བདུད་ལྷ་རྒྱལ།
རྩོམ་རིག་གསར་པའི་ལས་ཀ་འདི་བོད་མི་སུ་ལ་མཚོན་ནའང་འཇུག་བདེ་བོ་ཞིག་མ་རེད། བོད་རང་གི་སྔར་ཡོད་ཀྱི་རྩོམ་རིག་གཞུང་ལུགས་དང༌། གསར་བྱུང་གི་རྩོམ་རིག་གཞུང་ལུགས་གཉིས་ཀྱི་འབྲེལ་བ་ནི་གཞི་མཐུན་ས་ལས་གཞི་མི་མཐུན་ས་མང་བས། ཐོག་མར་གསར་རྩོམ་དང་མྱོང་དཔྱོད་ཀྱི་སྟེང་ན་སྲོལ་རྒྱུན་གྱི་གེགས་རྐྱེན་ཆེན་པོ་ཞིག་ཡོད། དེའི་སྟེང་རྩོམ་རིག་གསར་བ་འདི་བོད་དུའང་ལོ་ངོ་ཉི་ཤུ་ལྷག་གི་སྔོན་ནས་ས་ཁྱབ་རྡོ་ཁྱབ་ཏུ་གྱུར་པ་ལྟར་སྣང་ཡང། འདིའི་ཆ་ཚང་བའི་གཞུང་ལུགས་ཀྱི་མ་ལག་དང་རིགས་པ་ཞིབ་མོ་དེ་ཅིས་ཀྱང་བོད་ཡུལ་དུ་ཟབ་རྒྱས་སུ་ཆགས་མ་ཐུབ་པས། རིག་པ་གསར་པ་འདིར་འཇུག་པར་ཚིག་རིས་ཙམ་གྱི་ངོས་ནས་དང། རང་སྦྱོང་དང་རང་སྟོབས་ཙམ་གྱིས་འཇུག་དགོས་པའི་རྣམ་པ་གྲུབ། རྩོམ་རིགས་གསར་པའི་གསར་རྩོམ་དང་ཞིབ་འཇུག་གི་ངེས་དོན་གྱི་གོམ་ཁ་དལ་བའི་རྒྱུ་མཚན་ཡང་ངས་བསམ་ན་འདི་འདྲ་ལ་ཐུག་ཡོད་སྙམ།
རང་ལ་མཚོན་ན་ཡང། དུས་རབས་གོང་མའི་ལོ་རབས་བརྒྱད་ཅུ་པའི་ནང་རྩོམ་རིག་གསར་པའི་ཀློག་འདོན་ལ་ཐོག་མར་ཞུགས་པ་ཡིན་ལ། རྩོམ་རིག་གི་ཡོ་ལང་དྲག་ཏུ་རྒོད་པའི་ཁོར་ཡུག་ཐུན་མོང་མ་ཡིན་པ་དེའི་ནང་ནས་ཕྱི་ནང་གི་རྩོམ་གསར་དེ་དག་ལ་འཇུག་དུས་ཇི་ལྟར་ཀློག་དགོས་པའི་ཐད་ནས་ངལ་བ་ཆེན་པོ་བྱུང་ཞིང༌། དཀའ་བ་འདི་ཁྱད་དུ་གསོད་པའི་ལམ་ཉག་གཅིག་པོ་ནི་བརྩམས་ཆོས་དང་བརྩམས་ཆོས་ཀྱི་ཀློག་འདོན་ནམ་མྱོང་རོལ་སྦྲགས་མར་བཀོད་པའི་དཔེ་དེབ་བཙལ་ནས་བཀླག་རྒྱུ་དེ་རེད། ༼བརྩམས་ཆོས་དང་རྩོད་གླེང།༽ ༼ཀློག་འདོན་དང་མྱོང་རོལ།༽ ༼གྲགས་རྩོམ་མྱོང་རོལ།༽ སྙན་ངག་གི་ཕྲན་དཔྱད་དང་ཀློག་འགྲེལ་སོགས་ནི་རང་གི་ཐོག་མའི་བློ་འབྱེད་ཀྱི་ཀློག་དེབ་ཡིན། ཀློག་དེབ་དེ་དག་བཀླགས་པའི་མོད་ལ། ནམ་ཞིག་རང་གིས་ཀྱང་འདི་ལྟར་དུ་རང་དང་འདྲ་བའི་བོད་ཀྱི་ཀློག་པ་པོ་དག་གི་ཀློག་འདོན་གྱི་ངལ་བ་ཁྱད་དུ་གསོད་རྒྱུ་བྱུང་ན་སྙམ་པའི་འདོད་འདུན་ནི་དུས་རྒྱུན་དུ་འབྱུང། ད་ལྟ་ཕྱིར་འདང་བརྒྱབ་ན་རྐྱེན་འདི་འདྲ་ཞིག་གི་འོག་ནས་ང་རང་རྩོམ་རིག་དཔྱད་བརྗོད་ཀྱི་ལས་ལ་ཞུགས་སོང་བ་མཐོང་ཐུབ།
