“ཞེང་ཚད་ལ་རྨིས་སུམ་ཅུ་ལྷག་ཟིན་པའི་ཞོ་ཏུང་གི་ཚབ་མཚོན་རི་མོ་ཁ་བྱང་ “མཚོ་བོད་ལྕགས་ལམ་” དུ་འབོད་པའི་རི་མོ་དེས་ལྟད་མོ་བ་དག་ལ་ད་ལྟའི་བོད་ཀྱི་སྣོད་བཅུད་གཉིས་ཀར་ཕྱི་ཕྱོགས་ཀྱི་ཤུགས་རྐྱེན་ག་ཚོད་ཅིག་ཐེབས་བཞིན་ཡོད་པ་ར་སྤྲོད་གསལ་བོར་བྱས་འདུག རི་མོའི་ངོས་སུ་རྔམ་བརྗིད་ལྡན་པའི་ལྗང་མདོག་གི་རི་འདབས་སུ་བསྟར་དུ་བསྒྲིགས་པའི་བཟོ་གྲྭ་སྣ་ཚོགས་ཀྱིས་ནག་ལྷོག་ལྷོག་གི་དུ་བ་དྭངས་ལ་གཙང་བའི་བོད་མཐོ་སྒང་གི་ནམ་མཁར་བག་མེད་དུ་གཏོང་བཞིན་ཡོད་པ་མ་ཟད། སྐྱ་ཤད་ལེར་རི་གཞོང་དུ་འཐེན་པའི་རྒྱ་ནག་གི་མེ་འཁོར་ལྕགས་ལམ་གྱིས་བོད་ཀྱི་སྒང་གཤོང་ཡོད་ཚད་འཕྲེད་དུ་དུམ་བུར་གཤགས་ནས་བརྐྱངས་འདུག འགྲོ་བ་མི་ཞིག་ཡིན་པའི་ཆ་ནས་རི་མོ་འདིས་ཐད་གར་སྒྱུ་རྩལ་བ་ལོས་ཞོ་ཏུང་གིས་རང་བྱུང་ཁོར་ཡུག་ལ་བཟུང་པའི་རྣམ་འགྱུར་དང་སེམས་ཁུར་མཚོན་ཐུབ། ལྕགས་ལམ་དང་མི་རིང་བའི་ས་རུ་དེང་རབས་ནུབ་ལུགས་ཀྱི་གྱོན་ཆས་བགོས་པའི་བོད་ཀྱི་འབྲོག་པ་ཕོ་གསར་གཉིས་རྟ་ཕོར་ཞོན་ནས་སྐྱ་ཐང་ཐང་གི་རྐང་ལམ་སྙེག་བཞིན་པ་ཞིག་བྲིས་འདུག་པ་དེས་ད་ལྟའི་བོད་སྤྱི་ཚོགས་ཁྲོད་ཀྱི་རིག་གཞུང་མཉམ་འདྲེས་ཀྱི་ཤུགས་རྐྱེན་དང་རིག་གཞུང་ཕུང་གསུམ་པའང་མཚོན་ཐུབ་འདུག་གོ”