ཤེས་དབང་བློ་གྲོས།
རྒྱལ་བའི་དགོངས་བཞེད་དང་མཁྲེགས་འཛིན་བསམ་བློ་ལས་འཕྲོས་པའི་ཉེན་བརྡ་རིང་མོ།
ལོ་རབས་མང་པོའི་སྔོན་དུ་འཕགས་ཡུལ་གྱི་རྒྱལ་སྲས་ཆེན་པོ་ཞི་བ་ལྷས། སྔོན་ཆད་མ་བྱུང་བ་ཡང་འདིར་བརྗོད་མེད།། ཅེས་སྔོན་མེད་པའི་བྱུང་བ་གསར་བ་གང་ཡང་བརྗོད་དུ་མེད་པར་གསུངས་ཡོད། དེའི་རྗེས་ཀྱི་དུས་རབས་མང་པོ་འདས་པའི་དེ་རིང་ངས་སྔོན་ཆད་བྱུང་མ་མྱོང་བའི་གཏམ་གསར་བ་ཞིག་བརྗོད་འདོད་བྱུང་། དེ་ནི་ལྟོས་འཇོག་གི་གཏམ་གསར་བ་ཞིག་ལས་རྣམ་པ་ཐམས་ཅད་དུ་གསར་བ་ཡིན་མི་སྲིད། དེ་ཡང་༸གོང་ས་ཐམས་ཅད་མཁྱེན་པ་སྐུ་ཕྲེང་བཅུ་བ་ཆེན་པོས། “ང་ཚན་རིག་ལ་དང་པའི་ཀུན་སློང་འདི་སྒེར་དོན་ཙམ་མིན་པར་བོད་ཀྱི་ཆབ་སྲིད་ཉམས་རྒུད་བྱུང་བའི་གཞི་རྩའི་རྒྱུ་རྐྱེན་གཅིག་ནི་བོད་དེང་རབས་ཅན་ལ་བསྒྱུར་མ་ཐུབ་པ་དེ་རེད། ཅེས་དང། ཚན་རིག་དང་སེམས་དོན་རིག་པ་གཉིས་ཟུང་འབྲེལ་གྱིས་འགྲོ་བ་མིའི་རིགས་ཀྱི་ཤེས་ཡོན་དང་ཤེས་རབ་ལ་མཐའ་རྒྱ་གསར་བ་ཞིག་བསྐྱེད་པར་རམ་འདེགས་བྱེད་ཆོག ལྷག་པར་ཕན་ཚུན་བར་གྱི་གྲོས་བསྡུར་ལ་བརྟེན་ནས་ཚན་རིག་དང་སེམས་དོན་རིག་པས་འགྲོ་བ་མིའི་རིགས་ཀྱི་དགོས་མཁོ་དང་བདེ་ཐབས་ལ་སྔར་ལས་ལེགས་པའི་ཞབས་འདེགས་བསྒྲུབ་ཐུབ་པའི་རེ་བ་བདག་ལ་ཡོད།” ཅེས་གསུང་བ་བཞིན། ༸གོང་ས་༸སྐྱབས་མགོན་ཆེན་པོས་ཕུགས་རྒྱང་རིང་པོའི་དགོངས་གཞི་སྟེ་བོད་དེང་རབས་ཅན་དུ་བསྒྱུར་རྒྱུའི་རྨང་གཞི་དང་། ནང་ཆོས་ཀྱིས་འཇིག་རྟེན་སྤྱི་ཡོངས་ལ་ཕན་བདེའི་ཞབས་འདེགས་སྒྲུབ་པ་དང་ལྷན་དུ་འཛམ་གླིང་སྤྱི་ཡོངས་ཀྱི་ངོས་ལེན་དང་ཡིད་སྨོན་ཤོར་བའི་ཚན་རིག་གི་སྒྲོམ་གཞིའི་ལམ་ནས་བོད་ཀྱི་ནང་བའི་གྲྭ་བ་རྣམས་རྒྱལ་སྤྱིའི་སྡིངས་ཆར་འཛེགས་ཏེ་བོད་དང་བོད་ཀྱི་མཚན་ནས་སྐྱོར་བཞིན་བོད་ཀྱི་རང་དབང་བསུ་བའི་དགོངས་བཞེད་འོག་ནས་སྔ་ཕྱི་བར་གསུམ་དུ་བཀའ་སློབ་ལམ་སྟོན་གནང་ཞིང་དཔལ་འབྱོར་སོགས་ཀྱི་མཐུན་རྐྱེན་ཡང་སྦྱར་ནས་ནང་བའི་གྲྭ་བ་རྣམས་ཚན་རིག་དང་ནང་བའི་རིགས་ལམ་མཉམ་གཤིབ་ཀྱི་ཞིང་ཁམས་ཤིག་ཏུ་འཁྲིད་ཐབས་གནང་ཡོད། དེ་ལྟར་ཡང་ནང་བའི་ལྟ་གྲུབ་དང་གཞུང་ལུགས་ལ་རྒྱུས་མངའ་ཟབ་པའི་ཆེན་པོ་དག་དང་། ནམ་ནམ་ཞར་ཞར་ལ་༸གོང་ས་མཆོག་ཟེར་ནས་ཆེས་རྩ་ཆེན་དུ་གླེང་བའི་འབྲེལ་ཡོད་ལས་སྣེ་དག་གིས་དེ་ནི་བཙན་བཀའ་ལྟ་བུ་ཞིག་ཏུ་ངོས་འཛིན་བྱས་ཤིང་གྲྭ་བས་ཚན་རིག་སློབ་ཚན་སྦྱང་དགོས་པའི་བསམ་བློའི་དགོས་དམིགས་འདི་བློ་ཡུལ་ལ་མ་ཤོང་བར་དེ་ནི་ནང་བའི་ཆོས་ཀྱི་སློབ་གཉེར་ཉམས་ཆག་གི་རྒྱུ་རུ་མཐོང་ནས་སྐད་ངན་སྟོང་ཁྲག་གི་ངུ་རྒྱངས་དང་བཅས་རྒྱལ་བའི་བཀའ་དགོངས་ཡིན་པ་རེད་ཟེར་བ་ཙམ་ལས་དགོས་པ་དང་། རྒྱབ་ལྗོངས་ཀྱི་གནས་ཚུལ་གང་ཡང་མ་གླེང་བ་སྟེ་གང་ཡང་གླེང་མ་ཤེས་པར་ཁྲལ་ཆོས་ཙམ་གྱི་འཛིན་གྲྭ་རེ་བྲེལ་བྲེལ་ཚུབ་ཚུབ་ངང་བསྡུས་པ་རེད། ཁོང་ཚོར་རྒྱུ་མཚན་དང་ཁུངས་འདྲེན་གཅིག་ཡོད་པ་ནི་མཁས་དབང་ཟམ་གདོང་རིན་པོ་ཆེས་ཚན་རིག་གིས་ནང་ཆོས་ཀྱི་སྤུས་མོ་ཙམ་ལ་སྙོབ་ཀྱི་མ་རེད་ཅེས་པ་དང་། ཚན་རིག་གིས་ནང་ཆོས་ལ་ཕན་ཐོགས་ཆེར་མེད་པའི་དགོངས་ཚུལ་གསུང་བཤད་རྣམས་ཡིན། ད་ནི་ད་བར་སུས་ཀྱང་བཤད་མ་མྱོང་བའི་གསུང་བཤད་འདི་གཉིས་ཀྱི་རྒྱབ་ལྗོངས་དང་དགོས་གལ་ནས་གླེང་ཏེ་དགོངས་གཞིའི་གནད་ཀྱི་མདོ་རྩ་བཟུང་སྟེ་བཤད་པར་བྱའོ།། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དངོས་ནི་གོང་དུ་རོབ་ཙམ་བཤད་པ་བཞིན་འཇིག་རྟེན་སྤྱི་ཡོངས་ཀྱི་མོས་མཐུན་དང་དད་པས་བཀུར་བའི་ཆོས་ལུགས་ཤིག་དགོས་ན་དེ་ནི་ཚན་རིག་གིས་བདེན་དཔང་གིས་མི་རྣམས་ལ་ཡིད་ཆེས་སུ་འཇུག་དགོས་རྒྱུ་དེ་ཡིན་པའི་གནས་ལུགས་ལ་གཞི་བཅོལ་བ་དང་། མཐར་ཐུག་གི་བདེན་པ་སྟེ་ཆོས་རྣམས་ཀྱི་རང་བཞིན་ངོ་མ་དེ་འཚོལ་བའི་དམིགས་ཡུལ་འདི་ནང་ཆོས་དང་ཚན་རིག་གཉིས་ཀྱི་གཅིག་མཐུན་གྱི་བསམ་བློ་ལྡན་པ་འདིའི་ངོས་ནས་དང་། ནང་ཆོས་དང་ཚན་རིག་གི་མཐུན་ཕྱོགས་མཉམ་སྦྲེལ་གྱི་ནུས་པས་འགྲོ་བ་མི་རྣམས་ཀྱི་ཕྱི་དང་ནང་གི་དགོས་མཁོ་འམ་བདེ་སྐྱིད་སྒྲུབ་ཐུབ་པའི་ཡིད་ཆེས་བཅས་ཀྱི་རྒྱབ་ལྗོངས་ནས་ཆོས་ཀྱི་གཞུང་ལུགས་ཀྱི་གོ་རྟོགས་ལྡན་པའི་གྲྭ་བ་ཚོར་ཚན་རིག་སློབ་སྦྱོང་གི་གལ་ཆེའི་རང་བཞིན་ནན་བརྗོད་གནང་བ་དང་སློབ་སྦྱོང་བྱེད་པར་སྐུལ་དེད་བྱས་པ་རེད། དེ་ཡང་གྲྭ་བ་རྣམས་ཚན་རིག་པ་ཆགས་ནས་རྡུལ་ཕྲན་ཚོན་ཆ་བཟོ་རྒྱུ་དང་། དཔལ་འབྱོར་འཚོལ་སྒྲུབ་བྱ་རྒྱུ་སོགས་ཀྱི་ཆེད་དུ་མ་ཡིན་པར་ཚན་རིག་གི་གཞི་རྩའི་ཤེས་བྱ་རྣམས་ངེས་པར་བྱས་ནས་ཐ་སྙད་དང་བསམ་བློའི་ཁ་ཕྱོགས་ངོས་འཛིན་གྱིས་ནང་ཆོས་ཀྱི་ལྟ་གྲུབ་སྒྲོམ་གཞི་གཞན་བློར་འཇུག་བདེ་བའི་བྱེད་ཐབས་ཀྱིས་ཕྱི་ནང་གི་དགོས་མཁོ་མཉམ་སྒྲུབ་ཀྱིས་བདེ་སྐྱིད་ལྡན་པའི་མིའི་རིགས་ཀྱི་སྤྱི་ཚོགས་ཤིག་བསྐྲུན་རྒྱུ་ནི་དགོས་དམིགས་མཐར་ཐུག་པའོ།། དེ་ལྟར་བྱུང་ན་སེམས་ཅན་ཐམས་ཅད་བདེ་བ་དང་ལྡན་པར་ཤོག་ཅེས་པའི་སྨོན་ལམ་འདི་དོན་དངོས་ཀྱི་ཕྱོགས་སུ་བསྙེག་པ་ཡིན་ལ་བསྟན་པ་རྒྱས་པར་ཤོག་ཟེར་བཞིན་དོན་དངོས་ཐོག་རང་དང་རང་གི་ཁོར་ཡུག་གཅིག་པོ་མ་གཏོགས་མི་རིག་པའི་ཆེས་རྒྱང་ཐག་ཉེ་བའི་བློ་མིག་ལྡོངས་པོ་དེ་ཚོར་ཡིད་གཏད་རྗེས་འབྲང་བྱེད་པ་ནི་ཛ་དྲག་དང་ཉེན་ཁའི་གནས་སོ།། འོ་ན་མཁས་དབང་ཟབ་གདོང་རིན་པོ་ཆེས་ཚན་རིག་གལ་ཆེན་དུ་གཟིགས་ཀྱི་མེད་པ་དང་། ནང་ཆོས་དང་བསྡུར་ཐབས་མེད་པ་གསུངས་པ་མ་ཡིན་ནམ། ད་དུང་ཚན་རིག་ལ་དགག་པ་གནང་བ་མ་ཡིན་ནམ་ཟེར་ན་དེ་ནི་འགལ་འདུ་བྱེད་སྟངས་ཆེས་ཞན་པ་ལས་ཀྱང་ཞན་པའོ།། རྒྱུ་མཚན་ནི་འཇིག་རྟེན་ཡོངས་གྲགས་ཀྱི་བཤད་སྟངས་ལྟར་ན་རིག་གཞུང་དང་བྱ་བ་གང་ཡིན་ཡང་ལེགས་དང་ཉེས་ཀྱི་ཆ་དང་། མཐུན་དང་འགལ་བའི་ཆ་གཉིས་ཡོད་པ་བཞིན་དུ་མཁས་དབང་ཟབ་གདོང་རིན་པོ་ཆེས་ནི་ཚན་རིག་གི་བྱུང་རབས་ཀྱི་ཀུན་སློང་དང་། ལྟ་གྲུབ་རང་ངོས་ནས་ནང་པའི་ཡང་དག་པའི་རིགས་ལམ་ལ་འགྲན་དུ་མེད་པར་གསུངས་ཤིང་། ༸གོང་ས་༸སྐྱབས་མགོན་ཆེན་པོ་མཆོག་གིས་ནི་འགྲོ་བ་མིའི་དགའ་ཕྱོགས་དང་ཤུགས་རྐྱེན་གྱི་འགྲོས་ལས་སྤྱི་ཕན་གྱི་ཆ་རྐྱེན་ཞིག་ཏུ་འགྱུར་བར་གཟིགས་པས་དེ་ལ་འགལ་བར་འཛིན་པ་ནི་འགལ་སྤོང་རྩོད་སྤོང་གི་གཞུང་ལུགས་ལ་གོམས་འདྲིས་ཡོད་མཁན་ཞིག་གི་ངོས་ནས་ཆེས་བླུན་རྟགས་བླ་མེད་པ་ཞིག་གོ། འདི་དང་འབྲེལ་ནས་ཡིད་སྐྱོ་བའི་གནས་ཚུལ་ཞིག་ཡོད་པ་ནི་གདན་ས་དང་དགོན་པ་ཁག་གི་དབུ་འཁྲིད་རེ་འགས་དུས་དང་དུས་སུ་༸གོང་ས་མཆོག་ཟེར་ཏེ་ཁ་ནས་འདོར་མེད་དུ་འབོད་ཀྱང་དོན་དངོས་ཐོག་རང་གི་བློ་ལ་མ་བབ་པའམ་མ་ཤོང་བའི་གནས་ཚུལ་གང་ལ་ཡང་དེའི་དགོངས་གཞི་འཚོལ་ཐབས་དང་། རྒྱུ་མཚན་དབྱེ་ཞིབ་མི་བྱེད་པར་གཡོལ་ཐབས་དང་། ཁྲལ་ཙམ་གྱི་ལས་གཞི་འགོ་འཛུགས་ཀྱིས་ཁོང་གི་མདུན་ནས་ལེགས་ཕྱོགས་རྐྱང་རྐྱང་གི་འགྲེལ་བཤད་བྱེད་པའི་སྲོལ་རྒྱུན་འདིའི་རྒྱུ་བ་ཧ་ཅང་མཐུག་པ་འདིའོ།། འདི་ནི་གོ་བདེ་བར་བརྗོད་ན་༸གོང་ས་མཆོག་དབུ་སྐོར་བཏང་བ་དང་སེམས་ནང་གི་༸གོང་ས་མཆོག་གི་རིན་ཐང་འགྲེལ་བཤད་བྱས་པའོ།། །།
ང་རང་ཁྱེད་ཀྱི་བསམ་ཚུལ་འདི་ལ་མོས་མཐུན་ཡོད་ལ།༧གོང་ས༧མཆོག་ལ་ལྐོག་ནས་མགོ་བོ་སྐོར་མཁན་ཡང་གདན་ས་ཁག་མང་།གདན་ས་ཁག་གི་རིག་པ་སྨྲ་བ་ཚོས་ཚན་རིག་ལ་འབད་བརྩོན་བྱས་ཏེ།ཚན་རིག་ལག་ཤེས་ཀྱིས་བོད་མི་ཞབས་ཞུ་བསྒྲུབ་ཐུབ་རྒྱུའི་རེ་བཡོད།དེ་མིན་བོད་གཞུང་ངོས་ནས་ཚན་རིག་ལག་ཤེས་ཀྱི་སློབ་སྦྱོང་སྤྲད་པའི་མི་སྣ་གཅིག་ཀྱང་སྟོན་རྒྱུ་མེད།ཐ་ན་ཙག་ཊ་རྐང་གཅིག་ཀྱང་བཟོ་མི་ཤེས་བར་ལོ་ངོ་ལྔ་བཅུ་སོང་།ད་རུང་འདི་ལྟར་བསྐྱལ་ངེས་རེད།གལ་སྲིད་གཞུང་གིས་ཚན་རིག་ལག་ཤེས་ཀྱི་ཡིག་བསྒྱུར་ལས་ཁུང་ཞིག་བཙུགས་ཡོད་ཚེ་དེ་རིང་བོད་ཡིག་གི་གནས་བབ་འདི་འཆི་ལ་ཉེ་བའི་རྔན་སྐྲག་འདི་བྱུང་དགོས་དོན་མེད།བཙན་བྱོལ་གཞུང་ལོ་ངོ་ལྔ་བཅུའི་རིང་ཤེས་རིག་གི་ཕམ་ཁ་བྱུང་བའི་འབྲས་བུ་དེ་རིང་དངོས་སུ་ཤར་ཡོད།
རྔམ་སྐྲག་ལབཅོས་རོགས
ཟམ་གདོང་རིན་པོ་ཆེ་འདི་གང་ཡིན་སར་མི་ཤེས་ཤེས་མདོག་བྱེད་རྒྱུར་དགའ་མཁན་ཞིག་ཡིན་ཚང་མས་ཤེས་གསལ་རེད། དེར་བརྟེན་ཁ་ཤས་ཀྱིས་འདི་ཕྱོགས་སུ་(ཟམ་གདོང་Google ) ཟེར་གྱིན་ཡོད།
གང་ལྟར་༧གོང་ས་མཆོག་གིས་ཚན་རིག་ཟབ་སྦྱོང་དང་ཚན་རིག་པ་མཉམ་དུ་བགྲོ་གླེང་ཐེངས་མང་བྱས་ཟིན། རྡུལ་ཕྲན་གཅིག་ཁོ་ནའི་སྟེང་གི་འཇིག་རྟེན་བཀླགས་རྗེས་གཞི་ནས་ཁོང་གི་རླབས་ཆེ་བའི་དགོངས་གཞི་ལ་ངོ་མཚར་སྲིད།
ཟམ་གདོང་ཚང་གི་ཚན་རིག་སྡེ་ཚན་གྱི་རིག་གནས་སྣ་གཅིག་ཀྱང་མི་ཤེས་པར་དེ་ལ་ད་དུང་ཚད་གཞི་འདྲ་འཇོག་ཁུལ་བྱེད་པ་ཧམ་པ་རང་རེད། ཐ་ན་ཟམ་གདོང་ཚང་གིས་ཚན་རིག་གི་མ་མཐའ་ཕྲ་རྡུལ་ཆ་བགོས་ཀྱི་སྡེབ་དེ་ཡང་མི་ཤེས་པ་ཐག་གིས་ཆོད།།།།།
ཧཧཧ མཁན་པོ་རང་རེད་འདུག་ དཔེ་མི་སྲིད་པའི་ཤེས་རྒྱ་འདུག ད་དུང་ཀླད་པ་རུལ་མེད་ན
མཁན་པོ་ཉི་མ་དང་ཁ་བ་འཚོ་མཉམ་འབྲེལ་གྱིས་ཙག་ཊའི་བཟོ་གྲྭ་ཞིག་ཡིན་ད།
ཆོས་ཀྱི་བསྟན་དགྲ་གཙོ་བོ་ནི་རིག་གཞུང་དང་སྲོལ་རྒྱུན་རེད། དེ་གཉིས་ལ་བརྟེན་ནས་ཆོས་ཆོས་སུ་བསྟན་མི་ཐུབ་པར་འཁྱོག་བཤད་དང་འབག་བཙོགས་འདྲ་མིན་གྱི་བརྐང་ནས་ད་ཆ་འཛམ་བུ་གླིང་ཕྱོགས་ཡོངས་སུ་ཆོས་ཁར་འཁུར་ནས་དོན་དུ་རིག་གཞུང་དང་སྲོལ་རྒྱུན་དར་སྤེལ་བྱེད་བཞིན་གདའ། ད་ནི་རྒྱང་རིང་པོར་ལྟ་མི་དགོས་པར་འུ་བཅག་གི་ནང་ཆོས་ལྟེ་སྣས་གང་སར་ཡོད་པ་དག་ལ་གཟིགས་ན་ཤེས་ཐུབ། ཆོས་བཤའ་མ་ཞིག་སྤེལ་མཁན་ནི་ཧ་ཅང་དཀོན། མི་མང་གི་དགོས་མཁོ་དང་ཁམས་ལ་བསྟུན་ནས་ཆོས་དེ་རིག་གཞུང་དང་སྲོལ་རྒྱུན་གྱི་ལྷད་རྒྱབ་ནས་འཆད་པ་མང་། དེ་ལྟར་མ་བྱས་ན་མི་མི་འཁོར་ལ་མི་མ་འཁོར་ན་ཀུན་དགའ་དོན་གྲུབ་ག་ནས་ཡོང་། དེ་མེད་ན་ནང་ཆོས་ལྟེ་གནས་དེ་ཡང་སྒོ་རྒྱབ་པ་ལས་གཞན་ཐབས་ཤིག་ལྷག་མེད།
ནང་པའི་ཆོས་དེ་དངོས་གནས་དཔྱད་པ་བྱེད་མཁན་གྱི་སྐྱེས་བུ་སུ་འདྲ་ཞིག་ཡིན་རུང་། དེར་གདེང་སྤོབས་དང་གཏིང་མཐའ་བྲལ་བ་ཞིག་ཡོད་ཀྱང་དུས་དང་གནས་སྐབས་ཀྱི་ཁེ་ཕན་ལ་ལྟོས་ནས་ནང་ཆོས་ཁར་འཁུར་ནས་རིག་གཞུང་དང་སྲོལ་རྒྱུན་དར་སྤེལ་བྱེད་བཞིན་ཡོད། དཔེར་ན་ཆོས་ཀྱི་སྙིང་པོར་དོན་སྟིལ་འབྲུ་ཙམ་ཡང་མེད་རྐྱང་ལག་མགོར་ཕྲེང་བ་ཞིག་འཁྱེར་ན་སྔགས་བཟླ་ཁུལ་དང་བརམཐིལ་དུ་མ་ནི་འཁོར་ལོ་ཞིག་བསྐོར་ནས་ཆོས་ཤེས་ཁུལ་ད་དུང་དུས་ཚེས་བཟང་ལ་བསང་གསོལ་གཏོང་ནས་སྟོན་པ་བསུ་ཚུལ་སོགས་ནི་དེང་གི་ནང་ཆོས་ཀྱི་ངོ་བོར་འགྱུར་བཞིན་པས་དངོས་གནས་ཆོས་སྤེལ་མཁན་ཚོས་ཡིད་ཟབ་མཛད་རོགས།
ཚད་ཡོད་ཀྱི་རྒྱུ་དངོས་དག་རྨང་གཞིའི་སློབ་གྲ་ཡག་པོ་གཉེར་རྒྱུ་དང་དང་བོད་ཀྱི་ལོ་ཆུང་རྣམས་ལ་འཛམ་གླིང་སྤྱི་དང་མཐུན་པའི་སློབ་གསོ་ཡག་པོ་ཞིག་སྤྲོད་རྒྱུ་དེ་ནི་གནད་ཀྱི་དམ་པ་ཡིན། དེ་ལྟར་བྱེད་ཐུབ་ན་ཙག་གྲ་ཙམ་མ་ཟད་གློག་ཀླད་ལ་སོགས་པ་བཟོ་ཐུབ་མཁན་ཐོན་རྒྱུར་ཐེ་ཚོམ་མེད། ཆོས་དང་ཚན་རིག་སུ་ལ་བདེན་པ་ཡོད་མེད་དེ་སྐུ་མདུན་ཀྱིས་གསུངས་པ་ལྟར་རྩོད་པའི་གནས་ཤིག་ཆགས་ཀྱི་མེད་ལ། དེ་ལས་གྲ་པ་ཡིན་ན་རི་ཁྲོད་ལ་བསྡད་ནས་གཙོ་བོ་ཆོས་ལ་ཉམས་ལེན་དང་། སྐྱ་བོ་ཡིན་ན་སྤྱི་ཚོགས་ཐོག་ཞུགས་ནས་གཙོ་བོ་ཚན་རིག་ཤེས་བྱ་ཡག་པོ་སྦྱོངཐུབ་པ་ཡིན་ན་རྒྱལ་བའི་དགོངས་དོན་འགྲུབ་པ་ཡིན་ལ་རང་གི་མི་ཚེ་ཡང་དོན་དང་ལྡན་པ་ཞིག་ཡོང་གི་རེད། སྐྱ་མིན་སེར་མིན་བྱས་དྲག་ན་ཡག་པོ་རང་ཨ་ཡོད།
མིས་བསམ་མ་མྱོང་བ་ཞིག འདྲེ་འདིས་འུར་གྱིས་བསྒྲགས་སོང་། ནང་བའི་ལྟ་གྲུབ་དང་གཞུང་ལུགས་ལ་རྒྱུས་མངའ་ཟབ་པའི་ཆེན་པོ་དག་གིས༧གོང་ས་མཆོག་གི་དགོངས་གཞི་ཅི་ཙམ་གཏིང་མི་དཔོག་རུང་། མགོ་གཡུག་བའི་མ་ཟད་སེམས་གཅུས་ནས་བསྡད་དེ་མཁྲེགས་འཛིན་བྱེད་ལུགས། གང་ནས་མཐོང་སོང་། ཅི་ཡང་མི་ཤེས་ལ་གང་ཡང་མི་མཁྱེན་རུང་བྲེལ་བྲེལ་འཚབ་འཚུབ་གྱིས་འཛིན་གྲ་ཞིག་བཙུགས་བ་བདེན་ན། དཔྱོད་ཤེས་ཅན་ཁྱོད་ལོགས་སུ་བགོས་སྐལ་ཆད་སོང་བ་རེད་མ་གཏོགས། འཛིན་གྲ་འདི་གོམས་སྟབས་གསར་བ་ཡིན་པའི་ཆ་ནས་འབྲས་བུ་ལྷམ་མེར་བ་ཞིག་སྟོན་རྒྱུ་མེད་མོད། ལམ་སྣེ་ཞིག་ལ་གདོང་གཏད་ནས་དགོས་མཁོ་ཞིག་གི་དོན་དུ་སྙེགས་བཞིན་པ་རེད།
ཟམ་གདོང་བླ་མའི་ཁྱད་ཆོས། ཁྱོད་དང་ངའི་མཐོང་སྣང་མི་འདྲ་བའི་རྒྱུ་མཚན་རེ་ཡོད་པའི་ཆ་ནས། སྐབས་སུ་གླེང་འདོད་མི་འདུག འོན་ཀྱང་། བདག་གི་བསམ་སྣང་ལ་ཟམ་གདོང་བླ་མ་རྩ་ཆེན་པོ་རེད། བླ་མ་མཁས་བ་རེད། བཀའ་ཟུར་དཔྱོད་ཤེས་ཅན་རེད། བློས་མི་གཟོད་ན་གནས་ལུགས་ཤོད། ག་ལེར་གླེང་ན་འགྲིག་གི་རེད།
མ་གཞི་་་སྐབས་ཀྱི་དཔྱད་མཆན་འདི་བཀོད་དོན། ཧ་ཅང་ཐལ་གྲགས་ན་གནས་ལུགས་རེད་བསམ་པ་སྐྱེས་ཐབས་མེད་པའི་དབང་གིས་ཡིན། རྡ་སའི་གཡས་གཡོན་འདི་ནས་ཅི་ལྟར་སྒྲོ་བཏགས་རུང་། གཅིག་གིས་མི་མཁྱེན་རུང་གཅིག་ལ་ཆ་རྒྱུས་ཡོད་ཡོད་པ་རེད།
༄༅།། ཤེས་དབང་བློ་གྲོས་ལགས་རྩོམ་རིང་པོ་གོ་དོན་གཟབ་པོ་ཡག་པོ་ཞིག་འདུག ། འོན་ཀྱང་ཡིག་སྐད་ནང་དུ་ཡུལ་སྐད་ཀྱིས་ལྷད་བཅུག་ནས་ཡིག་སྐད་ལྟར་ཀློག་ན་བདེ་པོ་ཞིག་མིན་འདུག །བརྡ་དག་གི་འཇུག་ཚུལ་དང་མི་མཐུན་པར་པ་ཡིག་ཐོབ་སར་བ་ཡིག་ཀྱང་ཀྱང་བེད་སྤྱོད་བྱས་འདུག ། བདག་སྒྲ་ཡ་གྱུར་བ་དང་ནི། ཆ་ལ་པ་གཉིས་སྤྱོར་བ་ལེགས། ཅེས་པའི་གོ་དོན་ལ་འགྲེལ་བཤད་གང་འདྲ་ཞིག་གནང་གི་ཡིན་ནམ། དེང་སང་རྕོམ་ལ་མཁས་པར་རློམ་པ་མང་པོས་གྲོང་གསེབ་ཀྱི་ཡུལ་སྐད་དང་། ཡིག་སྐད་སྲེས་པའི་ནད་ཡམས་འདི་ཁྱབ་སྤེལ་གནང་ན་དགོས་པ་ལས་གནོད་ཆེ་བས་དེ་དོན་དགོངས་བཞེས་གནང་ན་མཛེས་པར་མཐོང་།།
