སློབ་གྲྭར་འགྲིམས་པའི་གཏམ།

གཅན་འོད་འབར།

སློབ་ཆུང་གི་ལེའུ་དང་་ཁྱིམ་བརྒྱུད་སློབ་གསོ།
ང་ཆུང་དུས་སློབ་གྲྭར་སོང་མྱོང་བའི་མི་ཞིག་ཡིན་ལ་སློབ་སྦྱོང་ཡང་བྱས་མྱོང་བའི་མི་ཞིག་ཡིན། འོན་ཀྱང་སློབ་སྦྱོང་བྱེད་པའི་དགོས་དམིགས་དང་དེའི་དགེ་ཕན། སློབ་སྦྱོང་གི་ངོ་བོ་དང་བྱ་སྟངས་བྱེད་ལུགས་སོགས་ལ་བསམ་བློ་བཏང་མ་མྱོང་ལ་བཏང་བའི་དབང་དུ་བྱས་ན་ཆ་རྒྱུས་ཟབ་མོ་ཞིག་དང་ངེས་ཤེས་ཡང་དག་ཅིག་མེད་པ་ད་ལྟ་ཁ་ཚོན་བཅད་ནས་བཤད་ཐུབ་ཀྱི་འདུག དེ་མ་ཚད་བྱིས་པ་གཞན་དང་འདྲ་བར་སློབ་གྲྭར་འགྲོ་རྒྱུར་བསུན་ཞིང་སློབ་སྦྱོང་བྱེད་རྒྱུ་མི་དགའ་བས་རྟག་ཏུ་ལམ་རུལ་༼སློབ་གྲྭར་མ་སོང་བར་ལམ་བར་དུ་ཉིན་མ་ཕུད་ཐབས་བྱེད་པ་ལ་གོ༽སྡོད་རྒྱུ་གོམ་པའི་སློབ་མ་ཞིག་ཀྱང་ཡིན། དེ་དུས་གཅིག་བྱས་ན་རང་ཉིད་བསམ་མ་ཤེས་པས་སློབ་སྦྱོང་ལ་སྤྲོ་བ་མ་སླེབས་པ་ཡིན་ངེས། ཡང་གཅིག་བྱས་ན་སྐབས་དེའི་གཅར་རྡུང་སྐོར་གསུམ་གྱི་ཕ་མ་དང་དགེ་རྒན་ཚོའི་སློབ་གསོ་གཏོང་སྟངས་དེའི་དབང་གིས་ཀྱང་ཡིན་སྲིད། གང་ལྟར་དེ་དུས་སློབ་གྲྭ་ནི་བཙོན་ར་དང་དགེ་རྒན་ནི་བཙོན་སྲུང་བ་དང་གཅིག་མཚུངས་ཡིན་པའི་བསམ་བློའི་འདུ་ཤེས་ཤིག་བཅོས་མིན་གྱིས་སྐྱེས་ཀྱིན་ཡོད་ལ། སློབ་གྲྭར་འགྲོ་རྒྱུ་ནི་མི་ཚེའི་སྡུག་བསྔལ་དང་འཚོ་བའི་འོས་འགན་ལྕི་ཤོས་དེ་རེད་བསམ་ནས། ཆ་རྐྱེན་གཞན་ཞིག་གིས་སློབ་གྲྭར་བསྐྱོད་རྒྱུའི་གོ་སྐབས་མ་རེག་པའམ་ཡང་ན་ཕ་མས་མ་མངགས་པ་སོགས་ཀྱིས་ཡུལ་ན་ཞིང་ལས་འབྲོག་ལས་ཉར་གྱིན་གསེར་ལས་དཀོན་པའི་གཞོན་ནུའི་དུས་ཚོད་འཕྲོ་བརླག་ཏུ་གཏོང་གིན་པའི་ཁ་ཡ་ན་ཟླ་དང་ཕོ་གཞོན་མོ་གཞོན་དེ་ཚོར་ཡིད་སྨོན་དང་འཁང་ར་ཡང་གྲངས་མེད་བྱས་མྱོང། གང་ལྟར་ཡུལ་གྱི་ཕ་མའི་བཀའ་གྱོན་དང་སློབ་གྲྭའི་དགེ་རྒན་གྱི་ཉེས་རྡུང་སོགས་ལ་བསྐྲགས་ཤིང་འཇིགས་ཞོར་མི་འདོད་བཞིན་སློབ་གྲྭར་སོང་ཞིང། ནངས་སྔ་ལངས་ཀྱིས་རྩ་འགྲེལ་མང་པོ་ངག་སྐྱོར་བཏང་དུ་བཅུག་ལ་དགོང་འཕྱི་ཉལ་གྱིས་ལས་བྱ་ཙག་ཙིག་བཙན་གྱིས་བྲིས་སུ་བཅུག་པའི་ངང་ཚུལ་དེ་ཚོ་ནི་བྱིས་དུས་ཀྱི་ཕ་མ་དང་དགེ་རྒན་ཚོའི་སློབ་གསོ་གཏོང་སྟངས་ཀྱི་ཁྱད་ཆོས་ཤིག་རེད། འོན་ཀྱང་ད་ལྟ་འདི་ལྟར་མནོ་བསམ་ཞིབ་མོ་རེ་བཏང་ན་ཆུང་དུས་ཀྱི་གཅར་རྡུང་སྐོར་གསུམ་གྱི་སློབ་གསོའི་འོག་ནས་སེམས་སྐྲག་སྐྲག་དང་ཡིད་ཞེད་ཞེད་གྱིས་བློ་ལ་བཟུང་ཞིང་སྦྱངས་བརྩོན་བྱས་པའི་སུམ་རྟགས་དག་གསུམ་དང་རྒྱལ་རབས་ལོ་རྒྱུས་དེ་ཚོ་ད་ལྟ་ཕན་ཐོགས་བྱུང་འདུག་སྙམ་པའི་ཚོར་བ་ཞིག་གཞི་ནས་ངམ་ངམ་ཤིག་ཤིག་གིས་སྐྱེས་ཀྱིན་འདུག་ལ། དེ་དུས་ཕ་མས་གཤེ་གཤེ་དང་དགེ་རྒན་གྱིས་གཅར་རྡུང་བྱེད་རྒྱུ་དེ་ཡང་དུས་ལ་ཕབས་པའི་འོས་ཤིང་འཚམས་པ་ཞིག་ཡིན་པ་ད་ལྟའི་རང་ཉིད་ཀྱི་སློབ་སྦྱོང་གི་རིན་ཐང་ལྟ་ཚུལ་དང་མི་གཤིས་ཀྱི་རྩིས་ཐང་བསམ་ཚུལ། ཀུན་སྤྱོད་ཀྱི་ངོ་བོ་སྲུང་ལུགས། དེ་བཞིན་དེ་དུས་འཇམ་པའི་ངག་གི་སློབ་གསོ་ལ་གོ་བ་མེད་ལ་རིན་ཐང་མི་སྤྲོད་པའི་བྲ་ཚགས་ཀྱི་གཤིས་ཀ་སོགས་ལས་དགེ་ཕན་ལྷག་མ་ཞིག་དང་རྒྱུ་མཚན་འཕར་མ་ཞིག་འདུག་སྙམ་པའི་འདུ་ཤེས་ཤིག་ཀྱང་རྙེད་བྱུང།
