༼ནང་པ་སངས་རྒྱས་པ་དང་འབྲེལ་བའི་གློག་བརྙན་ཡིད་དབང་འཕྲོག་པ་ཞིག༽
གློག་བརྙན་འདི་ནི་ལྷོ་ཁོ་རེ་ཡ་ནས་བཟོས་པ་ཞིག་རེད། གློག་བརྙན་འདིའི་ནང་དོན་ནི་མཚོ་དབུས་སུ་གནས་པའི་ཁང་མིག་གཅིག་ཅན་གྱི་ལྷ་ཁང་ཆུང་ངུ་ཞིག་ཏུ་བཙུན་པ་རྒན་པ་ཞིག་དང་ཁོང་གི་དགེ་ཕྲུག་ན་གཞོན་ཞིག་གི་མི་ཚེ་ལས་འཕྲོས་པའི་གཏམ་རྒྱུད་ཅིག་རེད། དེ་ཡང་དགོན་པ་ཆུང་ངུ་དེ་མཚེའུའི་སྟེང་དུ་གཡེངས་པའི་ཚུལ་གྱིས་བཟོས་ཡོད་པ་དང་མཚེའུ་བརྒལ་བར་ཤིང་གྲུ་ཆུང་ངུ་ཞིག་ཡོད་པ་དེ་བཏང་ནས་འགྲོ་དགོས། མཚེའུའི་ཁོར་ཡུག་ནི་ནགས་ཚལ་གྱིས་ཁེབས་པའི་རི་བོ་དང་བྲག་རིས་བསྐོར་བས་ཉམས་དགའ་བ། རིག་པ་དྭངས་བ། སྤྲོ་སྣང་ཁོལ་བ། ཞི་བདེ་བག་ཕེབས་ཀྱི་ཚོར་སྣང་དབང་མེད་དུ་སྟེར་བ་ཞིག་རེད།
དཔྱིད།
དེ་ཡང་བཙུན་པ་རྒན་པ་ཞིག་ལ་དགེ་ཕྲུག་བྱིས་པ་ཞིག་ཡོད་པ་དེས་རི་ངོས་ནགས་གསེབ་ཏུ་འཁྱམས་ཉུལ་བྱེད་སྐབས་ཆུ་མིག་ནང་གི་ཉ་ཆུང་ངུ་ཞིག་བཟུང་ནས་རྐེད་པ་སྐུད་པས་བསྡམས་ནས་དེའི་སྣེར་རྡོ་ཆུང་ངུ་ཞིག་བཏགས་ནས་ཆུ་ནང་དུ་འཕངས། ཉ་ཆུང་དེའི་འཕག་འཚག་ག་ཚོད་མང་པོ་བྱས་ཀྱང་སྐྱལ་མི་ཐུབ་པ་ལ་བལྟས་ནས་མཚར་སྣང་སྐྱེས་ཤིང་གད་མོ་མང་པོ་བགད། དེ་བཞིན་དུ་སྦལ་བ་ཞིག་ལ་རྡོ་བཏགས་ནས་བཏང་། སྦྲུལ་ཞིག་ལ་རྡོ་བཏགས་ནས་བཏང་བ་སོགས་ཉེས་དམིགས་ཅན་གྱི་རྩེད་མོ་མང་པོ་ཞིག་རྩེ་བཞིན་པ་དགེ་རྒན་གྱི་ལྐོག་ནས་མཐོང་ཡང་མ་མཐོང་བའི་ཟོལ་བྱས། ཉིན་དེའི་དགོང་མོར་དགེ་ཕྲུག་གཉིད་དུ་ཡུར་ཡོད་སྐབས་དགེ་རྒན་གྱིས་རྡོ་ཆེན་པོ་ཞིག་ཐག་པར་བསྡམས་ནས་དགེ་ཕྲུག་གི་རྒྱབ་དུ་བཅིངས་ནས་དགྲོལ་མི་ཐུབ་པ་བྱས། དགེ་ཕྲུག་གཉིད་ལས་སད་སྐབས་དགེ་རྒན་ལ་རྡོ་དེ་གློད་རོགས་ཞེས་ཞུ་བ་ཕུལ་སྐབས་དགེ་རྒན་གྱིས་སྔར་ཉིན་མཐོང་བའི་ཉ་དང་སྦལ་བ་སོགས་ལ་རྡོ་བཏགས་པའི་ཚུལ་དང་དཔེར་སྦྱར་ནས་བཀའ་བཀྱོན་དང་འབྲེལ་རྡོ་དེ་རྒྱབ་ཏུ་བཅིངས་བཞིན་དུ་ཉ་དང་སྦྲུལ་སོགས་རང་དབང་དུ་གཏོང་བར་བཏང་། དགེ་ཕྲུག་གི་རྒྱབ་ཏུ་རྡོ་བཅིངས་བཞིན་དུ་རིའི་ལྡེབས་སུ་བསྐྱོད་སྐབས་ཉ་ནི་ཤི་ཟིན། སྦྲུལ་ནི་བྱ་ཡིས་ཟོས་ཚར། རུས་སྦལ་གཅིག་པོ་ཤི་མ་གསོན་དུ་ལུས་ཡོད་པའི་ཚུལ་མཐོང་ནས་ཉེས་དམིགས་དྲན་པ་དང་སྙིང་རྗེ་སྐྱེས་ནས་ངུ་ཤོར།
དབྱར།
དགེ་ཕྲུག་དེ་ན་གཞོན་ལང་ཚོ་དར་ལ་བབ་པའི་སྐབས་ཤིག་ལ་བུད་མེད་ཅིག་གིས་རང་གི་བུ་མོ་ན་གཞོན་དགེ་ཕྲུག་དེ་དང་ན་ཚོད་མཉམ་པ་ཞིག་ཁྲིད་ནས་དགོན་པར་སླེབས། དེ་ཡང་བུ་མོ་དེ་ལ་ནད་གཞི་གསལ་ཁ་མེད་པའི་ན་ཚ་ཤིག་གིས་ཟིན་ནས་ཡོད་པ་དྲག་ཏུ་རེ་ནས་གནས་སྐབས་རིང་དགོན་པར་འཇོག་པའི་རེ་བ་བཏོན། དགེ་རྒན་གྱིས་དེ་ལུགས་ཁས་བླངས་ནས་བུ་མོ་ན་གཞོན་དེ་དགོན་པར་ཉར། ཉིན་དེ་ནས་བཟུང་དགེ་ཕྲུག་གི་སེམས་པ་བུ་མོ་དེར་ཤོར། ཡིན་ན་ཡང་ངོ་ཚའི་དབང་གིས་ཆགས་གཏམ་གླེང་མ་ཕོད། ཉིན་ཞིག་ལ་བུ་མོ་དེ་ལྷ་ཁང་ནང་གི་སྟོན་པའི་སྐུ་བརྙན་མདུན་དུ་གཉིད་དུ་ཡུར་ཡོད་སྐབས་ཤིག་ལ་དགེ་ཕྲུག་གིས་བུ་མོ་དེའི་བྲང་ཁར་ལག་པས་རེག་ཙམ་བྱས། བུ་མོ་གཉིད་ལས་སད་ནས་ཁོར་འགྲམ་ལྕགས་ཤིག་བརྒྱབ། ཁོས་དེ་མ་ཐག་སྟོན་པའི་སྐུ་བརྙན་གྱི་མདུན་དུ་བསྡད་ནས་འགྱོད་བཤགས་གི་ཆོ་ག་བྱེད་བཞིན་པ་དགེ་རྒན་གྱིས་མཐོང་། ཡིན་ན་ཡང་ཉིན་ནས་ཉིན་རེ་བཞིན་དགེ་ཕྲུག་དང་བུ་མོ་ནད་པའི་འབྲེལ་བ་ཇེ་ཉེར་སོང་ནས་ནགས་ཚལ་གསེབ་ཏུ་འཁྱམས་ཉུལ་བྱེད་པའི་ཟོལ་གྱིས་ཆགས་པ་སྤྱོད་དུ་འགྲོ་བ་དང་། མཚན་མོར་དགེ་རྒན་གཟིམ་ཡོད་པའི་གོ་སྐབས་བཟུང་ནས་གྲུ་ཆུང་ནང་དུ་ཆགས་པ་སྤྱོད་ཅིང་ཉལ་བ་སོགས་བྱེད་བཞིན་དགེ་རྒན་གྱིས་གསལ་བར་མཐོང་། ཡིན་ན་ཡང་དགེ་རྒན་གྱིས་ཞེ་སྡང་གི་སྒོ་ནས་གཤེ་བ་སོགས་ལས་ལྡོག་སྟེ་དགོང་མོ་ཞིག་ལ་དགེ་ཕྲུག་དང་བུ་མོ་ནད་པ་གཉིས་གྲུའི་ནང་དུ་ཆགས་པ་སྤྱོད་རྗེས་གཉིད་འཐུག་པོ་ལོག་ཡོད་སྐབས་སུ་དགེ་རྒན་གྱིས་ག་ལེར་གྲུ་གཟིངས་དེ་ཚུར་རང་གི་གམ་དུ་འཐེན་ནས་གྲུའི་རྐུབ་ཀྱི་ཆུ་འགོག་བྱེད་ཀྱི་ཤིང་ཚལ་བ་དེ་ཕུད། གྲུ་ཆུ་ཡི་གཏིང་ཏུ་བྱིངས་ལ་ཉེ་སྐབས་ཁོང་གཉིས་གཉིད་ལས་སད་དེ་དགེ་རྒན་གྱི་མདུན་དུ་ངོ་ཚ་འཇིགས་སྐྲག་འགྱོད་པ་ཚོད་མེད་པ་ཞིག་བྱུང་། དེ་ནས་དགེ་རྒན་གྱིས་དགེ་ཕྲུག་ལ་འདོད་སྲེད་ཀྱི་ཉེས་དམིགས་རྒྱས་པར་གསུངས་ཞིང་བུ་མོ་དེ་ཡང་དགོན་པ་ནས་ཕྱིར་འབུད་དགོས་ཚུལ་གསུངས། སྐབས་དེར་དགེ་ཕྲུག་ཤིན་ཏུ་ཁྲོས་ནས་དགོང་མོ་དེར་དགོན་པའི་ནང་གི་སྟོན་པའི་རྡོ་སྐུ་དང་བྱ་ཕོ་ཚེ་ཐར་ཞིག་ཡོད་པ་ཁུར་ནས་བུ་མོ་དེའི་རྗེས་སུ་བསྙེགས།
སྟོན།
ལོ་མང་པོ་ཞིག་འདས་པའི་རྗེས་སུ་ལོ་ན་རྒས་པའི་དགེ་རྒན་དེ་གྲོང་དུ་སོང་ནས་འཚོ་རྒྱགས་དང་ལྷན་དུ་ཞིམ་བུ་ཞིག་ཁུར་ནས་དགོན་པར་ལོག སྐབས་དེར་ཟས་རིགས་བསྒྲིལ་ཐུམ་ཚགས་ཤོག་ཅིག་གི་སྟེང་ལ་སྐྱེས་པ་ཞིག་གིས་རང་གི་བཟའ་ཟླ་བསད་ཚུལ་འདྲ་པར་དང་སྦྲགས་པ་ཞིག་མཐོང་། དེ་ནི་གཞན་སུ་ཡང་མ་ཡིན་རང་གི་སྔར་གྱི་དགེ་ཕྲུག་དེ་ཡིན་པ་ཤེས། དེ་མ་ཐག་ཏུ་མཚེའུའི་མཐར་མི་ཞིག་གིས་འབོད་བཞིན་པ་མཐོང་། དེ་ནི་རང་གི་དགེ་ཕྲུག་ལག་དམར་དེ་ཡིན་པ་དང་། ད་དུང་ཁྲག་གིས་གོས་པའི་གྲི་ལག་ཏུ་ཐོགས་བཞིན་རང་གི་བཟའ་ཟླ་དེ་སྐྱེས་པ་གཞན་ཞིག་དང་ཆགས་འབྲེལ་ཡོད་པ་ཤེས་ནས་བཟའ་ཟླ་བསད་ཟིན་ན་ཡང་ད་དུང་ཞེ་སྡང་གིས་མྱོས་ནས་སེམས་རྣལ་དུ་མི་གནས་པར་གྱུར་ནས་དགོན་པར་གབ་ཡོལ་བྱ་ཆེད་དུ་འབྱོར། དགེ་རྒན་གྱིས་དེ་མ་ཐག་ཏུ་དགེ་ཕྲུག་ལག་དམར་ལ་གཤེ་ཞིང་རྡུང་བརྡེགས་དྲག་པོ་བྱས། རལ་གྲི་ཁྲག་གིས་གོས་པ་ལག་ཏུ་གཏན་ནས་རང་གིས་རང་ཉིད་གསོད་དུ་བསྐུལ། ཡིན་ན་ཡང་དགེ་ཕྲུག་གིས་རང་ཉིད་གསོད་མ་ནུས། མཐར་དགེ་རྒན་གྱིས་དགེ་ཕྲུག་ཐག་པར་བསྡམས་ཤིང་དགོན་པའི་གནམ་ཡོལ་ངོས་སུ་བཏགས་པའི་ཐག་སྣེ་དང་ཉེ་བར་སྣུམ་སྒྲོན་སྦར་ཞིང་ག་ལེར་ཐག་པ་ཚིག་ནས་ཆད་ཡོང་བ་ཞིག་བྱས། རང་གིས་ཞིམ་བུ་ལག་པའི་གྲུ་ཁུག་ཏུ་བསྣམས་ནས་ཞིམ་བུའི་རྔ་མ་ལ་སྣག་ཚ་འགོས་བཅུག་ཅིང་རྒྱ་ནག་གི་ཡིག་གཟུགས་རྙིང་པའིཤེས་རབ་སྙིང་པོའི་མདོ་དགོན་པའི་ཁྱམས་གྱི་པང་ལེབ་སྟེང་དུ་འབྲི་མགོ་བརྩམས། ཐ་མ་དགེ་ཕྲུག་དཔྱངས་ཡོད་པའི་ཐག་པ་ཆད་ནས་སར་ལྷུང་བ་དང་དགེ་ཕྲུག་ལ་ཁྲག་གིས་གོས་པའི་གྲི་དེ་གཏད་ནས་པང་ལེབ་སྟེང་དུ་རང་ཉིད་ཀྱིས་འབྲི་བཞིན་པའི་ཤེར་སྙིང་གི་མདོ་དེ་འབུར་དོད་ཀྱིས་བརྐོ་རུ་བཅུག སྐབས་དེར་ཉེན་རྟོག་པ་གཉིས་ཀྱང་ཁོའི་རྗེས་དེད་ནས་ཁོ་འཛིན་ཆེད་དུ་སླེབས། ཡིན་ན་ཡང་དགེ་རྒན་གྱི་རེ་བ་བཞིན་ཤེར་སྙིང་གི་མདོ་དེ་བརྐོས་ཚར་དུ་བཅུག་ནས་བཙོན་ཁང་དུ་ཁྲིད། དེའི་རྗེས་སུ་དགེ་རྒན་རང་ཉིད་ཀྱིས་ཤིང་གྲུའི་སྟེང་དུ་བུད་ཤིང་བརྩེགས། དེའི་སྟེང་རང་ཉིད་ཀྱི་ཁ་མིག་སྣ་གསུམ་རས་ཀྱིས་བསྒྲིབས་ཤིང་ཏིང་ངེ་འཛིན་དུ་བཞུགས་ནས་ལུས་ལ་མེ་སྦར་ཏེ་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་བཙན་ཐབས་སུ་འདའ་རུ་བཅུག
དགུན།
དགེ་ཕྲུག་དེ་ལོ་ན་བཞི་བཅུའི་ནང་དུ་འབྱོར་ཡོད་སྐབས་ཤིག་ལ་སླར་ཡང་དགོན་པར་འབྱོར། རང་གི་དགེ་རྒན་གྱི་གདུང་རུས་ཕྲན་བུ་དང་རིང་བསྲེལ་རྣམས་བསྡུས་ནས་འཁྱགས་རོམ་ལས་སྟོན་པའི་སྐུ་བརྙན་ཞིག་བཟོས་ནས་དེའི་ནང་དུ་བཞུགས་སུ་བཅུག་ཏེ་རྦབ་ཆུ་ཞིག་འོག་ཏུ་སྦས། རང་གི་དགེ་རྒན་གྱི་ཉམས་ལེན་ལུས་སྦྱོང་བ་དང་འབྲེལ་