ཤེར་དབང་ལགས་ཀྱི་ཡག་པོ་བྲིས་འདུག་རྒྱབ་སྐྱོར་ཡོད།
༸གོང་ས་མཆོག་གིས་དགོན་པ་ཁག་གི་ནང་ཚན་རིག་བསླབ་དགོས་གསུངས་པ་འདི་་་དོན་དངོས་སུ་་་ཆེས་བླ་ན་མེད་པའི་ནང་ཆོས་ཀྱི་ཞབས་བརྟན་དང་བརྟན་བཞུགས་ཤིག་རེད་བསམ། འདིས་ཆོས་ལུགས་གཞན་དང་ནང་ཆོས་ཀྱི་ཁྱད་པར་ཀྱང་ཕྱེས་འདུག།།ཟམ་གདོང་ཚང་གི་གསུང་བཤད་འདི་མཐོ་རྒྱག་དམའ་རྒྱག་ཞིག་རེད། དངོས་གནས་ཡིན་མིན་མི་ཤེས།
སྤྱིར་ཚན་རིག་དང་ཆོས་ལུགས་ཀྱི་འགལ་ཟླ་འདི་དུས་རབས་བཅུ་དྲུག་བཅུ་བདུན་ནང་འགོ་བཙུགས་པ་ཞིག་དང་འགོ་འཛུགས་ས་ཡང་འཇིག་རྟེན་བྱེད་པོར་འདོད་པའི་ཆོས་ལུགས་དང་དངོས་ལུགས་འཚོལ་བའི་ཚན་རིག་པ་གཉིས་ཀྱི་བར་ནས་བྱུང་བའི་འགལ་ཟླ་ཞིག་རེད། འགོ་འཛུགས་སྟངས་ནི། ཚན་རིག་པ་ཁ་ཤས་ཀྱིས་འཇིག་རྟེན་འདི་ཆ་གསུམ་དུ་བགོས་ནས། ཆོས་ལུགས་པར་དབང་བའི་ཆ་དང། ལྟ་གྲུབ་སྨྲ་པར་དབང་བའི་ཆ། ཚན་རིག་པར་དབང་བའི་ཆ་གསུམ་དུ་ཕྱེ་ཡོང་དུས་ཆོས་ལུགས་པས་སྣོད་བཅུད་ཐམས་ཅད་དཀོན་མཆོག་གིས་བཟོས་ཞེས་པར་དོ་ཕོགས་ཆེན་པོ་བྱུང་ནས་འགལ་ཟླར་གྱུར།
འོན་ཀྱང་བལྟ་ཚུལ་འདི་བོད་པའི་སྤྱི་ཚོགས་ནང་དུ་ག་དུས་བྱུང་བ་དང། གང་འདྲ་ཞིག་བྱུང་བ་བཤད་མི་ཤེས་པ་ཞིག་རེད། གོང་གི་ཆོས་ལུགས་པ་དང། ནང་པའི་ཆོས་ལུགས་གཉིས་ར་འདྲ་ཡང་རིགས་མི་འདྲ་ཙང་དཀའ་ངལ་འདི་བོད་ལ་ཡོང་དོན་མེད། འོན་ཀྱང་དགོན་པ་ཁག་གི་དཀའ་ངལ་དེ་ཤུགས་ཆེན་པོ་འདུག།།
ཟམ་གདོང་རིན་པོ་ཆེས་ཆོས་དང་ཚན་རིག་གཉིས་བསྡུར་ན་དཔེར་འཇོག་པ་ནི་དངོས་དོན་ལ་གནས། ཚན་རིག་དང་ནང་ཆོས་ཀྱི་ལྟ་གྲུབ་གཞི་ལ་མཐུན་ཡང་ལམ་དང་འབྲས་བུ་མཉམ་བསྡུར་བྱེད་ས་མེད། ༧གོང་ས་མཆོག་དང་ཟམ་གདོང་མཆོག་གཉིས་ཀྱི་དགོངས་གཞི་ལ་འགལ་བ་མེད། གཅིག་གིས་གཞི་ལ་དམིགས་ནས་གསུངས་པ་དང་། གཅིག་གིས་དོན་དམ་ནས་བསྡུར་ཡོད།
གོང་ས་མཆོག་གིས། ནང་ཆོས་ཀྱི་ཚན་རིག །ནང་ཆོས་ཀྱི་ལྟ་གྲུབ། ནང་ཆོས་ཀྱི་ཉམས་ལེན་ཞེས་གསུམ་དུ་བགོས་ནས་གསུངས་པ་དེ་གནད་འགག་ཆེན་པོ་རེད། གཞིའི་རྣམ་བཞག་ཚན་རིག་དང་མཐུན་པ་ཡོད་ལ་མི་མཐུན་པ་ཡང་ཡོད། ནང་ཆོས་ཀྱི་ལྟ་གྲུབ་ཟེར་དུས་སེམས་ཁམས་ཀྱི་དྲི་མ་སྦྱོང་བྱེད་ལ་གཞིའི་རྣམ་བཞག་བདེན་བཞི་བདེན་པ་གཉིས་གསུངས་པ་མ་གཏོགས་རང་དགར་ཤེས་བྱ་ཙམ་མིན་པ་ཤེས་དགོས། ཟམ་གདོང་བླ་མས་ཚན་རིག་ཤེས་བྱ་ཡིན་ཀྱང་རིག་གནས་ཤིག་མིན་ཞེས་གསུངས་ཡོད་པ་བོད་ཀྱི་ཚན་རིག་དུས་དེབ་ནང་གསལ། རིག་གནས་ཡིན་མིན་གྱི་ཐད་ལ་མཁས་པས་བཤད་ཚུལ་མང་བ་དང་འཛམ་གླིང་མཁས་པའི་བགྲོ་གླེང་ཐོག་སྤྱི་ཡོངས་ཀྱིས་རིག་གནས་ཀྱི་གོ་དོན་མི་འདྲ་བ་ཉིས་བརྒྱ་ལྔ་བཅུ་ལྷག་བཞག་ཡོད་པ་རེད། རིག་གནས་བཅུའི་ནང་ཚན་ཡིན་མིན་གྱི་ཐད་ནས་བཤད་ན་ཁ་ཤས་ཀྱིས་བཟོ་རིག་པ་དང་གཏན་ཚིགས་རིག་པའི་ཁོངས་སུ་འདུ་བ་ཡིན་ཞེས་ཟེར་མཁན་ཡང་ཡོད་པ་རེད། ཁ་ཤས་ཀྱིས་ཚད་མའི་རིག་པའི་ཁོངས་སུ་འདུ་ཞེས་ཟེར། ཡང་ལ་ལས། ཚན་རིག་ལ་རང་བྱུང་ཚན་རིག་དང་སྤྱི་ཚོགས་ཚན་རིག་གཉིས་སུ་འདུ་བ་བཤད་འདུག །དེ་ལྟར་ན་ནང་བསྟན་ཆོས་ལུགས་དང་བརྡ་སྤྲོད་རིག་གནས་དང་ཡུལ་སྲོལ་གོམས་གཤིས་དག་སྤྱི་ཚོགས་ཚན་རིག་གི་ཁོངས་སུ་འདུ་བ་དང་། ད་ལྟ་གདན་ས་ཁག་གི་ནང་ལ་སྦྱོང་བཞིན་པ་དེ་དག་རང་བྱུང་ཚན་རིག་རེད། རིགས་པ་བཞིའི་ནང་ཚན་ཆོས་ཉིད་ཀྱི་རིགས་པ་རེད། དུས་ཀྱི་འཁོར་སྐྱོད་དང་འཐེན་ཤུགས། རྫས་སྦྱོར་གྱི་ནུས་པ་སོགས་དངོས་ཁམས་སྐོར་སོགས་བསམ་ཡུལ་ལས་འདས་པའི་ཤེས་བྱ་སྣ་མང་གི་ཕྱུག་ན་ཡང་། ཡ་རབས་ཀུན་སྤྱོད་རིག་པ་དང་བྱམས་བརྩེའི་སློབ་གསོ་མེད་པ་ཞིག་གོ །
