་བསམ་ཡང་ལུས་པོས་ལྕོགས་ཀྱིས་མི་འདུག་ལ་ལས་འགུལ་ལ་ཞུགས་དགོས་ཡིད་ཀྱིས་སྙམ་ཡང་ནུས་པ་དང་ཤེས་འཇོན་མི་འདུག” ཅེས་རང་ལ་འཁང་ར་དང་ཁག་འདྲི་བྱེད་ཀྱིན་ཕངས་སེམས་དང་འགྱོད་སྣང་གི་སྤྱན་ཆབ་ཤམ་ཤམ་བསིལ་བས་ཉེ་འཁྲིས་ཀྱི་བོད་མི་ཚོས་གཅིག་འཕྲོར་གཉིས་འཕྲོར་ཁོ་མོར་དེ་འདྲ་མིན་པའི་སེམས་གསོའི་སྐད་ཆ་སྣ་ཚོགས་ཤིག་ཡང་ནས་བསྐྱར་དུ་བཤད་ན་ཡང་ཁོ་མོའི་ངོ་གདོང་ན་ད་དུང་ཅི་མི་སྙམ་ཞིང་རེ་འདོོད་མ་ཁེངས་པའི་རྣམ་འགྱུར་ཞིག་ལྷག་འདུག
དེ་འདྲ་ཞིག་ལོས་ཡིན་སྟེ་རང་ཉིད་ཀྱི་སེམས་པས་བསམ་ཞིང་རེ་བས་འདོད་པ་བཞིན་གྱི་ལས་འགུལ་དང་འཐབ་རྩོད་ཅིག་མིག་གིས་མ་མཐོང་ལ་རྣ་བས་མ་གོ་བས་ལོས་ཡིན་སྙམ། མཚམས་འདིར་ངས་བསམ་བློ་གཞན་ཞིག་འཁོར་བ་ནི་རྒན་རྒོན་ལོ་ལོན་འདི་ཚོས་སེམས་པས་བསམ་ཡང་ལུས་པོས་མ་ལྕོགས་པར་ཁག་མི་འདུག་མོད། འོན་ཀྱང་ལང་ཚོ་དར་ལ་བབ་པའི་གཞོན་སྐྱེས་མང་པོ་ཞིག་གིས་རང་མི་རིགས་ཀྱི་རྩ་དོན་རྩོད་པར་ལུས་པོས་ལྕོགས་ཀྱང་སེམས་པས་མ་བསམ་པའི་རྒྱུ་རྐྱེན་ཅི་ཡིན་ནམ་སྙམ་པའི་དྲི་བ་དེ་རེད་ལ། ད་དུང་ཆེས་བློས་མི་དཔོགས་པ་ཞིག་ནི་རྒན་མོ་དེའི་མིག་ཟུང་ལས་གློ་བུར་དུ་ཅི་ཡིན་དེ་ཡིན་མེད་པར་ཕངས་སེམས་ཀྱི་སྤྱན་ཆབ་བསིལ་བའི་ངང་ཚུལ་དེའི་རྒྱབ་ལྗོངས་ཀྱི་རྒྱབ་ལྗོངས་ཀྱང་རེད་ལགས།
རྒན་མོ་དེའི་མིག་ཆུ་དང་བདེན་ཅོག་ཅོག་གི་སྐད་ཆ་སོགས་ཀྱིས་ངའི་སྐོམ་ཆུ་མངར་མོ་དང་ཞོག་ཁོག་བག་ལེབ་དེའི་བྲོ་བ་རྨང་ནས་བསད་སོང་ལ་འགྲེལ་བཤད་རྒྱག་མི་ཤེས་པའི་ཚོར་བ་རྣོ་པོ་ཞིག་ཀྱང་ཤུགས་ཀྱིས་སྤྲད་བྱུང་། དེ་དང་བསྟུན་ནས་རྒ་བཞིན་པའི་མི་རབས་རྒན་པ་འདི་ཚོའི་ཉམས་པ་