-4/14 ཡུལ་ཤུལ་ས་ཆར་ས་ཡོམ་གྱི་གོད་ཆག་བྱུང་ནས་ལོ་འཁོར་གཉིས་ལོན་པར་རྗེས་དྲན་དུ་བྲིས་པ།
གཅན་འོད་འབར།
ཁུ་སིམ་ཁད་ཀྱིས་དཀྲོགས་པའི་ནངས་མོ་དེ།
ལྷིང་འཇགས་ཐོལ་གྱིས་བཅོམས་པའི་ཞོགས་པ་དེ།
ནངས་མོ་དེ་དང་ཞོགས་པ་དེར།
སུ་ཞིག་གིས་ཡིད་ལ་མ་དྲན་ཞིང།
གང་ཞིག་གིས་ཐུགས་ལ་མ་མཁྱེན་པའི་ས་ཆེན་པོའི་གོད་ཆག་ཅིག་གིས།
ཡངས་བའི་རྩྭ་ཐང་གི་མཛེས་སྡུག་བསད་ཅིང།
བརྗིད་པའི་གངས་རི་ཡི་གཟི་མདངས་འཁྱེར་ལ།
ཉམ་ཆུང་སྤུན་ཟླ་ཚོའི་བདེ་སྐྱིད་འཕྲོག་སོང་།
མཚན་མོ་དེ་དང་ཉིན་མོ་དེར།
མིག་ཟུང་གི་མཆི་མ་ཟུངས་ཁྲག་གིས་འཚོས་པའི་སྐྱོ་གར་ཞིག
སེམས་ཁོང་གི་རེ་སྨོན་རྨ་ཁས་བརྫུས་པའི་གཏམ་རྒྱུད་ཅིག
སྙིང་དབུས་ཀྱི་གསོལ་འདེབས་ན་ཟུག་གིས་ཁེགས་བའི་བྱུང་བ་ཞིག
བཟློག་ཐབས་བྲལ་བའི་ལས་སྐལ་ཞིག་དང་འདྲ་བར།
མ་བུའི་བརྩེ་མདུད་གས་ནས་བྱུང་ཞིང།
གཞོལ་མི་ཐུབ་པའི་གོད་ཆག་ཅིག་དང་མཚུངས་བར།
ཕུ་ནུའི་ཞེ་ཐག་བཀྲོལ་ནས་བརྒྱབ་པ།
གནམ་ས་འཁྲུགས་པའི་བཀའ་ཆད་ཡིན་ནམ།་
ལྷ་ཀླུ་ཁྲོས་པའི་ཆོ་འཕྲུལ་ཡིན།
རེ་བའི་ཉི་གཞོན་ས་རྡུལ་གྱིས་གཡོགས་པའི་ཞོགས་པ་དེ།
བརྩེ་བའི་མེ་ཏོག་གྱང་ཆག་གིས་རལ་པའི་ནངས་མོ་དེ།
ཞོགས་པ་དེ་དང་ནངས་མོ་དེ།
ང་དང་ཁྱོད་ཀྱིས་མྱ་ངན་གྱི་མཆི་མ་འདོན་སྟངས་ཡིན་ལ།
ཁྱོད་དང་ང་ཡིས་ཡིད་ཆད་ཀྱི་སྨྲེ་ངག་གྱེར་ཚུལ་ཡིན།
དེ་རིང་ལྟ་བུའི་ཉིན་མོ་དེ།
མུན་པས་རྩྭ་ཐང་བཀབས་པའི་ཉིན་མོ་ཡིན་སྲིད་ན།
དེ་རིང་འདྲ་བའི་ཉིན་མོ་འདི།
སྐྱ་རེངས་ཀྱིས་འོད་སྣང་འགྱོགས་པའི་ཉིན་མོ་ཡང་ཡིན་ངེས་པས།
གདུང་སེམས་ཁྲོད་ཀྱི་རྩྭ་ཐང་ལ་བརྩེ་ཞེན་གྱི་མེ་ཏོག་བཞད་པའི་རེ་སྨོན།
མྱ་ངན་ཀློང་གི་ངོ་གདོང་ལ་ཞི་བདེའི་འཛུམ་དཀར་ཁྱབས་པའི་བཀྲ་ཤིས།
ན་ཟུག་གསེབ་ཀྱི་སེམས་པ་ལ་བདེ་སྐྱིད་ཀྱི་དབྱངས་རྟ་འཁོར་བའི་རྟེན་འབྲེལ།།
༢༠༡༢།༤།༡༤ ཉིན་རང་ཤག་ནས་ཤར་མར་བྲིས།