བའི་སྒོམ་ཐབས་ཀྱི་ཁྲིད་ཡིག་ཅིག་རྙེད་པ་དེ་དགུན་ཁའི་གྲང་ངར་གྱི་ཀློང་དུ་བརྩོན་པ་ཆེན་པོས་སྦྱང་བ་བྱས། ཉིན་ཞིག་ལ་བུད་མེད་ཅིག་གིས་ངོ་གདོང་རས་ཀྱིས་གཡོག་ནས་བུ་ཆུང་ཁུར་ནས་ངུ་བཞིན་དུ་དགོན་པར་འབྱོར། མཚན་མོ་དེར་གསང་བའི་སྒོ་ནས་བུ་ཆུང་དགོན་པའི་ནང་དུ་བཞག རང་ཉིད་ཕྱིར་ལོག་སྐབས་སུ་ཆབ་རོམ་ལ་བུ་ག་ཞིག་ཡོད་པའི་ནང་དུ་ལྷུང་ནས་ཆུར་བྱིངས་ཤིང་ཤི། བྱིས་པ་དེ་དགོན་པའི་ནང་གི་བཙུན་པས་བསྐྱངས། ཉིན་ཞིག་བཙུན་པ་དེས་སྡིག་སྒྲིབ་སྦྱོང་ཆེད་དུ་དགོན་པའི་ནང་དུ་སྨན་འདུལ་བྱེད་ཀྱི་རྡོ་འཁོར་ཆེན་པོ་ཡ་གཅིག་དེ་དྲུད། སྟོན་པའི་རྡོ་སྐུ་ཞིག་ཁུར་ནས་རིའི་ངོས་སུ་གོམ་བགྲོད་བྱས་ནས་རི་རྩེར་བསྐྱོད། སྐབས་དེར་ཁོའི་སེམས་ངོས་སུ་སྔར་རང་ཉིད་གཞོན་པའི་སྐབས་སུ་ཉ་དང་། རུས་སྦལ། སྦྲུལ་སོགས་ཀྱི་ལུས་ལ་རྡོ་བཅིངས་བའི་སྣང་ཚུལ་ཡིད་ལ་དྲན་ཞིང་འགྱོད་པ་དང་། སྙིང་རྗེ། གོ་རྟོགས་སོགས་སྐྱེས་པའི་སྣང་ཚུལ་གསལ་བོར་སྟོན། དེ་ལྟར་ངལ་བ་ཆེན་པོས་རིའི་ངོས་སུ་འཛེགས་ཏེ་ཐ་མ་རིའི་རྩེར་འབྱོར་སྐབས་སྟོན་པའི་རྡོ་སྐུ་དེ་རིའི་རྩེར་བཞུགས་སུ་གསོལ།
དཔྱིད།
སྐབས་དེར་བཙུན་པ་ཚོའི་མི་ཚེ་ཡང་ཏག་ཏག་དུས་བཞིའི་འཁོར་བསྐྱོད་དང་མཚུངས་པའི་སྐོར་བ་ཞིག་བརྒྱབ་སྟེ་དགེ་ཕྲུག་དེ་རང་ཉིད་དགེ་རྒན་དུ་གྱུར་ནས་བུ་ཆུང་དེ་དགེ་ཕྲུག་ཏུ་གྱུར་ཞིང་ཁོས་ཀྱང་ཉ་དང་སྦྲུལ་དང་སྦལ་བ་སོགས་ཀྱི་ཁའི་ནང་དུ་རྡོ་བཅུག་པ་སོགས་བྱེད་བཞིན་པའི་་སྣང་ཚུལ་སྟོན་པ་ཞིག་རེད།
གོང་གི་རང་མཆན་ནང་ཡི་གེ་མ་དག་པ་མང་པོ་ཤོར་འདུག་པར་དགོངས་ཡངས་ཞུ།
ཨ་ཁྱད་མཚར། འདི་གོང་མཆན་བུ་ཁ་ཤས་བཏབ་འདུག་པ་ཅིའི་ཕྱིར་ནག་བསུབ་བཏང་ཡིན་ནམ།
ཁ་བརྡ་ཚང་ལ་ཁ་ཡག་མ་འབྱོར་ན།།
