པཎ་ཆེན་རིན་པོ་ཆེ་དྲན་པ།

རས་པ།

སྤྲིན་པའི་གཞུ་རྒྱུད་རྡུང་བའི་དབྱངས་རྟ་ཡིས།།
ཀ་ཁའི་ཆར་བ་གངས་ཅན་ལྗོངས་སུ་བབས།།
སྲིད་གཞུང་ཞིང་ས་ཡིན་པའི་འབྲས་བུ་ལ།།
སྐད་ཡིག་རྩམ་པའི་ལོ་ལེགས་བྱུང་འདི་དྲན།།

གསུང་སྐད་སྦོམ་པོའི་བརྗོད་བྱ་གངས་ཀྱིས་བྱས།།
གངས་རི་བཞུ་བའི་གདུང་བ་དབྱངས་ཀྱིས་འཁྱེར།།
དཔེ་མེད་གཞས་པའི་ངག་ལ་འབྱར་གྱུར་ཚེ།།
ཇའེ་ཁུ་ཞོན་ཡང་དམན་སར་འགོད་པར་ངེས།།

དམར་དམག་དཔོན་པོ་བྱ་རྒོད་རྒྱག་པ་འདྲ།།
འགྱིང་བའི་ཚེ་ན་ཉམ་ཆུང་གཅིན་པ་འཆོར།།
དུས་དེར་དགྲ་འདུལ་སེང་ཆེན་རློན་པ་ཞིག།།
ཁྱེད་ལས་གཞན་པ་སུ་ཡིས་བྱེད་ཕོད་དམ།།

པཎ་ཆེན་ཀླད་པར་སྐྱོན་ལྡན་ཟེར་བ་དང་།།
ང་ཕོད་ཟུར་ནས་ཁྲེད་དགོད་བྱས་ཀྱང་རུང་།།
སྣོད་སྟོང་ཉར་བའི་འབྲོག་སྟོང་བོད་མི་རྣམས།།
ཁྱེད་ཀྱི་ཕྱག་ཟུང་དྲོད་མོས་བསྐྱངས་ནས་འོངས།།

ལོ་རྒྱུས་ཆུ་བོས་གཙང་ཕྱགས་བྱེད་པ་འདྲ།།
རྙོག་མ་ཆུ་བོར་དྭངས་རྒྱུའང་ཡོད་པ་འདྲ།།
ཞྭ་མོ་དགུ་བརྩེགས་ཅན་གྱི་དྲིན་ཆེན་ཁྱེད།།
ཕྱི་རབས་གཞོན་ནུས་ཡང་ཡང་གླེང་དགོས་ཀི།

གོ་ཐང་གནམ་གྱི་མ་ཕྱེས་མི་ཡིས་ཕྱེས།།
མི་ཡི་མིག་གིས་མཐོང་བའི་མཛད་པས་བསྟན།།
འགྲོ་དོན་སངས་རྒྱས་ཕྱོགས་ལ་ཡོད་ངེས་མོད།།
ང་ཡི་རྩོམ་ཡིག་འདི་ལ་ཆེན་པོ་མངའ།།