ཨ་ཁུ་དབྱངས་དམར་ནས།
ཡང་སྲིད་རིན་པོ་ཆེའི་འཁྲུངས་སྐར་ཉིན་མོ་རྒྱུན་དུ་དྲན་པའི་སེམས་ཚོར་དགའ། ང་མི་ཡུལ་ལ་འགྲོ་དགོས། །ཚེ་སྔོན་གྱི་ལས་རེད་ཅེས་པའི་གཞས་དེ་ངས་མི་ཚེ་འདིར་གཞས་ཉན་པའི་ཆེ་ཐོག་མ་དེ་ཡིན། ངའི་ཕ་མ་གཉིས་ལ་གང་ནས་བྱུང་མ་ཤེས་ཀྱང་རླུང་འཕྲིན་ནག་པོ་ཆུང་ཆུང་ཞིག་ཡོད་པས་རྒྱ་གར་རྒྱལ་ཡོངས་རླུང་འཕྲིན་ཁང་གི་བོད་སྐད་ཀྱི་གསར་འགྱུར་དེ་ཉན་རྒྱུ་རྒྱུན་ལྟོར་གྱུར། དེ་དུས་རིག་གསར་གྱི་མཇུག་ཙམ་ལ་སོང་སོ་སོའི་ཕ་སྤུན་ལ་ཡང་དོག་པ་བྱེད་པའི་དུས་ཡིན་ཡང་ངའི་པ་མ་གཉིས་ཀྱིས་སྣང་མེད་དུ་གསར་འགྱུར་དེ་ཉན་རྐྱང་གནང་གི་ཡོད། དེ་ལྟར་བྱས་ནས་ངས་ང་མི་ཡུལ་ལ་འགྲོ་དགོས་ཞེས་པའི་གཞས་དེ་ཤེས་པ་ཡིན།
གསར་འགྱུར་གྱི་བར་སེང་དུ་གཞས་དེ་གཏོང་སྐབས་ང་ཚོ་ནང་མི་ཚང་མས་མཉམ་དུ་གཏོང་བ་དང་། དེ་དུས་ངའི་ཕ་རྒན་དེའི་མིག་ནས་མཆི་མའི་ཐིག་པ་ལྷུང་ལྷུང་འབབས་པ་མཐོང་དུས་ང་རང་ཡང་ངུས་ནས་གཞས་ཚིག་གི་ནང་དོན་དྲིས་པར་ པ་རྒན་ནས་ལན་གང་ཡང་མ་གནང་བར་གཅུང་དོན་ཡོད་དང་། དོན་གྲུབ་ཀྱི་རྣམ་ཐར་དེབ་ཆུང་དེ་གནང་ནས་ཀློག་དགོས་པའི་བཀའ་སློབ་གནང་གི་ཡོད། ང་རང་ལོ་ན་ཆུང་ཡང་དེབ་དེ་ཡུད་ཙམ་ལ་ཀློག་གི་ཡོད་ལ་ཀློག་ཚར་ཙམ་ཕ་རྒན་ནས་གཅུང་དོན་ཡོད་དང་དོན་གྲུབ་ཀྱི་གཅེན་གཅུང་གཉིས་དང་རྒྱལ་དབང་ཡབ་སྲས་གཉིས་ཀྱི་མཛད་རྣམ་བསྲེས་ནས་གཏམ་རྒྱུད་སྙན་པོ་དེ་འདྲ་གསུང་གི་ཡོད་་ཀྱང་ངའི་སེམས་ནང་རྒྱལ་དབང་ཡབ་སྲས་གཉིས་སུ་ཡིན་མིན་ཐད་ད་དུང་དོག་པ་མ་ཆོད་ཀྱང་ཕ་རྒན་གཏུམ་དྲག་ཆེ་བས་དྲི་བ་ཡང་ཡང་ཞུ་བའི་སྤོབ་པ་ནི་མེད། ཕལ་ཆེར་ཕྱི་ལོ་་༡༩༨༤་ཙམ་ལ་ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་བོད་ཀྱི་གདན་ས་བཀྲ་ཤིས་ལྷུན་པོར་ཕེབས་ཞོར་དུ་ང་ཚོའི་ལུང་པར་ཕེབས་ཀྱི་ཡོད་པའི་གནས་ཚུལ་རྒྱ་གྲགས་བོད་གྲགས་སུ་གྱུ་བ་དང་། དེ་དུས་་རང་ངོས་ནས་གནས་ཚུལ་མང་པོ་ཞིག་ཤེས་པའི་རྣམ་དཔྱོད་ལྡན་པའི་སྤོབས་པ་མེད་ཀྱང་ཀུན་གཟིགས་མཆོག་གི་མཚན་ཐོས་པ་ཙམ་གྱིས་སེམས་ནང་དད་པ་ལྷད་མེད་པ་སྐྱེ་བཞིན་ཡོད།