དུས་རབས་གོང་མའི་ལོ་རབས་དགུ་བཅུ་པ་ནས་བདག་གིས་རྩོམ་རིག་དཔྱོད་བརྗོད་ཀྱི་རྩོམ་འབྲི་བའི་འགོ་བརྩམས་ཤིང། ད་ཐུག་གི་བར་དུ་བྲིས་པའི་བརྩམས་ཆོས་ཕལ་མོ་ཆེ་དཔེ་དེབ་འདིའི་ནང་བཀོད་ཡོད། རང་ཉིད་ལ་མཚོན་ན་ད་ཐུག་བར་དུ་བྲིས་པའི་བརྩམས་ཆོས་དེ་དག་ཆེས་ཡང་དག་པར་བཤད་ན་ཀློག་འགྲེལ་རེད་མ་གཏོགས། དཔྱད་བརྗོད་ཀྱི་ཚད་ཐིག་འདང་ཡོད་པ་ཉུང་ཤོས་རེད་སྙམ་པའི་ཕངས་སེམས་ཡོད། ད་ལྟའི་དུས་འདིར་རྩོམ་རིག་དཔྱད་བརྗོད་ཀྱི་ལས་ཀ་སྒྲུབ་དུས། ངའི་ཚོར་སྣང་ཆེས་བཙན་པོ་ནི་གཞུང་དཔྱད་ཅན་དུ་བྱས་པ་མི་འདང་སྙམ་པ་དེ་རེད། ལྷག་པར་དུ་རྒྱ་ཡིག་གི་ལམ་ནས་རྩོམ་རིག་དཔྱད་བརྗོད་ཀློག་དུས་སུ་༼རྒྱ་ཡིག་གི་མ་གཏོགས་ཀློག་མི་ཤེས་པས་སོ།༽་འདི་འདྲའི་ཚོར་སྣང་ཆེས་བཙན། ཞིབ་འཇུག་གི་ལས་ཀ་གང་ཡིན་ཡང་དེའི་ཐབས་ལམ་མ་ནོར་བ་ནི་གཞུང་དཔྱད་ཅན་དུ་བྱ་རྒྱུ་དང། བརྡ་དོན་དང་བརྡ་ཆད་ཀྱི་སྒོ་ནས་ཞྀབ་འཇུག་བྱ་རྒྱུ་ཡིན་པ་ལས། ངོ་སྤྲོད་དང་བཤད་པ་ལྟ་བུའི་སྒོ་ནས་ཞིབ་འཇུག་གི་ལས་ཀ་སྒྲུབ་མི་བཏུབ། ཚད་མཐོའི་གཅིག་སྡུད་ནི་སྤྱི་མཚན་པའི་བསམ་གཞིག་གི་ཆོས་ཉིད་རེད། ཡིན་ཡང་རང་གི་གྲོགས་པོ་འགའ་ཤས་ཀྱིས་ཁྱོད་ཀྱི་དཔྱད་བརྗོད་ལ་ལ་ཞིག་གོ་དཀའ་བར་འདུག་ཅེས་པ་དང། ཁྱོད་ཀྱི་དཔྱད་བརྗོད་ལ་ནུབ་གླིང་པའི་རྩོམ་གཞུང་གི་ཤན་ཞུགས་འདུག་ཅེས་པའི་སྐད་ཆ་འདི་བདག་གིས་ཐོས་དུས་སུ་ང་རང་གཏོལ་མེད་ཀྱི་གནས་སུ་གྱར་སོང། རང་གི་སེམས་སུ་༼གླེན་བཤད།༽བྱས་པ་མང་འདུག་སྙམ་པ་ལ། གཞན་གྱི་མིག་ལམ་ནས་གོ་དཀའ་བར་སྣང་སོང་བ་འདི་བློ་ཡུལ་ལས་འདས་པ་ཞིག་རེད། དེ་བཞིན་སྐྱོ་གདུང་ཆེན་པོ་ཞིག་ཀྱང་རེད། རང་གིས་རྩོམ་འབྲི་བའི་དམིགས་གཏད་དེ་བོད་ཀྱི་རྒྱ་ཆེའི་ཀློག་པ་