ཆབ་སྲིད་དཔྱད་གླེང་འདོན་ཐེངས་གཉིས་པ་ལས་དྲངས།
བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེ་རྒྱ་ཕྱོགས་ནས་ཁས་མ་བླངས་པ་ཡིན་སྟབས། མ་འོངས་པར་གང་བྱེད་ཀྱི་རེད་འདོད་མཁན་མང་པོ་ཡོད་པ་རེད། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེ་རྒྱ་ཕྱོགས་ནས་ཁས་མི་ལེན་པར་འཇོག་ཐུབ་ཐབས་མེད། ཁས་ལེན་གྱི་ཡིན་དང་མིན་ཞེས་པ་དེ་ཚོ་བརྒྱུད་ལམ་ཐོག་བཤད་རྒྱུའི་སྐད་ཆ་ཞིག་རེད། མི་དང་མི་གདོང་ཐུག་ནས་སྐད་ཆ་བཤད་པའི་སྐབས་སུ། ཡང་མིན་ན་རྩ་ཁྲིམས་ཁས་ལེན་་གྱི་མིན་ཞེས་བཤད་དགོས་ཀྱི་རེད། རྩ་ཁྲིམས་ཁས་ལེན་གྱི་མིན། རྩ་ཁྲིམས་ལ་འགྱུར་བ་གཏོང་རྒྱུ་ཡིན་ཞེས་བཤད་རྒྱུའི་དུས་ཚོད་ཅིག་ལ་མ་སླེབས་བར་དུ་བསམ་འཆར་ཡིག་ཆ་ཁས་ལེན་བྱེད་ཀྱི་མིན་ཞེས་བརྗོད་ཐུབ་ཐབས་མེད། རྒྱལ་སྤྱིའི་ནང་དུ་བརྗོད་ཐུབ་ཀྱི་མ་རེད་ལ། རྒྱལ་ནང་དུའང་བརྗོད་མི་ཐུབ། དེར་བརྟེན་༼བསམ་འཆར་༽ཡིག་ཆ་དེ་འབྱུང་འགྱུར་འབྲེལ་མོལ་དང་གྲོས་མོལ་བྱེད་རྒྱུའི་གོ་སྐབས་ག་དུས་བྱུང་ནའང་། ང་ཚོའི་ངོས་ནས་སྐད་ཆ་བཤད་རྒྱུའི་གཞི་རྩ་ལྟེ་བ་ལ་བཟུང་ནས་འགྲོ་རྒྱུ་རེད། ཁོང་ཚོའི་ངོས་ནས་ཀྱང་དེའི་ཐོག་མ་བཤད་རང་བཤད་ཀྱི་གནས་སྟངས་ཤིག་ཆགས་ཀྱི་རེད། ཡིན་ནའང་ཉིན་གཅིག་རྒྱ་ནག་ནང་འགྱུར་བ་ཆེན་པོ་ཞིག་བྱུང་ནས་ད་ལྟ་ལག་བསྟར་བྱེད་བཞིན་པའི་རྩ་ཁྲིམས་དེ་རྩ་མེད་ཕྱིན་ན། ང་ཚོའི་ཡིག་ཆ་དེ་ནུས་མེད་དུ་འགྲོ་རྒྱུ་རེད། དེ་འདྲའི་དུས་ཚོད་ཅིག་ཤར་ན། དམག་གིས་དབང་བསྒྱུར་བྱས་ན་གནས་ཚུལ་ཐ་དད་རེད་མ་གཏོགས། བཟང་ཕྱོགས་ཀྱི་འགྱུར་བ་ཞིག་ཕྱིན་ནས་རྩ་ཁྲིམས་གསར་པ་ཞིག་སླེབས་ན། རེ་བ་ལ་མང་གཙོའི་རྩ་ཁྲིམས་ཤིག་སླེབས་ཡོང་གི་རེད། མང་གཙོའི་རྩ་ཁྲིམས་ཤིག་སླེབས་ན་རྩ་ཁྲིམས་གསར་པའི་ནང་དུའང་ད་ལྟ་ང་ཚོའི་༼བསམ་འཆར་༽ཡིག་ཆའི་ཆ་རྐྱེན་དེ་ལས་ཡག་པོ་ཞིག་མ་བསྐྲུན་ཐབས་མེད་ཀྱི་ལམ་ཁ་ཞིག་ཕྱེ་ནས་བཞག་ཡོད་པ་རེད། དེར་བརྟེན་བཙན་བྱོལ་གཞུང་བཀའ་ཤག་གི་ངོས་ནས་༼བསམ་འཆར་༽ཡིག་ཆ་དེ་བཞག་ནས་ཐབས་ལམ་གསར་པ་ཞིག་བཙལ་དགོས་ཀྱི་ཡོད་པར་ནམ་ཡང་ངོས་འཛིན་བྱེད་ཀྱི་མེད་ལ། དེ་འདྲའི་བསམ་ཚུལ་ཞིག་རྩ་བ་ཉིད་ནས་མེད།
བཀའ་ཁྲི་གོང་མས་གསུངས།།
སྤྱིར་བཏང་ནས་བཤད་ན་་་་་་དུས་བབས་ལ་བརྟེན་ནས་བསམ་ཚུལ་གསར་པ་ཞིག་ཡོང་ཡག་མེད་ན་ཁག་པོ་རེད། གང་ཡིན་ཟེར་ན་ཚང་མ་དུས་ལ་ལྟོས་ནས་འགྱུར་བ་འགྲོ་དགོས་པ་རེད་མ་གཏོགས་་་ཆབ་སྲིད་ལ་་རྟག་པ་གཏན་པོ་ཞིག་ག་ནས་ཡོད།