ཨེ་མ་ཧོཿ
ཨེ་ཝྃ་ཞི་བདེ་གླིང་པའི་ཕྲིན་ལས་གར། །
དོན་གཉིས་ཡིད་བཞིན་ནོར་བུའི་སྙིང་ཐིག་གི །
བསྟན་འཛིན་ཆོས་ཀྱི་རྒྱ་མཚོ་རིན་པོ་ཆེའི། །
བཞེད་དོན་ལྷུན་གྲུབ་སྐུ་ཚེ་རབ་བརྟན་ཤོག །
ཤྲྰིས་སྙིང་ནས་སྨོན་པ་དགེའོ། །
ཨེ་མ་ཧོཿ
ཨེ་ཝྃ་ཞི་བདེ་གླིང་པའི་ཕྲིན་ལས་གར། །
དོན་གཉིས་ཡིད་བཞིན་ནོར་བུའི་སྙིང་ཐིག་གི །
བསྟན་འཛིན་ཆོས་ཀྱི་རྒྱ་མཚོ་རིན་པོ་ཆེའི། །
བཞེད་དོན་ལྷུན་གྲུབ་སྐུ་ཚེ་རབ་བརྟན་ཤོག །
ཤྲྰིས་སྙིང་ནས་སྨོན་པ་དགེའོ། །
ཨེ་ཝྃ་དབྱངས་གསལ་སོ་སོ་ལ། །
ཨེ་ཝྃ་ཕོ་མོའི་ཐབས་ཤེས་སྦྱར། །
ཨེ་ཝྃ་ཐབས་ཤེས་ངོ་བོ་གཅིག །
ཨེ་ཝྃ་གཅིག་ཉིད་གཉིས་སྟོན་མཁས། །
བཞེད་འདོད་ལྷུན་གྱིས་གྲུབ་པར་ཤོག །
ཨེ་ཝྃ་ཐབ་ཤེས་ཟུང་དུ་འབྲེལ། །
ཨེ་ཝྃ་བདེ་གསལ་མི་རྟོག་འཕེལ། །
ཨེ་ཝྃ་བདེ་སྟོང་ཟུང་འཇུག་སྤེལ། །
ཨེ་ཝྃ་རང་གཞན་དོན་སྟོན་མཁན། །
༸སྐུ་ཚེ་ཡུན་གནས་རབ་བརྟན་ཤོག །
༑ །དྲོ་སྐྱིད་ཀྱི་ཉི་མ། མུན་སེལ་གྱི་ཟླ་བ། ཞིང་བསིལ་གྱི་སྐར་ཚོགས། འཛམ་གླིང་གི་མགོན་སྐབས། ས་སྟེང་གི་སྐྱབས་མཆོག ཕན་བདེ་ཡི་གཞི་རྩ། འུ་ཅག་གི་བླ་མ། འདི་ཕྱི་ཡི་རེ་སྐྱབས། ཡིད་བཞིན་ནོར་མཆོག་ཁྱེད་ཉིད་ནི། སྒྲིབ་བྲལ་གྱི་དག་པའི་ཞིང་ཁམས་ནས་རྨད་བྱུང་གི་ཐུགས་བསྐྱེད་སྟོབས་ཀྱིས་འཁྲུག་རྩོད་ཀྱི་མཚོན་ཁ་བརྡོལ་བའི་གོ་ལ་འདིར་བསམ་བཞིན་སྲིད་པའི་ཚུལ་བཟུང་ནས་ད་བར་མི་ལོ་ཧྲིལ་པོ་དོན་བདུན་ཡུད་ཀྱིས་འཁོར་བའི་དེ་རིང་གི་བཀྲ་ཤིས་པའི་སྐུའི་འཁྲུངས་སྐར་དགེ་བའི་ཉིན་མོ་འདི་ལ་གུས་འབངས་སུ་ གཏོགས་པའི་ཉམ་ཆུང་བདག་གིས་དྭངས་ཤིང་གཙང་བའི་ལྷད་མེད་དད་གདུང་དྲག་པོ་སོར་མོའི་འདབ་མ་སྙིང་ཁར་ཟུམ་ཏེ་ལྷ་ཕྱག་གྲངས་མེད་དང་བཅས་འཚམས་འདྲིའི་བཀྲ་ཤིས་བདེ་ལེགས་དང། བླ་ན་མེད་པའི་གསོལ་སྨོན་ཤུག་དྲག་ཏུ་འདེབས་པ་ནི། ཁྱད་ཆོས་བརྒྱད་ལྡན་གྱི་རྩ་བའི་བླ་མ་ཁྱེད་ཉིད་སྐུ་ཚེ་བསྐལ་པ་རྒྱ་མཚོར་བརྟན་ཅིང་ཐུགས་བཞེད་ཇི་ཡོད་འབད་མེད་ལྷུན་གྱིས་འགྲུབ་པ་དང་མཛད་བཟང་ལ་ད་ལྟའི་མུ་བཞིན་ཡར་ཟླར་འཕེལ་བའི་སྨོན་ལམ་སྙིང་ཁོངས་རུས་པའི་གཏིང་ནས་འདེབས་པ་ལགས་སོ། །
