ནམ་མཁའ།
ཁ་སང་དེ་རིང་གླིང་ཚ་མ་བུ་གསུམ་གྱིས་སྐར་ལྔའི་དར་དམར་འཕྱར་བ་ལ་གླེང་སློང་འདྲ་མིན་བྱེད་ཀྱི་འདུག་པས་འདིའི་སྐོར་ལ་རང་ཉིད་ཀྱི་བསམ་ཚུལ་ཕྲན་བུ་ཞིག་བཤད་འདོད་བྱུང་།
ངས་འདི་གར་ཐོག་མར་བརྗོད་འདོད་པ་ཞིག་ནི།གླིང་ཚ་མ་བུ་གསུམ་གྱི་སྙིང་སྟོབས་དང་དེ་རིང་གི་དཀའ་ངལ་ཡིན། གླིང་ཚ་ཁོས་ཨེ་རྫེ་རལ་ནས་རང་གི་བུ་ཕྲུག་དང་བཟའ་ཟླ་སོགས་བཞག་སྟེ། མི་གཅིག་གི་ནུས་པ་ཐོན་མིན་ལ་མ་བལྟས་བར་བོད་མི་རིགས་ཀྱི་བདེ་སྡུག་ཆེད་ཞི་བའི་གོམས་བགྲོད་ཞུགས་པ་འདི་ནི་ཆེས་ཤིན་ཏུ་སྙིང་སྟོབས་སྐྱེས་བ་ཞིག་རེད།
མི་སུ་ཡིན་རུང་རང་གི་བུ་ཕྲུག་དང་བཟའ་ཟླའི་བདེ་སྡུག་ལ་བསམ་གཞིགས་མི་བྱེད་མཁན་དཀོན་པོ་ཡིན། ཡིན་ཡང་རང་གི་ཤ་ཁྲག་ལས་གྲུབ་པའི་སྙིང་གི་བུ་ཕྲུག་གཉིས་བློས་བཏང་སྟེ་མི་རིགས་ཞིག་གི་བདེ་སྡུག་ལ་བསམ་གཞིགས་བྱེད་པ་འདི་རླབས་ཆེ་བའི་བསམ་བློ་ཞིག་མ་ཡིན་ནམ།
ཐོག་མར་རྡ་ས་ནས་ལམ་ལ་ཆས་ཏེ་གོམས་བགྲོད་བྱེད་དུས། གཞོན་ནུ་དང་བོད་མི་མང་པོ་ཞིག་གིས་མིག་ཆུས་སྐྱེས་མ་བྱེད་ཀྱི་ཡོད་པའི་འདྲ་པར་ཡང་མཐོང་སོང་བས་ངའི་སེམས་ནང་རང་དབང་མེད་པར་སྐྱོ་སྣང་ཞིག་སྐྱེས།
ལྷག་པར་ཁོའི་ཨ་མ་ལྡོམ་པོ་སྐྱིད་དང་གཅུང་མོ་གཉིས་ཀྱིས་ཀྱང་རང་དབང་དྭངས་བླངས་ཀྱིས་ཁོའི་མཉམ་དུ་ཞི་བའི་གོམས་བགྲོད་ལམ་དུ་ཆས་དུས།ངའི་སེམས་ནང་ཁོའི་གཅུང་མོ་ལོ་ན་ཆུང་བས་ད་རུང་སློབ་སྦྱོང་ཞིག་མུ་མཐུད་ནས་བྱས་ན་བསམ་པ་ཞིག་རང་དབང་མེད་པར་ཡིད་ལ་འཁོར་བྱུང་།
དེ་ནི་གལ་སྲིད་ཁོ་མ་བུ་གསུམ་གྱི་དམིགས་ཡུལ་ཡག་པོ་མ་འགྲུབ་པར་ཕྱིར་རྡ་ས་སླེབས་པའི་ཉིན་མོ་གཅུང་མོ་སློབ་གྲྭ་ནང་ཚུད་ཀྱི་ཡོད་མེད་བཤད་དཀའ་བ་ཞིག་ཡིན།འདི་ནི་སྔོན་མ་ལོ་རབས་དགུ་བཅུའི་ནང་ཞི་བའི་གོམས་བགྲོད་ཐོག་མ་འགོ་བརྩམས་དུས་གསོག་སྒར་སློབ་གྲྭའི་སློབ་མ་མང་པོ་ཕྱིན་ཏེ།
