དྲ་ཐོག་གཟའ་ཉི་མའི་གླེང་མོལ་གྱི་ལས་རིམ་དང་ཟུར་བཤད།
གཅིག ༢༠༡༢ ཟླ ༥ ཚེས ༢༠ཉིན་ཏེ་རེས་གཟའ་ཉི་མའི་སྔ་དྲོའི་དུས་ཚོད་༠༩བའི་སྟེང་ནོར་གླིང་མཐོ་སློབ་ཀྱི་སློབ་མ་གཉན་པོ་ལགས་ཀྱིས་སྤེལ་བའི་ཐེངས་འདིའི་གཟའ་ཉི་མའི་གླེང་མོལ་གྱི་སྔོན་འགྲོའི་བསྒྲགས་གཏམ་དང་མཉམ་དུ་ཆེད་རྩོམ་ཁག་སྤྱན་འབུལ་ཞུ་རྒྱུ།
གཉིས། དུས་ཚོད་དགུ་དང་སྐར་མ་༢༠སྟེང་བགྲོ་གླེང་དངོས་སུ་དབུ་འཛུགས་བྱ་རྒྱུ་དང་། དྲ་གྲོགས་དག་གིས་སྔོན་འགྲོའི་བསྒྲགས་གཏམ་དང་ཆེད་རྩོམ་དག་ཆ་ཚང་ཞིག་ཀློག་ཐུབ་པའི་ཕྱིར་ཆེད་བྲིས་རྩོམ་ཡིག་དག་སྤེལ་རྗེས་སྐར་མ་༢༠རིང་མཆན་དག་རེ་ཞིག་འགོག་གི་ཡིན།
གསུམ། ཉིན་གུང་དུས་ཚོད་༡༢་ནས་དུས་ཚོད་༠༡བར་བར་གསེང་ཡིན། ཕྱི་དྲོའི་དུས་ཚོད་བཞི་པ་ནས་དེ་རིང་གི་བགྲོ་གླེང་ཡོངས་སུ་མཇུག་བསྡུས་ཏེ་གོ་སྒྲིག་པའི་ངོས་ནས་བགྲོ་གླེང་དག་གི་བསམ་ཚུལ་ཁག་ཕྱོགས་བསྡུས་ཀྱིས་དྲ་ཐོག་གི་གྲོགས་པོ་དག་དང་ཀློག་པོ་ཡོངས་ཀྱི་སྤྱན་སྔར་འབུལ་རྩིས་ཡོད།
བཞི། ཐེངས་འདིའི་བགྲོ་གླེང་དང་འབྲེལ་བའི་ཆེད་རྩོམ་སྤེལ་མཁན་དག་ནི་རྩོམ་པ་པོ་འཇིགས་མེད་དགེ་འདུན་ལགས་དང་ན་གཞོན་རྩོམ་པ་པོ་བོན་རྒྱ་བསྟན་འཛིན་རབ་རྒྱས་ལགས། ས་རཱ་མཐོ་སློབ་ཀྱི་སློབ་མ་བཙན་མེ་སྟག་ལགས། ཝར་ཎ་མཐོ་སློབ་ཀྱི་སློབ་མ་དབང་ཆེན་རྡོ་རྗེ་བཅས་ཡིན། རྩོམ་པ་པོ་ཁོང་ཅག་གིས་ཐེངས་འདིའི་བགྲོ་གླེང་འདི་ཉིད་གལ་ཆེན་དུ་གཟིགས་ནས་བརྗོད་གཞི་དང་འབྲེལ་བའི་རྩོམ་ཡིག་ལེགས་པོ་རེ་གནང་བྱུང་བར་བགྲོ་གླེང་གོ་སྒྲིག་པས་དྲ་གྲོགས་ཡོངས་ཀྱི་ཚབ་བྱས་ཏེ་ཆེད་དུ་ཐུགས་རྗེ་ཆེ་ཞུ་བ་ཡིན།
ལྔ། དེི་རིང་གི་དུས་ཚོད་དམ་འཛིན་བྱེད་ཐུབ་པའི་ཆེད་དམ། ཡང་ན་བརྗོད་བྱ་དངོས་ཀྱི་སྟེང་དུ་བབ་སྟེ་བགྲོ་གླེང་ཤུགས་ཆེར་ཡོང་བའི་སླད་དུ། དྲ་གྲོགས་དག་གིས་དགོས་མེད་གྱི་གཏམ་དང་བརྗོད་གཞིར་འབྲེལ་མེད་ཀྱི་སྐད་ཆ་སོགས་ཐེངས་འདིའི་དྲ་ཐོག་བགྲོ་གླེང་དུ་མི་སྤེལ་བའི་རེ་བ་ཡོད།
