ནམ་མཁའ།
དུས་རབས་ཉི་ཤུའི་ལོ་རབས་བདུན་བཅུ་ནང་མའོ་ཤི་རྗེས་སུ་ཏིན་ཞོ་ཕེན་གྱིས་རང་བཙན་མ་ཡིན་པའི་སྐད་ཆ་ག་རེ་ཡིན་ན་བཤད་འདོད་ཡོད་ཅེས་བཤད། སྐབས་དེ་ནས་བཟུང་ཏིན་ཞོ་ཕེན་གྱིས་བོད་རྒྱ་གཉིས་ཀྱི་བར་དུ་ས་རྒོད་དུ་ཤོར་བའི་ཐང་ཆེན་དེར།ཁོས་གཡོ་ཐབས་དང་ཡང་ན་དངོས་ཡོད་སེམས་གཏིང་གང་ཡིན་བཤད་དཀའ་ན་ཡང་། བོད་རྒྱའི་བར་གྱི་ས་རྒོད་མཁྲེགས་པོ་དེར་གཡས་སློག་དང་གཡོན་སློག་བྱས་ཏེ་འབྲས་བུ་མྱུ་གུ་སྐྱེས་སའི་ཞིང་ས་ཞིག་ཕན་ཚུན་གཉིས་ཀྱི་ཕྱོགས་ནས་འབད་བརྩོན་བྱས་ཏེ་ངོས་མི་མཉམ་པའི་ཞིང་ས་ཞིག་བཟོས་བ་རེད།
དེ་ནས་བཟུང་བཙན་བྱོལ་གཞུང་གིས་ཀྱང་རང་བཙན་གྱི་སྐད་ཆ་དེ་བཞག་ནས་གཉིས་ཕན་གྱི་ལམ་དུ་བསམ་གཞིགས་བྱས་ཏེ་།སྐར་ལྔའི་དར་དམར་གྱི་རྩ་ཁྲིམས་གཅིག་གི་སྒྲོམ་གཞིའི་འོག་ནས་མི་རིགས་ཀྱི་རིག་གཞུང་སོགས་ཕྱོགས་གང་ཐད་ནས་རང་དབང་གིས་ལོངས་སྤྱོད་བྱེད་རྒྱུར་རེ་བ་རྒྱབ་སྟེ། མཐའ་གཉིས་སུ་མ་ལྷུང་བའི་ལམ་ཁ་བཙལ་ནས་ས་བོན་བཏབས། .རབས་དང་རིམ་པ་མང་པོ་ཞིག་ལ་བསམ་གཞིགས་དང་གྲོས་བསྡུར་རིམ་པ་མང་པོ་བྱས་མཐར་ཞི་བའི་དོན་ཚན་ལྔ་ནས་འགོ་བརྩམས་ཏེ་ཐ་མ་དབུ་མའི་ལམ་ཆེས་ཚད་མཐོའི་རང་སྐྱོང་སོགས་ཀྱི་རེ་འདུན་མང་པོའི་ཡིག་ཆ་རྒྱ་ནག་གི་སྲིད་དབང་སྒེར་གཅོད་པ་རིམ་པ་བཞི་ཡི་མདུན་ཅོག་ཐོག་བཞག
ས་རྒོད་དུ་ཤོར་བའི་ཐང་ཆེན་དེ་ཡང་།ངོས་མི་མཉམ་ཞིང་བདེ་ཐང་མིན་པའི་ཞིང་ས་ཞིག་ཡིན།དེ་ཏིན་ཞོ་ཕེན་གྱིས་ཅང་ཙེ་མེན་གྱི་ལག་ཏུ་བཞག་སྟེ་ཁོ་རང་འགྲོ་འདོད་མེད་པའི་ཡུལ་འཇིག་རྟེན་མུན་ནག་ཡུལ་དུ་ཕྱིན། ཅང་ཙེ་མེན་གྱིས་ཀྱང་ཁོའི་སྲིད་དབང་རྫོགས་ལ་ཉེ་སྐབས་ཀྱི་༢༠༠༢ལོར་ངོས་མི་མཉམ་པའི་ས་ཞིང་ཐོག་ས་བོན་མ་བཏབས་པའི་གོང་ནས་རུལ་ཟིན་པའི་ཕྱི་མཛེས་ནང་སྙིང་མེད་པའི་ས་བོན་བཏབས།
བཙན་བྱོལ་གཞུང་གིས་ཕྱིའི་རྣམ་པ་གཅིག་པོ་ལ་ལྟས་ནས་ས་བོན་དེ་ལ་རེ་བའི་མྱུ་གུ་འབུས་བའི་གྲོས་མོལ་གྱི་འགོ་འཛུགས་བྱས།རྒྱ་ནག་གིས་ཀྱང་ཕྱིའི་འཛུམ་མདངས་འཛམ་གླིང་ལ་སྟོན་ཞོར།བོད་རྒྱ་གྲོས་མོལ་གྱི་རྣམ་པ་བསྟན་ཏེ།ད་རུང་བཙན་བྱོལ་གཞུང་ལ་ཆ་རྐྱེན་འདི་ལྟར་བཏོན། རྒྱ་ནག་ལ་དམར་ཕྱོགས་ཞེས་འབོད་མི་ཆོག་པར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཞེས་བརྗོད་དགོས་བ་དང་། ཅང་ཙེ་མེན་གྱིས་ཐག་གཅོད་བྱས་བའི་པཎ་ཆེན་ལ་པཎ་ཆེན་རྫུན་མ་ལབ་མི་ཆོག་ཞེས་བཤད། བཀའ་བློན་ཁྲི་ཟུར་ཟམ་གདོང་བླ་མས་ཀྱང་དེ་བཞིན་ཁྱབ་བསྒྲགས་བྱས། མ་ཟད་ཕྱི་སྡོད་བོད་ཀྱི་དོན་གཅོད་བརྒྱུད་ནས་གསུམ་བཅུ་དུས་དྲན་སྐབས་ཁྲོམ་སྐོར་བྱས་ན་ཡང་སྐད་མ་རྒྱག་ཟེར་ནས་བཀའ་ཤག་གིས་གསུང་འཕྲིན་བསྩལ། བོད་མི་ཚོས་ཀྱང་གཞུང་ལམ་ཐོག་བོད་ཀྱི་རྒྱལ་དར་འཕྱར་ཞོར་སྐད་འབོད་ཚིག་གཅིག་ཀྱང་བྱེད་མ་ཐུབ་པར་ངག་བཅད་ངོ་རྒོལ་བྱས་ཡོད།
ཅང་ཙེ་མེན་གྱིས་བཏབས་པའི་ས་བོན་ནང་སྙིང་མེད་པ་དེ་ལག་དམར་ཧུའུ་ཆིན་ཐའོ་ཡི་ལག་ཏུ་བཞག་མོད།ཧུའུ་ཡིས་མྱུ་གུ་འབུས་བའི་བསམ་གཞིགས་ནམ་ཡང་མི་བྱེད་པར་བོད་རྒྱ་གྲོས་མོལ་ཚོར་སྐད་ཆ་གཅིག་དང་འཛམ་གླིང་ལ་བསྒྲགས་པའི་སྐད་ཆ་གཅིག་བཅས་ངོ་གཉིས་མའི་འཁྲབ་སྟོན་བྱེད་ཞོར།ཧུའུ་ཡིས་བྱ་སྤྱོད་དངོས་མ་དྲག་སྤྱོད་དང་གདུགས་རྩུབ་ཀྱིས་བོད་ཀྱི་གཞི་ལུས་མི་དམངས་ཚོའི་