ལྡི་ལི་བར་དུ་གོམས་བགྲོད་བྱས་བ་རེད།ལྡི་ལི་ནས་བཀག་སྟེ་འགྲོ་མ་ཐུབ་པས་ཆ་ཚང་ཕྱིར་ཡོང་དགོས་བྱུང་།དེ་དུས་གསོག་སྒར་གྱི་སློབ་མ་ཚོ་ཕྱིར་སློབ་གྲྭ་ནང་མ་ཚུད་པར་གནས་དབྱུངས་བྱས་བས་དཀའ་ངལ་མང་པོ་འཕྲད་ཡོད།
རྒྱུ་མཚན་འདི་འདྲ་ཞིག་ལ་བསམ་བློ་བཏང་དུས་གླིང་ཚ་ཁོའི་གཅུང་མོའི་མ་འོང་བའི་མདུན་ལམ་དེའི་ཕྱོགས་ལ་བསམ་བློ་འཁོར་མྱོང་། ཡིན་ཡང་གཅུང་མོའི་སློབ་སྤྱི་དང་མི་ཁ་ཤས་ཞིག་ཁོང་ཚོར་འཚམས་འདྲི་སོང་བས་འདྲ་པར་ཞིག་དང་གནས་ཚུལ་ཞིག་མཐོང་དུས་མོའི་སློབ་སྤྱིས་ཁྱེད་རང་ག་དུས་སློབ་གྲྭ་ཡོང་ན་སྒོ་ཕྱེ་ཡོད་ཟེར་བས་གནས་ཚུལ་མཐོང་བས་ངའི་སེམས་ནང་སྤྲོ་སེམས་རབ་ཏུ་འཁོལ།
ཐབས་སྐྱོ་བ་ཞིག་ལ་དེ་རིང་གླིང་ཚའི་ཨ་མ་ལྡོམ་པོ་སྐྱིད་ན་ནས་སྨན་ཁང་དུ་བསྐྱལ་འདུག་པ་ཐོས་དུས་ངའི་སེམས་རང་དབང་མེད་པར་སྐྱོ་སོང་ལ།
ཁོང་ཚོར་རོགས་རམ་གྱི་ཕྱོགས་ནས་དཀའ་ངལ་སེལ་བ་ལ་མི་དམངས་དང་གཞུང་གི་ངོས་ནས་ག་རེ་གནང་གི་ཡོད་མེད་ཀྱི་གནས་ཚུལ་གསལ་བོ་མ་ཤེས་ཀྱང་།གཞོན་ནུས་གསལ་བསྒྲགས་ཞིག་ལ་ཁོང་ཚོའི་དམར་ཕྱོགས་ཀྱི་དར་དམར་འཕྱར་ནས་འགྲོ་གི་འདུག་པས་དེ་ལ་ངོས་ལེན་མེད་ཚུལ་དང་ངོ་རྒོལ་ཡོད་པའི་གནས་ཚུལ་ཞིག་དྲ་ཐོག་ནས་མཐོང་སོང་།
སྤྱིར་གཞོན་ནུས་གསལ་བསྒྲགས་ལ་ངོ་རྒོལ་དང་གླིང་ཚ་མ་བུ་གསུམ་གྱི་དར་དམར་འཕྱར་བ་ལ་དབུ་ལམ་ཚོགས་པ་བཞིན་རྒྱབ་སྐྱོར་སོགས་གང་མེད། ཡིན་ཡང་གླིང་ཚ་ཁོ་རང་ལ་འགྲེལ་བཤད་དང་དམིགས་ཡུལ་ཡོད་པ་སྨྲས་མ་དགོས་བ་རེད། ཁོས་དར་དམར་འཕྱར་བ་དེས་རྒྱ་གཞུང་ལ་དགའ་བའི་རྣམ་པ་ཞིག་རེད་ནམ་ཡང་དྲན་གྱི་མི་འདུག
མ་ཟད་ངས་ཐོག་མ་ནས་བོད་ཀྱི་རྒྱལ་དར་གཅིག་པོ་ཁྱེར་ན་འགྲིག་གི་འདུག་བསམ་སོང་།
