……..རྩེ་སྐར།
ས་སྲོད་འདིར།
དགོང་ཁའི་ཉི་མ་ལ་ལེ་བདའ་བྱེད་བཞིན།
རླུང་བུ་རྒྱུ་ཕྱོགས་ན་འཕུར་བའི་ཕོ་རོག་དེ་ཚོ།
ད་དུང༌། རལ་ལ་ཉེ་བའི་སྤྲིན་པ་ལེབ་མོ་དེ།
སྐུ་དྲག་སུ་ཞིག་གི་ཕོ་ཉ་བཞིན།
རི་བོ་དེའི་ཕར་རྒྱབ་ལ་བཞུད་སྟངས་དེས།
ངའི་དྲན་པ་གློ་བུར་དུ་ཚ་གདུག་གིས་བཟུང་སྟེ།
ཞེན་ཁོག་ལྷག་མ་ཞིག་གིས
ཚོད་ཚོད་ལ་ཀི་རིང་ཞིག་མི་འཐེན་ཀ་མེད་དུ་གྱུར།
ས་སྲོད་འདིར།
རི་གཟར་གྱི་སྡོང་པོ་ཁེར་སྐྱེས་དེ་ལ་ཡང༌།
ཞེན་ཆགས་ཀྱི་སྐྱོ་ངལ་གཞན་ཞིག་ཡོད་པ་འདྲ།
བསེར་བུ་ལྡོམ་པོ་ཞིག་དང་འདྲོགས་པའི་སྡོང་ལོ་འགའ།
དྲིལ་ལོག་རྒྱག་བཞིན་ས་ལ་འཐོར་སྟངས་དེས།
ངའི་སེམས་པ་གློ་བུར་དུ་གྲང་ཤུར་ཤུར།
སྙིང་དབྱིབས་དང་མཚུངས་པའི་ལོ་མ་དག་གི་སྟེང༌།
ནམ་རྒྱུན་སེམས་པ་སྲེག་བྱེད་ཀྱི་ཡིག་འབྲུ་དེ་ཚོ་འབྲི་བསམ་ཡང༌།
ཇི་ལྟར་བརྗོད་ཀྱང་བདེན་ཁ་སྟེར་མཁན་གྱི་མི་དག
རང་རང་གི་ས་ན་ཕོར་བ་གནམ་ལ་བཟེད་པར་བྲེལ་ཏེ།
ད་ཆ་ཨ་ལན་རྒྱག་མཁན་མེད་པ་ཚོར་དུས།
དོ་དགོང་ཡང༌།
ངས་རང་ཉིད་ཀྱི་སྙིང་ཁ་མེ་ལ་བསྲེག་རྒྱུ་དེ་རེད
དངོས་ནས་བློར་འབབ་ལ་སེམས་སྨྲེང་བའི་སྙན་ངག་ཅིག་བྲིས་འདུག བཀླགས་པར་དགའ་སོང།