བོད་དགའ།
༄༅། དེ་རིང་ནི་ཀུན་གཟིགས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་སྐུ་འཁྲུངས་ནས་ལོ་ངོ་༢༣་དང་གུང་ཁྲན་གྱིས་བཙན་བཟུང་བྱས་ནས་ལོ་ངོ་༡༧་སོང་བའི་ཉིན་མོ་ཡིན། བོད་མི་གཙོ་བྱས་འཛམ་གླིང་ནང་པ་ཡོངས་ཀྱི་སེམས་ནང་ཁོང་ཉིད་གང་དུ་ཡོད་མེད་ཐོག་ལ་སེམས་འཚབ་མེད་མི་སྲིད། གང་ཡིན་ཞེ་ན།༧པཎ ཆེན་སྐུ་ཕྲེང་ན་རིམ་གྱི་མཛད་རྣམ་ནང་འཁོད་དོན་ལྟར་སངས་རྒྱས་ཀྱི་བསྟན་པ་སྤྱི་དང་འགྲོ་བ་སེམས་ཅན་ཡོངས་ལ་སྨན་པ་དང་།ཁྱད་པར་བོད་རྒྱ་ཆེའི་མི་མང་ལ་བཀའ་དྲིན་བླ་ལྷག་ཏུ་ཆེ་བ།ཁ་རྒྱུན་ལ།གནམ་ལ་ཉི་ཟླ་གཉིས། ས་ལ་རྒྱལ་དབང་པཎ་ཆེན་ཞེས། རྒྱལ་བ་ཡབ་སྲས་རྣམ་གཉིས་ནི་སྐུ་ཕྲེང་རིམ་པར་བོད་མི་རིགས་དང་ཧི་མ་ལ་ཡའི་རི་བརྒྱུད་ཀྱི་ཆོས་རིག་གཅིག་པའི་མི་མང་ལ་དམིགས་བསལ་འབྲེལ་བ་དམ་ཟབ་ཡོད།ཁོང་གཉིས་ནི་བོད་མིའི་བླ་སྲོག་ལྟར་གནས་ཡོད་ཅིང་།ལྷག་པར་༧གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་དང་།ཀུན་གཟིགས་༧པཎ་ཆེན་བཅུ་པ་ཅེན་པོ་རྣམ་གཉིས་ཀྱིས་བོད་མི་རིགས་ཀྱི་ཆེད་དུ་སྐུ་ངལ་ཚད་མེད ་སྐྱོན་པ་ཙམ་དུ་མ་ཟད་མཛད་རྗེས་ཀྱང་གཞན་ལས་འབུར་ཐོན་བཞག་གནང་མཛད་པ་མིག་ལྡན་ཀུན་གྱི་མཐོང་ཆོས་སུ་གྱུར་པ་ཡིན།འོན་ཀྱང་ཀུན་གཟིགས་༧པཎ་ཆེན་བཅུ་པ་དགོངས་པ་རྫོགས་རྗེས་ཡང་སྲིད་རིན་པོ་ཆེ་འཚོལ་ཞིབ་ཐོགས་འབད་བརྩོན་དང་དཀའ་སྡུག་རིམ་བརྒྱུད་ཐོགས་མཐར་ ༡༩༩༥ ལོའི་ཕྱི་ཟླ་༥་ཚེས་༡༤ ཉིན་༧གོང་ས་སྐྱབས་མགོན་ཆེན་པོ་མཆོག་ནས་དམིགས་བསལ་མཛད་ཁུར་ཆེ་བཞེས་ཀྱིས་བརྟག་དཔྱད་ཞིབ་ནན་གྱིས་ཐ་མའི་ཐག་ཆོད་དེ་སྐུ་ཕྲེང་བཅུ་གཅིག་པ་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ལ་ངོས་འཛིན་གསལ་བསྒྲགས་བརྐྱངས་པར་བོད་མི་གཙོ་གྱུར་འཛམ་གླིང་ནང་པ་ཡོངས་ལ་རེ་ཞིག་དགའ་བས་རྣམ་པས་ཁེངས་ཡོད། འོན་ཀྱང་ཉིན་གཉིས་ལས་མ་སོང་བར་ཆུང་སྲིད་རིན་ཆེ་དགོངས་ལོ་དྲུག་ལས་མ་སོན་པ་དེ་གུང་ཁྲན་དམར་གཞུང་གིས་བཙོན་བཅུག་ཀྱིས་འཛམ་གླིང་མི་མང་སུ་ཞིག་ལའང་མཇལ་རྒྱུའི་གོ་སྐབས་མེད་པ་མ་ཟད། ད་བར་འཛམ་གླིང་ནང་ཆེས་མཐོའི་སྙན་གྲགས་ཆེ་བའི་མི་སྣ་མང་པོ་ཞིག་མཇལ་འདོད་ཀྱི་རེ་འདུན་སྔ་རྗེས་སུ་རྒྱ་དམར་གཞུང་ལ་སྟོན་ཀྱང་གུང་ཁྲན་དམར་གཞུང་ནས་ཁས་ལེན་ཅིག་ཀྱང་བྱས་མེད། རྒྱ་དམར་གཞུང་ནས་དེ་ལྟར་བྱས་པ་དེ་ནི་འཛམ་གླིང་མི་མང་ཡོངས་དང་།གྲགས་ཅན་མི་སྣ་དེ་དག་ལའང་མཐོང་ཆུང་དང་བརྙས་བཅོས་རྡོག་བརྫིས་བཅས་བྱས་པ་མངོན་སུམ་ཡིན། འཛམ་གླིང་ནང་ད་དུང་དེ་ལྟའི་བྱེད་ཚུལ་ལ་མཐའ་གཅིག་ཏུ་རྒོལ་ཕོད་ཅན་གྱི་མི་སྣ་དཀོན་པར་སྣང་ངོ་།ལྷག་པར་བོད་མི་རིགས་རིག་གཞུང་དང་བཅས་པར་མཐོང་ཆུང་དང་བརྙས་བཅོས་ཆེན་པོ་ཞིག་དང་།མགོན་དཔུང་དམ་པ་དེ་ཉིད་བོད་མི་རྣམས་ཀྱིས་ཞལ་མཇལ་ཙམ་ཡང་མ་ཐུབ་པ་ནི་ཤིན་ཏུ་ནས་ཕངས་པ་ཞིག་ཡིན། ༧པཎ་ཆེན་སྐུ་ཕྲེང་རིམ་བྱོན་སྤྱི་དང་།ལྷག་པར་༧པཎ་ཆེན་སྐུ་ཕྲེང་བཅུ་པ་མཆོག་ནས་ལོ་རབ་དྲུག་བཅུ་བདུན་བཅུའི་ནང་བོད་མི་རིགས་འདིའི་ཆེད་དུ་ལོ་དགུ་ཟླ་བརྒྱད་མུན་བཙོན་དུ་བཞུགས་དགོས་བྱུང་བ་མ་ཟད། བཙོན་བཀྲོལ་རྗེས་ལོ་ངོ་བཅུ་ལྷག་བཞུགས་རིང་མདོ་དབུས་ཁམས་གསུམ་དུ་གཟིགས་ཞིབ་དང་།བོད་མིའི་བདེ་སྡུག་ཐོག་ཐུགས་ཁུར་རྐང་བཞེས་དང་། མི་རིགས་ཀྱི་རིག་གཞུང་ཕྱོགས་གང་ཐད་ནས་དབྱར་མཚོ་རྒྱས་པ་ལྟར་གསོ་ཐབས། ཐ་ན་མི་རིགས་རང་གི་ཆས་གོས་དང་རྒྱུན་སྲོལ་གང་ཐད་ནས་མི་ཉམས་པ་བྱ་རྒྱུར་རེ་འབོད་རྒྱུན་འཁྱོངས་གནང་ཡོད། མདོར་ན། ཁོང་གིས་ཉིན་ཚན