མཁོ་འདོན་པཿ དམ་ཆོས་བསམ་འཕེལ།
སྤྱིར་རྒྱུ་རྐྱེན་སྣ་ཚོགས་ཀྱི་དབང་གིས་ཕྱོགས་གང་ཐད་ནས་བོད་མི་རིགས་འདི་རྗེས་ལུས་ཤིག་ཡིན་པ་རང་གཞན་ཀུན་གྱིས་ཤེས་གསལ་ལྟར་ཡིན་མོད། ཉེ་བའི་ལོ་ཤས་རིང་མི་རིགས་འདིའི་གོ་རྟོགས་སད་པའི་མྱུར་ཚད་དང་ཚད་རིམ་ནི་ཧ་ལས་པའི་མཐོན་པོར་སླེབས། དཔེར་ན་མདོ་དབུས་ཁམས་གསུམ་གྱི་མི་མང་ཡོངས་ནས་སྡེབས་གཅིག་ལ་མ་བསྐུལ་དང་བླངས་ཀྱིས་རྩ་ཆེའི་རི་དྭགས་ཀྱི་པགས་རིགས་གྱོན་མཚམས་འཇོག་པའི་ཆས་གོས་གསར་བརྗེའི་བྱ་འགུལ་ཆེན་མོ་ནས་མགོ་བརྩམས་ཏེ་ད་ལྟའི་སྐད་ཡིག་རྨོངས་སེལ་གྱི་བྱ་འགུལ་བར་གནས་སྟངས་ཀྱི་ཆ་ནས་བལྟས་ན་འཛམ་གླིང་སྟེང་མཐོང་དཀོན་པ་ལྟ་བུར་ཡོད།
བོད་རང་གི་ལོ་རྒྱུས་ལ་ཕྱིར་འདང་རེ་བརྒྱབ་པ་ཡིན་ན་སྔར་ཆོས་རྒྱལ་མེས་དབོན་རྣམ་གསུམ་གྱིས་བོད་ལ་ཆོས་ལུགས་རིག་གནས་གསར་བརྗེ་བྱས་པའི་ཚུན་གྱི་བོད་ཀྱི་རླབས་ཆེ་བའི་གསར་བརྗེའི་ལས་འགུལ་ཆེ་ཤས་དེ་ཡིན་པར་གླེང་ཆོག་ཆོག་རེད། སྐད་ཡིག་རྨོངས་སེལ་གྱི་བྱ་འགུལ་འདིར་ཆོས་སྲིད་གང་གི་ཕྱོགས་ནས་ཀྱང་བསྐུལ་སློང་བྱེད་མཁན་གྱི་ཚོགས་པ། སྒྲིག་འཛུགས་ཅི་ཡང་མེད་པར་མང་ཚོགས་རང་ངོས་ནས་གོ་རྟོགས་སད་དེ། མི་རེ་རེ་དང་། ཁྱིམ་ཚང་རེ་རེ། སྡེ་བ་རེ་རེ་བྱས་ནས་ཡོངས་ཁྱབ་ཏུ་མཆེད་བཞིན་འདུག ཁོ་ཚོའི་ནང་ན་ཆེ་བ་ལོ་དགུ་བཅུའི་མན་དང་ཆུང་བ་བྱིས་པ་ལོ་གསུམ་ཡན་ཆད་ཡོད་པ་མ་ཟད། སྐད་ཡིག་རྨོངས་སེལ་གྱི་བྱ་བ་འདི་ནི་རྒྱལ་ཁབ་ཀྱི་སྐད་གཉིས་སློབ་གསོའི་སྲིད་ཇུས་དང་ཡོངས་སུ་མཐུན་པས་རྒྱལ་ཁབ་ཀྱིས་ཀྱང་བཀག་འགོག་བྱེད་ཀྱི་མི་འདུག་ལ། ས་གནས་ལ་ལའི་རྫོང་དང་ཡུལ་ཚོ་སྲིད་གཞུང་གི་ལས་བྱེད་རྣམས་ཀྱིས་ཀྱང་སྐད་ཡིག་རྨོངས་སེལ་གྱི་བྱ་བར་མཉམ་ཞུགས་དང་རྒྱབ་སྐྱོར་བླ་མེད་གནང་བཞིན་འདུག
གོང་བཀོད་ཀྱི་པར་རིས་འདི་དག་ལོ་འདི་འགའི་རིང་བོད་ནང་དུ་རྒན་པས་སྣེ་ཁྲིད་ནས་སྐད་ཡིག་རྨོངས་སེལ་བྱེད་བཞིན་པའི་གནས་སྟངས་དངོས་ཡིན། ཁོ་ཚོའི་མི་ཚེ་ཧྲིལ་བོར་རིག་གནས་སྦྱངས་པའི་གོ་སྐབས་མ་བྱུང་བའི་ཕངས་སེམས་གསུང་ཡོང་དུས་མི་རྣམས་ཀྱི་མིག་ཆུ་དབང་མེད་དུ་འཇོ་བར་བྱེད། འདི་ལྟར་རྒན་སྐྱོར་བྱིས་ཁྲིད་ཀྱིས། རྒྱུ་དང་ནོར་གྱི་ཧམ་སེམས་མེད་ལ། ཐོབ་དང་གོ་སའི་རེ་བ་མེད་པར། ཞི་བདེ་དང་སློབ་གསོ་ཁོ་ནའི་ཆེད་ལམ་ལ་ཆས་བཞིན་འདུག ད་དུང་གནས་སྟངས་དངོས་ལ་བསམ་བློ་རེ་བཏང་ཚེ། ཆ་རྐྱེན་དང་གོ་སྐབས་ཞན་ལ། ཕྱི་ནང་གི་རྒྱུ་རྐྱེན་སྣ་ཚོགས་ཀྱི་དཀའ་ངལ་ལ་གདོང་གཏད་ནས་རང་མི་རིགས་ཀྱི་སློབ་གསོའི་བྱ་བཞག་རྨངས་ནས་གསོ་བའི་མང་ཚོགས་འདི་དག་ལ་སྙིང་ཐག་པ་ནས་བཀའ་དྲིན་ཆེ་ཞུ་བ་དང་ཆབས་ཅིག་རྒྱལ་ཁབ་ཕྱི་ནང་ན་གནས་པའི་བོད་རིགས་སྤུན་ཟླ་ཡོངས་དང་། ལྷག་པར་བླ་སྤྲུལ་དང་མཁས་དབང་བོད་ཀྱི་སློབ་གསོའི་རྐང་འཛིན་པར་རློམ་པ་རྣམས་ལ་བོད་སྐད་གཙང་མ་སྨྲ་བའི་རྐང་འཛིན་པ་མི་བྱེད་རུང་མང་ཚོགས་ཕལ་བ་འདི་དག་ལ་ཡིད་སྨོན་རེ་མི་འཆོར་རམ་ཞུ་བ་ལགས་སོ། །
བོད་མི་རིགས་ཀྱི་མཚོན་རྟགས་བླ་ན་མེད་པ། ཀ་ཁ་ག་ང་ནམ་ཡང་རྒྱལ་གྱུར་ཅིག །ས་ཆ་གང་ནས་ཡིན་གསལ་ཁ་མི་འདུག །ཕལ་ཆེར་མཚོ་སྔོན་ཕྱོགས་ཡིན་ས་རེད།
ཧ་ཅང་ཡག་པོ་འདུག་མུ་མཐུད་དུ་ཤིགས་རྒྱག་རོགས།
བོད་ཡིག་བོད་སྐད་་བོད་ཀྱི་བླ་སྲོག་ཡིན་པས་སྐད་དང་ཡི་གེ་ག་ཚོད་གནས་ན་བོད་མི་ཡང་དེཚོད་གནས་སྐད་ཡིག་སྲུང་སྐྱོབ་བྱེད་པ་ནི་ཤུན་དུ་ལེགས།