པོ་ཡིན་པ་ངས་ཀྱང་ཤེས་ཡོད། ཞིབ་འཇུག་གི་བྱ་བ་ནི་ངོ་སྤྲོད་དང་བཤད་པ་ལྟ་བུ་མ་ཡིན་པར་གསར་བཤད་ཀྱི་ཆ་དགོས་པ་འདི་རང་གི་དམ་ཚིག་དང་པོ་ཡིན། རང་གིས་མི་ཤེས་པ་ཡོན་ཏན་ཞིག་ཏུ་སྒྲོག་ག་ལ་རུང། སྤྱི་མཚན་གྱི་རིགས་པའི་རྩེར་སོན་པའི་དབུ་ཕར་ཚད་མ་ལྟ་བུ་ང་ཚོས་ཡོས་འཆའ་འཆའ་བྱེད་ཐུབ་ན། དངོས་ཡོད་འཚོ་བའི་ནང་ནས་བྱུང་བའི་རིགས་པའི་གསང་བ་རྙེད་མི་ཐུབ་པའི་གནས་ལུགས་གང་ན་ཡོད།
དཔྱད་བརྗོད་ཀྱི་སྐབས་དེ་དག་ཏུ་ངའོ་སྙམ་ཆོག་པ་གཅིག་ཡོད་པ་ནི་གཞན་དྲིང་མི་འཇོག་པའི་རང་ཚུགས་ཀྱི་བསམ་གཞིག་བྱ་སྟངས་ཤིག་ཡོད་པ་དེ་ཁོ་ན་ཡིན། བདེན་ལུགས་ནི་འདིའོ་ཡང་དག་པ་ནི་འདིའོ་སྙམ་པའི་གདེང་ཚོད་དང་ཁ་ཚོན་ནི་ཡེ་ནས་མེད། བྲིས་ཟིན་པའི་དཔྱད་བརྗོད་ཀྱི་བརྩམས་ཆོས་གང་ཞིག་ཡིན་ཡང། ཐོག་མར་སེམས་ལ་དོགས་གཞིའམ་ཡང་ན་འདི་ན་བཤད་རྒྱུ་ཞིག་ཡོད་སྙམ་པའི་དངོས་ཀྱི་མྱོང་བ་ཞིག་གི་རྗེས་ནས་ད་གཟོད་རྩོམ་བྲི་བའི་ལས་སུ་ཞུགས་པ་དང། རྩོམ་དང་རྩོམ་པ་པོ་གང་ལ་དཔྱད་བརྗོད་བྱེད་ཀྱང་མྱོང་བ་དེའི་རྗེས་བཅད་དེ་རྩོམ་པ་པོ་དང་༼ཕར་ལྟ་ཚུར་ལྟ༽་མ་གཏོགས་༼ཡར་ལྟ་མར་ལྟ༽བྱེད་མི་རུང་སྙམ། ལར་དཔྱད་བརྗོད་པ་ཞིག་གི་ངོས་ནས་གྲོགས་པོ་མང་པོ་མེད་པའི་མི་ཁེར་ཧྲེང་བ་ཞིག་དང། ངོ་སོ་ལ་མི་འཛེམ་པའི་མི་དཔའ་བོ་ཞིག་ཡིན་ན་སྙམ་པའི་བློ་བསྐྱེད་ཀྱང་འབྱུང། དཔྱད་བརྗོད་ཀྱི་ཕན་པ་ཉག་གཅིག་པོ་ནི་བདེན་ལུགས་ཡིན་པ་མ་གཏོགས། བསྟོད་སྨད་གཏན་ནས་མིན། འདི་ནི་བོད་ཀྱི་རྩོམ་རིག་དང་བོད་ཀྱི་ཀློག་པ་པོ་ལ་ཁེག་ཁུར་བའི་མཚན་རྟགས་ཡིན་ལ། རྩོམ་མང་པོ་མི་འབྲི་བའི་རྒྱུ་མཚན་ཡང་ཡིན། རང་ཆ་ནས་བཤད་ན། ལས་གང་ཞིག་སྒྲུབ་ཀྱང་དུས་ཚོད་ཀྱི་ཚོད་བགམ་བཟོད་པའི་༼རྟག་པ་རྒྱུན༽་གྱི་ལས་དོན་དེ་ལྷུར་ལེན་པའི་ཁུལ་བྱས་པ་ཡིན། འཕྲལ་མའི་དཔྱ་ཁྲལ་ལྟ་བུའི་བྱ་ལས་དང་གཏན་ནས་གཏན་དུ་གྱེས་པར་ཤོག།།
རྩོམ་པ་པོས༢༠༠༤། ༡༠། ༢༨ཉིན་ལན་ཀྲུ་ནས།