མེད་པའི་སེམས་ཤུགས་དང་ཞུམ་པ་མེད་པའི་བློ་སྟོབས་སོགས་ནམ་ཡང་འགྱུར་བ་མེད་པར་གནས་ཡོད་པ་ར་སྤྲོད་བྱས་བྱུང་ལ། ད་དུང་ཁོང་ཚོས་ང་ཚོ་མི་རབས་གསར་པ་རྣམས་ལ་བཅོལ་བའི་རང་དབང་སླར་གསོའི་ཡིད་ཆེས་དང་རིག་གཞུང་རྒྱུད་འཛིན་གྱི་རེ་བ་ནི་ཅི་འདྲའི་ལྕི་ཞིང་ཆེ་བའི་འགན་འཁྲི་གལ་ཆེན་ཞིག་རེད་ཨང་སྙམ་པའི་ཚོར་བ་ཞིག་ཀྱང་དྲག་ཏུ་ལངས་སུ་བཅུག་བྱུང། དེ་བཞིན་ནུབ་ཁའི་ཉི་མ་ལྟ་བུའི་རྒན་མོ་འདི་དང་མཚུངས་བའི་མི་རབས་རྒན་པ་ག་ཚོད་ཅིག་ལ་ཡུན་རིང་མཐོང་མ་མྱོང་པའི་ཕ་ས་མ་ཡུལ་ལ་མགྱོགས་ནས་མྱུར་དུ་ལོག་འདོད་ཀྱི་རེ་འདུན་དང་སྨོན་སེམས་ཅི་འདྲའི་ཆེ་ཨང་བསམ་པའི་བསམ་བློ་ཞིག་ཀྱང་ངང་གིས་འཁོར་བྱུང།།
༢༠༡༢།༣།༣༠ དགོང་མོར་རང་ཤག་ནས་ཤར་མར་བྲིས་པ་དགེའོ།།
དངོས་གནས་རྨོ་མོ་ལགས་དེ་ཐུགས་ཁག་མེད།
སྔར་བདོ་ཀྱི་གཏམ་དཔེར།
ལུས་པོ་གསེར་ལྟར་ཡོད་དུས།
སེམས་པ་རོ་ལ་གནས་འདུག
སེམས་པ་གསེར་ལྟར་སོང་དུས།
ལུས་པོ་རོ་ལྟར་ཆགས་འདུག
ན་གཞོན་བྱིས་པ་ཚོར་ཡིན་ནོ།
ཡག་པོ་བྲིས་འདུག
མ་དག་པ། བྱིངས། ལེ་བདའ།
ཁ་བརྡ་དྲ་བདག་ལགས། བདག་ཁ་བརྡའི་དྲ་བར་གསར་ཞུགས་བྱེད་མཁན་ཞིག་ཡིན་པས། ཇི་ལྟར་ཞུགས་དགོས་མིན་ཐད་ལམ་སྟོན་ཞིག་ཐུགས་རྗེ་གཟིགས།
ཧ་ཅང་ཡག་པོ་བྲིས་འདུག
བྱིངས།
ལེ་བདའ།
ཡ་རབས།
གོམས་གཤིས།
མངགས་པ་སོགས་མ་མཁྱེན་པ་ག་ལ་ཡིན།
ཤར་མར་བྲིས་ན་ཤུལ་དུ་ལོས།
དལ་བོར་བྲིས་དག་མ་ཡོངས་་་་་་་་་ཟེར་བ་དེ་བདེན་པའི་རྟགས་རེད།
དངོས་གནས་ཡག་པོ་བྲིས་འདུག
མུ་མཐུད་དུ་འབྲི་རོགས
༡༽ ཕ་ཡུལ། ཕ་ས་མ་ཡུལ།
ངའི་དེང་པོའི་མཁའ་དབུགས་རྔུབས་ས།
ངའི་ཐོག་མའི་ལྟེ་ཁྲག་བཞིར་ས།