རང་དབང་ཅང་ཙེ་མེན་གྱི་སྐབས་དང་བསྡུར་ན་ཡང་སྡུག་རུ་ཕྱིན། མའོ་ཡི་བྱ་སྤྱོད་སེམས་སུ་བཟུང་བའི་ཧུའུ་ཡི་གདུགས་རྩུབ་ལ་བོད་ཆོལ་གསུམ་ཡོངས་ཀྱིས་བཟོད་ཐབས་བྲལ་བས་༢༠༠༨ལོའི་ཕྱི་ཟླ་གཉིས་པ་དང་ཧོར་ཟླ་དང་པོའི་ཚེས་༡༥་ཉིན་མདོ་སྨད་རེབ་གོང་ནས་འགོ་བརྩམས་ཏེ་བོད་ཆོལ་གསུམ་ཡོངས་ཀྱིས་མ་གྲོས་གཅིག་མཐུན་གྱིས་ཞི་བའི་ངོ་རྒོལ་བྱས། སྐབས་དེ་ནས་བཟུང་བོད་རྒྱ་གྲོས་མོལ་གྱི་ས་བོན་ནང་སྙིང་མེད་པ་དེ་ཡང་ས་འོག་ནས་བྱ་ཕོ་རོག་ནག་པོ་ཧུའུ་ཡིས་འདོད་ཐོག་ཏུ་རྟ་རྒྱུགས་པ་བཞིན་དེ་ཡང་འབྲས་མེད་དུ་གྱུར་སྟེ། འཛམ་གླིང་གི་ལུས་རྩལ་རྩེད་མོ་ཚར་བ་དང་བོད་རྒྱ་གྲོས་མོལ་གྱི་འབྲེལ་ཐག་ཆད་པ་ཡང་གཅིག་མཚུངས་སུ་གྱུར།དེ་ནས་བཟུང་བོད་གཞི་ལུས་མི་དམངས་ཚོ་བོད་ཀྱི་རང་དབང་རྩོད་པའི་གཏམ་བརྗོད་ཀྱི་རང་དབང་ཕར་བཞག ཐ་ན་ཆོལ་གསུམ་ནང་ཁུལ་དུ་འགྲོ་སྡོད་རང་དབང་ཡང་མེད་པར་གྱུར་ཡོད།
དེང་སང་རྒྱ་ནག་གི་དཔལ་འབྱོར་ཡར་རྒྱས་ཀྱི་གོ་སྐབས་དང་བསྟུན་ཏེ་འཛམ་གླིང་ཐོག་ལ་སྐད་ཆ་བཙན་སྐད་བཤད་ཀྱི་ཡོད།དཔེར་ན་ཁ་སང་༧གོངས༧མཆོག་ཨོ་སི་ཁྲེ་ཡ་ཡི་སྲིད་བློན་གཉིས་ལ་མཇལ་འཕྲད་གནང་བ་ལ།ཀྲུང་གོས་ཨོ་ཕྱོགས་ལ་སྐད་ཆ་བཙན་པོ་བཤད་ཡོད་ཀྱང་ཁོ་ཚོས་མ་ཉན་པར་ཏྰ་ལྰའི་བླ་མར་མཇལ་འཕྲད་གནང་བ་དང་བོད་རང་བཙན་པར་ནོར་འཁྲུལ་གྱིས་བརྡ་རྟགས་བསྟན་པ་རེད་ཞེས་སྡུག་སྐད་རྒྱག་སྟངས་ཀྱི་ཚིག་༼བཙན་པོ༽ཟེར་བ་འདི་ད་ཐེངས་མ་གཏོགས་གུས་བས་མཐོང་མ་སོང་།གཅིག་བྱས་ན་སྔོན་མ་ཡང་བཤད་ཡོད་སྲིད།འདི་འདྲའི་ང་རྒྱལ་ནུབ་ཕྱོགས་རྒྱལ་ཁབ་ཐོག་བཤད་ཀྱི་ཡོད་དུས།ང་ཚོའི་བོད་ནང་གི་གཞི་ལུས་མི་དམངས་ཐོག་ང་རྒྱལ་དང་བཙན་སྐད་དྲག་སྤྱོད་བཀོལ་རྒྱུ་བཤད་མ་དགོས་བ་ཞིག་རེད།
ད་དུང་རྒྱ་གཞུང་གིས་དབུ་མའི་ལམ་གྱི་སྒྲོམ་གཞིའི་ཐོག་ལ་ཕྱེད་རང་བཙན་དང་རང་བཙན་འུ་ཚུགས་ཀྱིས་ཤིང་རྡོ་གཉིས་བཙན་གྱིས་སྦྱོར་གང་ཐུབ་བྱེད་ཀྱི་ཡོད།ཡིན་ཡང་ང་ཚོས་བཙན་བྱོལ་གཞུང་གིས་ཀྱང་དབུ་མའི་ལམ་ཁོ་ནའི་ཐོག་ལ་འབད་བརྩོན་གྱིས་གྲོས་མོལ་བསྐྱར་མཐུད་ལ་རེ་བའི་ཁེངས་ཡོད་མོད།འོན་ཀྱང་ཕར་ཕྱོགས་ནས་ཁྱེད་ཚོས་རང་བཙན་རྩོད་ཀྱི་འདུག་ཟེར་ནས་ང་ཚོའི་ཁ་ནང་དུ་བཙན་འཇོག་བྱས་ན་ཡང་།འདི་གར་རང་བཙན་ཁ་ནས་སྐྱུགས་གང་ཐུབ་ཀྱིས་དབུ་ལམ་དེ་ལག་གཉིས་ཀྱིས་རང་གི་ཁ་ནང་དུ་བཙན་འཇོག་བྱེད།
དབུ་མའི་ལམ་གྱི་མངར་ཟས་ཞིམ་པོ་དེ་རྒྱ་ནག་གི་མདུན་ཅོག་ཐོག་ལ་གྲ་རྒྱས་བའི་བཤམས་ན་ཡང་། རྒྱ་ནག་གི་དཔོན་རིགས་ཚོར་མཁྲིས་ནད་བྱུང་བ་བཞིན་བོད་རང་བཙན་གྱི་འབྲི་མར་སེར་བོ་རེད་ཟེར།ཁོང་ཚོའི་སེམས་ཁོང་དུ་དོག་པའི་ཁེངས་བའི་མཁྲིས་ནད་སེལ་བའི་སྨན་ཞིག་བཙན་བྱོལ་གཞུང་གིས་བཟོ་ཐབས་བྲལ་ལ་ནུབ་ཕྱོགས་པ་ཚོས་ཀྱང་བཟོ་ཐབས་མི་འདུག་སྙམ། གང་ལྟར་ཀྱང་ང་ཚོས་ཀྱང་གྲ་སྒྲིགས་སྡུག་ས་རྒྱག་རྒྱུ་ལས་ཐབས་གཞན་ཅི་ཡང་མི་འདུག་སྙམ། ཨ་རི་དང་ཡོ་རུབ་སོགས་ཕྱོགས་ཡོངས་ཀྱི་བོད་རིགས་ཚོགས་པ་ཡོངས་ཀྱིས་གཞོན་ནུ་ཚོགས་པའི་ནང་ཞུགས་སྟེ།གཞོན་ནུའི་རྒྱ་ཁྱོན་ཆེ་རུ་བཏང་ནས་ལས་འགུལ་ཤུགས་ཆེན་སྤེལ་ན་ལེགས་སྙམ།
དེ་རིང་གུས་པ་ལྟ་བུ་དབུ་མའི་ལམ་དང་རང་བཙན་གཙང་མའི་ལམ་གཉིས་ཀྱི་གང་ལ་གོམས་པ་སྤོས་དགོས་མིན་བཤད་དཀའ།ཡིན་ཡང་སེམས་ཁ་ག་ལེར་རང་བཙན་ལམ་དུ་འཁོར་བར་ངེས་མོད།ཡིན་ཡང་དྲི་བ་ཆེན་པོ་ཞིག་ལྷག་ཡོད་པ་ནི་རང་བཙན་ཅི་ལྟར་རྩོད་རྒྱུ་ཡིན་འདི་རེད།