དྲུག ཐེངས་འདིར་དྲ་བའི་གླེང་མོལ་ལ་ཞུགས་མཁན་དག་གིས་དྲ་ངོས་སུ་མཆན་སྤེལ་མི་ཐུབ་པའམ། ཡང་ན་རང་རང་ལ་ཟིན་བྲིས་སོགས་མེད་ཚེ་ཐད་ཀར་ང་ཚོའི་ཡིག་འཕྲིན་ཁ་བྱང་dorjelks@ymail.comསྟེང་སྐུར་ན་དུས་ལྟར་ང་ཚོས་དྲ་བའི་མཆན་དུ་སྤེལ་ངེས།
བགྲོ་གླེང་གོ་སྒྲིག་པ་ཁྲོ་གཏུམ་དང་ཁ་བ་སྐམ་པོ་གཉིས་ཀྱིས་གུས་ཕུལ།
དྲ་ཐོག་གཟའ་ཉི་མའི་གླེང་མོལ་གྱི་སྔོན་འགྲོའི་བསྒྲགས་གཏམ།
གཉན་པོ།(ནོར་གླིང་མཐོ་སློབ།)
ཐོག་མར་རིགས་ཀྱི་བདེ་སྡུག་ལ་སེམས་ཁྲལ་ཆེ་ཞིང་སྒོས་སུ་བོད་ཀྱི་མཐོ་རིམ་སློབ་མའི་གནས་བབ་ལ་དོ་སྣང་ཡོད་པའི་གཟའ་ཉི་མའི་དྲ་ཐོག་བགྲོ་གླེང་གི་སྐུ་མགྲོན་ཡོངས་ལ་ཁམས་འདྲི་ཞུ་བ་དང་མཉམ་དུ་ཐེངས་འདིའི་གཟའ་ཉི་མའི་གླེང་མོལ་དང་འབྲེལ་བའི་སྐད་ཆ་འགའ་ཞིག་བཤད་ན།
བོད་མི་རིགས་ཀྱི་གནས་བབ་ཛ་དྲག་ཡིན་པའི་དུས་སྐབས་འདི་ལ“རང་ཉིད་ནས་འགོ་རྩོམ་པའི་དགོས”པའི་རྩ་དོན་བསམ་པའམ་ཡང་ན་བོད་པ་མི་རེ་ངོ་རེ་ཡིས་རིགས་ཀྱི་དོན་དུ་མ་མཐའ་ཡང་ཞབས་འདེགས་ཕྲན་བུ་ཞིག་ནི་ཅིས་ཀྱང་ཞུ་དགོས་སྙམ་པའི་ཚོར་བ་ཞིག་གིས། ང་ཚོར་གཟའ་ཉི་མའི་གླེང་མོལ་ཞེས་པ་འདི་འགོ་འཛུགས་པར་བྱས་ཤིང་། རྩ་ཆེན་ཡིན་པའི་སློབ་སྦྱོང་གི་དུས་ཚོད་འགའ་ཡང་བློས་བཏང་ནས་དམངས་ཁྲོད་ཀྱི་བསམ་བློའི་གླེང་སྟེགས་ཤིག་སྟེ་གཟའ་ཉི་མའི་གླེང་མོལ་ཞེས་པ་མུ་རུ་སྒྲུབ་བཞིན་ཡོད།
ཐེངས་འདིར་གཟའ་ཉི་མའི་གླེང་མོལ་དྲ་ཐོག་ཏུ་ཚོགས་གཏན་འཁེལ་བར་ཡང་རྒྱུ་མཚན་འགའ་ཞིག་ཡོད་ཅིང་། གཅིག་ནས་གཟའ་ཉི་མའི་གླེང་མོལ་གྱི་ཁྱབ་རྒྱ་ཆེ་རུ་བཏང་སྟེ་བགྲོ་གླེང་བ་དག་གི་བསམ་བློའི“འཚོ་བཅུད”ཀུན་ལ་དབུལ་འདོད་པས་ཡིན་ལ། གཉིས་སུ་ཐག་ཉེ་རིང་གི་གྲོགས་པོ་དང་ངོ་ཤེས་པ་སྐོར་ཞིག་གིས་གཟའ་ཉི་མའི་གླེང་མོལ་དུ་ཕེབས་འདུན་ཡོད་པའི་བརྡ་བཏང་བྱུང་པས། ཁོ་བ་ཚོ་དང་། ཡང་ན་གླེང་མོལ་འདི་ཡི་ཕྱིར་མཉམ་འཛོམས་བྱེད་འདུན་ཡོད་པའི་དྲ་སྟེང་རྩོམ་འབྲི་བ་དག་ལ་སྟབས་བདེ་ཡོང་བར་བསམ་སྟེ་ཡི་གེའི་བརྒྱུད་ལམ་ནས་བགྲོ་གླེང་བྱ་བར་གཏན་འཁེལ་པ་ལགས།
