སྐར་ཆེན།
ལས་འབྲས་མེ་ཏོག་ཆུ་བོའི་གཞུང་ལ་མ་སྟོར།།
ཕ་མའི་བཀའ་དྲིན་རྡོག་པའི་སྣེ་མོར་མ་འདོགས༌།།
གཞོན་པའི་མི་ཚེ་སྟོང་སེམས་རླུང་ལ་མ་བསྐུར༌།།
རང་གི་སྙིང་ལ་ལྕགས་ཀྱི་རུས་བ་འཇུག་རོགས།
ཁྱེད་ཀྱི་སྡུག་བསྔལ་གཞན་ལ་བདེ་བ་ཆགས་ཅིང༌།།
གཞན་གྱི་བདེ་བ་ཁྱེད་ལ་སྡུག་བསྔལ་ཆགས་དུས།།
རྟེན་འབྱུང་སྟོང་ཉིད་སེམས་ལ་གོམས་པ་མེད་ཀྱང༌།།
འཇིག་རྟེན་དངོས་པོའི་གཤིས་ལ་ངེས་རྟོགས་རྙེད་དགོས།།
མི་བུ་རང་ཚུགས་ཅན་ཞིག་ཁྱེད་རང་ཡིན་ན།།
རྒྱུ་འབྱོར་གོ་ཐོབ་ཅན་ཞིག་ཁྱེད་རང་མིན་ཡང༌།།
མི་ལུས་ཐེངས་གཅིག་བླངས་བའི་མི་ཡུལ་འདི་ནས།།
རང་གི་མགོ་བོ་གཞན་གྱི་སྐེ་ལ་མ་བསྐོན།།
རང་ཡུལ་དགྲ་ལ་ཤོར་བའི་འགྲོ་ཉེས་ཤིག་གིས།།
ཁྱེད་ཀྱི་ལྕེ་འདི་རྒྱ་དབྱིན་སྐད་ལ་ལྐུགས་ཀྱང༌།།
དབྱངས་གསལ་སོ་བཞི་ཟེར་བའི་བོད་ཡིག་འདི་ལ།།
རང་གི་གཅེས་བའི་སྲོག་ལས་གཅེས་བར་གཉོར་རོགས།།
ཐོས་མཐོང་ཅུང་ཙམ་ཡོད་པའི་མིག་རྒྱང་དེ་ཡིས།།
རིག་པའི་ས་རྒྱ་ཆེན་པོ་ཁད་ཀྱི་མི་ཆོད།།
མཁས་མྱོང་ཞི་དུལ་ཅན་ཞིག་ཁྱེད་རང་ཡིན་ན།།
འཇིག་རྟེན་བླང་དོར་ལུགས་ལ་འཇུག་པ་ཡངས་དགོས།།
འབྲི་ཀློག་ཅུང་ཙམ་ཤེས་བའི་ང་རྒྱལ་དེ་ཡིས།།
གཞན་གྱི་རིགས་ལ་ཁབ་བཙགས་འབིག་བཙགས་མ་བྱེད།།
རྣམ་དཔྱོད་རྣོ་ཁ་ཅན་ཞིག་ཁྱེད་རང་ཡིན་ན༌།།
རྒྱལ་ཁམས་རིག་པའི་རྐང་རྗེས་ས་ལ་འཇོག་དགོས།།
སྐྱིད་སྡུག་ཕན་ཚུན་འདྲེས་བའི་མི་ཡུལ་འདི་ནས།།
ན་ཆུང་བརྩེ་དུང་ཟེར་བའི་སྒྲིབ་གཡོགས་དེ་དང༌།།
ཕོ་མོའི་འདོད་ཆགས་ཟེར་བའི་འཁྲིག་སྲེད་འདི་ཡིས།།
སེམས་པ་རླུང་ལ་བཏེགས་པ་གྲངས་ཀྱིས་མི་ལོང༌།།
དེང་རབས་རིག་གནས་ཟེར་བའི་དྲགས་རླབས་ཤིག་གིས།།
རྐང་གཉིས་འགྲོ་རྣམས་མུན་ནག་ཁྲོམ་ལ་དེད་སོང༌།།
དཔལ་དང་གོ་ཐོབ་ཟེར་བའི་ཐོ་བ་དེ་ཡིས།།
ཉམ་ཆུང་མི་ཡི་སྒལ་ཚིགས་ཐང་ལ་གཏོར་སོང༌།།
གཞིས་ནས་བྱེས་ལ་གྱར་བའི་ལྡོམ་པོ་ཞིག་གིས།།
བྱེས་ནས་ནུབ་ལ་གྱར་བའི་མི་བུ་ཞིག་གིས།།
མཐོང་ཐོས་ཅུང་ཙམ་བསགས་པའི་རྨོངས་འཆར་ཙམ་ཞིག།
གཞན་གྱི་ཟས་རིན་དོད་དུ་ཁྱེད་ལ་བསྐུར་ཡོད།།
རང་གི་དོན་ལྔ་སྣོད་དྲུག་བར་རྨ་ཡིས་ཁེངས་ཏེ་སྣག་ཁྲག་འཛགས་པ་དང་མགོ་ཡི་ཀླད་པ་རུལ་ནས་འབུ་བརྒྱབ་ཡོད་ཀྱང་དེ་མི་ཚོར་བར་གཞན་ལ་བསླབ་བྱ་རྐྱང་བརྒྱབ་ཡོང་བ་འདི་རིང་མོ་ཞིག་ནས་བརྒྱུད་ཡོང་བའི་ང་ཚོའི་ཐུན་མོང་མ་ཡིན་པའི་གོམས་སྲོལ་ཞིག་རེད། ཡག་པོ་རེད། མུ་མཐུད་དུ་དེ་འདྲ་ཕྲིས།
ཁ་བརྡ་ཞིག་ཡིན་ཚེ་ཕན་ཚུན་བར་གྱི་འདོད་ཚད་རྗེས་ལེན་ཞིག་གི་ཁྱབ་ལ། གོང་ནས་བྱུང་བའི་་་ངེད་ཀྱི་ཁ་བརྡ་ཞེས་པ་དེ་ཡང་ལྷགས་བསམ་ལྷད་མེད་ཀྱི་བོད་མི་ཞིག་གི་རང་གི་ཤེས་ཚུལ་བསམ་ཚུལ་གྱི་ཁ་བརྡ་ཞིག་ཡིན་པས་། དོན་ལྔ་སྣོད་དྲུག་བར་རྨ་ཡིས་ཁེངས་ཏེ་སྣག་ཁྲག་འཛགས་པའི་དཔེ་དང་སྦྱོར་དོན་ཡང་མེད་ལ་། འགྲོ་ཡང་མི་འགྲོ།
རྒྱུ་ནོར་ལོང་སྤྱོད་དང་ཤེས་བྱ་ཡོན་ཏན་གྱི་ཁྱད་པར་ཏོག་ཙམ་ཤོར་ཚེ་གཞན་པ་དེ་རྐང་བའི་ལྡོག་འོག་དུ་གནོན་པ་འདི་ཡང་རིང་མོ་ཞིག་ནས་བརྒྱུད་ཡོང་བའི་ང་ཚོའི་ཐུན་མོང་མ་ཡིན་པའི་གོམས་སྲོལ་ཞིག་རེད། ཡག་པོ་རེད།