ཁྱིམ་བརྒྱུད་སློབ་གསོའམ་ཁྱིམ་སྲོལ་འདིའི་ཕྱོགས་གཞན་ཞིག་ནི་ཁྱིམ་ཚང་གཅིག་ལ་གྲྭ་བ་གཅིག་དགོས་པ་དེ་རེད་པས། ཁྱིམ་ཚང་དེའི་བུ་ཞིག་ཆུང་དུས་སམ་ཆེ་དུས་གང་རུང་ལ་དགོན་པར་སོང་ན་དགེ་བ་འདི་དང་ཕན་པ་དེ་ཡོད་ཚུལ་སོགས་ཀྱི་རྒྱུ་མཚན་མང་པོ་ཞིག་བགྲང་ནས་རང་གི་མི་ཚེའི་མདུན་ལམ་རང་ལ་མི་དབང་པར་ཉེ་འཁྲིས་ཀྱི་དགོན་པ་ཆེ་ཆུང་གེ་མོ་ཞིག་ཏུ་བཙན་གྱིས་མངགས་གཏོང་གིས་གྲྭ་བ་བྱེད་དུ་འཇུག་པའི་རྣམ་པ་ཁྱད་འཚར་པོ་དེ་རེད་ལ། བུད་མེད་ཅིག་ཡིན་ན། སློབ་གྲྭར་སོང་ན་གང་ཡང་མི་འཇོན་དེ་ལས་མ་བུ་མོ་འགྲོ་ས་གནས་ཡིན། ཞེས་ཁུངས་ལུང་མེད་པའི་རྒྱུ་མཚན་དང་གནས་ལུགས་མང་དག་ཅིག་བགྲང་ནས་སློབ་གྲྭར་མངགས་རྒྱུའི་ཚབ་ཏུ་གནས་ཚང་གཞན་ཞིག་ལ་གཞོན་དུས་ནས་མི་འདོད་བཞིན་མནའ་མར་སྟེར་བའི་དཔེའམ་སྲོལ་དེ་རེད། འདི་ནི་བོད་པའི་སྤྱི་ཚོགས་ཡོངས་ལ་ས་ཁྱབ་རྡོ་ཁྱབ་ཏུ་སོང་བའི་ཁྱིམ་བརྒྱུད་ལམ་སྲོལ་ལམ་སློབ་གསོའི་ཆ་ཞིག་རེད་པས། ལར་འདི་ནི་ཁྱིམ་བརྒྱུད་སློབ་གསོའི་ནག་ཉེས་ཆེ་ཤོས་ཤིག་དང་སྐྱོན་ཆ་ཆེ་ཤོས་ཤིག་རེད་ཅེས་བརྗོད་ཀྱང་མ་འགྲིག་པ་ག་ལ་ཡོད་སྙམ། གང་ལྟར་འདི་ནི་སྒང་པ་མི་རིགས་འདིའི་མི་རབས་ནས་མི་རབས་བརྒྱུད་དར་ཞིང་འཕེལ་བའི་མི་ཚེའི་འཚོ་བར་ལྟ་སྟངས་དང་ཤེས་རིག་དཔལ་ཡོན་བརྒྱུད་སྤྲོད་བྱེད་ཚུལ་གྱི་རྣམ་པ་ཞིག་ཏུ་གྲུབ་པས། དུས་ཀྱི་དགོས་མཁོའམ་ཁོར་ཡུག་གི་འགྱུ་བག་སོགས་ལ་ལྟོས་ནས་སློབ་གསོ་འདིའི་ལག་ལེན་གྱི་ཁ་ཕྱོགས་ལ་ཡང་དར་རྒུད་ཀྱི་འགྱུར་བ་ཞིག་འགྲོ་དང་འགྲོ་བཞིན་པའི་སྣང་ཚུལ་ཞིག་མཐོང་གིན་འདུག མི་རབས་རྒན་པ་ཚོས་མི་རབས་གཞོན་པ་རྣམས་ལ་འདི་ལྟ་བུའི་ཁྱིམ་བརྒྱུད་སློབ་གསོ་རྒྱུད་སྤེལ་བྱས་པར་ཁག་མི་འདུག་སྟེ། ཁོང་ཚོ་ཡང་འདི་ལྟ་བུའི་ཁྱིམ་རྒྱུད་སློབ་གསོའི་ར་བ་ལས་བརྒལ་མ་མྱོང་བ་ཤ་སྟག་ཅིག་ཡིན་པས་སོ། དེར་བརྟེན་སློབ་གསོ་འདི་འདྲ་ཞིག་གི་ཁོར་ཡུག་ནས་འཚར་ལོངས་བྱུང་བའི་འུ་ཅག་ལ་མཚོན་ན་དུས་རབས་གསར་པའི་དགོས་མཁོར་འཚམས་ཤིང་སྔོན་ཐོན་མི་རིགས་ཀྱི་གྲལ་དུ་ཚུད་པའི་མི་རབས་ཤིག་གསོ་སྐྱོང་དང་འཛུགས་བསྐྲུན་བྱེད་མ་ཐུབ་པའི་རྒྱུ་མཚན་གཅིག་བྱིས་དུས་ཀྱི་སློབ་གསོའི་ཁ་ཕྱོགས་ལ་རེག་ལས་ལོས་ཡོད་བསམ། རྒྱུ་མཚན་ནི་བྱིས་དུས་ཀྱི་སློབ་གསོ་ནི་སློབ་གསོ་ཀུན་གྱི་རྨང་རྡོ་ཡིན་པས། མི་ཞིག་གི་ཤེས་ཡོན་སློབ་སྦྱོང་དང་བསམ་བློའི་འདུ་ཤེས་སོགས་ཀྱང་ཆུང་དུས་ཀྱི་ཁྱིམ་བརྒྱུད་སློབ་གསོ་ཅི་འདྲ་ཞིག་ཇི་ལྟར་ཐོབ་མ་ཐོབ་ལ་བརྟེན་ཞིང་རག་ལས་པས་སོ། གང་ལྟར་ཡང་འདི་ལྟ་བུའི་སློབ་སྦྱོང་གི་ཁ་དབུགས་དང་སློབ་གསོའི་ཁོར་ཡུག་ནི་རྒྱལ་ཁབ་གཞན་གྱི་སློབ་གསོའི་ལམ་ལུགས་དང་བསྡུར་ན་མནར་མ་སོན་ཞིང་ཁོ་ལག་མ་རྒྱས་པའི་བྱིས་པ་བསམ་མེད་ཅིག་གིས་ལང་ཚོ་དར་ལ་བབས་པའི་ན་གཞོན་ཞིག་ལ་ལད་ཟློས་དང་རྗེས་བསྙེག དེ་བཞིན་འགྲན་རྩོད་བྱེད་པ་དང་གཅིག་མཚུངས་རེད། འོན་ཀྱང་ལོ་གཅིག་རིང་སློབ་འབྲིང་འགྲིམས་པའི་བརྒྱུད་རིམ་ཁྲོད། རང་ཉིད་ལ་གོ་རྟོགས་དང་ཉམས་མྱོང་གཞན་ཞིག་རེག་པ་ནི་སློབ་འབྲིང་གི་སློབ་གསོའི་ཁ་ཕྱོགས་དང་རིན་ཐང་རེད། དེ་དུས་ཆེས་གསལ་བོར་དྲན་པ་ནི་དང་བ་འདྲེན་པའི་བོད་ཡིག་དགེ་རྒན་གྱི་འཆད་འཁྲིད་དང་སྤྲོ་བ་འཕེལ་བའི་བོད་ཡིག་སློབ་དེབ་གསེབ་ཀྱི་སློབ་ཚན་དེ་དག་རེད་ལ་སློབ་སྦྱོང་གི་དགོས་དམིགས་དང་རིན་ཐང་སོགས་ཅུང་ཙམ་ཤེས་རྟོགས་བྱུང་བས། ཁྱིམ་རྒྱུད་སློབ་གསོ་དང་སློབ་གྲྭའི་སློབ་གསོ་གཉིས་ཀྱི་ལེགས་ཉེས་སོགས་འདྲ་བ་དང་མི་འདྲ་བའི་ཆ་ཡི་ཧེ་བག་དེ་ཡང་རེད། ཨ་ཕ་རྫོང་ཐོག་ཏུ་འགྲོ་ཐེངས་རེེར་(སྦྲང་ཆར།)དང་(མཚོ་སྔོན་དམངས་ཚོགས་སྒྱུ་རྩལ།) (ཟླ་ཟེར།)དང་(བོད་ཀྱི་རྩོམ་རིག་སྒྱུ་རྩལ།) ད་དུང་། (དམངས་ཁྲོད་གླུ་གཞས།)དང་(འཛམ་གླིང་གེ་སར་རྒྱལ་པོའི་སྒྲུང་གཏམ།)སོགས་ཀྱི་དུས་དེབ་མང་པོ་ཞིག་ཉོས་ནས་ཉར་ཚགས་བྱས་ཡོད་བ་དེ་དག་གོ་བ་ཟབ་མོ་ཞིག་ལེན་ཐབས་བྲལ་ཡང་བལྟ་ཀློག་བྱེད་རྒྱུ་དགའ་བ་ཞིག་ཏུ་ཆགས་སུ་བཅུག་པ་དེ་ཡང་ཁྱིམ་བརྒྱུད་སློབ་གསོའི་གྲུབ་ཆའམ་ཕན་འབྲས་ཤིག་རེད་འདོད་དེ། ད་ལྟ་དཔེ་ཀློག་ལ་དགའ་བའི་རྣམ་པ་འདིས་ཀྱང་རང་ཉིད་ཀྱི་རྒྱུད་ལ་ཁྱིམ་བརྒྱུད་སློབ་གསོའི་བགས་ཆགས་ཟབ་མོ་ཞིག་ཐེབས་ཡོད་པ་གསལ་བཤད་བྱེད་ཐུབ་པར་སྙམ། དེར་བརྟེན་བོད་ཀྱི་ཁྱིམ་བརྒྱུད་སློབ་གསོ་འདི་ལ་ཡང་ལེགས་པའི་ཆ་དང་ཉེས་པའི་ཆ་གཉིས་ཀ་ལྡན་ན་མཐའ་གཉིས་སུ་མ་ལྷུང་བར་ལེགས་སྤེལ་ཉེས་འགོག་གིས་ཁྱིམ་བརྒྱུད་སློབ་གསོའི་ལམ་ལུགས་ཤིག་དར་སྤེལ་བྱ་རྒྱུ་ནི་མི་རིགས་འདིའི་འབྱུང་འགྱུར་གྱི་མི་རབས་ཚོ་སྔོན་ཐོན་མི་རིགས་ཀྱི་རྗེས་སུ་བསྙེག་ཐུབ་པའི་ལས་དབང་དང་འབྲེལ་བའི་བྱ་གཞག་གལ་ཆེན་ཞིག་རེད་སྙམ།
སློབ་འབྲིང་གི་ལེའུ་དང་་བཙན་བྱོལ་སློབ་གྲྭའི་ཤེས་ཡོན་སློབ་གསོ།
རང་ཉིད་ཕ་ཡུལ་ལ་སྡོད་དུས་སློབ་འབྲིང་ནས་སློབ་མཐར་མ་ཕྱིན་པར་ཨ་ཕ་དང་ཤ་ཉེ་ཚོས་རྒྱ་གར་དུ་མངགས་ཤིང་ཡོང་བ་ཡིན། རྒྱ་གར་དུ་ཡོང་དགོས་པའི་རྒྱུ་མཚན་ཉག་གཅིག་སྐབས་དེར་སུ་དང་གང་གིས་དྲིས་ན་བཤད་རྒྱུ་ཡོད་པ་ནི་སློབ་སྦྱོང་བྱེད་དུ་ཡོང་པ་ཡིན་ཞེས་པ་འདི་རེད། འོན་ཀྱང་དོན་དམ་པས་དེ་དུས་སློབ་སྦྱོང་བྱེད་བསམ་ནས་རྒྱ་གར་དུ་ཡོང་བ་རེད་དམ། ཞེས་དྲིས་ན་མ་རེད། ཨ་ཕ་དང་ཤ་ཉེ་ཚོས་རྒྱ་གར་དུ་མངགས་དོན་གྱི་རྒྱུ་མཚན་དང་རེ་འདོད་ཅི་ཡིན་ངས་མི་ཤེས་མོད། ང་རང་ཉིད་ལ་མཚོན་ན་རྒྱ་གར་ཞེས་པ་དེ་ལྷ་ཡུལ་འདྲ་བ་ཞིག་རེད་བསམ་ནས་ཡོང་པ་ཡིན། འོན་ཀྱང་རྒྱ་གར་ནི་སེམས་ཀྱིས་བསམ་པ་དང་ཡིད་ཀྱིས་སྙམ་པའི་ལྷ་ཡུལ་གྱི་ཞིང་ཁམས་དེ་མ་རེད་ལ། བདེ་སྐྱིད་ལྡན་པའི་ཡུལ་གྲུ་ཞིག་ནི་དེ་བས་ཀྱང་མ་རེད། དེ་ལས་ལྡོག་སྟེ་རང་བྱུང་མཛེས་སྡུག་གི་བཀོད་པ་མཛེས་ཤིང་དྭངས་གཙང་མཁའ་དབུགས་ཀྱི་ཁྱད་ཆོས་ལྡན་པའི་ཕ་ཡུལ་གྱི་རི་ཆུ་ནགས་གསུམ་དང་ཁོར་ཡུག་སོགས་ཅི་དང་གང་ལ་ཡང་བསྡུར་ཐབས་མེད་པའི་ཚ་བའི་ཡུལ་གྲུ་ཞིག་རེད། འོན་ཀྱང་རྒྱལ་ཁབ་འདི་ལ་ཡང་ལེགས་པའི་ཆ་མེད་པ་མིན་སྟེ། མི་ལོ་ཉིས་བརྒྱ་ལྷག་ལ་དབྱིན་ཇི་གཙོས་རྒྱལ་ཁབ་གཞན་གྱི་བཙན་གནོན་དང་བཤུ་གཞོག དབང་བསྒྱུར་ལམ་ལུགས་སོགས་ལ་ཞི་དྲག་གཉིས་ཀྱི་ཐབས་ལམ་སྤྱད་ནས་འཐབ་རྩོད་ཡང་ཡང་བྱས་མཐར། རང་དབང་རང་བཙན་ཐོབ་པ་དང་། རྒྱལ་ཁབ་མང་པོ་ཞིག་གི་ཆབ་དཔལ་རིག་གསུམ་གྱི་ཤེས་རིག་གླིང་ག་ནས་སྙིག་དོར་བཅུད་ལེན་གྱིས་དམངས་གཙོའི་ལམ་ལུགས་དང་སྤྱི་ཚོགས་རིང་ལུགས་སོགས་ཀྱི་ལྟ་གྲུབ་འདྲ་མིན་གྱི་ལེགས་ཆ་བསྡུ་ལེན་བྱས་ནས་མི་ལོ་དྲུག་ཅུ་ལྷག་གི་རིང་ཆབ་སྲིད་ལམ་ལུགས་དང་ཚན་རྩལ་རིག་གནས། ཚོང་ལས་དཔལ་འབྱོར་སོགས་ཀྱི་ཕྱོགས་ནས་ཡུ་རོབ་དང་ཨ་གླིང་གཙོས་སྔོན་ཐོན་རྒྱལ་ཁབ་ཁག་གི་ཆབ་སྲིད་དབང་ཐང་དང། རིག་གནས་ཕྱུགས་ཚད། དཔལ་འབྱོར་སྟོབས་ཤུགས་སོགས་ལ་འགྲན་རྩོད་བྱེད་ཐུབ་ཅིང་ཚོང་ལས་ཡར་ཐོན་གྱི་གོམ་སྟབས་ཆེས་མགྱོགས་པའི་རྒྱལ་ཁབ་ཚོའི་གྲས་ཀྱི་གཅིག་ཆགས་ཡོད་པ་མ་ཟད་ད་ལྟ་འཛམ་གླིང་སྟེང་མི་འབོར་གྱི་ཆ་ནས་དམངས་གཙོ་དོན་ཉར་ཅན་གྱི་རྒྱལ་ཁབ་ཆེས་ཆེ་ཤོས་དེ་ཡང་ཆགས་ཡོད། གནས་ཡུལ་རྒྱལ་ཁབ་འདི་ལ་མཚོན་ན་སྐད་དང་ཡི་གེ སྲོལ་རྒྱུན་དང་ཆོས་ལུགས། མི་རིགས་དང་རིག་གཞུང་སོགས་བརྒྱ་ཕྲག་དུ་མས་ཕྱུགས་པའི་རྒྱལ་ཁབ་ཅིག་ཡིན་ལ། མི་ལོ་སྟོང་ཕྲག་རིང་གི་མིའི་རིགས་ཀྱི་གནའ་བོའི་ཤེས་རིག་དང་གདོད་མའི་དཔལ་ཡོན་གྱི་ལོ་རྒྱུས་གཏིང་ཟབ་ཅིང་རྒྱུན་རིང་ཡོད་པའི་མི་རིགས་ཤིག་ཀྱང་ཡིན་སྟབས། རྒྱལ་ཁབ་འདི་ནི་འཛམ་གླིང་མི་རིགས་ཀྱིས་ཤེས་རིག་གི་བང་མཛོད་དང་རིག་གནས་ཀྱི་འབྱུང་ཁུངས་སུ་འབོད་པའི་གྷི་རི་སི་གཉིས་པ་རེད་ཅེས་བརྗོད་ཀྱང་མི་འགྲིག་པ་ག་ལ་ཡོད་སྙམ། འདི་ལྟ་བུའི་རང་དབང་གི་ཁོར་ཡུག་ཅིག་ནས་ཕྱི་ནང་རིག་གནས་ཀྱི་ཁ་དབུགས་རྔུབ་རྒྱུའི་གོ་སྐབས་བྱུང་བ་འདི་མི་བུ་སྒེར་པ་ཞིག་ལ་ཆ་བཞག་ན་ཡང་བསྐྱར་སླེབས་མི་སྲིད་པའི་ལས་སྐལ་ཞིག་ལགས་ན་དམ་འཛིན་གྱིས་བེད་སྤྱོད་གང་ཡག་བྱ་རྒྱུ་ནི་གལ་འགེངས་ཆེ་བ་ཞིག་རེད་འདོད། འོན་ཀྱང་ཤེས་ཡོན་གྱི་གོ་སྐབས་སྣ་མང་འཛོམས་པའི་ཁོར་ཡུག་འདི་འདྲ་ཞིག་ཡོད་ཀྱང་དེའི་ནང་གི་སློབ་གསོའི་གནད་དོན་དང་སློབ་ཚན་འཁྲིད་ཐབས། བསླབ་གཞི་འཆར་འགོད་སོགས་ཀྱིས་མ་འདིང་བའི་ཆ་ཧ་ཅང་མང་པོ་ཞིག་གིས་བཙན་བྱོལ་སྤྱི་ཚོགས་ཁྲོད་དུ་ཕྱི་ནང་དང་གནའ་དེང་ཤེས་རིག་གི་འདབ་ཤོག་རྒྱས་ཤིང་རྒྱན་པའི་ཤེས་ལྡན་མི་སྣ་མང་པོ་ཞིག་བསྐྱེད་བསྲིངས་བྱེད་མ་ཐུབ་པ་རེད་བསམ། དཔེར་ན་སློབ་ཆུང་སློབ་འབྲིང་གི་བོད་ཡིག་སློབ་དེབ་དེ་ཚོའི་ནང་དུ་སློབ་མ་ཚོའི་ཤེས་ཚད་ལས་བརྒལ་ཞིང་སྦྱངས་འདོད་ཀྱི་ཡི་ག་ཉམས་སུ་འཇུག་པའི་ཐ་སྙད་མཁྲེགས་པོ་དང་སྟོང་ཉིད་རྟེན་འབྲེལ་སོགས་ཀྱིས་རྣམ་བཞག་སོགས་ཀྱིས་ཁེངས་ནས་ཡོད་པའི་རྒྱལ་རབས་ཆོས་འབྱུང་སོགས་ལས་སློབ་མའི་སྤྲོ་བ་འདྲེན་ཞིང་དང་བ་འཕེལ་བའི་སློབ་ཚན་ཉུང་བའི་སྣང་ཚུལ་འདིས་ཀྱང་སློབ་གསོའི་ འཐུས་ཤོར་གྱི་ཆ་ཞིག་དང་ཤེས་རིག་གྱོང་གུད་ཀྱི་ཕྱོགས་ཤིག་གསལ་སྟོན་བྱེད་མི་ཐུབ་ཅེས་སུས་ཁ་ཚོན་བཅད་ནས་བཤད་ནུས་སམ། ད་དུང་བོད་ཡིག་སློབ་ཁྲིད་སྐབས་སུ་སློབ་ཕྲུག་མང་ཆེ་བ་ཞིག་དགེ་རྒན་གྱི་སློབ་ཁྲིད་ལ་ཉོབ་ནས་གཉིད་དུ་ཡུར་སྡོད་པའི་ངང་ཚུལ་དེ་དང་ཡིག་རྒྱུགས་སླེབས་དུས་ཞེ་སྐྲག་སྐྲག་དང་སེམས་འཚུབ་འཚུབ་ཀྱིས་བོད་ཡིག་གི་རྩ་འགྲེལ་དག་གསུམ་སོགས་ངག་སྐྱོར་དང་བློ་འཛིན་བྱེད་པའི་རྣམ་པ་དེས་ང་ཚོ་ལ་བཙན་བྱོལ་སྤྱི་ཚོགས་ཁྲོད་དུ་མ་འོངས་གངས་ལྗོངས་ཀྱི་སོན་རྩ་བསྐྱེད་བསྲི ངས་བྱེད་ས་ཡིན་ཞེས་གྲགས་པའི་ཤེས་རིག་གི་བསྟི་གནས་སམ་སློབ་གྲྭ་ཁག་གི་ནང་དུ་ནམ་རྒྱུན་མིག་མཐོང་ལག་ཟིན་དང་ཁ་ཡོད་ལག་ཡོད་ཀྱི་རྣམ་པ་དེས་ཀྱང་ཤེས་ཡོན་སློབ་གསོའི་ཞན་ཆ་ཞིག་ར་སྤྲོད་བྱས་པ་མ་ཡིན་ནམ། འདི་ལྟར་བསམ་ན་སྤྱི་ཚོགས་འདིའི་ནང་དུ་བོད་ཀྱི་སློབ་འབྲིང་དང་མཐོ་སློབ་ཡིན་ཟེར་བ་འདི་ཚོ་ཚང་མར་མིང་ལ་སློབ་གྲྭ་ཞེས་དེང་རབས་ཀྱི་ཤེས་ལྡན་པ་གསོ་སྐྱོང་བྱ་སའི་བསྟི་གནས་ཤིག་གི་མིང་སྙན་པོ་ཞིག་བཏགས་ཡོད་པ་མ་གཏོགས་དོན་དུ་གཞི་ལམ་འབྲས་གསུམ་སྦྱོང་བའི་གྲྭ་བ་དང་བཙུན་མ་ཏག་ཏག་བཟོ་བསྐྲུན་བྱེད་སའི་དགོན་སྡེ་ཞིག་དང་གཅིག་འཚུངས་རེད། འདི་ལྟ་བུའི་རང་དབང་གི་ཁོར་ཡུག་ཅིག་ནས་བོད་པའི་སྐད་ཡིག་ལ་དགའ་ཞིང་མཁས་པའི་བོད་རིགས་མང་པོ་ཞིག་དུས་རབས་ཕྱེད་ཀ་ལྷག་གི་རིང་གསོ་སྐྱོང་དང་བཟོ་བསྐྲུན་བྱེད་མ་ཐུབ་པའི་སྒང་ལ། བོད་ཀྱི་སྐད་ཡིག་ལ་འཛིན་པའི་རྣམ་འགྱུར་མི་ལེགས་ཤིང་དེའི་རིན་ཐང་ལྟ་ཚུལ་གྱི་འདུ་ཤེས་ཞན་པ། སྐད་ཡིག་ཉམས་རྒུད་དུ་འགྲོ་བ་སོགས་ཀྱི་རྒྱུ་རྐྱེན་ཡང་ཤེས་རིག་སློབ་གསོའི་ཁ་ཕྱོགས་ཀྱི་ནོར་འཁྲུལ་དང་། ཤེས་ཡོན་སྲིད་བྱུས་གཏན་འབེབས་ཀྱི་ཞན་ཆ། དེ་བཞིན་ལག་ལེན་གྱི་ཁ་ཕྱོགས་ནོར་བ་སོགས་ཚུད་པའི་ཤེས་ཡོན་སློབ་གསོའི་ནག་ཉེས་ཤིག་དང་འཐུས་ཤོར་ཞིག་རེད་འདོོད། སྤྱིར་ན་དུས་རབས་ཀྱི་འཕེལ་ཕྱོགས་དང་འཛམ་གླིང་གི་འཕོ་འགྱུར། བརྡ་འཕྲིན་གྱི་ཡར་རྒྱས་སོགས་ལ་བརྟེན་ནས་ཕྱི་ནང་རིག་གནས་ཀྱི་ཤུགས་རྐྱེན་མང་པོ་ཞིག་འུ་ཅག་གི་སྐད་ཡིག་ལ་ཡང་ཐེབས་མི་སྲིད་པ་མིན་མོད། འོན་ཀྱང་སྐད་ཡིག་ཉམས་རྒུད་དུ་འགྲོ་བའི་རྒྱུ་རྐྱེན་དེ་ཙམ་ལ་ཁག་འགེལ་བ་ནི་ཧ་ཅང་གི་ནོར་འཁྲུལ་ཞིག་སྟེ། དཔེར་ན་ང་ཚོ་གནས་སྡོད་བྱེད་སའི་རྒྱ་གར་མི་རིགས་ཀྱི་སྐད་ཡིག་ལ་ཡང་རྒྱལ་ཁབ་གཞན་གྱི་ཆབ་དཔལ་རིག་གསུམ་གྱི་དབང་བསྒྱུར་དང་ཤུགས་རྐྱེན་ཐེབས་མྱོང་པའི་ལོ་རྒྱུས་དང་བརྒྱུད་རིམ་རིང་པོ་ཞིག་ཡོད་ཀྱང། ད་ལྟའི་དར་ཞིང་འཕེལ་བའི་རྒྱ་གར་གྱི་སྐད་ཡིག་འདིའི་བེད་སྤྱོད་དང་ཁྱབ་རྒྱ་དེ་བཞིན་དུས་རབས་ཀྱི་དགོས་མཁོ་དང་འཚམས་པའི་སྐད་ཡིག་གི་བཀོད་སྤྱོད་སོགས་ལས་ང་ཚོས་གོང་གི་རྒྱུ་མཚན་ཆུང་ཆུང་དེ་འདྲ་ཞིག་ལ་ཁ་གཡར་ནས་མ་ཎི་བཞིན་བགྲང་བ་ནི་རང་མགོ་རང་གིས་གཡོག་པ་ཙམ་ཡིན་པ་ཧ་ཅང་ཤེས་རྟོགས་ཐུབ་པའི་གནད་ཅིག་མ་ཡིན་ནམ། དེར་བརྟེན། ང་ཚོས་ཀྱང་རང་མི་རིགས་ཀྱི་སྐད་ཡིག་འདི་རྒྱ་ཆེའི་བོད་མི་ཚོའི་བསམ་བློའི་མོས་པ་དང་འཚམས་ཤིང། བརྡ་འཕྲིན་དུས་རབས་ཀྱི་དགོས་མཁོ་སྐོང་ཐུབ་ལ། ཚན་རྩལ་རིག་གནས་ཀྱི་སྟོང་ཆ་གསབ་ནུས་པ། དེ་བཞིན་དེང་རབས་སྐད་ཡིག་དཔལ་ཡོན་གྱི་གདན་གྲལ་དུ་ཚུད་ཐུབ་པ་ཞིག་བཟོ་དགོས་ན་སྐད་ཡིག་བཀོད་སྤྱོད་ཀྱི་ཁོར་ཡུག་ཆེ་རུ་བསྐྱེད་ཅིང་སྐད་ཡིག་གི་རིན་ཐང་དང་ངོ་བོ་ཤེས་རྟོགས་ལེགས་པར་སྤེལ་ཐུབ་རྒྱུ་དེ་གལ་གནད་ཆེ་བ་མ་ཟད། སྐད་ཡིག་སློབ་གསོའི་རྨང་གཞི་བརྟན་པོ་ཞིག་དང་པོ་ནས་འཛུགས་བསྐྲུན་བྱེད་རྒྱུ་དེ་དེ་ལས་ཀྱང་གལ་ཆེན་ནང་གི་དོན་ཆེན་ཞིག་རེད་འདོད།

མཐོ་སློབ་ཀྱི་ལེའུ་དང་སློབ་སྦྱོང་གི་བསམ་ཚུལ།
ལོ་དེར་བདག་གིས་དམིགས་ཡུལ་ངེས་ཅན་ཞིག་དང་རྨི་ལམ་དྲོན་མོ་ཞིག་ཁོག་ལ་བཅུགས་ནས་མཐོ་སློབ་འགྲིམས་རྒྱུ་སེམས་ཐག་བཅད་པ་ཡིན། སྤྱིར་ང་དམའ་རིམ་དང་འབྲིང་རིམ་སློབ་གྲྭར་ཡོད་དུས་སློབ་སྦྱོང་དང་ཀུན་སྤྱོད་སོགས་བཟང་བའི་སློབ་མ་ཚོའི་གྲས་ཡིན་ལ། དགེ་རྒན་དང་སློབ་གྲོགས་ཚོས་རེ་བ་བཅོལ་སའི་སློབ་ཕྲུག་ཅིག་ཀྱང་ཡིན། ད་དུང་བོད་ཡིག་ལ་དགའ་ཞེན་ཆེ་ལ་བོད་ཀྱི་རིག་གནས་ལ་སྦྱངས་བརྩོན་བྱེད་རྒྱུ་དགའ་བའི་སློབ་མ་ཞིག་ཡིན་ཞེས་བཤད་ཀྱང་རང་གིས་རང་ལ་ངོ་བསྟོད་བྱས་པའི་ཚད་དུ་མི་འགྲོ་སྙམ། འོན་ཀྱང་མཐོ་སློབ་ཏུ་འཛུལ་ཞུགས་བྱས་ནས་ཅུང་མ་འགོར་བར་སྔོན་ཆད་དང་འདྲ་བར་བོད་ཡིག་གི་རྩོམ་ཡིག་འབྲི་རྒྱུ་དང་དཔེ་དེབ་ཀློག་རྒྱུ། བོད་སྐད་རྒྱག་རྒྱུ་སོགས་ཇེ་ཉུང་ནས་ཇེ་ཉུང་དུ་འགྲོ་བཞིན་པ་སོ་སོས་ཀྱང་ཤེས་རྟོགས་ཐུབ་ཀྱིན་འདུག་མོད། དེ་དུས་དེ་ལ་དེ་ཙམ་གྱི་དོ་སྣང་མ་སྤྲད་ལ་གད་ཆེན་ཞིག་ཀྱང་རེད་མ་འདོད། རྗེས་སུ་དབྱར་ཀའི་གུང་གསེང་གི་སྐབས་ཤིག་དང་བསྟུན་ནས་ཕྱིར་རྡ་སར་ཐེངས་གཅིག་ཡོང་དུས། རང་ཉིད་ཀྱིས་སྔོན་ཆད་བྲིས་མྱོང་བའི་འཁྱར་འཁྱོར་གྱི་རྩོམ་ཡིག་དེ་ཚོ་ཡོད་པའི་འབྲི་དེབ་རྙིང་བ་འགའ་ཞིབ་ཏུ་བསྐྱར་ཀློག་བྱས་པ་ཡིན། སྐབས་དེར་ཡིད་ལ་ངེས་