དེ་ཡང་ཐེངས་འདིའི<<བརྗོད་བྱར་མཐོ་རིམ་སློབ་མའི་གནས་བབ་དང་བསམ་བློའི་འགན་འཁྲི>>ཞེས་པ་གདམས་དགོས་པའི་རྒྱུ་མཚན་ནི་གཅིག་ནས་ད་ལྟའི་མཐོ་རིམ་སློབ་མའི་གནས་བབ་སྟེ་མཐོ་རིམ་སློབ་མའི་སློབ་སྦྱོང་གི་ཁོར་ཡུག་དང་བསླབ་བྱའི་ཆེད་ལས། ད་དུང་མཐོ་རིམ་སློབ་མའི་སློབ་དེབ་དང་ཀློག་དེབ་སོགས་ཀྱི་སྐོར་ནས་གླེང་རྒྱུ་གལ་ཆེན་དུ་མཐོང་ཞིང་། གཉིས་ནས་མཐོ་རིམ་སློབ་མའི་བསམ་བློའི་ཁ་ཕྱོགས་ཏེ་ཤེས་ཡོན་འཐུས་ཚང་ཡིན་མིན་དང་བསམ་བློའི་གཞི་རྐང་བརྟན་མིན། དཔྱད་སྟོབས་ཀྱི་བློ་མིག་དང་འགན་འཁུར་གྱི་འདུ་ཤེས་ལྡན་མིན་སོགས་ལས་འཕྲོས་ཏེ་རང་རེའི་མཐོ་རིམ་སློབ་མ་དག་གི་གླེང་རི་བའི་སློབ་སྦྱོང་གི་གྲུབ་འབྲས་དང་། ཡང་ན་འཐུས་ཤོར་དང་མི་འདང་སའི་ཕྱོགས་ཅི་ཡོད་ལ་ཞིབ་མོ་རྣམ་འཐག་བྱེད་པའི་རེ་བ་འཛིན་པས་ཡིན་ནོ།
གཟའ་ཉི་མའི་གླེང་མོལ་འགོ་བརྩམས་པ་ནས་ད་བར་ཟླ་ངོ་རེ་གཉིས་སོང་ཟིན་ན་ཡང་བགྲོ་གླེང་མང་བོ་ཞིག་ཚོགས་ཐུབ་མེད་ཅིང་། སྔོན་མར་རེ་འགའ་ཚོགས་ཟིན་པ་དག་ཀྱང་འཐུས་ཚང་དང་རྒྱས་བོ་སོགས་གང་ཡང་མིན་པར་མ་ཟད་གླེང་མོལ་ཞེས་པའང་ངོ་ཤེས་དང་རང་ཚོའི་གྲོགས་པོ་འགའི་སྤྱིར་བཏང་གི་ཁ་བརྡ་ཡིན་པ་ལས་གཞན་ཅི་ཡང་མིན། དེ་ལས་ཀྱང་ཤེས་དགོས་པ་ཞིག་ནི་གླེང་མོལ་འདི་རུ་ད་སྔ་ཆེད་དུ་མཁས་པ་དང་ཤེས་ཡོན་པ་སོགས་ཆེད་འབོད་བྱས་མྱོང་པ་ཅི་ཡང་མེད། རྒྱུ་མཚན་ནི་ང་ཚོས་འདི་རུ་ཅི་ཞིག་ཐག་ཨེ་ཆོད་དམ་སྙམ་སྟེ་མཉམ་འཛོམས་བྱེད་ཀྱི་མེད་ལ་གྲོས་ཆོད་དང་གྲོས་གཞི་ཟེར་བ་སོགས་ཀྱང་ཁ་ལ་བླངས་མ་མྱོང་བས་གཅིག་བྱས་ན་ཆེན་པོ་དག་གི་ཆུ་ཚོད་གྲོན་པ་ཁོ་ནར་སྲིད་ན་ཐང་།
འུ་ཚོའི་བགྲོ་གླེང་མང་དག་ཅིག་ཏུ་གཏམ་རྫིག་པོ་བཤད་མཁན་མང་ན་ཡང་སྐད་ཆ་དྲང་མོར་སྨྲར་མཁན་ཉུང་བ་དང་། ཅི་ཞིག་གི་གནད་དོན་གསལ་བོར་ངེས་ཡོད་ན་ཡང་དོན་དེ་འགན་དུ་ལེན་མཁན་དཀོན་པས་ན། སྟབས་བདེའི་གླེང་མོལ་འདི་རུ་གང་ཞིག་ཐག་ཆོད་སོང་དང་ཅི་ཞིག་ལ་གྲོས་བྱུང་སོང་སོགས་མི་ཟེར་མོད། བགྲོ་གླེང་བ་དག་གིས་རང་རང་གི་སེམས་ཀྱི་ན་ཟུག་ཅི་ཡོད་བཤད་འཐུས་པ་དང་ཁ་བརྡ་གང་ཡོད་ལྷུག་པོར་མོལ་ཆོག་པ་འདི་ཡང་འཚོ་བ་རོལ་སྟངས་ཤིག་དང་བསམ་བློའི་ལས་འགུལ་ཞིག་མ་རེད་ཟེར་ས་མེད་དོ།
