འབྲོག་རུ་ཆོས་གྲགས།
དཀའ་བ་ཁྲི་ཕྲག་གི་རྔུལ་ཆུའི་ཁྲོད་ནས
ངལ་བ་གྲངས་མེད་ཀྱི་སྡུག་ཡུས་ཀློང་ནས
ཁྱེད་རང་འཇིག་རྟེན་འདིར་སླེབས་དུས
བོད་པ་ཚང་གིས་ཁྱེད་ལ་འཛུམ་མདངས་ཀྱིས་དགའ་བསུ་བྱས་ཐུབ་མེད
ཁ་བ་ཚང་གིས་ཁྱེད་ལ་བསྟོད་བསྔགས་ཀྱི་མེ་ཏོག་གཏོར་ཐུབ་མེད
ཏག་ཏག
ཁྱེད་ཉིད་འཇིག་རྟེན་འདིར་སླེབས་དུས
འུ་ཚང་གི་ཁྱིམ་གཞི་ལ་ཡང་བསྐྱར་གོད་ཆགས་ཐེབས་པའི་ལོ་ཟླ་ཡིན
འུ་ཚང་གི་ཕ་ཡུལ་ལ་ཡང་བསྐྱར་ཤི་རྨས་ཐེབས་པའི་དུས་ཚོད་ཡིན
དེའི་རྐྱེན་གྱིས ཁྱེད་ལ་འཛུམ་མདངས་ཀྱིས་དགའ་བསུ་བྱས་ཐུབ་མེད
དེའི་དབང་གིས ཁྱེད་ལ་བསྟོད་བསྔགས་ཀྱི་ཐལ་མོ་རྡེབ་ཐུབ་མེད
མི་ལོ་གཅིག་རིང་གི་ཁྱེད་ཀྱི་བརྒྱུད་རིམ་ཁྲོད
ཁྱེད་ཀྱི་བཟོད་སྒོམ་དང་སྙིང་སྟོབས་ཀྱིས་ང་རང་གསོན་དུ་བཅུག
ཁྱེད་ཀྱི་སྒམ་དཀྱེལ་དང་དྲང་བདེན་གྱིས་ང་རང་ལངས་དུ་བཅུག
ཡིན་ནའང༌།
ས་འདི་ན་ང་ལ་ཕ་མ་དང་སྤུན་མཆེད་མེད
ཡུལ་འདི་ན་ང་ལ་ཁྱིམ་གཞིས་དང་རྒྱུ་ནོར་ཡང་མེད
ཐ་ན་རང་ཉིད་ཀྱི་ལྟོ་རྒྱབ་ཀྱང་གཞན་གྱི་ལག་ཏུ་ཡོད
འོན་ཀྱང༌།
ང་རང་སྡུག་དུས་ཁྲོ་གཏམ་གླེང་ས་དང
ང་རང་དགའ་དུས་སྙིང་གཏམ་བཤད་ས་ཁྱེད་རང་ཆགས་པས
ངེད་གཉིས་བར་ལ་རང་བཞིན་གྱིས་དུངས་སེམས་ཤིག་ཆགས
དེ་རིང་ནི་ཁྱེད་ཀྱི་འཁྲུངས་སྐར་ཉིན་མོ་རེད
དེ་རིང་ཁྱེད་ཉིད་འཇིག་རྟེན་འདིར་སླེབས་ནས
མི་ལོ་གཅིག་ཏག་ཏག་འགོར་བའི་ཉིན་མོ་རེད
དེ་བས
དེ་རིང་ངས་སེམས་ཀྱི་ཁ་བཏགས་མཁའ་རུ་བཏེགས་ནས
ཁྱེད་ལ་བཀྲ་ཤིས་བདེ་ལེགས་དང
བསམ་དོན་ལེགས ཅི་བསམ་ལྷུན་འགྲུབ
བྱ་བ་ལམ་འགྲོ་ཡོང་བའི་བཀྲ་ཤིས་སྨོན་འདུན
སེམས་བསམ་པའི་གཏིང་དང
སྙིང་རུས་པའི་ཁོང་ནས་ཞུས་པ་ཡིན