ཁ་བརྡ་ཙམ་གྱི་མཆན་དེ་བསུབས་ཚར་འདུག།
ཁ་བརྡ་སྙད་པའི་རང་དབང་མི་སྤྲད་ན།།
ཁ་བརྡ་ཚང་གི་ཁ་ལས་སྒུར་རྒྱུ་རེད།།
ཏན་ཏན་ཁ་བརྡའི་དྲྭ་བར་དྲྭ་ནད་ཀྱིས་ཟིན་འདུག མེཀ་སི་ཀོའི་ནད་ཡམས་དེ་མིན་ནམ་སྙམ།
གློག་བརྙན་དེ་གང་མགྱོག་ལྟ་ཐུབ་པའི་རེ་འདུན་ཡོད།
སྙན་པོ་བྱུང་བཀླགུ་ཟིན
ངས་དེར་ལོ་ལྔའི་སྔོན་ཚར་བཞི་ཙམ་བལྟས། ཁྱེད་ཀྱི་འབྲི་སྟངས་འདིས་ངས་ལོ་གཅིག་སྔོན་གློག་བརྙན་ཞིག་ལ་ལྟ་བཞིན་བྲིས་པའི་ཨོ་ཐར་གྲོངས་པའི་སྔ་གཞུག་ཏུ་ཞེས་པ་དེ་ཟིལ་གྱིས་མནན་འདུག
དུས་བཞི་འཁོར་སྐྱོད་དང་བསྟུན་པའི་སྒྲུང་སྙན་པོ་ཞིག་བྲིས་འདུག།མི་ཞིག་ཡིན་ན་སྒྲུང་དང་ལོ་རྒྱུས་མེད་པ་མི་སྲིད་ལ། དེ་ཡོད་ཚད་ཡིག་ཐོག་ཏུ་ཕབ་རྒྱུ་ཡང་ཁག་པོ་རེད། །སྒྲུང་ནང་གི་བྱུང་རིམ་དང་མི་སྣ། ཁོར་ཡུག་ཞིབ་ཏུ་འབྲི་བ་གལ་ཆེ། །སྤྱི་ཚོགས་ཀྱི་དགའ་ཕྱོགས་གང་ཡིན་པ་དེ་དང་བསྟུན་ནས་བྲིས་ན་བྲིན་ཆེ་ན་ཐང་མོད། དེ་ལ་དོན་དངོས་དང་མི་མཐུན་པ་རྟོག་བཟོ་མང་པོ་ཞིག་ཀྱང་ཡོད་ངེས་རེད།
ཐུགས་རྗེ་ཆེ ཆ་ཚང་ཀློག་པ་ཡིན་ཡག་པོ་འདུག མུ་འཐུད་དེ་འདྲའི་རིགས་མང་ཙམ
ངས་གློག་བརྙན་འདི་ལ་བལྟས་པས་ནང་ཆོས་དང་མི་ཚེ་ལ་བསམ་ཞིབ་གསར་པ་ཁ་ཤས་ཤིག་བྱ་དགོས་བྱུང་སོང་། དེ་བཞིན་དུ་སྡིག་བཤགས་ཞེས་པའི་ནང་དོན་ལ་ཡང་ངོས་འཛིན་གསར་པ་ཞིག་ཐོབ་བྱུང་། ཁྱེད་རྣམ་པ་གློག་བརྙན་འདི་མ་བལྟས་མཁན་ཚོས་ཐེངས་གཅིག་ལྟོས་དང་ཧ་ཅང་ཡག་པོ་འདུག ང་ལ་རྩོམ་ཡིག་འབྲི་བའི་ནུས་རྩལ་སོགས་གང་ཡང་ཡོད་པ་མ་རེད། ཡིན་ན་ཡང་དེང་སང་ངས་ཅིག་འབྲི་ཁུལ་བྱེད་དུས་གནས་ཚུལ་གསར་པ་སྣ་རེ་ཙམ་ངོ་སྤྲོད་ཐུབ་པའི་རེ་བ་བརྒྱབ་ནས་ཅིག་བཤད་ཁུལ་བྱེད་བཞིན་ཡོད། དོ་སྣང་གནང་བར་ཐུགས་རྗེ་ཆེ།
གློག་བརྙེན་དེ་མི་རིང་བ་མིག་ལམ་དུ་མངོན་ཐུབ་པའི་རེ་བ་ཡོད།