ང་ཚོ་ཡང་མི་ཞིག་ཡིན།

དབུས་ཕྲུག་ཚེ་རིང་།

ཁྱེད་ཀྱིས། ཉེ་འཁོར་གྱི་གཉེན་ཉེ་དང་།
རང་ཉིད་ཀྱི་བདེ་སྐྱིད་ཆེད།
མི་གཞན་གྱི་ཚེ་སྲོག རྡོག་པས་མ་བརྫི་རོགས།
ང་ཚོ་ཡང་མི་ཞིག་ཡིན།

ང་རང་ཆེས་ཐོག་མར་འཇིག་རྟེན་དུ་འཐོན་སྐབས་ནས།
ངའི་ཁོར་ཡུག་ན། དཔྱིད་ཀ་ཞིག་བཞད་མ་མྱོང་བས།
ངའི་སྐྱེས་སྟོབས་ཀྱི་ནུས་པ་ཇི་ལྟར་ཆུང་རུང་།
ཁྱེད་ཀྱིས། ངའི་ཚེ་སྲོག་ལ་སྣང་ཆུང་མ་གཏོང་རོགས།
ང་ཚོ་ཡང་མི་ཞིག་ཡིན།

ཁྱེད་ཀྱི་ལག་འོག་ན། འཛམ་གླིང་འདི་ཇི་ལྟར་ཆུང་ན་ཡང་།
ཆེས་ཡིད་དུ་འོང་བའི་རང་བྱུང་གྱི་ཁམས་ཆེན་པོ་འདི།
སྐྱེ་འགྲོ་ཐུན་མོང་གི་ཡིན་པས།
ཁྱེད་ཀྱིས། ངའི་ཚེ་སྲོག་ལ་ཁུ་ཚུར་གྱིས་མ་སྣུན་རོགས།
ང་ཚོ་ཡང་མི་ཞིག་ཡིན།

ཁྱེད་ཀྱིས། ཨམ་ཕྲག་ན་ལྕགས་ཐག་རྩུབ་མོ་དེ་བཟུང་ཞིང་།
ཡ་ང་བའི་ཟློས་གར་བའི་འཛུམ་མདངས་ཞིག་སྟོན་གྱིན།
ང་ཚོའི་མེས་པོ་ཚོའི་དུར་སའི་སྟེང་།
གར་སྟབས་མྱུར་བའི་གླུ་གཞས་མ་འཁྲབ་རོགས།
ང་ཚོ་ཡང་མི་ཞིག་ཡིན།

ངའི་ངོ་གདོང་གི་མིག་ཆུ་དང་།
ངུ་འབོད་ཀྱི་རྒད་རྒྱངས།
དམར་ལྷབ་ལྷུབ་ཀྱི་མེ་ལྕེའི་ཁྲོད་ཀྱི་ཚེ་སྲོག
འཐོར་ལ་ཉེ་བའི་མེས་པོ་ཚོའི་གཅེས་ནོར།
ཁྱེད་ཚོས་མ་མཐོང་བ་ཡིན་ནམ།
ང་ཚོ་ཡང་མི་ཞིག་ཡིན།