་མེད་པ་མི་རིགས་འདིའི་ཆེད་དུ་སྐུ་ངལ་ཚད་མེད་སྐྱོན་གནང་མཛད་ཡོད་དེ་ཡང་ཁོང་ཉིད་ཀྱི་ཞལ་ལས་ངའི་ཕྲག་པར་བོད་མིའི་བདེ་སྡུག་གི་ལས་འགན་ལྗིད་མོ་བབས་ཡོད་དེ་ནི་གཞན་ལ་བཀྲི་ཐབས་མེད་པ་ཞིག་ཡིན་པས་ངས་བོད་མིའི་ཆེད་དུ་ཁ་བཙུམ་ནས་ནམ་ཡང་སྡོད་མི་ཐུབ་ཅེས་གསུངས། མཛད་རྗེས་རྣམས་དེབ་ཐེར་ནང་གསལ་བ་མ་ཟད་བོད་ནང་གི་ཤེས་ལྡན་པ་ཚོའི་སེམས་ནང་དེ་བས་གསལ་བར་གནས་ཡོད། དེར་བརྟེན་གང་གི་ཡང་སྲིད་རིན་པོ་ཆེ་དེ་༧པཎ་ཆེན་གོང་མ་དེ་ཉིད་ཀྱིས་འཛམ་གླིང་ཞི་བདེ་དང་གངས་ཅན་ལྗོངས་ཀྱི་ཆོས་སྲིད་དཔལ་འབྱོར་རིག་པའི་གཞུང་ལུགས་སོགས་ཕྱོགས་གང་ཐད་ནས་འཛམ་གླིང་ནང་ཡར་ཐོན་དང་། སྔོན་ཐོན་མི་རིགས་ཚང་མའི་སྔོན་དུ་མདུན་སྐྱོད་ཐུབ་རྒྱུའི་ཐུགས་རེ་བཅངས་པའི་མཛད་འཕྲིན་དེ་རྣམས་འཇུག་སྐྱོང་གནང་མཁན་ངོ་མ་དེ་ཆག་ཡོད། འོན་ཀྱང་ཡང་སྲིད་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་དམར་གཞུང་གིས་བཙོན་བཅུག་བྱས་ཏེ་ད་ལྟའང་གང་དུ་ཡོད་མེད་སུས་ཀྱང་ཤེས་ཚོར་མེད་པ་འདི་ང་ཚོའི་མི་རིགས་འདི་ལ་དོན་ངོ་མ་གྱོང་གུན་ཇི་ཚམ་ཕོག་གི་ཡོ་པ་ཚང་མས་བློ་གཟུ་བོར་གནས་ཏེ་བརྟག་ན་ཤེས་པར་སླ། འོ་ན་དེ་འདྲའི་གྱོང་གུན་ཚབ་ཆེན་ཞིག་རང་རེར་ཕོགས་ཀྱང་ང་ཚོས་གོ་ཚོར་མེད་པ་སྣང་མེད་དུ་སྡད་ན་དེ་བས་བླུན་པ་ཞིག་གང་ན་ཡོད། ཕྱོགས་གཞན་ཞིག་ནས་བཤད་ན་༧པཎ་ཆེན་གོང་མའི་དྲིན་ལན་གསོབ་ཕྱིར་ཡང་༧གོང་ས་བཀའ་དྲིན་ཟླ་མེད་རྒྱལ་མཆོག་བཅུ་བཞི་པ་ཆེན་པོའི་བཀའ་གསུང་ཅི་སྒྲུབ་ཐོག་ང་ཚོས་དེ་མུར་མ་བསྡད་པར་ཚང་མས་ནུས་ཤུགས་སྟོན་དགོས་ངེས་ཡིན། རྡོག་རྩ་གཅིག་སྒྲིལ་གྱི་ནུས་ཤུགས་བཏོན་ན་དེས་མ་འགྲུབ་པའི་བྱ་བ་མི་སྲིད་། དཔེར་ན།ངག་དབང་ཆོས་འཕེལ་གྱི