མཁན་པོ་དང་ཉི་མ་སྟེ་མཁན་པོ་ཉི་མ་ཞེས་མིང་རྫིག་པོ་ཡོད་མཁན་དེས་ཟམ་གདོང་བླ་མས་ཚན་རིག་གི་སྡེ་ཚན་སྣ་གཅིག་ཀྱང་མི་ཤེལ་ཁུལ་ལྟ་བུ་དང་། ཁོང་གི་ཚན་རིག་ལ་ལྟ་ཚུལ་དེ་ནོར་བ་ཡིན་བཟོ་བཤད་འདུག་པས། སྐད་ཆ་དེ་གོ་བ་དང་མཁན་པོ་ཉི་མ་ཞེས་པའི་མི་དེ་མཐོང་མ་མྱོང་ཡང་ཁོང་གི་ཤེས་ཚད་དང་བསམ་བློའི་ལྗིད་ཁོག་དེ་ཧ་ཅང་ཡང་པའི་བྱ་སྤུ་ལྟ་བུ་ཞིག་ལས་མེད་པར། ཆེས་དམར་རྗེན་དུ་གསལ་སྟོན་བྱས་ཟིན་པས་དེ་ནི་རང་མཚང་འབྲུ་བ་ཞིག་ལས་དཔྱད་ལྡན་གྱི་གཏམ་མིན། ཟམ་གདོང་བླ་མས་ཚན་རིག་གི་གནས་ཚད་དེར་ཁྱོད་རང་ལྟ་བུ་མི་བྱབ་ཆུང་གཅིག་གིས་གཏན་ནས་དགག་པ་རྒྱག་ཐུབ་ཀྱི་མ་རེད། རྒྱུ་མཚན་ནི་ཁྱོད་རང་གི་ཚན་རིག་ཤེས་ཚད་དེ་འདྲ་བ་བརྒྱ་འགྱུར་སྟོང་འགྱུར་གྱིས་ཀྱང་ཁོང་གི་ཚན་རིག་ཤེས་ཚད་དེ་ལ་དོ་ཟླ་མི་ནུས་པས་སོ། ད་དུང་སྐད་ཡིག་དང་ནང་ཆོས། ཚན་རིག་དང་སྤྱི་ཚོགས། བོད་དང་རྒྱལ་ཁམས་གཞན་གྱི་རྒྱལ་རབས་ལོ་རྒྱུས། ནང་ཆོས་དང་ཆོས་ལུགས་གཞན་ཁག རྩོམ་རིགས་སྒྱུ་རྩལ། མདོར་ན་སྐད་རིགས་རྣམ་གྲངས་དུ་མའི་ཤེས་ཚད་སོགས། ཁྱོན་ཡོངས་ནས་བསྡོམས་ན་ཁོང་ལྟ་བུའི་གནའ་དེང་གི་འདབ་གཤོག་གཉིས་དང་ལྡན་པའི་མཁས་པ་རླབས་ཆེན་ཞིག་བོད་ལ་མེད་ཅེས་ཕྱི་རྒྱལ་བ་མཁས་པ་མང་པོས་བཤད་མྱོང་ཡོད་ལ། དེ་ནི་དོན་ལ་གནས་པ་ཞིག་ཡིན། ད་དུང་དེ་ལས་འཐོར་འཕཊ་ཏེ་བཤད་ན། ད་ཆ་འཛམ་གླིང་ཁྱོན་ལ་ཁོང་འདྲ་བའི་མཁས་པ་ཉུང་ཉུང་ཞིག་ལས་མེད་ཅེས་བཤད་ཀྱང་རྫུན་དུ་མི་འགྱུར་སྙམ། ངས་ཧོབ་ཏུ་མོད་ལ་འདི་ལྟར་བརྗོད་དུས་ཏན་ཏན་མི་མི་ཉུང་བ་ཞིག་གིས་ངས་བཤད་པ་དེ་ཐལ་དྲགས་པ་དང་། ཟམ་གདོང་བླ་མར་མངོན་
པར་བསྟོད་དྲགས་སོང་བསམ་ཟིན་ཡོད་མོད། རྣམ་པ་ཚོས་ཁོང་གི་ཤེས་ཚད་ཀྱི་རྣམ་གྲངས་དང་སྤུས་ཀ་ཡོངས་སུ་རྫོགས་པ་གསལ་པོར། རང་གིས་དཔྱད་པ་དང་གཞན་ལ་འདྲི་བ་སོགས་བློ་གཟུར་བོར་གནས་པའི་ཐོག་ནས་ཞིབ་འཇུག་ཡང་དག་པར་བྱེད་པ་དང་། དེ་བཞིན་ཕྱི་རྒྱལ་བ་མཁས་པ་མང་པོས་ཁོང་ལ་ལྟ་ཚུལ་དང་ཆ་འཇོག་གང་འདྲ་ཡོད་མེད། རྒྱ་གར་བ་མཁས་པ་གྲགས་ཅན་ག་ཚོད་ཙམ་ཞིག་གིས་ཁོང་ལ་ཆེ་མཐོང་ཇི་ཙམ་ཡོད་མེད་བཅས། འདི་དག་རེ་རེ་བཞིན་དཔྱད་ན་ད་གཟོད་ངས་བཤད་པའི་སྐད་ཆ་འདི་དག་ལ་གནས་ལུགས་དང་རྒྱུ་མཚན་ཡོད་མེད་ཁ་གསལ་ཤེས་ཐུབ།
བོད་སྐད་ལས་མི་ཤེས་མཁན་བོད་མིའི་ཁྲོད་དབྱིན་ཚིག་ཁ་ཤས་བཅུག གྲྭ་པའི་ཁྲོད་ཆབ་སྲིད། ཁྱིམ་པ་སྐྱ་བོའི་ཁྲོད་དབུ་ཚད། དེ་འདྲ་བྱས་ནས་མཁས་དབང་ཆགས་པ་རེད།
སྔོན་ཆད་མ་བྱུང་བ་དེ་འདི་ལྟར་ཡང་བཤད་རུང་།
ནང་བས་ཚན་རིག་ཅིས་ཕྱིར་སློབ་དགོས་སོང་། མ་བསླབ་ན་སྐྱོན་དང་བསླབ་པའི་དགོས་པ་གང་ཡིན། སོགས་ནི་སྐབས་འདིའི་དྲི་བ་རེད།