ཀུན་གཟིགས་མཆོག་ཕེབས་པའི་ཉིན་དེར། ང་ཚོའི་ལུང་པ་ལུང་ཁུག་དང་མི་མང་པོ་མེད་ཀྱང་ཚང་མས་དད་སེམས་མཚོན་བྱེད་དར་དཀར་ལག་ཏུ་བཟུང་ནས་ཀུན་གཟིགས་མཆོག་ལ་ཕེབས་བསུ་ཞུས། གུས་པས་མི་ཚོགས་ཀྱི་འཚངས་ཁའི་ཁྲོད་ནས་ཀུན་གཟིགས་མཆོག་གི་བཞིན་རས་ཕེབས་སྒྲོལ་གྱི་ཤེལ་སྒོའི་ནང་ནས་མཇལ་བྱུང་བར་བཞིས་རས་ཀྱི་དཀྱིལ་འཁོར་གཟི་བརྗིད་ཆེ་བས་དེ་སྔོན་བཞིན་རས་དེ་འདྲ་མཇལ་མྱོང་མེད་པས་སེམས་ནང་འཇིགས་སྣང་བྱུང་བ་ཞིང་། ཕྱིས་སུ་ ང་རང་དང་འདྲ་བའི་ཕྲུ་གུ་ཚང་མས་དེ་དང་གཅིག་མཚུངས་ཤོད་བཞིན་འདུག དེ་རྗེས་གཞིས་རྩེའི་གདན་ས་ཆེན་པོར་ཐེང་མ་གསུམ་ལ་མཇལ་ཞིང་མགོན་པོ་ཚེ་དཔག་མེད་ཀྱི་ཚེ་དབང་ཞུ་བའི་སྐལ་བཟང་གི་གོ་སྐབས་བྱུང་། ཕྱི་ལོ་༡༩༨༩ ལོ་གདན་ས་བཀྲ་ཤིས་ལྷུན་པོས་དབུས་བོད་ཁུལ་དུ་ཕེབས་པ་དེ་ནི་ཆེས་མཐའ་མའི་ཆིབས་བསྒྱུར་ཞིག་ཡིན་པ་ནི་སྐྱེ་བོ་ཀུན་གྱི་བློ་ཡུལ་ལས་འདས་ཤིང་སྐབས་དེར་ཕེབས་དགོས་པའི་རྒྱུ་མཚན་ནི་གདན་ས་བཀྲ་ཤིས་ལྷུན་པོར་ཀུན་གཟིགས་པཎ་ཆེན་སྐུ་ཕྲེང་ལྔ་པ་ནས་དགུ་པ་བར་གྱི་གདུང་རྟེན་མཆོད་ཁང་ཤར་བཀྲ་ཤིས་རྣམ་རྒྱལ་ཆེན་མོའི་རབ་གནས་ཀྱི་མཛད་སྒོའི་ཆེད་དུ་ཡིན། ཉིན་ཤས་རིང་ཕྱོགས་མཐའི་སྐུ་མགྲོན་གལ་ཆེ་ཁག་དང་མཇལ་ཕྲད་དང་། ཆོས་ལུགས་ཀྱི་གནང་སྒོ་སོགས་མཛད་བྲེལ་གྱིས་སྐུ་ངལ་ཡང་གསོ་ལོངས་བྱུང་མེད། རབ་གནས་མཛད་སྒོ་དངོས་གཞིས་གྲུབ་ཙམ་མཆོད་ཁང་ཆེན་པོའི་དབུ་རྩེ་ནས་དད་ལྡན་མི་མང་རྣམས་ལ་རྒྱུན་རིང་གཟིགས་པ་དང་། ཕྱག་གཡུག་གཡུག་གནང་སོང་བར་དེ་ནི་མི་ཚེ་འདིར་ཀུན་གཟིགས་བཀའ་དྲིན་ཅན་དེའི་ཞལ་རས་མཇལ་བའི་མཐའ་མ་དེ་ཡིན། ཉིན་ཤས་རྗེས་ལ་ཁོག་པའི་སྙིང་དང་། དཔྲལ་བའི་མིག །གཙུག་གི་ནོར་བུ་ས་ལ་ལྷུང་སོང་བར་དེ་ལས་གྱོང་ཆེ་བ་དང་མྱ་ངན་ཆེ་བ་ཞིག་ཅི་ཡོད། མ་ཟད་བོད་པ་ཚང་ལ་ཡང་གྱོང་གུན་ཆེན་པོ་ཞིག་ཡིན་པ་ད་ལྟ་བོད་ནང་འུ་ཐུག་ཐབས་ཟད་ཀྱི་སྐུ་སྲོག་ཞུགས་མེར་ཕུལ་བའི་གནས་ལ་གྱར་བ་དེ་ནས་ཤེས་པ་ཡིན།
སླར་ཡང་སིལ་ལྗོངས་བསྟན་འགྲོའི་དོན་དུ་ཡང་སྤྲུལ་ཉི་མ་གཞོན་ནུ་མྱུར་དུ་བྱོན་པ་དང་། སྲིད་དོན་གྱི་གཡོས་མ་སླད་པར་གནའ་བོའི་ཆོས་ལུགས་ཀྱི་སྲོལ་རྒྱུན་གཙང་མའི་ལམ་བཟང་ཉམས་སུ་བསྟར་ནས་ཀུན་གཟིགས་གོང་མ་རིམ་གྱི་གསེར་ཁྲིར་འཁོད་ཐུབ་པའི་རེ་བ་ནི་བོད་མི་ཡོངས་ཀྱི་སེམས་སུ་ཉར་བའི་རེ་བ་ཉག་གཅིག་དེ་ཡིན་ཞིང་། ཡུན་རིང་འགུགས་པའི་རྨིས་ལམ་དང་རེ་བ་དེ་ཕྱི་ལོ་༡༩༩༥ ལོར་དངོས་སུ་མངོན་དུ་གྱུར་བ་བྱུང་ཡང་དགའ་སྣང་གི་ཚོ་བ་དེ་མངོན་དུ་གྱུར་པ་དང་། མཇུག་བསྡུས་པ་དུས་མཉམ་དུ་ཡོང་རྒྱུ་ཡིན་པ་ནི་ཉལ་བའི་རྨིས་ལམ་ལ་ཡང་གཏོང་མྱོང་མེད། དེ་རིང་ཡང་སྐུའི་འཁྲུངས་སྐར་་༢༣་གྱི་དུས་ཚེས་ཤར་སོང་ངོ་མ་ངས་དགོད་དགོས་སམ། ངུ་དགོས་རེད།དེ་ལྟར་བྱེད་སྟངས་མ་ཤེས་པའི་ངང་ནས་ངས་ལོ་ལྟར་ཁྱོད་ཀྱི་འཁྲུངས་སྐར་ལ་སྲུང་བརྩི་ཞུ་བཞིན་ཡོད།