གནས་ཚུལ་ཐོས་པར་མཛད་པ་ལ་བཀའ་དྲིན་ཆེ། བོད་ལུགས་བཟང་སྲུང་བའི་བྱ་བ་འདི་བཞིན་བོད་ལྗོངས་ཡོངས་དང་། རི་བོ་གངས་ཅན་ལོགས་སུ་འཁོད་པའི་སྐྱེ་བོ་རྣམས་དང་། རྒྱ་གར་སོགས་ལ་ཡོད་པའི་བོད་རིགས་དག་གིས་ཀྱང་མཛད་མི་དགོས་སམ། སྔོན་ལོ་ངོ་ཉི་ཤུ་རྩ་གྲངས་ཙམ་སྔོན་དུ་ཨ་རིའི་གྲོང་ཁྱེར་ནེཝ་ཡོརཀ་གྲོང་ཁྱེར་དུ། བོད་ཀྱི་ལས་ཁུངས་ཀྱི་ཁང་པར་བདུན་རེ་བཞིན་འཛོམས་ནས་ས་སྐྱ་ལེགས་བཤད་སོགས་ཀློག་པར་དྭངས་བླངས་ཀྱིས་ཕྱིན་ཏེ། ཀློག་པ་པོ་བཅོ་ལྔ་ཉི་ཤུ་ཙམ་འཛོམས་པའི་རེ་བ་བྱས་ཀྱང་། ང་རང་ཐེ་བས་ཀློག་པོ་བཞི་མ་གཏོགས་མ་བྱུང་། ད་རེས་བོད་ཀྱི་ལས་འགུལ་འདི་ཛམ་གླིང་བོད་ཡོངས་ཀྱི་མིག་ལྟ་སའི་རྒྱུར་གྱུར་ཅིང་། བོད་སྲོལ་བཟང་སྲུང་བའི་བྱ་བ་བཟང་པོའི་ས་བོན་འདེབས་པ་འདི་ལ་བོད་སྲོལ་བཟང་གི་མེ་ཏོག་དང་ལོ་ཏོག་མང་པོ་འཆར་བར་སྨོན་ནོ།།
ཡི་གེ་འབྲི་བ་པོ་ལ་དྲི་བ་དང་། བསམ་འཆར་ཞིག་ཡོད།
བོད་རང་གི་ལོ་རྒྱུས་ལ་ཕྱིར་འདང་རེ་བརྒྱབ་པ་ཡིན་ན། ཞེས་པའི་འདང་གི་དོན་ཅི་ཡིན་ནམ།
ཡོད་པ་མ་ཟད། ཅེས་པ་ཁྱེད་ཙམ་མ་ཡིན་པར་བོད་ཀྱི་རིག་གཞུང་དཔེ་ཆ་ལེགས་པར་ཀློག་་མ་མྱོང་བ་མང་པོས་འབྲི། འོན་ཀྱང་བོད་ལུགས་བཟང་གི་སྐད་དུ། ཡོད་པར་མ་ཟད་ཅེས་བྲིས་ཡོད་པ་དཔེ་རྙིང་ཚང་མ་ན་འདུག བོད་སྔ་རབས་པའི་སྐད་ཡིག་དེ་བོད་ཡོངས་གཅིག་སྒྲིལ་བྱེད་པ་ལ་མེད་དུ་མི་རུང་བར་མཐོང་ངོ་།།
ངོ་མ་འདི་དག་ནི་དགའ་འོས་པའི་གནས་ཚུལ་རེད། སྟག་གཟིག་གི་པགས་པའི་ལས་འགུལ་བཞིན་བོད་ཕྱི་ནང་གཉིས་ནས་རྒྱུན་སྐྱོང་ཐུབ་པར་བྱ་དགོས་པ་གལ་ཆེ།
རྒན་ལ་དྭགས་པ་ལགས། སྐུ་ཉིད་ཀྱི་e-mail་ཁ་བྱང་འདིར་བཞག་ན་འགྲིག་གི་རེད་དམ། སྐུ་ཉིད་ལ་བཀའ་འདྲི་ཞུ་ཡ་ཁ་ཤས་ཡོད་ལགས།