ཤེས་ཟབ་མོ་ཞིག་རྙེད་པ་ནི་རང་ཉིད་ཀྱིས་བྲིས་མྱོང་བའི་རྩོམ་ཡིག་དེ་ཚོ་རང་ལ་ཆ་རྒྱུས་ཅི་ཡང་མེད་པ་ཡིག་ཚགས་ཏག་ཏག་ཏུ་གྱུར་འདུག་པས་རང་ཉིད་ཀྱིས་བྲིས་པ་ཞིག་ཨེ་ཡིན་བསམ་ནས་རང་ཉིད་རང་ལ་ཐེ་ཚོམ་ཟ་ཞིང་ཡིད་མི་ཆེས་པའི་ཚོད་དུ་འདུག་པ་དེ་རེད། ཁྱད་མཚར་བའི་གནས་ཚུལ་འདི་ལས་ངས་སྔོན་ཆད་བོད་ཀྱི་སྐད་ཡིག་ལ་དུངས་བ་ཟབ་ཅིང་རྩོམ་རིག་རིག་གནས་ལ་དགའ་ཞེན་ཆེ་པའི་རང་ཉིད་དེ་ད་ལྟ་ངོ་མི་ཤེས་པའི་མི་གཞན་ཞིག་ཏུ་འགྱུར་བཞིན་པའི་འཐུས་ཤོར་གྱི་ཕྱོགས་དེ་རེད། འོན་ཀྱང་ཞིབ་ཏུ་བསམ་ན་འདི་ནི་ང་གཅིག་པོའི་འགྱུར་ལྡོག་ཅིག་ག་ལ་ཡིན་ཏེ། ང་དང་ང་འདྲ་བའི་མཐོ་སློབ་འགྲིམས་མྱོང་ལ་ད་ལྟ་འགྲིམ་ཀྱིན་པའམ་རྗེས་སུ་འགྲིམ་ངེས་པའི་བོད་རིགས་སློབ་མ་མང་ཆེ་བ་ཞིག་གི་རང་མི་རིགས་ཀྱི་སྐད་ཡིག་སློབ་སྦྱོང་གི་འཐུས་ཤོར་ཤིག་ཡིན་པ་གཤམ་གྱི་འགྲེལ་བཤད་ལས་ཧ་གོ་ཐུབ་པ་མ་ཡིན་ནམ།
སློབ་འབྲིང་གི་སློབ་སྦྱོང་ཐོན་པ་དང་གནས་འདིའི་བོད་རིགས་སློབ་མ་ཚོ་རང་ཉིད་ཀྱི་སྤྱི་རྒྱུགས་ཀྱི་གྲུབ་འབྲས་བརྒྱ་ཆ་ལ་ཕབས་ནས་རྒྱ་གར་སྤྱི་ཚོགས་ཁྲོད་ཀྱི་མཐོ་སློབ་ཁག་ཏུ་བསྐྱོད་ཀྱིན་ཡོད། རྒྱ་གར་གྱི་མཐོ་སློབ་ཁག་ན་དབྱིན་ཇིའི་སྐད་ཡིག་གི་བརྒྱུད་ལམ་ནས་རང་ཉིད་ཀྱིས་གདམས་གསེས་བྱས་པའི་སློབ་ཚན་དག་ལས་བོད་ཡིག་གི་སློབ་ཚན་སྦྱངས་སའི་ཁོར་ཡུག་མེད་ལ་མཁའ་དབུགས་ཀྱང་མེད། ལྷག་པར་དུ་བོད་པའི་སློབ་མ་འཚོ་ལྷན་འདུག་བྱེད་སའི་སྡོད་ཁང་རེ་གཉིས་ཤིག་ཡོད་པ་དེ་དག་གི་ནང་དུ་ཡང་བོད་ཀྱི་སྐད་ཡིག་དང་རིག་གནས་རྒྱུད་འཛིན་བྱེད་པའི་ཆ་རྐྱེན་ཞན་ལ་ཁོར་ཡུག་ཀྱང་ཆུང། གནས་སྐབས་འདི་དང་དུས་ཚོད་འདི་ནི་བོད་རིགས་སློབ་མ་ཚོའི་རང་ཉིད་ཀྱིས་ལོ་ངོ་བཅུ་ལྷག་ལ་སྦྱངས་བརྩོན་བྱེད་ཁུལ་གྱིས་བླངས་པའི་བོད་ཡིག་གི་གྲུབ་འབྲས་ཆུང་ཆུང་དེ་ཡང་བསམ་སྤྱོད་གཉིས་ལས་ཁ་ཐག་ཇེ་རིང་དུ་འགྲོ་འགོ་ཚུགས་ཤིང་བརྗེད་འགོ་ཚུགས་པའི་དུས་དེ་རེད། ཁ་གཅིག་གིས་བཤད་ན་འདི་ནི་ཁོར་ཡུག་གི་རྒྱུ་རྐྱེན་དུ་བྱས་པས་ཡིན་ཟེར་ལ། ཡང་འགའ་ཞིག་གིས་ཞེས་ན་འདི་ནི་བོད་ཡིག་སྦྱངས་ན་དགོས་ཕན་ཅི་ཡང་མེད་པས་ཡིན་ཟེར། འོན་ཀྱང་རྒྱུ་མཚན་བདེན་པ་དེ་འདི་མ་རེད། རྒྱུ་རྐྱེན་བདེན་པའམ་ཡང་དག་དེ་ནི་བོད་རིགས་གཞོན་སྐྱེས་ཚོའི་རྒྱུད་དུ་སློབ་ཆུང་ནས་བཟུང་རང་མི་རིགས་ཀྱི་སྐད་ཡིག་ལ་དགའ་བའི་བག་ཆགས་ཡག་པོ་ཞིག་དང་རིག་གནས་ལ་དུངས་ཤིང་ཞེན་པའི་འདུ་ཤེས་གཏིང་ཟབ་ཅིག་བསྐྱེད་ཐུབ་མེད་པའི་རྒྱུ་མཚན་དེ་རེད་འདོད། མཐོ་སློབ་ཀྱི་མི་ཚེའི་ཁྲོད་དུ་སྤྱིར་ཡིན་ན་མི་རིགས་འདྲ་མིན་བར་དུ་ཤེས་རིག་བརྗེ་རེས་དང་བསམ་བློ་བགྲོ་གླེང་སོགས་བྱེད་སའི་སྡིངས་ཆ་གལ་ཆེན་ཞིག་ཡིན་མོད། བོད་རིགས་སློབ་མ་ཚོའི་ནང་ན་རང་མི་རིགས་ཀྱི་གནའ་དེང་རིག་གནས་ལ་གོ་རྟོགས་ཟབ་ཅིང་རྒྱལ་རབས་ལོ་རྒྱུས་ལ་ཆ་རྒྱུས་ཡོད་པའི་ཐོག་ནས་མི་རིགས་གཞན་ལ་སྤོབས་པའི་སྒོ་ནས་བོད་མི་རིགས་ཀྱི་ཁྱད་ཆོས་དང་ངོ་བོ་འགྲེལ་བརྗོད་བྱེད་ནུས་པའི་མི་ནི་ཧ་ཅང་ཉུང་ཙམ་གདའ་བའི་རྒྱུ་མཚན་ཡང་གོང་གི་དེ་རེད་སྙམ། ད་དུང་། ན་ནིང་ད་ལོ་དང་དེ་རིང་ཁ་སང་གི་བཙན་བྱོལ་སྤྱི་ཚོགས་ཁྲོད་དུ་གུ་ཡངས་ཅན་གྱི་སློབ་གསོའི་ཁ་ཕྱོགས་ཤིག་གི་འོག་ནས་འཚར་ལོངས་བྱུང་བའི་གཞོན་སྐྱེས་མང་པོ་ཞིག་གི་བོད་ཡིག་གི་ཤེས་ཚད་བོད་ནང་ལོགས་སུ་བཞུགས་པའི་བོད་མིའི་བོད་ཡིག་ཤེས་ཚད་