སེམས་ཚོར་ཟབ་མོའི་རྩོམ་ཞིག་བྲིས་འདུག ངོ་མ དེ་ལྟར་རེད།
ཨ་ཁུ་དབྱངས་དམར་ཁྱོད་ངོ་མ་ཁག་མི་འདུག ངས་ཀྱང་ཀུན་གཟིགས་མཆོག་གི་འཁྲུངས་སྐར་འདི་ངུ་མ་དགོད་ཀྱིས་སྲུང་བརྩི་ཞུ་དགོས་འདུག ཁྱོད་ཀྱིས་ཀུན་གཟིགས་མཆོག་ལ་དད་པའི་སྤུ་ལོང་གཡོ་སྟངས་ཀྱི་སེམས་ཚོར་གསོན་པོ་དེའང་ང་དང་འདྲ་བ་འདུག ཕལ་ཆེར་ལོ་རབས་བརྒྱད་ཅུའི་ནང་གི་བོད་ཕྲུག་ཚང་མར་སེམས་ཚོར་གཅིག་མཚུངས་ཡོད་ཀྱི་རེད།
ངོ་མ་ཁྱོད་བདེན།
བྱེད་སྟངས་མ་ཤེས་པའི་སྐབས་འདིར་ང་ལ་བསམ་ཚུལ་ཞིག་ཡོད་སང་ཉིན་ ༢༥ ཉིན་འཁྲུངས་སྐར་ཟབ་རྒྱས་ཞུ་དགོས་པ་དང་། ཉིན་དེ་ནས་འགོ་འཛུགས་ཀྱི་༧པཎ་ཆེན་རིན་པོ་ཆེ་རྒྱའི་བཙོན་འོག་ནས་ཕྲལ་མ་ཉིད་དུ་གློད་བཀྲོལ་འཐོབ་ཐབས་ཀྱི་ལས་སྐུལ་ཤུགས་ཆེ་ལ་རྒྱུན་འཁྱོངས་བ་ཞིག་སྤེལ་ན་བསམ་གྱི་འདུག།དྲ་གྲོགས་ཚོའི་ཐུགས་ལ་བསམ་ཚུལ་འདིར་དགོངས་ཚུལ་ག་རེ་ཡོད།།
ལགས་རེད། ལགས་རེད། དེ་ལྟར་ལོས་ཡིན།
མི་རྣམས་ཀྱིས་པཎ་ཆེན་དགེ་འདུན་ཆོས་ཀྱི་ཉི་མའི་འཁྲུངས་སྐར་བསུས་ནས་དགུངས་གྲངས་འདི་ཙམ་ལ་བསླེབས་ཀྱང་ངའི་མིག་ལམ་དང་སེམས་ངོགས་ན་ད་དུང་ཡང་ཞལ་རས་ཟླ་བའི་དཀྱིལ་འཁོར་འདྲ་བ་དེ་དང་སྐུ་གཟུགས་རི་རྒྱལ་ལྷུན་པོ་འགྱངས་བར་འདྲ་བའི་༧པཎ་ཆེན་སྐུ་ཕྲེང་བཅུ་བའི་བརྗིད་ཉམས་ངོ་མཚར་ལྡན་པ་དེ་གསལ་ལམ་མེར་གནས་འདུག
གཞལ་མཐའ་བྲལ་བའི་ཁོང་གི་སྐུ་གསུང་ཐུགས་ཀྱི་མཛད་རྗེས་ནི་འདིར་བརྗོད་ནུས་པ་ཞིག་ག་ལ་ཡིན །
སེམས་ཚོར་གྱི་ཟིན་པའི་རྩོམ་ཡིག་ཧ་ཅང་གཙང་མ་ཞིག་བྲིས་འདུག་་་་་་་་་ཐུགས་རྗེ་ཆེ་་་་
སྐུའི་འཁྲུངས་སྐར་ལ་ཅི་ཞིག་བྱེད་དགོས་མི་ཤེས་ཀི སྤྱི་བྱས་སྐུ་ཉི་མ་འདྲ་བཞུགས་ཡོད་ན་དགའ་བའི་གླུ་དང་སྐྱིད་པའི་བྲོ་རྩེད་དགོས་པ་སྨོས་མེད་རེད། འོན་ཀྱང་ད་ནི་ཅི་ཞིག་བྱེད་དགོས་མི་ཤེས་ཀི་ཡ
སྐུའི་འཁྲུངས་སྐར་ལ་ཅི་ཞིག་བྱེད་དགོས་མི་ཤེས་ཀི སྤྱིར་ཡིན་སྐུ་ཉི་མ་འདྲ་བཞུགས་ཡོད་ན་དགའ་བའི་གླུ་དང་སྐྱིད་པའི་བྲོ་རྩེད་དགོས་པ་སྨོས་མེད་རེད། འོན་ཀྱང་ད་ནི་ཅི་ཞིག་བྱེད་དགོས་མི་ཤེས་ཀི་ཡ
ཨ་རོགས་ཁྱེད་ཀྱིས་སེམས་ཚོར་ཡག་པོ་ཞིག་བཀོད་འདུག
ཐུགས་རྗེ་ཆེ།
ཀུན་གཟིགས༧པཎ་ཆེན་བཀའ་དྲིན་ཅན། །དྲན་ཞིང་མིག་ནས་མཆི་མ་འཐོར། །ད་ལྟ་ནོར་བུ་ཡོད་དོ་ཅོག །གཅེས་སྤྲས་བྱེད་པའི་དུས་ལ་བབ། །