དེང་གི་སྤྱི་ཚོགས་ནི་ཚན་རིག་དང་བསྡོངས་ནས་ལེགས་ཉེས་འབྱེད་པའི་སྤྱི་ཚོགས་ཤིག་རེད་ཅེས་ན་ཡང་ཐལ་ཆེ་མེད། རིག་གནས་གང་ཡིན་ཡང་དགོས་མཁོ་དང་འབྲེལ་ནས་དར་ཞིང་དགོས་མེད་དུ་གྱུར་དུས་ནུབ་འགྲོ་བ་རེད། དེའི་ཕྱིར་སྤྱི་ཚོགས་འཚོ་བའི་ནང་གི་དགོས་མཁོ་མང་བོ་ཞིག་ཚན་རིག་གིས་སྐོང་གི་ཡོད་པས་ཚན་རིག་འདི་ལྟར་དར་ཁྱབ་ཆེ་བའི་རྒྱུ་མཚན་ཡང་དེ་རེད། ད་དུང་ཚན་རིག་གིས་རྫས་རྡུལ་མང་བོ་ཞིག་གི་ཕན་གནོད་སྦྱོར་སྡེབས་བྱས་པའི་ཉམ་མྱོང་ལས་ཐོན་རྫས་མང་པོ་ཞིག་མིའི་འཚོ་བའི་ནང་སྐྱལ་བྱུང་། འཚོ་བ་མི་སེམས་པའི་མི་ནི་ཕལ་ཆེར་འཚོལ་དུ་མེད་པས་ན། ཚན་རིག་གི་ཕྲིན་ལས་མི་རྣམས་ཀྱེས་དེང་ལེན་བྱེད་རྒྱུ་ལ་འགོག་རྐྱེན་མེད་པ་ཡང་དེ་རེད། རིག་གནས་གསར་བ་འདི་དག་གིས་གདོད་མའི་རིག་གནས་འགའ་ཞིག་གི་གོ་ས་འཕྲོག་པས་བེད་མེད་དུ་གཏོང་བཞིན་ཡོད་པ་ནི། དཔེར་ན་ང་ཚོའི་གཡག་སྒ་གླང་སྒ་ལྟ་བུ་རེད། དཔེ་དེ་བཞིན་དུས་རབས་འདིའི་ནང་ང་ཚོའི་ནང་ཆོས་དང་ཚན་རིག་གཉིས་གདོང་ཐུག་རྒྱབ་པ་རེད་ལ། གདོང་ཐུག་རྒྱག་སྟངས་དེ་ཡང་ཚན་རིག་གིས་ནང་ཆོས་བེད་མེད་དུ་གཏོང་རྩིས་བྱས་པ་དེ་རེད། གདོང་ཐུག་འདི་ལས་རྣམ་པར་རྒྱལ་དགོས་ན་ཚན་རིག་དང་རྒྱང་དུ་ཀྱེས་རྒྱུ་དེ་མ་ཡིན་པར། ཚན་རིག་དང་རྣོ་ངར་འགྲན་དགོས་པ་དེ་རེད། ཚན་རིག་དང་ནང་ཆོས་གཉིས་ལ་སྤྱིའི་རང་གཤིས་ཤིག་ཡོད་པ་ནི་གནས་ལུགས་ཕུ་འདེད་བྱེད་རྒྱུ་དེ་ཡིན་འདུག་པས་རྒྱལ་ཕམ་རྩོད་སའི་འཐབ་ར་ཡང་འདི་ནས་མཤམ་དགོས་པ་རེད། གལ་དེ་ནང་ཆོས་འཐབ་ར་འདི་ནས་ཕམ་སོང་ན་ནང་ཆོས་ཀྱི་གདུལ་བྱ་ཡང་ཚན་རིག་པའི་ལག་ཏུ་ཤོར་འགྲོ་བས་དེ་དུས་ང་ཚོའི་ནང་ཆོས་བེད་མེད་དུ་གྱུར་འགྲོ་བ་འདི་ཤེས་དགོས། ནང་ཆོས་ལ་རིགས་པ་བཙན་པོ་ཐོག་འདྲ་བ་ཞིག་ཡོད་བཞིན་དུ་ཚན་རིག་ལ་བདེན་ཁ་མཐའ་དག་སྟེར་དགོས་པའི་རྒྱུ་མཚན་མེད། ང་ཚོས་མཐའ་དག་རྟེན་འབྱུང་གི་སྟེང་ནས་ཐག་གཅོད་ཀྱིན་ཡོད་པས་འདི་ནི་ང་ཚོས་ཚན་རིག་ལ་འཐབ་མོ་བྱེད་སྤྱད་ཀྱི་ལག་ཆ་གཙོ་བོ་དེ་ཡང་ཡིན། རྟེན་འབྱུང་ཕྲ་རག་གི་དབང་དུ་བྱས་ནས་བཤད་ན། འདུས་བྱས་རྟེན་འབྱུང་གི་རིག་པ་ཐོག་མ་ཡིན་ལ། དེ་ལ་ཡང་རྫས་ཀྱི་རྟེན་འབྱུང་དེ་འབྱུང་བའི་ཕན་གནོད་ལ་གཞིག་པའི་རྟེན་འབྱུང་གི་རིག་པ་དང་། དེ་རྗེས་ཆ་ཤེས་ལ་བརྟེན་པའི་རྟེན་འབྱུང་གི་སྟེང་དང་། དེ་ནས་ཤེས་པ་ཕྲ་རག་གི་རྟེན་འབྱུང་སོགས་ལ་རིམ་གྱིས་ཁྲིད་དགོས། དེ་ནས་སྐྱིད་སྡུག་རྟེན་འབྱུང་། འཚོ་བ་རྟེན་འབྱུང་། དེ་ནས་གདག་གཞི་ལ་རྟེན་པའི་རྟེན་འབྱུང་དང་། དེ་ནས་འདོགས་བྱེད་སྒྲ་རྟོག་གིས་བཞག་ཙམ་གྱི་རྟེན་འབྱུང་གི་རིག་པ་སོགས་ལས་ཆོས་རྣམས་ཀྱི་གནས་ལུགས་རྒྱུ་མ་ཕུ་འདེད་བྱེད་དགོས་ལ། དེ་ལྟར་བའི་གྲུབ་དོན་ནི་མི་རྣམས་ལ་ཚན་རིག་གིས་སྦྱིན་མ་ཐུབ་པའི་དྲོ་བ་གསར་བ་ཞིག་བསྣོན་པ་འདི་དང་། དེ་ལ་བརྟེན་དོ་སྣང་གསར་བ་དང་། ངེས་ཤེས་གསར་བ་སོགས་རྙེད་དེ་ཉིན་རེ་འཚོ་བའི་ནང་གི་དགོས་མཁོ་ཞིག་ཏུ་སྤྱོད་ཐུབ་པ་ཡིན་ན་དེ་ནས་ནང་ཆོས་འདི་ད་བཟོད་འཛམ་གླིང་སྤྱི་ནོར་དུ་གྱུར་བ་ཡིན་པས་ནང་ཆོས་མུ་འཐུད་དུ་གནས་ཐུབ་མིན་གྱི་སེམས་ཁྲལ་འདི་ཡང་མི་དགོས་པར་བདག་གིས་འདོད་པ་ཡིན། ཚན་རིག་སློབ་པའི་དགོས་པ་དེ་ཁོ་ན་ཡང་མ་ཡིན་པར་ང་ཚོར་ཡང་འགྲེལ་བཤད་མིག་མཐོང་ཅན་བྱུང་བ་ཡིན་ན་ནང་ཆོས་ལ་བཟུང་བའི་དད་པ་རྒྱས་པའི་གྲོགས་སུ་འགྲོ་བའི་དགོས་པ་ཡོད་པ་འདི་ཡང་སེམས་ལ་ཉར་རོགས་ཞུ་འདོད