ངའི་དྲ་གྲོགས་མཆན་པ་ཚོས་ཀྱང་བསམ་གཞིགས་རེ་གནང་རྒྱུའི་རེ་བ་ཡོད།
གཡོ་སྒྱུ་ཁྲམ་གསུམ་འཛོམས་པའི་རྒྱལ་ཁམས་ཀྱི།།
སེམས་པ་ལྕགས་ལྟར་གྱུར་བའི་སྐྱེ་ཚོགས་སུ།།
བརྗོད་འདོད་སེམས་ཀྱི་རི་མོ་བྲིས་པ་འདི།།
གདོང་གཉིས་ཁྲམ་པའི་ཚོགས་སུ་འཁྱོལ་བར་ཤོག།
ནམ་མཁས་ཡོ་རུབ་ནས ༧/༦/༢༠༡༢ལ་བྲིས།
ཡག་པོ་གསུངས་འདུག
དེ་རྒྱའི་གཡོ་སྒྱུ་རེད། བོད་པས་ཅི་ལྟར་གནང་ཡང་རྒྱ་གཞུང་གིས་ཡ་གཡར་ས་ཡོད་ཡོད་པ་རེད།
འཛམ་གླིང་གི་ལུས་རྩལ་རྩེད་མོ་ཚར་བ་དང་བོད་རྒྱ་གྲོས་མོལ་གྱི་འབྲེལ་ཐག་ཆད་པ་ཡང་གཅིག་མཚུངས་སུ་གྱུར་པ་དེས་རྒྱ་ཕྱོགས་ཀྱིས་གྲོས་མོལ་མགྲོན་འབོད་དེ་གནས་སྐབས་ཁོ་པ་ཚོའི་ཆབ་སྲིད་ཀྱི་དགོས་མཁོ་དང་ལག་པ་ཕྱི་ས་ཞིག་གིས་ཐོག་ནས་དུས་ཚོད་ནར་མགྱངས་གཏོང་ཆེད་ཁོ་ན་ལས་དོན་དམ་པའི་གྲོས་མོལ་བྱ་འདོད་མེད་པ་དང་ད་ལྟ་གནས་བཞིན་པའི་མིང་ཙམ་གྱི་མི་རིགས་ས་གནས་རང་སྐྱོང་ཟེར་བ་འདི་ཡང་རྩ་མེད་བཟོ་རྒྱུའི་ཕུགས་བསམ་བཅངས་ཡོད་པ་མངོན་གསལ་དོད་པོར་ཆགས་ཟིན་ནས་༸གོང་ས་མཆོག་གིས་ད་ལྟའི་རྒྱ་ཡི་དཔོན་རིགས་ཚོར་ང་ཚོས་རེ་བ་རྒྱག་ས་ཞིག་མི་འདུག་ཅེས་གསལ་པོར་གསུངས་ཟིན་ནའང་ད་དུང་བློ་སེང་གིས་ཚ་ཚ་འུར་འུར་གྱིས་གྲོས་མོལ་གྱི་གྲ་སྒྲིག་བྱེད་ཀྱིན་པ་འདི་ནི་མཁས་པའི་མིང་འཛིན་ཙམ་ལས་དོན་དུ་ལྐུགས་པས་བྲོ་གར་སྔ་ཤུལ་དུ་འཁྲབ་པ་དང་འདྲའོ།
ལོག་སྨྲ་ཚར་གཅོད་ཀྱི་གསུངས་འཐད་པ་ཡོད་ལ།ང་ཚོས་ཀྱང་ལམ་ཁ་གཞན་ལ་སྙེགས་ན་བཟང་།