ངའི་ཆེས་ཐོག་མའི་ངུ་སྐད་དང་དགོད་སྒྲ་སྒྲོཊ་ས།
༢༽ ཕ་ཡུལ། ཕ་ས་མ་ཡུལ།
ངའི་ཨ་ཕས་ནོར་ལུག་འཚོ་ས།
ངའི་ཨ་མས་འབྲི་འོ་བཞོ་ས།
ང་ཆུང་དུས་འཚར་ལོང་བྱུང་ས།
༣༽ ཕ་ཡུལ། ཕ་ས་མ་ཡུལ།
ང་ལྟོག་དུས་རྩམ་པ་ཟ་ས།
ང་སྐོམ་དུས་འོ་ཇ་འཐུང་ས།
ང་བརྒྱགས་དུས་གཅིན་སྐྱག་གཏོང་ས།
༤༽ ཕ་ཡུལ། ཕ་ས་མ་ཡུལ།
ང་ཆུང་དུས་སློབ་གྲྭར་འགྲོ་ས།
ང་གཞོན་དུས་དགའ་རོཊ་བསྒྲིགས་ས།
ང་རྒས་དུས་སེམས་པ་ཆགས་ས།
༥༽ ཕ་ཡུལ། ཕ་ས་མ་ཡུལ།
ངས་ཉིན་མོར་དྲན་པ་ཤོར་ས།
ངས་མཚན་མོར་རྨི་ལམ་འཁོར་ས།
ངས་ནམ་རྒྱུན་སྨོན་ལམ་འདེབས་ས།
༦༽ ཕ་ཡུལ། ཕ་ས་མ་ཡུལ།
ཁར་སང་གི་རྩ་ས།
དེ་རིང་གི་ཁྲག་ས།
སང་ཉིན་གྱི་སྨག་ས།
༧༽ ཕ་ཡུལ། ཕ་ས་མ་ཡུལ།
ཡ་གླིང་གི་ཡ་གྱལ།
ཡོ་གླིང་གི་སྨོན་ཡུལ།
ཡ་ཡོ་（亚洲和欧洲）གླིང་མཚམས་ནས་དྲན་སོང་།
ཞེས་བ་འདི་༢༠༡༢་ལོའི་ཟླ་༤་བའི་ཚེས་༣་ཉིན་ཁ་ཆེས་གྲོང་ཁྱེར་ཡེ་སི་ཐན་བྷོལ་ནས་བྲིས།
དྲ་གྲོགས་ཚོས་ལེགས་སྤེལ་ཉེས་འགོག་གི་བསམ་འཆར་ལྷུག་པོར་བརྗོད་པ་ཐུགས་རྗེ་ཆེ། རྩོམ་འདི་ལ་ཞིབ་དག་གཏོང་རྒྱུའི་གོ་སྐབས་མ་རེག་པས་ཡིག་ནོར་ཅུང་ཙམ་ཐོན་འདུག་རྗེས་སུཉམས་འཇོག་བྱ་ངེས་ཡིན། མུ་མཐུད་བསམ་འཆར་གནང་བར་དགའ་བསུ་དང་རེ་བ་ཡོད། གཅན་འོད་འབར་ནས།
རྗེས་སུ་དྲ་ཚིགས་ནས་ཀློག་དུས་རང་ཉིས་ཀྱིས་ཀྱང་ཡིག་ནོར་མང་པོ་ཞིག་ཡོད་པ་ཤེས་སོང་མོད་བཟོ་བཅོས་རྒྱག་རྒྱུའི་བསམ་བློ་སྐྱེས་ཀྱང་བཟོ་ཐབས་མ་བྱུང། རང་དབང་དྲ་རྒྱར་བཟོ་བཅོས་བརྒྱབ་ནས་བཀོད་ཡོད་པས་དེར་གཟིགས་རོགས་ཞུ།
༦༽ ཕ་ཡུལ། ཕ་ས་མ་ཡུལ།
ཁར་སང་གི་རྩ་ས།
དེ་རིང་གི་ཁྲག་ས།
སང་ཉིན་གྱི་སྨག་ས།
འདིར།
མདང་།
འདི་རིང་།
སང་ཉིན།