ནང་བསྟན་ཡུལ་དུས་དང་བསྟུན་ནས་འཕེལ་རྒྱས་འགྲོ་དགོས་ན་བོད་ཀྱི་དགེ་འདུན་པ་ཡང་འཛམ་གླིང་གི་མི་ཀུན་དང་མཚུངས་བར་དཔུང་པ་མཉམ་གཤིབས་དང་མཐོང་རྒྱ་ཆེར་བསྐྱེད། ཤེས་བྱ་ཕུན་སུམ་ཚོགས་པར་གཏོང་བ་ལ་ངེས་བར་ཡུལ་དུས་དགོས་མཁོ་ལ་དམིགས་པའི་ནུབ་ཕྱོགས་རིག་གནས་ཀྱི་ཤེས་ཡོན་དང་ཤར་ཕྱོགས་རིག་གནས་ཀྱི་ཉིང་བཅུད་བོད་ཀྱི་སྤྱི་ཚོགས་སྟེང་ཐོན་ཐུབ་པ་ཞིག་དགོས་ངེས་ཆགས་ཡོད་པ་རེད། བདག་ཅག་གི་སྟོན་པས་ཀྱང་ཡུལ་དུས་དང་བསྟུན་ནས་ཐེག་པ་སྣ་ཚོགས་གསུངས་ཤིང་། དམ་ཆོས་འདུལ་བའི་སྐབས་སུའང་དབང་པོ་རྣོ་བ་དག་གིས་ཉི་མའི་སུམ་ཆ་གཅིག་ལ་ཕྱི་རོལ་རིག་བྱེད་ལ་སློབ་དགོས་པར་གསུངས་པ་ཡང་ཡུལ་དུས་དགོས་མཁོ་ལ་དམིགས་པ་རེད། གནའ་སྔ་མོའི་དུས་ནས་ད་ལྟའི་བར་ང་ཚོ་བོད་པ་རང་གི་ཁོར་ཡུག་ཆུང་ཆུང་དེའི་ནང་དུ་མགོ་འཐོམས་ནས་བསྡད་བསྡད་པའི་ཉེར་ལེན་ལ་བརྟེན་ནས་བོད་རང་དབང་ཤོར། ཁོར་ཡུག་ཆུང་བའི་འདུ་ཤེས་དེས་དེང་སང་དུས་རབས་ཉེར་གཅིག་གི་ཚབ་མཚོན་བྱེད་མི་ཐུབ་པར་ལྷག་ཡོད་པ་རེད། ད་ཆ་འཛམ་གླིང་གོ་ལ་རིལ་བོའི་འགྲོ་འོང་གི་འགྲིམ་འགྲུལ་དང་ཕན་ཚུན་གཅིག་ལ་གཅིག་རྟེན་གྱི་བསམ་པའི་འདུ་ཤེས་རྒྱ་ཆེ་རུ་འགྲོ་བའི་དུས་མཚུངས་སུ་གནམ་ནས་ཐོག་བབ་པ་ལྟ་བུའི་དཀའ་ངལ་ཞིག་དགེ་འདུན་པ་ཚོའི་དབུ་ཐོག་ཏུ་མི་བསླེབ་པའི་ངེས་པ་མ་མཆིས། དེ་དུས་ནང་བསྟན་དེ་ཡང་ནུས་མེད་ཅིག་ཆགས་རྒྱུ་ཡིན་པ་ཉག་གཅིག་རེད། དེར་བརྟེན་གོང་ས་མཆོག་གི་ཕུགས་རྒྱང་རིང་པོའི་དགོངས་གཞི་དེ་ལ་ངེས་བར་ལག་ལེན་བསྟར་བའི་དུས་ཚོད་ལ་བསླེབས་འདུག་ཅེས་ཐལ་མོ་སྙིང་གར་སྦྱར་ནས་ཞུའོ།།
མཁྱེན་ཡངས་མེ་ཏོག་དཀར་པོ་ལགས།
ཁྱེད་རང་གིས་ཀྱང་མཁས་དབང་ཟམ་གདོང་རིན་པོ་ཆེ་ལྟར། བོད་སྐད་མ་གཏོགས་མི་ཤེས་མཁན་ཚོར་དབྱིན་སྐད་དང་། དབྱིན་སྐད་སོགས་སྐད་ཕྱི་གླིང་བའི་སྐད་ཡིག་མ་གཏོགས་མི་ཤེས་མཁན་རྣམས་ལ་བོད་སྐད་བཤད་དེ་གདན་སར་ཆབ་སྲིད་དང་། མི་སྐྱར་རིགས་ལམ་དང་ནང་ཆོས་དབུ་ཚད་སོགས་གསུངས་སྟེ་མཁས་དབང་གི་མཚན་སྙན་ཆེན་པོ་དེ་གཅིག་བཞེས་དང་། ཁོར་ཡུག་དེ་དག་མཁས་དབང་ཟམ་གདོང་རིན་པོ་ཆེ་ཁོང་རང་གཅིག་པོས་བདག་གིར་
བཟུང་ནས་སྒེར་སྤྱོད་གནང་མེད་ལ་གནང་ཐབས་ཀྱང་མེད།
ཁྱེད་ལ་ཡང་ལྷོ་གོས་གཏམ་གསུམ་མི་དགོས་པ་ནི་མིན་ཙང་དེ་དག་སྔ་ཙམ་དོན་གཉེར་གནང་ན་མཁས་དབང་ཟམ་གདོང་རིན་པོ་ཆེ་ལྟར་གདན་ཞུ་མགྲོན་འབོད་གནང་མཁན་མང་དག་ཞིག་ཡོང་ངེས་ཡིན་པས་ཁྱེད་རང་ཡང་འཕྲལ་དུ་མིང་དོན་མཚུངས་པའི་
མཁས་དབང་ཕྱུག་པོ་ཞིག་ཆགས་ངེས་ཡིན། མགྱོགས་པོ་ཡིན་ཏཱ། ཁ་ནང་དུ་གྲོག་ཡོད་པ་ལྕེས་སྦུད་རྒྱག་མ་གཏོང་།།གོ་སོང་ངམ།།
ཡང་རྩོམ་པ་པོ་ཁྱེད་ཀྱི་བརྗོད་བྱ་དེ་སྔོན་ཆད་མ་བྱུང་བ་ཞིག་རང་ལྷ་རེད་མི་འདུག་ཀྱང་། རྩམ་ཕྲུག་ལགས་དང་མིག་བརྒྱད་པ་ལགས་ཀྱིས་གོ་རྒྱུ་ཡོད་པ་དང་གཏིང་ཟབ་པའི་
བརྟག་དཔྱད་ཞིག་གནང་མེད་དམ་སྙམ་པའི་བྲོ་བ་ཞིག་ཚོར་བྱུང་།
མཁན་པོ་ཉི་མ་ནི་བླུན་པོའི་ཞེན་ཁོག་གིས་མིག་ལྡོང་མེད་དམ་སྙམ་པའི་དོག་པ་ཆེན་པོ་ཡོད།།
འདུག་
གྲ་བས་ཚན་རིག་སྦྱངས་ན་བཟང་མོད་ཀྱང་།
རང་གི་ལྟ་གྲུབ་བརྗེད་ན་ངོ་ཚ་རེད།
བསྟན་པ་ནུབ་ལ་སྤེལ་ན་བཟང་མོད་ཀྱང་།
བོད་ཆོས་ཚོང་ལ་བསྒྱུར་ན་བསྟན་དགྲ་རེད།
རྟགས་དང་རིགས་པ་ཤེས་ན་བཟང་མོད་ཀྱང་།
ཉམས་ལེན་སྣ་གཅིག་མེད་ན་ཆོས་མ་རེད།
བྱམས་དང་སྙིང་རྗེ་བཤད་ན་བཟང་མོད་ཀྱང་།
རང་རྒྱུད་མ་འདུལ་ཁ་བཤད་ཝུ་བ་འདྲ།