ཨ་ཁུ་དབྱངས་དམར་ལགས་ཀྱི་རྩོམ་ཡིག་དེ་ཀློག་སྐབས་ངོ་མ་སྐབས་དེ་དུས་སོ་སོ་དངོས་ཡོད་པ་ལྟ་བུའི་ཚོར་ཤུགས་གཟབ་མོ་སྤྲོད་བཞིན་འདུག་རང་གི་ཚོར་བ་དངོས་ཡིན་པ་ར་སྤྲོད་གསལ་པོ་འདུག་པས་ཐུགས་རྗེ་ཞུ།
དེས་ན་ངས་ཀྱང་གདོང་དམར་བོད་ལ་བཀྲིན་ཟླ་མེད་༧ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་གྱི་ཉིན་མོར་དགའ་སྐྱོ་ཟུང་སྦྲེལ་འཚམས་འདྲི་བཀའ་བདེ་ལེགས་གྲངས་མེད་ཞུ་བ་དང་།༧ཀུན་གཟིགས་མཆོག་སྐུ་ཚེ་དཔག་མེད་བརྟན་ཞིག་མྱུར་དུ་རྒྱའི་བཙོན་འོག་ནས་ཀློད་འཁྲོལ་ཡོང་བའི་སྨོན་ལམ་གྲངས་མེད་ཞུ།།
༧ཀུན་གཟིགས་༧པཎ་ཆེན་རིན་པོ་ཆེའི་གནས་བབ་ལ་ངོས་འཛིན་ཡང་དག་པ་དགོས་རྒྱུའི་གནད་དོན་ཁག་ཅིག
༡༽༧ཀུན་གཟིགས་༧པཎ་ཆེན་སྐུ་ཕྲེང་བཅུ་པོ་ཆེན་མོས་བོད་ཀྱི་ནང་བསྟན་སླར་གསོ་དང་།སྐད་ཡིག་རིག་གཞུང་སླར་གསོ།གསོ་རིག་རིག་གཞུང་སླར་གསོ།བོད་མི་མང་བདེ་སྡུག་ལ་ཐུགས་འགན་གཙང་བཞེས་གནང་བ།བོད་ཀྱི་ཆབ་སྲིད་ཐད་རྒྱ་གཞུང་ལ་མེར་འཚིག་མེར་གཏུགས་གནང་བ་བཅས་མདོར་ན་ཁོང་གི་མཛད་རྗེས་དེ་དག་ཚང་མ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་གྲུང་བོན་བཅས་རིས་སུ་མ་ཕྱེད་པའི་གྲུབ་མཐའ་ཡོང་དང་།མདོ་དབུས་ཁམས་གསུམ་མཐའ་དག་ལ་ཁྱབ་ཡོད་པས།གང་གི་བླ་ན་མེད་པའི་མཛད་འཕྲིན་དེ་དག་ལ་ང་ཚོ་བཙན་བྱོལ་བོད་མི་ཚོས་ངོས་འཛིན་ཡང་དག་པ་གནང་དགོས་འདུག
༢༽༧ཀུན་གཟིགས་༧པཎ་ཆེན་པོ་ཆེའི་གནད་དོན་དེ་ནི་བོད་ཀྱི་གནད་དོན་གལ་ཆེན་ཞིག་ཡིན་པ་ལས་བཀྲིས་ལྷུན་པོ་གཅིག་བུའི་གནད་དོན་ཞིག་མིན་པས་༧ཀུན་གཟིགས་མཆོག་གི་འཁྲུངས་སྐར་སྲུང་བརྩི་ཞུ་རྒྱུ་དང་།བཙོན་འོག་ནས་ཀློད་འཁྲོལ་གྱི་ལས་འགུལ་སྤེལ་རྒྱུས་མཚོན་པས་༧ཀུན་གཟིགས་མཆོག་གི་ཞུ་སྒོ་མཐའ་དག་བོད་གཞུང་མང་ཡོང་དང་བོད་མི་ས་དྲུག་ལ་འགན་འཁྲི་ཐད་ཀར་ཡོད་པས་དེར་ང་ཚོས་ངོས་འཛིན་ཡང་དག་པའི་སྒོ་ནས་ནུས་ཤུགས་གཅིག་སྒྲིལ་གྱིས་ཁོང་ཉིད་ཀློད་འཁྲོལ་གྱི་ལས་འགུལ་སྤེལ་དགོས་པ་མཐོང་།
༣༽༧ཀུན་གཟིགས་མཆོག་གི་ལོ་རྒྱུས་གནས་བབ་ཐད་ནས་ཞུ་ན།བོད་མིའི་གསུང་འགྲོས་སུ་གནམ་ལ་ཉི་མ་ཟུང་དང་།ས་ལ་རྒྱལ་བ་པཎ་ཆེན་ཞེས་འབོད་སྲོལ་ཡོད་པ་ལྟར་༧ཀུན་གཟིགས་མཆོག་རྒྱལ་བ་ཡབ་སྲས་གཉིས་ཀྱི་ཡ་གྱལ་དང་།བོད་ཀྱི་ལོ་རྒྱུས་ནང་རྒྱལ་ཚབ་གནང་མྱོང་མཁན།ལོ་རྒྱུས་ཡུན་རིང་ལྡན་པའི་བླ་མ་ཆེན་པོ་ཞིག་དང་།བོད་ཀྱི་བླ་ན་མེད་པའི་བསམ་པའི་གཙོ་འཛིན་བཅས་ཞིག་ཡིན།
༤༽༧ཀུན་གཟིགས་པཎ་ཆེན་པོ་རེན་པོའི་ཆེ་སྐུ་ཕྲེང་གསུམ་བསྟུད་མར་རང་ཡུལ་དང་ཞལ་གྱེས་ནས་མིའི་ལུང་པར་བཙོན་ཁང་དུ་བཞུགས་དགོས་བྱུང་བ་དང་།ཡང་ན་བཙོན་བྱོལ་ལ་བཞུགས་དགོས་བྱུང་ཡོད།དེ་ཡང་པཎ་ཆེན་སྐུ་ཕྲེང་དགུ་པ་མཆོག་བོད་མི་ནང་ཁུལ་གྱིས་དཀའ་རྙོག་གིས་རྐྱེན་པས་རྒྱ་སོག་ཡུལ་གྲུ་དང་།མདོ་སྨད་ཕྱོགས་སུ་ལོ་མང་བཞུགས་དགོས་བྱུང་བ་མ་ཟད།མཐར་སྒ་སྐྱེ་མདོར་སྐུ་ངལ་ཆེན་པོའི་ངང་དགོངས་པ་རྫོགས་དགོས་བྱུང་།
དེ་རྗེས་སྐུ་ཕྲེང་བཅུ་པ་ཆེན་མོ་མཆོག་རྒྱ་གཞུང་གིས་བཙན་འོག་དུ་གྲལ་རིམ་འཐབ་རྩོད་དང་།ཆབ་སྲིད་སློབ་གསོ།དུས་ངན་རིག་གནས་བརྗེ་བཅས་སུ་ལོ་ངོ་༡༥ཙམ་འཐབ་རྩོད་དང་།བཙོན་ཁང་ནང་བཞུགས་དགོས་བྱུང་།
དེ་ནས་སྐུ་ཕྲེང་བཅུ་གཅིག་པ་མཆོག་ནི་དེ་བས་སེམས་སྐྱོ་བ་ཞིག་ལ་ངོས་འཛིན་བྱས་ནས་མི་མང་གིས་ཞལ་མཇལ་གསུང་ཐོས་མ་བྱུང་གོང་ནས་རྒྱའི་སྲིན་བུས་བཟུང་ནས་ད་བར་བཙོན་ཁང་དུ་བཅུག་ནས་མཐའ་ན་སྐུ་འཚོ་བཞུགས་ཡིན་མིན་ཡང་ཤེས་རྟོགས་མེད་པར་གྱུར་ཡོད།
༥༽༧ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་ཀྱི་གནད་དོན་དེ་ནི་བོད་ཀྱི་རྩ་དོན་གྱི་གནད་དོན་ཕུད་པའི་དེ་མིན་གྱི་བོད་ཀྱི་གནད་དོན་གལ་ཆེ་ཤོས་ཀྱི་གནད་དོན་ཞིག་ཆགས་ཡོད།༧ཀུན་གཟིགས་མཆོག་གི་གནད་དོན་དེ་ནི་བོད་ཀྱི་ནང་བསྟན་གྱི་གཞི་རྩ་ལ་ཐུགས་ཡོད་པ་དང་།བོད་རིག་གཞུང་དང་།ཆབ་སྲིད་ཀྱི་བདག་དབང་།བོད་མིའི་དད་སེམས་སོགས་ཀྱི་རྩ་བའི་ཁེ་ཕན་ལ་ཐུགས་ཡོད།
༦༽བཙན་བྱོལ་ནང་གི་ཆོས་བརྒྱུད་ཁག་ནང་དང་།ལྷག་པར་ཆོས་བརྒྱུད་ཁག་གི་བླ་ཆེན་རྣམ་པས་༧ཀུན་གཟིགས་མཆོག་གི་བཙོན་འོག་དུ་ཀློད་འཁྲོལ་ཡོང་རྒྱུའི་ལས་གཞི་བརྩམ་རྒྱུ།འཆར་གཞི་འགོད་རྒྱུ་ལྟ་ཅི་མཐའ་ན་༧ཀུན་གཟིགས་མཆོག་གི་སྐུ་འཁྲུངས་སྐར་ཉིན་མོར་སྨོན་ལམ་སྐྱོན་པ་དང་།གསུང་འཕྲིན་ཕེབས་རྒྱུ་ཙམ་ཡང་མེད་པ་མ་ཟད།ཞལ་ཙམ་ཡང་བསྒྲགས་ཀྱི་མེད་པ་དེ་ནི་འགྱེལ་བའི་སྒང་ལ་རྡོག་བརྫིས་ཞེས་པའི་དཔེ་ལྟར་སོང་བ་ངོ་མ་བློ་ཕམ་གྱི་གནས་སུ་ལྷུང་།