རྒྱ་དཀར་ནག་དར་ཆ་དང་བལ་ཡུལ་དར་ཆ་གང་ཁྱེར་དགོས་བའི་དམིགས་བསལ་གྱི་དོན་ཞིག་མི་འདུག་ལ་ལྗིད་ཁོག་ཆེ་བ་ཁོ་ན་བསམ་ནས་དེ་རིང་བར་ཚིག་གཅིག་གིས་བཟང་ངན་གང་ཡང་བཤད་མེད་མོད།ཡིན་ཡང་ཁོང་ཚོའི་སྙིང་སྟོབས་ལ་རྗེས་སུ་ཡི་རང་བྱས་ཏེ།ཉིན་ལྟར་གནས་ཚུལ་རེ་ཤེས་ཆེད་དྲ་ཉུལ་བྱས་བ་ཡིན།
ཡིན་ཡང་ཐབས་སྐྱོ་བ་ཞིག་ལ་རྒྱ་གར་ས་མཚམས་བརྒལ་ནས་བལ་ཡུལ་ས་ཐོག་ལ་འབྱོར་དུས། བལ་དམག་གིས་བཀག་པའི་གནས་ཚུལ་འདུག་པས་ཤིན་ཏུ་བློ་ཕམ་བྱུང་ལ། འགག་སྒོ་དེ་ནས་ཐར་ཐབས་ལ་གཞོན་ནུ་དང་གྲོས་ཚོགས་ཀྱིས་ཐབས་ལམ་བྱེད་ཀྱི་མི་འདུག་པར་དར་དམར་ཁྱེར་བ་ལ་གཏམ་གླེང་འདྲ་མིན་བྱས་སོང་བས་བློ་ཕམ་བྱུང་།
སྤྱིར་དམངས་གཙོའི་འགྲོ་ལུགས་ལྟར་སྨྲ་བརྗོད་ཀྱི་རང་དབང་ཡོད་པས་གང་བཤད་པ་ལ་ངོ་རྒོལ་བྱེད་དགོས་དོན་མི་འདུག
ཡང་ཕྱོགས་གཞན་ཞིག་ནས་བསམ་བློ་བཏང་ནས་བཤད་ན། གཞོན་ནུས་ངོ་རྒོལ་དང་དབུ་ལམ་ཚོགས་པས་དེས་ཁ་གཏད་ལྟ་བུས་རྒྱབ་སྐྱོར་བྱེད་དགོས་དོན་ཡང་མི་འདུག་སྙམ།
གང་གིས་ཟེར་ན་༢༠༠༨ལོར་ས་བྱི་ལོའི་ཞི་རྒོལ་ཆེན་མོའི་སྐབས་དྲག་དམག་ལྷ་སར་འབྱོར་དུས།
ལྷ་སའི་གཡག་མགྲོན་ཁང་གི་སྦྱིན་བདག་རྡོ་རྗེ་བཀྲ་ཤིས་ཀྱིས་དྲག་དམག་ཚོ་ཕེབས་བསུར་ཁ་བཏག་བཟུང་སྟེ་ཕེབས་བསུ་བྱས་བའི་འདྲ་པར་དང་བཅས་བ་འོད་ཟེར་ཟིན་བྲིས་སྟེང་ཡོད་པ་ཚང་མས་མཐོང་ཡོད།
ཡིན་ཡང་དེ་དུས་བཙན་བྱོལ་གཞུང་ན་གྲགས་འགུལ་མི་འདུག་ལ་དྲ་ཐོག་གི་དྲ་མཆན་པ་ཚོ་ཡང་གྲགས་འགུལ་མི་འདུག ད་རུང་ཡང་དར་དམར་ལ་རྒྱབ་བཅོལ་བའི་སྐུ་དྲག་ང་ཕོད་འདས་དུས་བཀའ་ཤག་གིས་མྱ་ངན་འཚམས་འཕྲིན་བསྐུར་དུས་ཡང་གཞོན་ནུ་གྲགས་འགུལ་མེད་ལ་མི་དམངས་ནང་ཁུལ་ན་ཡང་དེ་ཙམ་གྲགས་འགུལ་མི་འདུག
དེ་རིང་མི་ཉམས་ཆུང་གསུམ་གྱིས་སེམས་ཤུགས་ཀྱིས་ས་ལེ་དབར་མང་པོ་རྐང་བགྲོད་བྱས་བའི་དཀའ་ངལ་དང་སྡུག་བསྔལ་ལ་གདུང་སེམས་ཉམས་བསྐྱེད་བྱེད་རྒྱུ་ལས་དར་དམར་ཁྱེར་བ་ལ་ཁ་ཤས་ཀྱིས་ལག་རྗེས་རྐང་བསུབ་བྱས་སོང་ཟེར་བ་ལ་ལྟས་ན། བོད་མི་དམངས་ཕལ་ཆེར་གྱིས་བཟང་དང་ངན་གཉིས་ལས་ངན་དེ་ཐོག་མར་མཐོང་མཁན་ཞིག་རེད། འདི་ནི་བཟང་ངན་གཉིས་ལས་གང་ཤུགས་ཆེ་བ་འདུག་དེར་བསམ་གཞིགས་བྱེད་རྒྱུ་གལ་ཆེན་རེད་སྙམ། གལ་སྲིད་དེ་རིང་མ་བུ་གསུམ་འདི་མི་ཚང་ཕྱུག་པོ་དང་སྐུ་དྲག་གི་རྒྱུད་པ་ཞིག་ཡིན་ཚེ།གཞོན་ནུ་དང་
གྲོས་ཚོགས་ཀྱིས་གཏམ་བརྗོད་ག་རེ་བྱས་ཡོད་དམ། གང་ལྟར་མི་ཉམས་ཆུང་གིས་རང་སྲོག་འབེན་དུ་བཞག་སྟེ་འཐབ་རྩོད་བྱས་ན་ཡང་སྐྱོན་ཕྲན་བུ་རེ་མཐོང་ཚེ་གང་བྱས་བའི་ལག་རྗེས་ཐམས་ཅད་གཞུང་དམངས་གཉིས་ཀྱིས་ནུས་མེད་དུ་གཏོང་དགོས་དོན་གང་ཡིན་ནམ། གང་ལྟར་ཀྱང་ཁོང་ཚོའི་སྙིང་སྟོབས་ལ་རྗེས་སུ་ཡི་རང་ཡོད་ལ། ཁྱེད་མ་བུ་གསུམ་ལམ་ཁའི་འགག་སྒོ་སོགས་ནས་དཀའ་ངལ་མི་འཕྲད་པའི་སྨོན་ལམ་དང་བཅས།
ནམ་མཁས་ཡོ་རུབ་ནས་༡༢/༥/༢༠༡༢་ལ་བྲིས།
སྐུ་དྲག་རིང་ལུགས་འཇུག་བསྡུས་མི་ལོ་༥༠ ལྷག་ཕྱིན་སོང་། ད་ནམ་མཁས་ག་རེ་བསམ་ནས་སྐུ་དྲག་ཡིན་ན། ཡོད་ན་འདྲ་པོ་བཤད་གི་ཡོད། ཐུགས་རྗེ་གཟིགས། ཡོད་ན། ཡིན་ན། བྱུང་ན། ཟེར་བ་འདྲ་བོ་བཤད་ནས་མ་འདུག
མེ་ཏོག་དཀར་པོསད་རུང་སྐུ་དྲག་ངོས་འཛིན་བྱེད་ཤེས་ཀྱི་མི་འདུག སྔོན་མ་སྐུའི་གཅེན་པོ་སྟག་འཚེར་རིན་པོ་ཡིས་འདི་འདྲ་ཞིག་བཤད་པ་ཐོས་མྱོང་།བཙན་བྱོལ་གཞུང་མི་ཚང་གསུམ་གྱིས་བཟུང་འདུག་གསུངས་པ་རེད།
ཁྱེད་ཀྱིས་གཞུང་གི་ལས་ཁུང་དག་གི་གནད་ཡོད་ཚོར་ཞིབ་ལྟོས་བྱས་དང་ད་གཟོ་ཁྱེད་ཀྱིས་སྐུ་དྲག་རིང་ལུགས་དང་སྐུ་དྲག་ངོས་འཛིན་བྱེད་ཐུབ།
