གུང་ཐང་བསླབ་བྱ་ལས་འཕྲོས་པའི་ཟུར་གཅིག

མགརའཇམ་དབྱངས།
-ནད་རྙིང་ཞིག་བསྐྱར་འཕར་གྱི་རྐྱེན་པས། དགོས་མེད་ཀྱི་ཚིག་ཉོག་མང་བོ་ངོ་དེབ་སོགས་སུ་སྤུང་བཞིན་པའི་རྗེས་སུ།

རང་ཉིད་ཆགས་སྡང་སྒྲོག་ལས་མ་གྲོལ་བར།།
རེ་དོགས་ཆོད་པའི་གཏམ་གྱིས་འདི་འོ་ཞེས།།
འུར་གྱིས་སྒྲོག་འདི་གཏད་སོ་ཡེ་མེད་པས།།
རྒྱུ་འབྲས་བློ་མིག་ཡངས་པོས་དཔྱོད་ཅིག་ཨང་།།
ཁམས་ཀྱི་གསེར་རྟ་ཨ་མདོའི་གསེར་རྟ་གཉིས།།
གང་ལྟར་གདོང་དམར་བོད་ཀྱི་རྒྱུད་ཡིན་པས།།
ཆོལ་གསུམ་གང་དུ་གཏོགས་ལ་རྩོད་དགོས་མེད།།
དེ་བས་ནང་ཁུལ་མཐུན་ལམ་གྱིས་ཤིག་ཨང་།།
ཆོས་པའི་གཟུགས་ཀྱིས་འདུལ་བ་དོར་དང་གཅིག །
ལས་བྱེད་ཁྱོ་བོ་ཁྲིམས་ལས་བརྒལ་བ་གཉིས།།
དོན་ལ་སྒྲིག་དང་འགལ་བ་ཁྱད་མེད་པས།།
ཉེས་ཅན་གཏེ་བོའི་གྲས་སུ་རྩིས་ཤིག་ཨང་།།
དུག་ཆེན་རྫས་ཀྱི་མཚོན་ཆ་མེད་ན་ཡང་།།
ལྷིང་འཇགས་དཀྲོགས་པའི་ཚིག་གི་མཚོན་ཆ་ཡིས།།
མགོ་ལུས་དུམ་བུར་གཅོད་ལ་ཉེན་ཆེ་བས།།
དེ་བས་རྡོག་རྩ་གཅིག་ཏུ་སྒྲིལ་ཅིག་ཨང་།།
ཁམས་དང་ཨ་མདོ་གང་དུ་ཡིན་ཀྱང་ཆོག །
སྐྱ་བོ་སེར་གཟུགས་གང་ཞིག་ཡིན་ཀྱང་ཆོག།
ནང་ཁུལ་དཀྲུག་ཤིང་བྱེད་པའི་ནག་ཚོགས་ཀྱི། །
གདོང་རིས་དམར་རྗེན་ཁྲོམ་དུ་སྒྲོགས་ཤིག་ཨང་།།
ཕྱོགས་རིས་རིགས་པ་གཡག་ཞར་རྩྭ་ཟན་ལྟར།།
བྱུང་རྒྱལ་དེབ་ཏུ་བསྐྱུགས་པའི་ཚིག་ཉོག་གི །
ཟེར་སྒྲོས་ཙམ་ལ་ཞེན་ན་འཕུང་ཉེན་པས།།
མཛེ་བོའི་ནད་བཞིན་རྒྱང་དུ་སྤོངས་ཤིག་ཨང་།།
གླེང་མི་ཚར་བའི་གསེར་རྟའི་གཏམ་རྒྱུད་དང་།།
འཇགས་མི་ཐུབ་པའི་འཐེན་འཁྱེར་ན་ཟུག་གཉིས།།
ཡིན་མིན་དཔྱོད་པར་བློ་དང་སྟོབས་མེད་པའི།།
གླེང་རྒན་གོག་པོའི་རིགས་ཀྱིས་འཛེམས་ཤིག་ཨང་།།
ཕ་དང་མ་ལོ་དགྱེས་སུ་མི་སྟེར་ཞིང་།།
བུ་དང་ཚ་བོ་གཉིད་དུ་མི་འཇུག་པའི།།
དགྲ་དགའ་གཉེན་སྡུག་ལས་ཀྱི་སྐྱོ་གར་འདི།།
ད་ནས་བཟུང་སྟེ་གཙང་ཕྱགས་གྱིས་ཤིག་ཨང་།།
རང་ཉིད་བདེན་ལ་གཞན་ཉིད་རྫུན་ཡིན་པའི།།
སྒྲུབ་བྱེད་ཐབས་དང་ཤེད་ཀྱིས་བཙལ་ན་ཡང་།།
རང་གཞན་གཉི་ག་འཕུང་བའི་རྒྱུ་ཡིན་པས།།
དེ་བས་སྙིང་ནས་འགྱོད་བཤགས་གྱིས་ཤིག་ཨང་།།
འཇིག་རྟེན་ཧྲིལ་བོའི་ངོ་གདོང་ཡིད་ཙམ་གྱིས།།
སྟོན་པའི་དེང་གི་ཆ་འཕྲིན་གསར་བའི་ངོར།།
དགོས་མེད་རྩོད་པའི་ཉོག་གཏམ་སྤུངས་པ་ལས།།
ལྷད་མེད་མཛའ་བརྩེའི་ལག་རྡང་སྦྲེལ་ཅིག་ཨང་།།
ཕྱི་དགྲ་བཙན་པོར་བྲོས་ཏེ་བྱོལ་ན་ཡང་།།
ནང་དགྲ་གསར་བས་སྡོད་དུ་མ་བཅུག་པས།།
སུ་ལ་ཕོག་ན་དེ་རུ་གཟས་པའི་མདའ།།
འཛེམས་མེད་འཕངས་པའི་སྐལ་འདི་ལོངས་ཤིག་ཨང་།།
མདོར་ན་ཁ་སྣ་གཉིས་ཀྱི་གོང་འོག་དབར།།
སྔོན་མེད་བརྟན་ཅིང་བརླིངས་པའི་ལྕགས་རི་ཞིག །
སོ་སོའི་གོ་གནས་ཆེད་དུ་བཟོ་ཤེས་པའི།།
ཤིང་རྟའི་སྲོལ་འབྱེད་གང་དག་སྤྱུགས་ཤིག་ཨང་།།