་སྐྱེད་མས་ངག་ཆོས་བཙོན་གྲོལ་ཆེད་ནུས་ཤུགས་ཆེན་པོས་ལས་སྐུལ་རྒྱུན་ཁྱོངས་བྱས་པའི་གྲུབ་འབྲས་ཀྱིས་ང་ཚོར་དཔེ་མཚོན་གསལ་བསྟན་བྱས་ཡོད། ད་ལྟ་ང་ཚོས་རྒྱ་དཔོན་རྣམས་ཁྲེགས་བཟུང་ཅན་རེད་ཅེས་ཞུམ་ནས་བསྡད་ན་ང་ཚོའི་བདེན་དོན་རྣམས་ནམ་ཡང་འགྲུབ་མི་སྲིད། ཀུན་གཟིགས་༧པཎ་ཆེན་བཅུ་གཅིག་པ་མཆོག་བོད་མི་རིགས་རིག་གཞུང་དང་བཅས་པར་གནད་འགག་གང་འདྲ་ཆགས་ཀྱི་ཡོད་མེད་བསམ་བློ་གཞན་འཁོར་མ་ཐུབ་ནའང་། རྒྱ་གཞུང་ནས་ཁོང་ཉིད་དགོངས་ལོ་དྲུག་ལས་མ་སོན་རུང་བཙོན་བཅུག་བྱས་པ་དེ་ལ་བསམ་བློ་ནན་པོ་ཞིག་གཏོང་དང་གནད་འགག་ཆེ་ཆུང་གསལ་ཤེས་ཐུབ་ངེས་རེད། མདོར་ན་རྒྱལ་དབང་ཡབ་སྲས་རྣམ་གཉིས་ནི་ང་ཚོ་ཚང་མའི་བཀའ་དྲིན་གྱི་བདག་ཉིད་བླ་ན་མེད་པ་སོང་༧གོང་ས་སྐྱབས་མགོན་ཆེན་པོའི་བཀའ་གསུང་ཅི་སྒྲུབ་མ་ཞུས་པ་དང་།༧ཚཔཎ་ཆེན་དགེ་འདུན་ཆོས་ཀྱི་ཉི་མ་མཆོག་ལོ་ངོ་བཅོ་བདུན་སོང་ཡང་ད་དུང་གང་ཡོད་མ་ཤེས་པའི་དུས་དེར་ཁོང་བཙོན་གྲོལ་འཐོབ་ཐབས་ཀྱི་ལས་སྐུལ་སྤེལ་རྒྱུ་དང་།ཤུགས་བསྣོན་རྒྱག་རྒྱུའི་བསམ་པ་མེད་པར་འདུ་ཤེས་ གསུམ་པའི་ངང་ཚུལ་བཟུང་ན་དེ་བས་བླུན་པ་དང་། བྱས་ཤེས་དྲིན་དྲན་མེད་པ། མ་རབས་ཆེ་བ་ག་ལ་ཡོད་དེ་མེད་པས་སོ། དེར་བརྟེན་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ཕྲལ་མྱུར་གློད་གྲོལ་འཐོབ་ཐབས་ལ་ཚང་མས་ཤུགས་སྣོན་གང་ཆེ་གནང་རྒྱུ་ནི་མི་རིགས་འདིའི་ལས་དོན་གྱི་གནད་འགག་ཏུ་བཟུང་སྟེ་ཚང་མས་ཕྱར་གྲུ་མཉམ་འདེགས་ཀྱི་ལས་འགུལ་ཤུགས་ཆེ་ལ་རྒྱུན་འཁྱོངས་བ་སྤེལ་རྒྱུའི་རེ་འདུན་དང་།༧གོང་སྐྱབས་མགོན་རྒྱལ་བ་ཡབ་སྲས་རྣམ་གཉིས་སྐུ་ཚེ་ཡུན་དུ་བརྟན་ཅིང་རིང་མིན་ལྷ་ལྡན་རྒྱལ་ས ་ཆེན་པོར་གསེར་ཞལ་ལྷན་འཛོམས་ཀྱི་ཉི་མ་མྱུར་དུ་འཆར་བའི་སྨོན་འདུན་བཅས།། །།