༧༽གཞིས་བྱེས་བོད་མིས་རེ་བའི་མིག་འབུར་ལྟོས་ས་བཙན་བྱོལ་གཞུང་གིས་ཀྱང་ལོ་ཤས་སྔོན་ནས་དགྲ་ཕྱོགས་ཀྱི་དགྲ་ཚོད་མ་ལོན་པའམ་གང་ལྟར་ཡང་རྒྱ་གཞུང་གིས་ངོས་འཛིན་བྱས་པའི་རྟག་མཚན་གང་ཡང་མེད་ཅིང་།བོད་མི་མང་གིས་པཎ་ཆེན་རྫུན་མ་ཞེས་འབོད་པའི་བྱིས་པ་རྒྱལ་མཚན་ནོར་བུར་ཡང་སྲིད་རྫུན་མ་བརྗོད་མི་ཆོག་ཚུལ་གྱི་ཉེན་ཁ་ཆེ་བའི་གསལ་བསྒྲགས་ཤིག་སྤེལ་ཡོད།རྫུན་མར་རྫུན་མ་ཞེས་འབོད་མི་ཆོག་ན་རྫུན་མ་དེ་བརྒྱ་ཆ་ལྔ་བཅུ་ཁས་འཆེས་པ་དང་ཅིས་མི་མཚུངས།གལ་ཏེ་ཁོ་ཚོས་རྒྱ་བོད་གཉིས་མོལ་གྱིས་སྔོན་འགྲོའི་ཆ་རྐྱེན་དུ་པཎ་རྫུན་བཞག་ན་སྐབས་དེའི་བཀའ་ཤག་གིས་གང་འདྲ་བྱེད་དམ་ཞེས་མི་རྣམས་སྐབས་དེར་ཧང་སངས།འཇིགས་སྣང་སྐྱེས་དགོས་པ་ཆགས་ཡོད།གནད་དོན་དེ་དག་ནི་༧ཀུན་གཟིགས་མཆོག་གི་ལོ་རྒྱུས་ཀྱི་གནས་བབ་ངོས་འཛིན་འདང་ངེས་ཤིག་མ་བྱུང་བ་ཞིག་ལ་མཐོང་།
༨༽༧ཀུན་གཟིགས་མཆོག་གི་ཡང་སྲིད་རིན་པོ་ཆེའི་གནད་དོན་དེ་ནི་བོད་ཀྱི་གནད་དོན་ཛ་དྲག་གནད་དོན་གཅིག་ལ་ངོས་འཛིན་བྱེད་དགོས་པ་རེད།གང་ཡིན་ཟེར་ན་༧པཎ་ཆེན་རིན་པོ་ཆེའི་གནས་བབ་བདག་གིར་བཞེས་པ་ལ་གསེར་སྐུ་བཞེངས་ནང་བཞིན་ཟླ་ངོ་འགའ་ཤས་ནང་བཞེངས་ཐུབ་ཐབས་མེད་ཅིང་།གང་ཟག་དེར་ལོ་མང་རིང་ཆོས་ཕྱོགས་ཀྱི་སློབ་གཉེར་དང་།ཆོས་ཕྱོགས་ཀྱི་ལམ་གྱི་རིམ་པའི་གནད་རྣམས་ཐུན་མོང་མ་ཡིན་པའི་ཚུལ་དུ་གསན་བསམ་གནང་དགོས་སྟབས་གང་ཉིད་ཀྱི་དགུང་ནའི་བབ་དང་བསྟུན་ནས་ཀུན་གཟིགས་མཆོག་གནས་བབ་དུ་བཞུགས་རྒྱུར་སྐུ་ངལ་ཆེན་པོ་ཆེ་རེད་སྙམ།དེ་ན་ཀུན་གཟིགས་སྐུ་ཕྲེང་བཅུ་གཅིག་པ་མཆོག་ལས་དབང་དེ་ནི་རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་ལས་དབང་ལས་ཐབས་སྐྱོ་བ་ཆགས་རྒྱུའི་ཉེན་ཁ་ཆེན་པོ་འདུག
༩༽བོད་ནང་པཎ་ཆེན་རྫུན་མར་དད་བཀུར་མ་བྱས་པ་དང་།དཔར་སྒྲིག་གཤམ་མ་བྱས་པ་སོགས་ཀྱི་ཉེས་བཙུགས་འོག་བོད་མི་མང་པོར་རྒྱ་གཞུང་གིས་མནར་གཅོད་དང་།བཙོན་དོང་དུ་བཅུག་གི་ཡོད་པ་རེད།ཡིན་ནའང་བློ་ཕམ་པ་ཞིག་ལ་བཙན་བྱོལ་སྤྱི་ཚོགས་ནང་ཉེ་བའི་ལོ་ཤས་ནང་བསམ་བཏང་དྲན་རྐྱེན་གྱིས་ཚུལ་དུ་དྲ་རྒྱ་སོགས་སུ་པཎ་རྫུན་རྒྱལ་མཚན་ནོར་བུར་དེ་ལྟར་འབོད་མི་ཆོག་ཚུལ་དང་།ཁོང་ཡང་བོད་མི་ཡིན་པས་སྐྱོན་བརྗོད་མི་ཆོག་ཚུལ།གང་ཙམ་ནས་མཛད་འཕྲིན་དེ་དང་འདི་བཞིན་རྒྱས་རྒྱུའི་རེ་བསྐུལ་བྱས་པ་བཅས་ཀྱི་འཁྲུལ་འཚབ་ཆེ་བའི་བསམ་ཚུལ་དང་བལྟ་ཚུལ་དེ་འདྲ་ཡོང་གི་འདུག་པ་ཆུ་ངན་ལང་ཤོར་དེ་རིགས་ད་ལྟ་ནས་རྩ་མེད་མ་བཟོས་ན་འཁྲུལ་སྣང་གི་བསམ་བློ་དེ་རིགས་ཁྱབ་སྤེལ་ལ་སོང་ན་ནམ་ཞིག་རིམ་རབས་གསར་པའི་ཁྲོད་བྱིས་པ་རྒྱལ་མཚན་ནོར་བུར་པཎ་ཆེན་ངོ་མ་ཡིན་ཞག་གི་དད་བཀུར་བྱེད་མི་ཡོང་ཉེན་དང་།དེ་འདྲ་བྱུང་༧ཀུན་གཟིགས་༧པཎ་ཆེན་པོའི་ཆེའི་ལོ་རྒྱུས་ཀྱི་གནས་བབ་ལ་དོ་ཕོག་འཚབ་ཆེན་ཡོང་རྒྱུ་དང་།པཎ་ཆེན་བདེན་རྫུན་དང་ངོ་རྫུས་གཉིས་ཀྱི་ལར་ཞེན་ཕྱི་ཅི་ལོག་ན་བོད་ལ་བཀྲིན་ཆེ་བའི་༧ཀུན་གཟིགས་༧པཎ་ཆེན་སྐུ་ཕྲེང་བཅུ་པར་ངོ་གནོང་དགོས་པའི་ལས་འབའ་ཞིག་ཏུ་མཐོང་ངོ།