བདག་གིས་སྙམ་ན་མཐོ་རིམ་སློབ་ཆེན་པ་ནི་བསམ་བློ་དང་དཔྱོད་ཤེས་ཀྱི་འགྲུལ་བཞུད་པ་ཞིག་ཡིན་དགོས་པ་འདྲ་ཞིང་། ལྷག་པར་དུ་འུ་ཚོའི་མཐོ་རིམ་སློབ་ཆེན་པ་ཚོར་དེ་བས་ཀྱང་གལ་ཆེན་ཡིན་པའི་འགན་ཞིག་བདོག་པ་ནི་རང་ཚོའི་གནས་བབ་ཀྱི་ཆ་ནས་རེད། བོད་ནང་ཁུལ་དུ་བསམ་བློ་རེ་བཏང་ན་བོད་མི་ཚོས་བོད་རང་གི་སྐད་ཡིག་སྦྱོང་བའི་སྒོ་མོ་ཙམ་པོའང་གཞན་གྱིས་རྒྱབ་ཟིན་པ་རེད་ལ། ཐ་ན་འཇིག་རྟེན་འདིར་འཚོ་བའི་གདམ་ཀ་མེད་པའི་གནས་སྟངས་ཀྱང་ཁོ་བ་ཚོའི་མགོ་ཐོག་ཏུ་བབ་ཡོད་པ་རེད། དེ་བས་འུ་ཚོའི་སློབ་ཆེན་པ་ཚོས་བསམ་བློ་དང་ཤེས་རབ་བོར་ཏེ“ར་བཟི་རིག་བརྡབ”ཀྱི་སྐྱེ་བ་ལེན་མི་ཉན་ཅིང་། མཐོ་སློབ་གྱི་སྒོ་ཆེན་འགྲིམ་དུས་དཔའ་བོའི་མི་རབས་འདིའི་མིང་བྱང་བོར་བའི་ཟློས་གར་ནི་དེ་བས་ཀྱང་འཁྲབ་མི་རུང་།
དེ་བས་ཐེངས་འདིར་མཐོ་རིམ་སློབ་མའི་གནས་བབ་གླེང་རྒྱུ་འདི་ཉིད་གལ་ཆེན་དུ་བསམ་ཞིང་། ལྷག་པར་དུ་བསམ་བློའི་འགན་འཁྲི་ཞེས་པ་འདི་གཙུགས་པར་བྱས་ཏེ་སྙིང་གི་རུས་པ་སྲ་ཞིང་དཔྱོད་པའི་བློ་མིག་ཡངས་ལ། འགན་འཁྲིའི་འདུ་ཤེས་ལྡན་པ་དག་ལ་དཔྱད་གཞིར་བཞག་པ་ཡིན། འདི་དང་འབྲེལ་ནས་འུ་ཚོའི་རྩོམ་པ་པོ་འགའ་ཞིག་གིས་ཐེངསའདིའི་བརྗོད་གཞིར་དམིགས་ཏེ་ཆེད་རྩོམ་འགའ་ཡང་གནང་བྱུང་ན་ཐོག་མར་ང་ཚོས་ཁོ་བ་ཚོའི་ལྷག་བསམ་དག་པའི་རྒྱབ་སྐྱོར་ལ་དགའ་པ་སྟོན་ཅིང་།གཏིང་ཟབ་པའི་ལམ་སྟོན་ལ་ཡི་རངས་འབུལ།
མཇུག་མཐར་རྒྱ་ཆེ་བའི་དྲ་གྲོགས་དག་གིས་ཐེངས་འདིའི་བརྗོད་གཞི་དང་འབྲེལ་བའི་བསམ་ཚུལ་ལྷུག་སྩོལ་གནང་བའི་རེ་བ་དང་བཅས།
ཐེངས་འདིའི་གཟའ་ཉི་མའི་གླེང་མོལ་གྱི་སྔོན་འགྲོའི་བསྒྲགས་གཏམ་གྱི་ཚབ་ཏུ་གཉན་པོས་སྦྱར།
༢༠༡༢ ༠༥ ༢༠