ལས་སྐྱོ་བ་ཡོད་པ་དེ་ལས་ཀྱང་ར་སྤྲོད་བྱ་ཐུབ་པ་མ་ཡིན་ནམ། ངས་འདི་ལྟར་བཤད་དུས། ཁ་ཅིག་གིས་ན་རེ། བོད་ནང་དུ་བོད་ཡིག་སྦྱངས་སའི་ཁོར་ཡུག་ཡག་པོ་ཡོད་ཟེར་ངེས་མོད། དེ་ནི་ཧ་ཅང་གི་བདེན་པ་མ་ཡིན་ཏེ། བོད་ནང་གི་མི་མང་རྣམས་གཞན་གྱི་སྐད་ཡིག་གཉའ་གནོན་དང་རིག་གནས་དབང་བསྒྱུར་འོག་ན་སྐད་ཡིག་གི་བཀག་བསྡོམས་ཆེ་ལ་བེད་སྤྱོད་ཀྱི་ཁོར་ཡུག་ཆུང་བ་སོགས་ཀྱི་གནས་སྟངས་འདིས་ང་ཚོ་ལ་ལན་བཏབས་པ་མ་ཡིན་ནམ། གལ་ཏེ་སྐད་ཆ་དེ་བདེན་པ་ཡིན་པའི་དབང་དུ་བཏང་རུང་། ཕྱི་ལོགས་སུ་སྡོད་པའི་བོད་རིགས་རྣམས་ལ་སྐད་ཡིག་བཀོད་སྤྱོད་བྱེད་སའི་རང་དབང་གི་ཁོར་ཡུག་བོད་ལས་ཆེ་བ་ཡོད་ལ་སྐད་ཡིག་སྦྱངས་བརྩོན་གནང་སའི་རང་དབང་གི་སློབ་གྲྭ་ཡང་མང་པོ་ཡོད་པས་བཙན་བྱོལ་བོད་ཀྱི་སྐད་ཡིག་གི་དཔལ་ཡོན་དེ་བོད་ནང་དང་བསྡུར་ན་ཡར་རྒྱས་དང་གོང་འཕེལ་གྱི་གྲུབ་འབྲས་ཤིག་སྟོན་རྒྱུ་ཡོད་དགོས་མོད། དེ་ལྟ་བུའི་གྲུབ་འབྲས་ནི་མཐོང་རྒྱུ་མི་འདུག་ལ། དེ་ལས་ལྡོག་ཏེ་བོད་ཀྱི་སྐད་ཡིག་གི་ཁ་ལས་རླུང་རྟ་དང་ལས་དབང་དེ་བཞིན་དུས་ནས་དུས་སུ་ཉམ་རྒུད་དང་ཉམ་ཆགས་སུ་འགྲོ་བཞིན་པ་ནི་ཀུན་གྱིས་ཁ་གཅིག་གྲགས་དང་མགོ་གཅིག་ལྡེམ་གྱིས་ལབ་ཀྱིན་འདུག་པ་དེ་རེད། ད་ལྟ་ངས་ཆེས་ཧ་མི་གོ་བ་ནི་རང་དབང་དང་གུ་ཡངས་ཅན་གྱི་ཤེས་ཡོན་སྲིད་བྱུས་ལམ་ལུགས་ཤིག་གི་འོག་ནས་མི་རིགས་ཀྱི་སྐད་ཡིག་ལ་རང་སྐྱ་འཕེར་ཞིང་རང་དབང་འབྱོར་བའི་བོད་མི་མཛུབ་མོས་བགྲང་ཐུབ་པ་ཞིག་ལས་གསོ་སྐྱོང་བྱེད་མ་ཐུབ་པའི་རྒྱུ་མཚན་ཅི་ཡིན་ནམ། ཞེས་པ་དེ་རེད་ལ། བོད་ཡིག་གི་ལམ་ནས་མགོ་རྔ་ཚང་བའི་སྙན་ཞུ་ཡི་གེ་ཞིག་ཀྱང་འབྲི་མི་ཤེས་པའི་མཐོ་རིམ་སློབ་ཆེན་ཐོན་པའི་བོད་རིགས་སློབ་མ་དེ་ཚོའི་བོད་ཡིག་གི་ཤེས་ཚད་ཀྱང་རེད། གཅིག་བྱས་ན་དགེ་རྒན་དང་སློབ་གྲྭའི་འཛིན་སྐྱོང། ཤེས་ཡོན་སྲིད་བྱུས་སོགས་ཀྱིས་རྒྱུ་རྐྱེན་ཡིན་ངེས། ཡང་གཅིག་བྱས་ན་སློབ་མ་ཚོ་རང་ཉིད་བོད་ཡིག་ལ་དོ་སྣང་དང་སྦྱངས་འདོད་ཀྱི་ཡི་ག་མེད་པས་ཡིན་སྲིད། གང་ལྟར་ཀྱང་ང་ཚོས་ཕན་ཚུན་ནང་ཁུལ་ལ་སྐྱོན་བརྗོད་རྐྱང་རྐྱང་དང་དགག་སྒྲུབ་ཏག་ཏག་བྱེད་རྒྱུ་མཚམས་བཞག་ཏེ།༼ཡང་དག་གི་སྤྱི་ཚོགས་སྐྱོན་བརྗོད་དང་ཤེས་རིག་དགག་སྒྲུབ་ལ་མི་གོ༽ དངོས་ཐོག་བདེན་འཚོལ་གྱིས་ཤེས་ཡོན་སློབ་གསོའི་ཞན་ཆ་འདི་དག་བཅོས་བསྒྱུར་བྱས་ནས་ཤེས་ཡོན་སློབ་གསོའི་ཁ་ཕྱོགས་གསར་པ་ཞིག་གཏན་འབེབས་བྱེད་རྒྱུ་ནི་བཙན་བྱོལ་གཞུང་དམངས་གཉིས་དང་ཚོགས་སྡེ་ཁག དེ་བཞིན་བོད་ཀྱི་རིག་གནས་པའི་སྡེ་དང་། ཆེད་ལས་མི་སྣ་སོགས་ལ་དངོས་ཤུགས་བརྒྱུད་གསུམ་ནས་ཕྲག་ཏུ་བབ་པའི་འོས་འགན་གལ་ཆེན་དེ་རེད་བསམ། གང་ལྟར་འདས་ཟིན་པ་ནི་ལོ་རྒྱུས་ཤིག་ལས་ཕྱིར་ཡོང་མེད་པས། ང་ཚོས་རང་ཉིད་ཀྱིས་འདས་ཟིན་པའི་དུས་རབས་ཕྱེད་ཀ་ལྷག་གི་རིང་བཟོས་པའི་ཤེས་ཡོན་སློབ་གསོའི་ནོར་སྐྱོན་དང་འཐུས་ཤོར་ལ་གཞིགས་ནས་ད་ལྟ་དང་མ་འོངས་བའི་མི་རབས་དག་གི་ཆེད་དུ་རྗེས་དཔག་གི་བསམ་བློས་དཔྱད་ཅིང་རེ་བས་གྲ་སྒྲིག་དང་གདོང་ལེན་བྱེད་པར་འབད་དགོས་པའི་དུས་ལ་བབ་འདུག་སྙམ།