ཀུན་གཟིགས་༧པཎ་ཆེན་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་འཕྲིན་ལས་ཕུན་ཚོགས་དཔལ་བཟང་པོའི་སྐུའི་འཁྲུངས་སྐར་ལ། གུས་པས་སྙིང་ཁོང་རུས་པའི་གཏིང་ནས་འཚམས་སྤྲིའི་བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབས་ཅིག མགོན་པོ་མཆོག་སྐུ་ཚེ་བསྟན་ཅིང་སྐུ་གོང་མའི་རྣམ་ཐར་བདག་གིར་བཞེས་ཐུབ་པའི་སྨོན་འདུན་ཀྱང་ཞུ་རྒྱུ་ཡིན།།
པན་ཆེན་རིན་པོ་ཆེ་མཆོག་གི་སྐུའི་འཁྲུངས་སྐར་ལ་བཀྲ་ཤིས་འཚམ་འདྲི་དང་། མགྱོགས་མྱུར་དུ་ཀླ་ཀློའི་བཙོན་ལས་ཉི་མ་སྤྲིན་པའི་འོག་ནས་ཐར་བ་བཞིན་གློད་གྲོལ་ཡོང་བའི་སྨོན་ལམ་འདེབས། རྒན་ཆབ་བྲག་གི་འཁར་ར་བྱེད་སྟངས་གང་ཡིན་ན། དེ་ནི་བཤད་སྟངས་ཤིག་ཡིན་མིན་ཐད་དྲ་གྲོགས་ཚོས་བསམ་བློ་ནན་མོ་ཞིག་གཏོང་རོགས་ཟེར་རྒྱུ་ཡིན། བོད་རྒྱལ་ལོ།
༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་འཕྲིན་ལས་ཕུན་ཚོགས་མཆོག་གི་སྐུའི་འཁྲུངས་སྐར་ལ་བཀྲ་ཤིས་བདེ་ལེགས་ཞུ། བོད་དགའ་ལགས་ཀྱིས་འདས་པའི་༸པཎ་ཆེན་རིན་པོ་ཆེའི་སྐུ་དྲིན་དང་ད་ལྟའི་གནས་སྟངས་ཐོག་ནས་དགོངས་ཚུལ་གཏིང་ཟབ་པོ་སྤེལ་གནང་བར། དམིགས་བསལ་ཐུགས་རྗེ་ཆེ་ཞུ།
༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ་བ་ཆབ་གཅིག་མགྱོགས་མྱུར་ཀླ་ཀློའི་བཙོན་འོག་ནས་ཐར་ཏེ་གསེར་ཞལ་མྱུར་མཇལ་ཡོང་བའི་སྨོན་འདུན་ཞུ། །
བོད་དགའ་ལགས་བཀྲ་ཤིས་བདེ་ལེགས། སྐུ་ཁམས་གསལ་ཐང་།