༡༠༽ཡང་སྲིད་འཛིན་ཀྱི་ལམ་ལུགས་ནི་དུས་རབས་༡༢ཙམ་ནས་དར་བའི་བོད་ཀྱི་ཆོས་ཕྱོགས་ཀྱི་ཐུན་མིན་གྱི་རྒྱུན་སྲོལ་ཞིག་ཡིན་ཞིང་།དེར་མཚོ་མཇལ་དང་།བརྟག་ལུང་ཞུས་པ།གོང་མའི་སྐུ་ཆས་ངོས་འཛིན་བྱེད་རྒྱུས་མཚོན་དུས་ཚོད་ངེས་ཅན་ཞིག་ནང་བརྒྱུད་རིམ་ངེས་ཅན་ཞིག་གི་ཐོག་ནས་མཐའ་མའི་ཡང་སྲིད་ངོས་འཛིན་གཏན་འབེབས་ཡོང་གི་ཡོད།འོན་ཀྱང་ཆོས་མེད་རྒྱ་དམར་གྱིས་བོད་ཀྱི་ལོ་རྒྱུས་ཀྱི་རྒྱུན་སྲོལ་དང་།ཆོས་ཕྱོགས་ཀྱི་གནང་སྒོ།བོད་ཀྱི་སྲོལ་རྒྱུན་ཡང་སྲིད་ངོས་འཛིན་ལམ་ལུགས་སོགས་གང་ལ་ཡང་མི་བསྟུན་པར་ཕྱི་ལོ་༡༩༩༥ཟླ་༦ཙམ་ནས་ལོ་དེའི་ཟླ་༡༡བར་ལ་ཟླ་ངོ་འགའ་ཤས་ནང་ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་ངོས་འཛིན་བྱེད་ལུགས་ཀྱི་གློ་བུར་དུ་བྱིས་པ་བསམ་མེད་གསུམ་ལྷ་ལྡན་གཙུག་ཁང་དུ་འཁྱེར་ཡོང་ནས་འཁྲབ་ཚན་རིང་པོ་འགོ་བརྩམས།གསེར་བུམ་གྱི་བྱང་བུར་རིང་ཐུང་ལྡན་པའི་སྒོ་ནས་འཁྲབ་སྟོན་རྒྱ་ཆེ་ཞིག་བྱས།འཁྲབ་འཁྲིད་པ་ཀྲུང་དབྱང་དང་།འཁྲབ་ཡུལ་ལྷ་ས་གཙུག་ལག་ཁང་།འཁྲབ་མཁན་རྒྱ་གཞུང་དཔོན་ངན་ཁག་དང་།དེ་དག་གི་རྒྱུགས་ཁྱི་བོད་མི་ཉུང་ཤས་བཅས་ཀྱིས་འཁྲབ་ཆས་བྱིས་པ་རྒྱལ་མཚན་ནོར་བུ་ཀུན་གཟིགས་མཆོག་གི་ཡང་སྲིད་ཡིན་ལུགས་དྲིལ་བསྒྲགས་ཤུགས་ཆེན་བྱས།ཉིན་དེ་ནས་རྒྱལ་མཚན་ནོར་བུར་དད་པ་བྱེད་དགོས་སྐོར་བཙན་བཀའ་རབས་དང་རིམ་པོ་མང་པོ་བཏང་།དེའི་དབང་གིས་བོད་མི་མང་པོ་བཙོན་ནང་ལྷུང་ཡོད།བོད་མི་མང་པོར་མནར་གཅོད་རྡུང་རྡེག་ཕོག་ཡོད།།
༡༡༽མཐའ་དོན་ང་ཚོ་བཙན་བྱོལ་ནང་ནས་༧ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་ངོས་འཛིན་གཏན་འབེབས་གནང་ཡོད་པ་བཞིན།ང་ཚོས་ཁོང་གི་གནད་དོན་ཐད་བདག་པོ་ཡག་པོ་བརྒྱབ་ནས་ག་དུས་ཡིན་རུང་དོན་ཆེ་གལ་ཆེར་འཛིན་ཏེ་གཞུང་ཆོས་དམངས་གསུམ་གྱིས་འཁྲུངས་སྐར་ཙམ་མིན་པར་རྒྱུན་ཏུ་ནས་དྲིལ་བསྒྲགས་ཤུགས་ཆེན་བྱེད་དགོས་པ་དང་།རྒྱལ་སྤྱིའི་གནོན་ཤུགས་ལ་བརྟེན་ནས་རྒྱའི་བཙོན་འཁྲོལ་ཡོང་ཐབས་བྱེད་དགོས་པ།མགོན་པོ་མཆོག་གི་སྐུ་གེགས་ཀྱི་མཚན་མ་ཞི་ཐབས་སུ་ཞབས་རིམ་དང་བརྟན་བཞུགས་གསོག་བསྒྲུབས་བྱེད་དགོས་རྒྱུ་བཅས་ཀྱི་འབོད་བསྐུལ་ཞུ་བར་ཐལ།།།།