ཨ་མདོའི་ཁ་སྐད་དུ་སྤྱོད་པའི་འདང་ཞེས་པ་ཞེན་ཆགས་དང་བརྩེ་གདུང་ལ་འཇུག །དཔེར་ན། ང་རང་དགེ་རྒན་ལ་འདང་ཆེ་ལྟ་བུ། ཕ་མ་ལ་འདང་ཆེ་ལྟ་བུའོ། །དེ་མིན། བསམ་བློ་ལའང་འཇུག་སྟེ། དཔེར་ན། ངས་འདང་ཡུན་རིང་བརྒྱབ་ཀྱང་དྲན་མ་སོང་ལྟ་བུའོ།།
མི་རྟག་དྲན་སྐུལ།
ཀྭ་ཡེ་ལེ་ལོ་ལང་ཤོར་མ་སོང་བར།།ཁ་ཙམ་མིན་པའི་མི་རྟག་དྲན་སྐུལ་བྱ།།ག་ནས་བསྡད་ཀྱང་འཆི་བདག་བདུད་པོ་ཡིས།།ང་དང་གྲོགས་ཁྱོད་ཐར་བར་མི་གཏོང་ངོ་།།ཅ་ཅོ་བག་མེད་སྤྲང་པོའི་སྟོང་འདང་གིས།།ཆ་ལུགས་ཉི་མ་འཕུད་ཐབས་བྱེད་པ་འདི།།ཇ་ཡུན་ཙམ་ལ་སྡོད་པའི་དབང་མེད་པས།།ཉ་ཉོག་སྟོང་བར་ཟད་པའི་ལོ་རྒྱུས་ཡིན།།ཏཱ་ཐ་གཱ་ཏའི་གཞུང་ལ་མ་འགྲིམས་པར།།ཐ་མལ་རང་སེམས་བསླུས་བ་མ་ཤེས་པས།།ད་ལྟའི་ཡོ་ལང་གློག་གི་འཕྲུལ་འཁོར་གྱིས།།ན་ཚོད་སྟོང་ཟད་བྱེད་པ་ཡུན་གྱིས་ཚོར།།པ་སངས་ལྟ་བུའི་རབ་དཀར་སེམས་གཏིང་ནས།།ཕ་རོལ་དོན་ཆེན་སྒྲུབ་པའི་སེམས་དཔའ་ལ།།བ་ལང་ལྟ་བུ་འདུ་ཤེས་དམན་པ་ཡིས།།མ་རིག་ཁྱད་གསོད་བྱེད་པ་ཡིད་རེ་སྐྱོ།།ཙ་ན་ཀ་ཡི་ཟས་སོགས་ངན་ངོན་ཙམ།།ཚ་གྲང་མྱོང་མཁན་ཀུན་ལ་ཁྱད་མེད་ཀྱང་།།ཛ་ལང་སྤྱོད་པ་བདག་དོན་ཁོ་ནའི་ཆེད།།ཝ་ལེར་བསམ་ན་ཡིད་སེམས་གཏིང་ནས་འཕྱོ།།ཞྭ་སེར་མཁན་པོས་བྲག་ཕུག་སྐམ་པོ་ནས།།ཟ་རྒྱུ་འཐུང་རྒྱུ་ཙམ་ལ་མ་ཞེན་པར།།འ་ཅག་སྐྱེ་འགྲོ་ཡོངས་ལ་སྨན་སླད་དུ།།ཡ་མཚར་ཆེ་བའི་གདམས་ངག་གྲུ་ཆར་ཕབ།།ར་རིའི་བློ་དང་བྲལ་བའི་བཤེས་གཉེན་རྣམས།།ལ་ལུང་ངེས་མེད་མི་མེད་རི་ཁྲོད་དུ།།ཤ་མཆོག་སྙིང་གི་གུར་ཁང་ར་བ་ནས།།ས་ལམ་འདྲེན་པའི་བྱང་ཆུབ་ལམ་རིམ་སྒོམ།།ཧ་ལེ་ཧོ་ལེའི་ངང་དུ་མ་སོང་བར།།ཨ་མྲི་ཏ་ཡི་བདུད་རྩིའི་དཔལ་འདོད་ན།།ཧ་ལམ་བདེན་བཞིའི་མི་རྟག་སྒོམ་པ་ནི།།ཨ་དོན་སྐྱེ་མེད་རྟོགས་པའི་ཆེད་དུ་ཡིན།།