འབྱོན་ཐང་ཡོད་ན་སུས་བཟུང་ནའང་འགྲིག་གི་རེད་པ། སུས་འབྱོན་མ་རེད་དམ། བཀའ་ཤག་ནང་བཀའ་བློན་ཚང་ཁྱིམ་ཚང་གཅིག་སྤུན་མཆེད་ཡིན་ནའང་འགྲིག་གི་འདུག་ག སྟག་འཚེར་རིན་པོ་ཆེས་གསུངས་དང་མ་གསུངས་ཁྱད་པར་མེད།
དམངས་སྐྱོ་བ་ཞིག་རང་བཀའ་བློན་དང་བཀའ་ཤག་སོགས་མཐོ་རིམ་ལས་སྣེ་ལ་དགོས་ཟེར་ན་དམངས་གཙོ་ཡང་དག་པ་ཞིག་ཏུ་ངོས་འཛིན་མི་ཐུབ། ལར་ནས་བཙན་བྱོལ་བོད་གཞུང་ཁྱིམ་ཚང་ཆེན་པོ་གསུམ་གྱིས་བཟུང་ཡོད་མེད་མི་ཤེས། གཉིས་ནས་ཁོང་ཚོ་སྐུ་དྲག་ཡིན་པ་གཏན་ནས་ཁས་མི་ལེན།
བཙན་བྱོལ་བོད་མིའི་སྒྲིག་འཛུག་ལ་ཡིད་ཆེས་ཡོད། དམངས་གཙོ་ཚད་ལྡན་རེད། ངས་ལས་སྣེ་ཞིག་ལ་ཞུགས་རྒྱུའི་སྙན་ཞུ་ཕུལ་ཡང་ཆ་རྐྱེན་མ་ཚང་བས་ཞུགས་ཐུབ་མ་སོང་བར་སྒྲིག་འཛུག་ལ་ལྷག་པར་ཡིད་ཆེས་སོང་། བོད་རྒྱལ་ལོ། དམངས་གཙོ་རྒྱལ་ལོ།།
སྐུ་དྲག་རིང་ལུགས་ ༡༩༥༩ ནས་མཇུག་སྒྲིལ་ཟིན་པ་རེད།
རྡ་རམ་ས་ལའི་སྐུ་དྲག་ཡིན་ཟེར་མཁན་ཚོར་ཡང་ནང་ཁུལ་སྡུག་པོ་མཐོང་ཡོད་པ་འདྲ། ཟུར་ཁང་དང་། གཡུ་ཐོག ཕོ་ལྷ་སོགས་ཀྱི་མི་ཚེའི་ལོ་རྒྱུས་ཡ་ང་བ་དེ་ཚོར་ལྟོས་དང་ཤེས་ཐུབ། རྐུན་མ་གཞན་རྒྱུར་མ་འཆམ་ཟེར་བ་ཅིས་ཀྱང་བདེན། དགའ་ལྡན་ཕོ་བྲང་གིས་མི་དམངས་ནས་འཕྲོག སྐུ་དྲག་ཚོས་དགའ་ལྡན་ཕོ་བྲང་ནས་བརྐུས།
ཨམ་ཕྲུག་ཡབ་གཞིས་རྒྱ་ལོ་དང་རྒྱུགས་ཁྱི་ཁམས་ཕྲུག་ཁ་ཤས་དབར་དགའ་ལྡན་ཕོ་བྲང་གི་གསེར་བརྐུས་པ་བགོ་བཤའ་རྒྱག་རྒྱུར་མ་མཐུན་པར་ནང་འཁྲུག་གསོད་རེས་བཏང་། དེའི་ཡན་ལག་རྒྱས་ནས་ཁམས་པ་དང་ཨ་མདོའི་ནང་ཁུལ་དམག་འཁྲུག་ལངས། གང་ལྟར་དེ་སྔོན་གྱི་ལོ་རྒྱུས་བསྔོགས་ན་ཆོལ་ཁ་གསུམ་ཀའི་མི་ཆེན་ཚོར་རྩ་ཚང་བ་ཕལ་ཆེར་མེད་པ་འདྲ། དེ་བས་དེ་ཚོ་ཚང་མ་གཡུགས་ཞོག
གླིང་ཚ་མ་བུ་གསུམ་བཞིན་དམངས་ཕན་ལས་འགུལ་འདྲ་སྤེལ་དང་ཨ་མའི་བུ་རྒོད་ཚོ།