༄༅།།གཙང་སྟག་ཚང་ལོ་ཙཱ་བ་ཤེས་རབ་རིན་ཆེན་རྒྱལ་མཚན་དཔལ་བཟང་པོས་མཛད་པ་བསྟན་འཛིན་ཆེན་པོ་འགྲན་ཟླ་དང་བྲལ་བ་བློ་བཟང་གྲགས་པའི་དཔལ་གྱི་ངང་ཚུལ་མདོ་ཙམ་དུ་བརྗོད་པ་དད་པའི་པདྨོ་རྒྱས་པར་བྱེད་པའི་བསྟོད་ཚིག་གི་ཉི་མ་ཞེས་བྱ་བ་བཞུགས་སོ།།
ན་མོ་མཉྫུ་གྷོ་ཥཱ་ཡ།
བློ་ཆེན་རྒྱལ་བ་རྣམས་ཀྱི་སྤྱན་སྔ་རུ།།བཟང་པོའི་སྨོན་ལམ་རླབས་ཆེན་གྲུབ་པའི་མཐུས།།
གྲགས་པའི་སྒྲ་ཆེན་ཐུབ་བསྟན་འགྲོ་བའི་དཔལ།།བློ་བཟང་གྲགས་པའི་དཔལ་ལ་གུས་ཕྱག་འཚལ།།དཔག་ཡས་ཚོགས་གཉིས་ཀུན་གྱི་རྩེ་མོར་སོན།།བགྲང་ཡས་རྒྱལ་བ་ཀུན་གྱི་རིང་ལུགས་འཛིན།།མཐའ་ཡས་འགྲོ་བ་ཀུན་གྱི་དགེ་བའི་བཤེས།བསམ་ཡས་ཡོན་ཏན་ཀུན་གྱི་གཏེར་ལ་འདུད།།གངས་ཅན་ཤར་ཕྱོགས་ཙོང་ཁའི་སྐྱེད་ཚལ་དུ།།དལ་འབྱོར་ཡོངས་འདུའི་རྩ་བ་རབ་བརྟན་ཅིང་།།ཡོན་ཏན་ཡལ་གས་ཕྱོགས་ཀྱི་མཐའ་འཇལ་བ།།སྙན་གྲགས་དྲི་བསུང་འཕྲོ་བ་ཁྱོད་ལ་འདུད།།དྲི་མེད་མཁྱེན་ཡངས་འཇིགས་བྲལ་གཞོན་བློ་སོགས།།གངས་ཅན་མཁས་པའི་མཁས་པ་ཀུན་བསྟེན་ནས།།སྤྱི་དང་ཁྱད་པར་གཞུང་ལུགས་མཐའདག་ལ།།རྨོངས་པའི་མུན་ཀུན་སངས་པ་ཁྱེད་ལ་འདུད།།སྙོག་བྲལ་ཚུལ་ཁྲིམས་བརྟུལ་ཞུགས་རྒྱ་མཚོ་ཆེར།།མང་ཐོས་ལུང་རིགས་ནོར་བུས་ལྷག་པར་གཏམས།།མཁས་མཆོག་ཀླུ་དབང་ཀུན་གྱིས་གུས་པས་སྟེན།།རྣམ་དཔྱོད་གཏིང་མཐའ་མེད་ལ་གསོལ་བ་འདེབས།།ཁྱོད་བློའི་ཉི་མ་གཞོན་ནུའི་དུས་ཀྱི་ཚེ།།མདོ་དང་རྒྱན་གྱི་པད་ཚལ་རྒྱས་མཐོང་ནས།།བདག་བློ་ཁེངས་བའི་ཀུ་མུད་ལྷག་པར་ཟུམ།།ཟབ་ཡངས་མཁྱེན་པའི་གཏེར་ལ་གསོལ་བ་འདེབས།།བྱང་ཕྱོགས་འདི་ན་ཚིག་ཙམ་བྱང་བའང་དཀོན།།དོན་ལ་སྒྲོ་འདོགས་ཆོད་པ་དེ་བས་དཀོན།།བསྟན་དོན་ཉམས་སུ་ལེན་པ་སྲིད་མཐའ་ཙམ།།འདི་གསུལ་མཐར་ཕྱིན་ཁྱོད་ལ་སྙིང་ནས་འདུད།།ལ་ལ་རིགས་བྲལ་ལུང་གིས་གྲུབ་མཐའ་འཇོག།ཁ་ཅིག་ལུང་མེད་རིགས་པ་ལྟར་སྣང་རྩོམ།།ལུང་རིགས་གཉིས་ཀས་རྒྱལ་བའི་གསུང་རབ་ཀུན།།ལེགས་པར་འབྱེད་པ་ཁྱོད་ལ་གུས་ཕྱག་འཚལ།།ཁ་ཅིག་འདུལ་བ་གཙོར་བྱེད་གསང་སྔགས་སྤོང་།།གཞན་དག་སྔགས་ལ་མོས་བློས་འདུལ་བ་འགོག།རྒྱལ་བའི་བསྟན་པ་མཐའ་དག་འགལ་མེད་དུ།།རྫོགས་པར་ཉམས་སུ་ལེན་མཁས་ཁྱོད་ལ་འདུད།།མཚན་ཉིད་ཕྱོགས་བཟུང་གསང་སྔགས་ཟབ་ཆོས་དང་།།སྔགས་ཀྱི་ཁེངས་ནས་མཚན་ཉིད་ཁ་བཤད་ཙམ།།མདོ་སྔགས་མཐའ་དག་མ་ཚང་རྫོགས་བྱང་དུ།།བགྲོད་ཐབས་མེད་པར་གཟིགས་པ་ཁྱོད་ལ་འདུད།།ལ་ལ་སྤྱོད་པ་ཞིབ་མོས་ལྟ་བ་འགོག།ཁ་ཅིག་ལྟ་བ་མཐོན་པོས་སྤྱོད་པ་འདོར།།ལྟ་སྤྱོད་ཕན་ཚུན་གྲོགས་སུ་ཤར་ནས་ནི།།དོན་འདི་ལྷག་པར་འདོམས་པ་ཁྱོད་ལ་འདུད།།འགའ་ཞིག་བཤད་པ་གཙོར་བྱེད་སྒོམ་ལ་སྨོད།།ལ་ལ་སྒོམ་གྱིས་ཆོག་འཛིན་ལུང་ལ་སྨོད།།བཤད་སྒྲུབ་གཉིས་ནས་ལུང་རྟོགས་དམ་པའི་ཆོས།།འཛིན་ཚུལ་གསལ་མཛད་ཁྱོད་ལ་གུས་པས་འདུད།།མདོ་སྔགས་མཐའ་དག་ཁྱད་པར་རྡོ་རྗེ་ཐེག།རྒྱུད་སྡེ་མཐའ་དག་ཁྱད་པར་བླ་མེད་དོན།།རིམ་གཉིས་མཐའ་དག་ཁྱད་པར་སྒྱུ་ལུས་ལ།།སྔོན་མེད་ལེགས་བཤད་གཏེར་ཆེན་ཁྱོད་ལ་འདུད།།མདོར་ན་ཐུབ་བསྟན་མཐའ་དག་མ་ལུས་པར།།བཤད་སྒྲུབ་གཉིས་ཀྱིས་ཆེས་ཆེར་གསལ་མཛད་པ།།གངས་ཅན་འདི་ན་བསྟན་འཛིན་མཐའ་དག་གིས།།རྟག་ཏུ་བསྔས་པར་འོས་པ་ཁྱོད་ལ་འདུད།།བདག་ཀྱང་དེང་ནས་ཚེ་རབས་ཐམས་ཅད་དུ།།བདག་ཉིད་ཆེན་པོ་ཁྱོད་བཞིན་རྒྱལ་བའི་བསྟན།།བདག་པས་གཞན་གཅེས་ལྷག་བསམ་ཕུལ་བྱུང་གིས།།བདག་གིས་སྲོག་ལྟར་བསྲུང་བར་བྱིན་གྱིས་རློབས།།ཁྱོད་ལ་གཙོར་བྱས་ཧ་ཅང་མཆོག་འཛིན་གྱིས།།ཕྱོགས་ལྷུང་གདོན་གྱིས་ཐུབ་བསྟན་དཀྲུགས་པ་ཡང་།།དག་སྣང་ཕྱོགས་མེད་འབྱོངས་བ་ཁྱོད་ཉིད་ཀྱིས།།མྱུར་དུ་བསལ་ནས་བསྟན་འཛིན་མཐུན་གྱུར་ཅིག།།
ཅེས་་གཙང་སྟག་ཚང་གི་ལོ་ཙཱ་བ་ཤེས་རབ་རིན་ཆེན་རྒྱལ་མཚན་དཔལ་བཟང་པོས་དགེ་འཕེལ་ཆོས་འཁོར་སྒར་དུ་སྦྱར་བའོ།།
སྟག་ཚང་ལོ་ཙཱ་བས་གོང་གསལ་རྗེ་ཙོང་ཁ་པའི་མཁྱེན་ཡོན་ལ་བསྔགས་པ་ལྟར། འདིར་སྙིགས་ལྔའི་རང་མཚང་མཚོ་ལྟར་རྡོལ་བ་དུས་ངན་གྱི་མཐའ་ལའང་སྐྱོན་གྱིས་མ་གོས་པའི་མཁས་བཙུན་བཟང་གསུམ་གྱི་ཡོན་ཏན་དང་ལྡན་པ་དོན་གྱི་སླད་དུ་མཚན་ནས་སྨོས་ན་ཤཱཀྱའི་དགེ་སྦྱོང་བསྟན་འཛིན་རྒྱ་མཚོ་དཔལ་བཟང་པོ་ལ་ཡང་མཀྱེན་བརྩེ་ནུས་པའི་ཡོན་ཏན་དེ་དེ་བཞིན་དུ་མངའ་འོ་ཞེས་སྦྱར་ནས་དཔྱད་ན་འགལ་བ་མེད་ལ་ཚད་མས་ངེས་པ་བརྙེད།