ང་རང་དུས་རྟག་ཏུ་ཀུན་གཟིགས་༧པཎ་ཆེན་སྐུ་གོང་མས་བོད་མི་རྣམས་ལ་བཀའ་དྲིན་བསམ་བརྗོད་ལས་འདས་པ་སྐྱངས་པ་དྲན་བཞིན། ཁོང་གི་ཡང་སྲིད་ཕྲལ་མྱུར་རྒྱའི་བཙོན་འོག་ལས་གྲོལ་བའི་སྨོན་ལམ་དང་འདུན་པ་བཅངས་ནས་ཡོད། དེ་རིང་སྐུའི་འཁྲུངས་སྐར་ཉིན་མོ་འདིར་གུས་པས་སྙིང་ཁོང་རུས་པའི་གཏིང་ནས་འཚམས་འདྲིའི་བཀྲ་ཤིས་བདེ་ལེགས་དང་། སྐུ་ཚེ་བརྟན་ཅིང་མཛད་འཕྲིན་རྒྱས་པའི་སྨོན་འདུན་གྲངས་མེད་ཞུ་རྒྱུ་ཡིན།། །།
༧བདེ་ལྡན་ཞིང་གི་མགོན་པོ་༧ཀུན་གཟིགས་སྣང་བ་མཐའ་ཡས་༧པཎ་ཆེན་ཨིར་ཏེ་ནི་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡི་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་རང་ལུགས་དགུང་གྲངས་༢༤དང་ཕྱི་ལུགས་དགུང་གྲངས་༢༣བྱོན་པའི་སྐུའི་འཁྲུངས་སྐར་གྱི་དགའ་སྐྱོ་ཟུར་སྦྲེལ་གྱི་དུས་སྟོན་ལ་འཚམས་འདྲི་བཀྲིས་བདེ་ལེགས་གྲངས་མེད་ཞུ་བ་དང་སྦྲགས།གང་ཉིད་རྒྱ་དམར་ཀླ་ཀློའི་བཙོན་མུན་ནང་སྐུ་གེགས་ཀྱི་མཚན་མ་མཐའ་དག་ཞི་ནས་གང་མྱུར་རང་གདན་གངས་ཅན་ཆོས་ལྡན་ཞིང་ཁམས་སུ་ཞབས་གསོར་བདེ་བར་འཁོད་ནས་གོང་མའི་རྣམ་ཐར་བདག་གིར་བཞེས་པའི་སྨོན་ལམ་བཟང་པོས་རྒྱན་ཏེ་ཕུལ་ལགས།།
དྲ་གྲོགས་བོད་དགའ་ལགས་ཁམས་བཟང་།
ཉིད་ཀྱི་རྩོམ་ཡིག་ནང་༧ཀུན་གཟིགས་༧པཎ་ཆེན་རིན་པོའི་ཡང་སྲིད་ངོས་འཛིན་ཞུས་པའི་བརྒྱུད་རིམ་ཐུང་ཙམ་ནས་འགོ་བརྩམས་ཏེ་རྒྱལ་མཆོག་ཡབ་སྲས་གཉིས་ཀྱི་ཐུན་མོང་མིན་པའི་འབྲེལ་བ་དང་།༧ཀུན་གཟིགས་སྐུ་ཕྲེང་བཅུ་པ་ཆེ་མོའི་མཛད་རྗེས་ཀྱི་ཐོག་ནས་མགོན་པོ་གང་ཉིད་བོད་མིར་བཀྲིན་ཆེ་ཚུལ།དེ་མིན་ཡང་སྲིད་རིན་པོ་ཆེ་རྒྱ་གཞུང་གི་བཙོན་ནས་ཀློད་འཁྲོལ་དགོས་རྒྱུར་ནུས་པ་འདོན་དགོས་བཅས་ཀྱི་དོན་སྙིང་ལྡན་པའི་འབོད་བསྐུལ་གང་ལེགས་གནང་བར་སྙིང་ཐག་པ་ནས་རྗེས་སུ་ཡི་རངས་དང་ཐུགས་རྗེ་ཆེ་ཞུ།གུས་པས་ཀྱང་དེ་ལས་ལྷག་པ་ཞིག་བསྐྱར་ཟློས་དུང་ལ་དཀར་རྩིའི་རིས་མོ་བྲིས་པའི་དགོས་པ་མ་མཆིས།