དེ་ག་རང་རེད་ཞུ་རྒྱུ་ཡིན། མ་ཟད་ཕར་ལྟོས་སོང་ན་ང་ཚོར་རེ་བ་ཆེན་པོ་ཅང་མེད་པ་འདྲ་་་་
ནམ་མཁའ་ལགས་ཀྱིས་མཐའ་དང་རྒྱང་ནས་བསྐོར་སྟེ་ཇི་ཙམ་བཤད་ཀྱང་མ་འགྲིགས་པ་ཚང་མ་གཞོན་ནུའི་མགོར་གཡོགས་འདུག འོན་ཀྱང་གཞོན་ནུའི་ངོ་རྒོལ་འདི་གང་ཟག་བཟང་ངན་ལ་ལྟོས་མེད་ལ་གླིང་ཚ་མ་བུ་གསུམ་གྱི་ཞི་བའི་གོམ་བགྲོད་ལའང་མིན། དེ་ནི་སྲིད་དབང་སྒེར་འཛིན་གྱིས་མཚོན་དོན་ལོག་པའི་དར་ཆ་འདི་ཉིད་ངོས་ལེན་མེད་པའི་གསལ་བསྒྲགས་སྤེལ་སྟེ་མེ་རུ་བསྲེགས་ནས་ཟླ་ཤས་ལས་མ་སོང་བའི་སྐབས་འདིར་ལས་འགུལ་བ་ཞིག་གིས་སྔ་ནས་དར་མྱོང་མེད་པའི་དགྲ་བོའི་དར་ཆ་མཁའ་དབྱིངས་སུ་སྒྲེང་སྟེ་ཕེབས་བཞིན་པའི་ལས་འགུལ་རྩོམ་སྟངས་ལ་ངོ་རྒོལ་སྤེལ་བ་ལས་སྤྱིར་ན་ཁོང་ཚོའི་ལས་འགུལ་ལ་ངོ་རྒོལ་བྱེད་བཞིན་ཡོད་བཟོ་མི་འདུག འདི་ནི་རྡ་ས་ནས་འགོ་འཛུགས་སྐབས་གཞུང་དང་མི་དམངས་དེ་བཞིན་ཚོགས་སྡེ་ཡོངས་ནས་སྐྱེལ་བ་གནང་བས་ཤེས། གླིང་ཚ་མ་བུ་གསུམ་གྱི་ལས་འགུལ་ལ་རྒོལ་མཁན་དང་ནག་གསུབ་གཏོང་མཁན་དེ་ཁ་ཁོག་མཚུངས་པའི་གཞོན་ཚོགས་མ་ཡིན་ཁ་འཇམ་ཁོག་རྩུབ་དབུ་མའི་ལམ་གྱི་ལས་འགུལ་ཁང་ཟེར་བའི་མི་སྣ་ངན་རྒུ་འཛོམས་པའི་ཚོགས་པ་འདི་ཡིན་པ་ཤེས་པར་གྱིས།
ནམ་མཁའི་སྐད་ཆ་ལ་བདེན་ཆ་འདུག ང་ལ་མཚོན་ན་རྒྱ་མིའི་རྒྱལ་དར་འཕྱར་བ་དེ་ངོས་ལེན་ཞུ་མི་ཐུབ་ན་ཡང་། དེ་ཙམ་གྱིས་གླིང་ཚ་མ་སྨད་གསུམ་ནས་ད་བར་དཀའ་སྡུག་ཚད་མེད་མྱངས་དང་མྱོང་བཞིན་པའི་མཛད་རྗེས་ནག་གསུབ་དང་། ཁ་རྡུང་གཏོང་བ་སོགས་བྱས་ན་ལས་རྒྱུ་འབྲས་ལ་འགྲོ་བའི་བྱེད་སྟངས་མ་རེད་སྙམས། ད་དུང་རྒྱ་མིའི་རྒྱལ་དར་འཕྱར་བ་འདི་དབུ་མའི་ལམ་ལས་འགུལ་ཁང་ཞེས་པ་འདིས་རྒྱུད་བསྐུལ་བྱས་པ་ཞིག་མིན་པའི་ངེས་པ་མི་འདུག