དངོས་གནས་ཡག་པོ་རེད་འབྲོག་ཕྲུག་ཚོ་ཤུགས་བརྒྱབ།
མིག་བརྒྱད་པ་མཆོག འདང་གི་དོན་གསུངས་པར་བཀའ་དྲིན་ཆེ། ཡིག་སྐད་དུ། དྭངས་དང་། དང་གི་ད་ལྟ་བ། འདང་། ཞེས་པ་ཡིན་འདུག ངའི་གློག་འཕྲིན་ཨང་གྲངས་ནི། lj53@columbia.edu ཞེས་པ་ཡིན། སྐུ་ཉིད་དང་གཞན་ཡོངས་ལ་བཀྲ་ཤིས་བདེ་ལེགས།
ཁམས་ཨ་མདོའི་སྐད་གང་ཡིན་རུང་སྒྲ་གདོང་མ་འདྲ་བ་ཙམ་ལས་དགས་ཆ་སོགས་བོད་སྤྱིའི་སྐད་ཡིག་དང་མ་མཐུན་པ་ཞིག་མེད། འདང་རྒྱག་ཟེར་བ་མིན་པ། འདུན་རྒྱག་ཡིན་དགོས། འདུན་གྱི་སྒྲ་དེ་ཨ་མདོ་ནང་འདང་རྒྱག་བཅས་ཀློག་ནས། ད་ལྟ་འདང་རྒྱག་བཅས་བྲིས་པ་ནི་ཁུངས་མེད་རེད་བསམ། དགས་ཆ་ང་ཡང་ཡག་པོ་མེད་རུང་། རང་གི་ཡུལ་སྐད་ཀྱི་སྒྲ་བྲིས་ནས་འགྲིག་པ་ངས་མ་མཐོང་།
ཀ་ཁ་ག་ངའི་གདངས་འདི་བོད་ཀྱི་ཡིན།། ཨི་ཨུ་ཨེ་ཨོའི་དབྱངས་འདི་བོད་ཀྱི་ཡིན།།
འདི་ལ་གཅེས་སྤྲས་བྱས་ན་ལ་རྒྱ་ཡིན།། འདི་ལ་བདག་པོ་རྒྱབ་ན་དཔའ་པོ་ཡིན།།
ཀ་ཁའི་བོད་སྐད་བོད་པ་ཀུན་གྱིས་སྦྱོང་དགོས་འདུག །
ཁ་ནས་སྐད་ཆ་བོད་པར་ཤོད་ཚད་བོད་སྐད་དང་། །
ག་ཝར་བོད་པ་ཐུག་ཚད་བོད་སྐད་ཤོད་ཐབས་ལས། །
ང་ཅག་བོད་པས་བོད་སྐད་སྲུང་སྐྱོབ་དེ་ལྷག་མེད། །
ཐུགས་རྗེ་ཆེ་ཐུགས་རྗེ་ཆེ། ད་དུང་སེམས་ཤུགས་བསྐྱེད་དེ་ཡར་རྒྱས་གོང་འཕེལ་ཡོང་བའི་བཀྲིས་སྨོན་འདུན་ཞུ་རྒྱུ་ཡིན།
འཛམ་གླིང་ལྷ་ལམ་ཡངས་པའི་དཀྱིལ་འདི་ན།།
སྣང་བྱེད་བོད་ཀྱི་རིགས་གཞུང་འདི་འདྲ་བ།།
རེ་ཞིག་སྤྲིན་ནག་འཐུག་པོས་བསྒྲིབས་ཡོད་ཀྱང༌།།
ད་ལམ་རླུང་གིས་འཐོར་བ་བཀའ་དྲིན་ཆེ།།