བཀྲིས་བདེ་ལེགས།
(ཡིན་ཡང་དྲི་བ་ཆེན་པོ་ཞིག་ལྷག་ཡོད་པ་ནི་རང་བཙན་ཅི་ལྟར་རྩོད་རྒྱུ་ཡིན་འདི་རེད།) ༧གོང་ས་མཆོག་གིས་དྲིས་བ་འདིའི་ལན་དུ་དབུ་མའི་ལམ་གནང་རེད། དེ་མ་གཏོགས་སུ་གང་གིས་འདི་ལ་གདེང་ཚོད་ཡོད་པའི་ལན་ཞིག་འདེབས་ཐུབ་ཡོད་པ་མ་རེད། ཁྱོ་ལ་ཡང་ཁག་མེད། ང་ཡང་དེ་ལྟར་ཡིན། གཞོན་ནུ། བུད་མེད། སློབ་ཕྲུག དམངས་གཙོ། དེ་ནས་གདན་ས་ཁག་གིས་འདི་ལ་གདེང་ཚོད་ཡོད་པའི་ལན་ཞིག་རེག་སོང་ད་གཟོད་ང་ཚོ་ཚང་མ་རྡོག་རྩ་གཅིག་སྒྲུལ་ཡོང་ཡ་ཡིན་ཡིན་པ་རེད། དེའི་བར་དུ་འདི་ལྟར་མ་ཤི་མ་གསོན་ཙམ་གྱིས་རྒྱ་ནག་འཐོར་རྒྱུ་་ལ་སྒུག་ནས་སྡོད་པ་ལས་་་་་་་་།
(ཡིན་ཡང་དྲི་བ་ཆེན་པོ་ཞིག་ལྷག་ཡོད་པ་ནི་རང་བཙན་ཅི་ལྟར་རྩོད་རྒྱུ་ཡིན་འདི་རེད།) དེ་སྔ་རང་བཙན་བརྩོད་ནས་རང་བཙན་ཐོབ་པའི་རྒྱལ་ཁབ་མང་པོ་དཔེ་བལྟ་ཡོད། ང་ཚོས་ལྟ་བ་གཅིག་དང་ཐབས་ལམ་གཉིས་བཟུང་རྒྱུ་རེད། ལྟ་བ་གཅིག་ནི་རང་བཙན་ལས་གཞན་མེད། ཐབས་མལ་གཉིས་ནི་འཚེ་བ་མེད་པའི་ཞི་བའི་ཐབས་ལམ་ཞིག་དང་དྲག་པོའི་ཐབས་ལམ་ཞིག་ངེས་པར་བརྟེན་དགོས་པ་ཡིན། ང་ཚོ་བོད་པར་འཆི་རྒྱུར་མི་སྐྲགས་པའི་བློ་སྟོབས་ཡོད་པ་འཛམ་གླིང་མི་མང་གི་ཤེས་སྡད་ཡོད། རང་སྲོག་བློས་བཏང་གི་ལས་འགུལ་སྤེལ་བཞིན་ཡོད་པ་ལྟར་རང་སྲོག་བློས་གཏོང་གིས་ངོ་བོར་སྒྱུར་བ་ཞིག་བཏང་ནས་རང་མེད་མི་མེད་བཟོ་མི་ཐུབ་པའི་རྒྱུ་མཚན་གང་ཡང་མེད། དེར་རྟེན་རང་གིས་རྒྱལ་ཁབ་དང་མི་རིགས་ཀྱི་ལས་དབང་ཆེད་རྒྱ་ཕྱོགས་ཀྱི་གནད་ཡོད་མི་སྣ་དང་གནད་ཡོད་ཀྱི་ས་ཁུལ་ཁ་ཤས་རྩ་གཏོར་བཏང་བ་ཡིན་ན་ཁ་ཅིག་གྲགས་དོགས་ཁ་པོ་རེད།