བླ་མའི་འཁྲུངས་སྐར་གལ་ཆེན་པོ་དེ་ཙམ་མ་རེད། གཙོ་བོ་བླ་མས་གསུངས་པའི་བཀའ་སློབ་དེ་དག་ཉན་བསམ་སྒོམ་གསུམ་བྱེད་རྒྱུ་གལ་ཆེ། འཁྲུངས་སྐར་ཉིན་བྱེད་སྟངས་མ་ཤེས་ན་ཡང་སྲིད་སྐུ་ཚེ་བརྟན་པ་དང་། མགྱོགས་མྱུར་གློད་བཀྲོལ་ཡོང་བའི་སྨོན་ལམ་འདྲ་བཏབ་ན་ཡག སྤྱིར་བཏང་ཆོས་ཁས་མ་ལེན་མཁན་ཞིག་ཡིན་ན་ཡིད་མ་ཆེས་ཀྱང་ཁས་བླངས་ན་གྲུབ་འབྲས་འཐོབ་རྒྱུ་ངེས་པ་ཡིན། གཅིག་བྱས་ན་གུང་ཁྲན་ཏང་གི་སློབ་གསོའི་འོག་ནས་ཨ་ཁུ་ལེའུ་ཕུང་འདྲ་བ་ཞིག་ཆགས་ཡས་རེ་བ་ཡོད་སྲིད། གལ་སྲིད་ཨ་ཁུ་ལེའུ་ཕུང་ལྟ་བུའི་་སྙིང་སྟོབས་དེ་འདྲ་བྱུང་པ་ཡིན་ན་ང་ཚོ་ཚང་མས་ཁོང་ལ་མིག་དཔེ་བལྟ་རྒྱུ་ཡིན།
བདག་པོ་ལགས།
ཁྱོད་ཀྱིས་ཨ་ཁུ་དབྱངས་དམར་གྱི་སེམས་ཚོར་ལ་མ་རྟོགས་པའམ་ལོག་རྟོག་བྱུང་འདུག་པས། གནས་སྐབས་ཨ་ཁུ་ལེའུ་ཕུང་ལ་སློབ་སྦྱོང་བྱེད་རྒྱུ་བཞག་ནས། བོད་ཡིག་མང་ཙམ་ཀློག་རོགས།
བླ་མའི་འཁྲུངས་སྐར་གལ་ཆེན་པོ་ཡིན་པ་ནི། བླ་མ་ཙམ་མ་མ་ཟད་འཛམ་གླིང་འདིར་མཛད་རྗེས་ཅན་གྱི་སྐྱེ་བོ་ཀུན་གྱི་འཁྲུངས་སྐར་དུས་ཚིག་དེ་ལོ་ངོ་སྟོང་ལ་སོང་ཡང་ཕྱི་རབས་རྣམས་པས་རྗེས་དྲན་བྱེད་པ་ཡིན། དགེ་འདུན་ཆོས་ཀྱི་ཉི་མ་མཆོག་ལ་མཚོན་ན་དགུང་ན་ཕྲ་བའི་བྱིས་དུས་དེ་མུན་པའི་བཙོན་དུ་ཕེབས་དགོས་པའི་ལོ་རྒྱུས་ཀྱི་བརྒྱུད་རིམ་དེ་བསམ་ན་ཀུན་གཟིགས་མཆོག་ལ་དད་གུས་ཡོད་པའི་གུས་པ་ལྟ་བུར་འཁྲུངས་སྐར་གྱི་ཉིན་མོའི་དགའ་སྐྱོ་ཟུང་གི་འཚོ་འདུ་ནི་ནག་ཆུང་ཡིག་འབྲུ་ཁ་ཤས་ནང་བརྗོད་པར་དཀའ་མོ་ཞིག་རེད།
དབྱངས་དམར་ལགས་ལོས་བདེན། ཁྱེད་ཙམ་དུ་མ་ཟད་བོད་མི་བསམ་ཡོད་ཞིག་ཡིན་ན་ཀུན་གཟིགས་༧པཎ་ཆེན་གོང་མས་བོད་མིར་བསམ་བརྗོད་ལས་འདས་པའི་བཀའ་དྲིན་སྐྱངས་པ་དྲན་ནས། ཁོང་གི་ཡང་སྲིད་༧པཎ་ཆེན་དགེའདུན་ཆོས་ཀྱི་ཉི་མ་མཆོག་གི་སྐུའི་འཁྲུངས་སྐར་ལ་སྲུང་རྩི་དགའ་སྐྱོ་ཟུང་འབྲེལ་གྱི་གནད་འགག་ཆེན་པོས་ཞུ་དགོས་ངེས་ལས། བདག་པོ་ལྟ་བུ་བསམ་མེད་བྱས་པ་དྲིན་དུ་མི་ཚོེར་བས་སྣང་ཆུང་དུ་རྩིས་པ་དེ་ལྟ་བུ་ང་ཚོས་ག་ལ་བཞག་ཕོད།།
༄། །ཀུན་གཟིགས་པཎ་ཆེན་་རིན་པོ་ཆེའི་སྐུའི་འཁྲུངས་དཀར་ལ་བཀྲིས་བདེ་ལེགས་ཞུ་བ་དང་ཁྱབ་གཅིག་རྒྱ་དམར་ཙོང་ཁང་ནས་མྱུར་དུ་གློག་གྲོལ་ཡོངས་བའི་སྨོན་འདུན་ཤུགས་ཆེ་ཞུ།།