༄༅།། ནམ་མཁའ་ལགས། མ་གཞི་གླིང་ཚ་མ་བུ་གསུམ་ལ་རྒྱབ་བསྐྱོར་དང་རྗེས་སུ་ཡིད་རངས་ཡོད། འོན་ཀྱང་རྒྱ་མིའི་རྒྱལ་དར་འཁྱེར་བ་དེར་ངོ་རྒོལ་ཡོད། གང་ཡིན་ཟེར་ན་ཁོང་ཚོའི་གོམ་བགྲོད་དེ་དང་པོ་རྡ་ས་ནས་སུམ་བཅུའི་དུས་དྲན་ཉིན་མི་སྒོ་གཙུགས་པ་རེད་དེ་དུས་རྒྱ་མིའི་རྒྱལ་དར་འཁྱེར་མེད་། ལྡི་ལི་ནས་གོམ་བགྲོད་བྱས་པ་དེ་ནས་བཟུང་རྒྱ་མིའི་རྒྱལ་དར་དེ་འཁྱེར་བ་རེད། བོད་ནང་བོད་མི་ཚོས་རྒྱ་མིའི་རྒྱལ་དར་དེ་བསྒྲེངས་འཛུགས་བྱེད་མ་འདོད་པར་རང་སྲོག་ཚུན་ཆད་བློས་གཏང་བ་རེད། རང་དབང་ལུང་པར་ཡོད་བཞིན་དུ་རྒྱ་མིའི་རྒྱལ་དར་འཁྱེར་བ་དེ་བོད་ནང་གི་བོད་མི་ཚོའི་མངོན་འདོད་དང་མཐུན་གྱི་འདུག་གམ།
སྐུ་དྲགས་ཚོར་གདང་ཟུགས་བྱེད་སྟངས་དེས་དོན་དུ་རྒྱ་མིའི་ལས་དོན་སྒྲུབས་ཀྱི་ཡོད་པ་རེད། སྐུ་དྲགས་མེད་ན་བོད་གཞུང་ཚུགས་ཐབས་མེད་ལ་གལ་ཏེ་ཚུགས་པའི་དབང་དུ་བཏང་རུང་ད་ལྟའི་ཁ་མདོག་དེ་རེད། ད་ལྟ་བཙན་བྱོལ་གཞུང་གི་ནང་སྐུ་དྲག་དབང་འཛིན་པ་གཅིག་ཀྱང་མེད་མོད་ལྐོག་ཟ་རུལ་ཟུང་དང་། ཉེ་ཁ་ཕྱོགས་སྐྱོབས་སོགས་སྐུ་དྲག་ཚོས་གཞུང་འཛིན་པ་ལས་སྡུག་པ་ཡོད་པ་ཤེས་གསལ་རེད། མ་གཞི་ང་ནི་སྐུ་དྲག་མིན་ལ་མཐོ་རིམ་མི་དཔོན་རྒྱུད་པ་དེ་བས་མིན། འོན་ཀྱང་སྐད་ཆ་དྲང་པོ་བཤད་དགོས་པ་དང་དོན་ངོ་མའི་ཐོག་བསམ་བློ་གཏོང་དགོས་པ་རེད། སྐུ་དྲག་མིན་པ་ཨ་ལགས་འཇིགས་མེད་དང་། རྒྱ་ལོ་དོན་གྲུབ་སོགས་ལ་བལྟོས་དང་ད་ལྟ་བར་གཞུང་དངུལ་ཟས་པའི་ལོ་རྒྱུས་ལས་བྱས་རྗེས་ག་ཞིག་སྟོན་རྒྱུ་ཡོད་དམ།
དུས་དེ་རིང་ནས་བཟུང་སྐུ་དྲག་ལ་དམའ་འབེབ་དང་ཟུར་ཟ་དེ་དོར་ནས་སྤྱི་དོན་ལ་ཕན་པ་ཞིག་གམ་གལ་ཏེི་དེ་ལྟར་མ་བྱུང་རུང་མཐུན་སྒྲིལ་གྱིས་གུང་ཕུར་གནོད་པའི་སྐད་ཆ་དེ་རིགས་མེད་ན་ཅིས་མ་རུང་།