འདི་ལས་འཕྲོས་ཏེ་ང་རང་གི་སློབ་སྦྱོང་སྐོར་གྱི་བསམ་ཚུལ་ཞིག་གླེང་འདོད་དེ། སློབ་སྦྱོང་མུ་མཐུད་བྱེད་རྒྱུ་ནི་བདག་གི་མི་ཚེ་གཅིག་གི་རེ་འདུན་དང་བསམ་བློའི་རྨི་ལམ་ཡིན། འོན་ཀྱང་སྐྱེ་བོ་སུ་ཞིག་ལ་མཚོན་ན་ཡང་རང་ཉིད་ཀྱི་འདོད་པ་ཐམས་ཅད་ཇི་བཞིན་འགྲུབ་པའི་ངེས་པ་གཏན་ནས་མེད་སྙམ་བཞིན་ཡོད་ལ། རང་ཉིད་ཀྱི་རྨི་ལམ་དེ་ཡང་རང་ཉིད་ཀྱི་བསམ་པ་ལྟར་མངོན་འགྱུར་ཐུབ་པའི་གདེང་ཚོད་དང་ཁག་ཐེག་ཀྱང་ག་ལ་ཡོད་འདོད། གང་ལྟར་བསམ་པའི་ཡུལ་ལ་མ་འཁོར་ཞིང་བློ་ཡི་རྒྱུད་དུ་མ་འཆར་བའི་ཕྱི་ནང་གི་བར་ཆད་དང་འགོག་རྐྱེན་གང་མང་ཞིག་བརྒྱུད་ནས་ང་རང་ཡང་གཞན་དང་འདྲ་བར་དམའ་རིམ་ནས་འབྲིང་རིམ། འབྲིང་རིམ་ནས་མཐོ་རིམ་བཅས་ཀྱི་སློབ་སྦྱོང་མཐར་ཕྱིན་པ་རེད། ད་ལྟ་འདི་ལྟར་ཕྱིར་འཁོར་ནས་འདས་ཟིན་པའི་སློབ་གྲྭའི་མི་ཚེར་ཞིབ་འདང་རེ་རྒྱག་དུས། ཡིད་སེམས་དགའ་ལ་སྤོབས་པ་བསྐྱེད་པའི་གྲུབ་འབྲས་ཡོད་ལ། བློ་ཡིད་ཕམ་ཞིང་ཡི་ཐང་ཆད་པའི་ཕམ་ཁ་ཡང་ཡོད། དེ་བཞིན་ནོངས་འགྱོད་སྐྱེས་ལ་རེ་བས་ཁེངས་བའི་བྱ་གཞག་ཀྱང་མཆིས། གང་ལྟར་འདས་ཟིན་པའི་དོན་དག་དེ་ཚོ་ད་ལྟ་གླེང་རིན་ཞིག་ཡེ་ནས་མེད་ཀྱང། རང་ཉིད་ལ་མཚོན་ན་མི་ཚེའི་བཞུད་རྒྱུན་སློབ་སྦྱོང་ཁྲོད་བསྟུན་ཞིང་བསྟུན་རྒྱུའི་རེ་འདོད་དེ་ད་དུང་ཡང་མེ་ལྕེ་བཞིན་སེམས་ཁོངས་ན་ཤུགས་ཀྱིས་འབར་གྱིན་ཡོད་པས་སློབ་སྦྱོང་ཞེས་གླེང་དུས། སེམས་ན་བརྗོད་མི་ཤེས་པའི་དགའ་བ་ཞིག་དང་འགྲེལ་མི་ནུས་པའི་དུངས་བ་དྲག་པོ་ཞིག་འདུག་ལ། སློབ་སྦྱོང་དང་ཤེས་ཡོན་ཞེས་བརྗོད་དུས་ཡིད་ནས་མི་ཞིག་ལ་དུས་རབས་ཉེར་གཅིག་པའི་སྤྱི་ཚོགས་ཁྲོད་ཆེས་མེད་དུ་མི་རུང་བའི་ཆ་རྐྱེན་གལ་ཆེན་ཞིག་རེད་འདུག་སྙམ། དེ་བཞིན་རང་ཉིད་རང་ངོ་ཤེས་ནས་འཛམ་གླིང་སྔོན་ཐོན་མི་རིགས་ཀྱི་གྲལ་དུ་ཚུད་ཐུབ་པ་བྱེད་སྤྱད་ཀྱི་གཞི་རྩའི་གྲུབ་ཆ་ཞིག་རེད་བསམ་པའི་ཚོར་བ་ཞིག་ཀྱང་འདུག འདི་ནི་ངས་སློབ་སྦྱོང་གི་རིན་ཐང་ལ་བཟུང་བའི་བསམ་ཚུལ་ཡིན་ལ་སློབ་སྦྱོང་གི་དགེ་ཕན་ལ་བཅངས་བའི་བརྩེ་ཞེན་ཡང་ཡིན། འོན་ཀྱང་སློབ་སྦྱོང་ལ་དགའ་མོས་དང་དུངས་བ་ཁོ་ནས་མི་འགྲིག་པར་སེམས་ཐག་ཆོད་པོས་འབད་བརྩོན་ལྷུར་ལེན་དང་དཀའ་བ་ཁྱད་བསད་ཀྱིས་རྒྱུན་སྐྱོང་ནུས་པའི་ཆོད་སེམས་བརྟན་པོ་ཞིག་ཀྱང་དགོས་པ་རེད། མཚམས་རེར་ཕྱི་ནང་གི་རྒྱུ་རྐྱེན་མང་པོ་ཞིག་མ་ཚང་བའི་སྟབས་ཀྱིས་རང་འདོད་མངོན་འགྱུར་བྱེད་པར་དཀའ་ངལ་དང་བར་ཆད་གང་མང་ཞིག་འཕྲད་ནས་སེམས་ནས་བསམ་པའི་ལས་དོན་ལ་འགོག་རྐྱེན་མང་པོ་ཞིག་འཕྲད་ངེས་མོད་ཀྱང། དེ་ལ་ལྡོག་ཕྱོགས་ནས་བསམ་ཞིབ་དང་བཟོད་སྒོམ་གྱིས་གདོང་ལེན་བྱ་རྒྱུ་ནི་གལ་ཆེ། ང་ཚོ་ཀླད་ཤུགས་ངལ་རྩོལ་བ་ཞིག་ལ་ཆ་མཚོན་ན། ལུས་ཤུགས་ངལ་རྩོལ་བ་བཞིན་གྱིས་གྲུབ་འབྲས་མངོན་སུན་འདི་རེད་ཅེས་རྡོག་རྡོག་ཅིག་ལམ་སེང་སྟོན་རྒྱུ་ཧ་ཅང་ཁག་པས། རྒྱུ་རྐྱེན་ཆུང་ཆུང་དང་ཕམ་ཁ་ཆུང་ཆུང་དེ་འདྲར་ཁག་བཞག་ནས་དེ་མ་ཐག་སེམས་ཤུགས་ཆགས་ཤིང་སྤོབས་པ་ཉམས་ནས་རིག་གནས་སློབ་སྦྱོང་དོར་བ་ནི་ཤེས་རིག་ལ་བརྩེ་ཞེན་ཟབ་པའི་མི་ཞིག་གི་བྱ་སྟངས་བྱེད་ལུགས་མ་རེད་ལ། ཤེས་རིག་སྦྱོང་བའི་སྐྱེ་བོ་ཞིག་གི་བསམ་ཚུལ་ཐག་གཅོད་བྱེད་ཚུལ་ནི་དེ་བས་ཀྱང་མ་རེད། དེར་བརྟེན་འདུན་པ་དང་བརྩོན་འགྲུས། བཟོད་སྒོམ་གསུམ་ནི་སློབ་སྦྱོང་བྱེད་མཁན་ཞིག་ལ་ཚང་དགོས་པའི་ཆ་རྐྱེན་ཨང་དང་པོ་དེ་རེད་འདོད།།
(རྩོམ་འདི་རང་ཉིད་ཀྱི་སློབ་གྲྭར་འགྲིམས་པའི་ཉམས་མྱོང་ལས་བྲིས་པ་ཡིན་པས། ནང་དོན་གྱི་ཆ་དང་ཚིག་བརྗོད་ཀྱི་ཆ་སོགས་ཕྱོགས་གང་ཐད་ནས་ཀྱང་ཞན་ཆ་དང་ནོར་སྐྱོན་མང་པོ་ཞིག་ཡོད་ངེས་ན། ཀློག་པ་པོ་ཚོས་དེ་ལྟར་དགོངས་འཆར་གནང་བར་རེ་བ་ཡོད།)