ཚོར་བའི་དབང་དུ་བྱས་ན་སེམས་ལ་མ་བདེ་བ་ཙམ་འདུག་ན་ཡང་། ཀྲུང་ཧ་མི་མང་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་འོག་འདུག་རྒྱུ་ཡིན་ཟེར་བ་ཁ་ཞེ་གཉིས་མེད་དུ་ནན་བརྗོད་བྱེད་མཁན་ང་ལྟ་བུ་ཞིག་གིས་ལྟས་ན་དངོས་ཡོད་གནས་ཚུལ་ལས་བརྒལ་བ་ཆེར་མ་མཐོང་།
གང་ལྟར་ཁྱེད་མ་བུ་གསུམ་གྱི་ལྷག་བསམ་ལ་གུས་འདུད་ཞུ།
ད་སྤྲུལ་སྐུ་དང་མཁན་པོ་ཚོས་རྒྱ་ཡུལ་ལ་དཀོར་དང་གདུལ་བྱ་ནུབ་ཕྱོགས་ཡུལ་གྲུ་ཁག་ལས་ཆེས་ལྷག་པ་སྔོན་ཆད་ཀྱི་ཐེའེ་ཝོན་བཞིན་དར་གྱིན་ཡོད་པ་གཟིགས་ཏེ་དར་དམར་གྱི་རྒྱབ་རྩ་ལ་དམར་རྗེན་དུ་བཞེང་གནང་གཞིན་འདུག་ཨང་།
གླིང་ཚ་མ་བུ་གསུམ་གྱིས་ཞི་བའི་གོམ་བགྲོད་ལ་རྒྱབ་སྐྱོར་ཡོད་ཀྱང་བོད་པ་ཞིག་ཡིན་པའི་ཆ་རྒྱ་དམར་གྱི་དར་ཁྱེར་བ་ལ་ཐ་གཅིག་ཏུ་ངོ་རྒོལ་ཡོད། བོད་ནང་གི་བོད་མི་ཚོར་རྒྱ་ཡིས་དབང་ཡོད་བཙན་དབང་དུ་རྒྱ་དམར་གྱི་དར་ཆ་དེ་སྒེར་གྱི་ཁང་པའི་སྟེང་དང་དགོན་པའི་ཐོག་ཏུ་ངེས་པར་བཙུགས་དགོས་པའི་བཙན་བཀོད་བྱས་པ་རྣམས་མ་གཟིགས་སམ། མགོ་གཉིས་པ་ཁྲབ་པ་དེ་དྲང་པོ་མ་རེད། རྒྱ་དང་བལ་ཡུལ་གྱི་དར་ཆ་ཁྱེར་དགོས་དོན་གང་ཡང་མེད། ད་གཟིགས་དང༌། མ་བུ་གསུམ་ལ་རྒྱ་ཡི་རྒྱུགས་ཁྱི་བལ་ཡུལ་དམག་མིས་ཁོང་གསུམ་ལ་རྡུང་རྡེགས་བཏང་ཡོད་པ་ཚང་ཤེས་གསལ་ལགས། གླིང་ཚང་མ་བུ་གསུམ་སྙིང་རེ་རྗེ།
གླིང་ཚ་མ་བུ་གསུམ་གྱིས་ཞི་བའི་གོམ་བགྲོད་ལ་རྒྱ་མིའི་རྒྱལ་དར་འཁྱེར་བ་དེར་་བོད་མི་རིགས་ལ་གནོད་གི་རེད་བསམ་ན། དར་དམར་་འོག་གི་དངོས་རྫས་ཉོ་རྒྱུ་བཞག་དགོེས་རེད། སྤྱིར་བཙན་བྱོལ་སྤྱི་ཚོགས་ནང་གི་སྐུ་ངོ་ཚོ་ནས་ཟ་ཁང་དང་ཚོང་ཁང་ནང་གི་གཡོག་པོ་ཡན་ཆད་་ཚང་མ་དར་དམར་འོག་གི་ཅ་ལག་རང་བེད་སྤྱོད་་བྱེད་གི་ཡོད་པ་གསལ་བོ་རེད། དེ་ལ་གཞོན་་ནུ་ཚང་གི་མ་མཁྱེན་པ་ཡིན་རྒྱུ་མ་རེད།
མ་དགོན་ཟེར་བ་འདིས་བདེན་པ་འདྲ་ཞིག་བཤད་འདུག