ཨ་ནུ་ཐང་བསོད་ནམས།
ཧོང་ཀོང་མི་མང་གིས་རྒྱ་གཞུང་གིས་འདེམས་པའི་སློབ་ཚན་ནི་སློབ་ཕྲུག་ཚོའི་ཀླད་པ་བཅོས་སྒྱུར་བཏང་བྱེད་ཅིག་ཡིན་ཞིང་དེས་བྱིས་པ་ཚོའི་རྣམ་དཔྱོད་འཕེལ་རྒྱས་འགྲོ་བ་འགོག་རྐྱེན་བྱེད་པས་ངོ་རྒོལ་བྱེད་ཀྱིན་འདུག དེ་དང་མཚུངས་བ་བོད་ཀྱི་བྱིས་པ་རྣམས་ལ་རྒྱ་གཞུང་དང་བཙན་བྱོལ་གཞུང་གཉིས་ཀས་རང་གི་ཞེན་འདོད་ལྟར་ཀླད་པ་བཅོས་སྒྱུར་བཏང་བཞིན་ཡོད་ཅིང་། དེས་བྱིས་པ་རྣམས་ཀྱིས་འཇིག་རྟེན་གྱི་ཕྱོགས་གཅིག་ལས་ཡོད་ཚད་མཐོང་པར་འགོག་རྐྱེན་བཟོས་ཏེ་མང་པོ་ཞིག་བར་དུ་འཐོམ་ནས་ལྷག་ཡོད། བོད་དུ་རྒྱ་ནག་གིས་མེས་རྒྱལ་དང་ཏང་ལ་དགའ་ཞེན་གྱི་སློབ་ཚན་སྣ་ཚོགས་ཁྲིད་བཞིན་ཡོད་པ་ལྟར་རྒྱ་གར་བཙན་བྱོལ་བོད་ཀྱི་སྒྲིག་འཛུགས་ཀྱིས་ཀྱང་རང་གི་མངོན་འདོད་ལྟར་ནང་ཆོས་སློབ་ཚན་ཁག་ཏུ་ཅི་འདོད་དུ་ཁྲིད་བཞིན་ཡོད། དེས་བྱིས་པ་རྣམས་ཀྱི་ཀླད་པ་བཅོས་སྒྱུར་བཏང་ཞིང་རྣམ་དཔྱོད་འཕེལ་བ་འགོག་རྐྱེན་ཐེབས་པ་སྨོས་མེད་རེད་དེ། བྱིས་པ་རྣམས་ཀྱི་ཀླད་པ་བཅོས་སྒྱུར་བཏང་ཡ་ནི་ཧ་ཅང་སླ་ཞིང་དགེ་རྒན་གྱིས་གང་བཤད་བདེན་དུ་རློམས་པས་རྒྱུན་རིང་སེམས་སུ་བསམ་མཐར་ཤེས་བ་སྲོག་རླུང་དང་འབྲེལ་ཞིང་། སྲོག་རླུང་ཁྲག་རྒྱུན་དང་འབྲེལ་ནས་ཁྲག་རྒྱུན་གྱིས་དབང་རྩ་སྐྲུན་ཏེ་དབང་རྩས་ཤ་རུས་པགས་གསུམ་ལ་ཤུགས་རྐྱེན་བཟོས་པ་མ་ཟད། ལུས་ཀྱི་འཚོར་བ་ཀུན་ལ་བཏང་འཛིན་ཐེབས་ཤིང་གྲུབ་མཐའ་རིང་ལུགས་པའི་སེམས་ཤིག་ཡོད་པའི་སྟེང་དུ་ལུས་ཤིག་གྲུབ་པས་བྱིས་བའི་སྐབས་སུ་ཀླད་པ་བཅོས་སྒྱུར་བྱེད་པ་ནི་ཧ་ཅང་གི་ཉེན་ཚབས་ཆེ་སྟེ། རྣམ་དཔྱོད་ཅན་རེ་ཟུང་མ་གཏོགས་རྗེས་སུ་གོ་རྟོགས་སེལ་ནས་ཐར་མཁན་དཀོན། གོ་རྟོགས་ཀྱང་སྦྱོང་སྟོབས་དང་ལྷག་པར་དུ་ཕམ་ཁའི་མྱོང་བ་མང་དུ་རྒྱུད་ཅིང་མྱོང་གོམས་ལས་དལ་གྱིས་སེལ་དགོས་བ་ལས་ལས་སླ་པོ་ཞིག་གཏན་ནས་མིན། རྒྱུ་མཚན་ནི་མི་སུ་ཡིན་ཡང་རང་གི་ཚད་མ་འདོད་པའི་གནད་དོན་དེ་ལ་བདེན་རྫུན་གྱི་དཔྱད་པ་བཏང་བ་ལྟ་ཅི་སྐྱོན་བརྗོད་ཀྱང་ཐོས་འདོད་མེད། དེའི་རྩ་བའང་རྒྱུན་རིང་གོམས་པའི་སེམས་ཀྱི་སྟེང་དུ་ལུས་ཤིག་གྲུབ་ཅིང་ལུས་སེམས་རོ་གཅིག་ཏུ་ཐིམས་ཏེ་བདག་འཛིན་རྒྱས་བས་རེད། ཡིན་ཏེ་གང་ལ་བདག་འཛིན་ཆགས་ན་དེ་ནི་རང་ཉིད་ཀྱི་ཡིན་པ་རློམ་ཞིང་རང་གི་ཆེད་དུ་གང་ཐུབ་ཀྱིས་བློས་བཏང་བྱེད་པ་ནི་དངོས་པོ་ཆོས་ཉིད་ཡིན་པས་རེད། སྟབས་མ་ལེགས་པ་ཞིག་ཏུ་ཁྱེད་ཉིད་གཞན་གྱི་ཚོད་འཛིན་འོག་ཏུ་ཐེབས་པ་མ་རྟོགས་ཤིང་སྐྱི་གཡའ་བའི་ཉམས་མྱོང་ལས་རིམ་གྱིས་གོ་རྟོགས་སེལ་སྐབས་ཅུང་འཕྱིས་དྲགས་པས་རིན་ཐང་ཆེ་བའི་གོ་སྐབས་དང་ཆུ་ཚོད་མང་པོ་ཞིག་གཞན་གྱིས་བསམ་བློའི་དབང་སྒྱུར་འོག་ཏུ་ཆུ་ཟོས་སུ་བཏང་ཟིན་ཡང་། གོ་རྟོགས་མ་སེལ་བ་ལས་སེལ་པ་ཕན་ཐོགས་ཡོད་ཅིང་རང་གི་མྱོང་བའི་གནད་དོན་བཟང་ངན་ཅི་ཞིག་ཡིན་ཡང་སྤྱི་ཚོགས་སུ་བགོ་འགྲེམ་བྱེད་རྒྱུ་གནད་དུ་ཁུམས། རྒྱུ་མཚན་ནི་ཁྱེད་ཀྱི་མི་ཚེའི་ཕྱེད་ཀ་རང་ལ་མ་དབང་ཞིང་གཞན་གྱི་ཆེད་དུ་ཟད་ཚར་ཡང་ཁྱེད་ཀྱི་མི་རབས་རྗེས་མ་དང་། གཞོན་སྐྱེས་རྣམས་ཀྱི་མི་ཚེ་ཡོངས་རྫོགས་གཞན་ཞིག་གི་ཆེད་དུ་མིན་པ་ཁོ་ཚོ་དབང་བའི་ཁོར་ཡུག་ཅིག་སྐྲུན་རྒྱུ་ཧ་ཅང་གལ་ཆེ་ལ། དངོས་རྒྱུད་ཀྱི་མྱོང་བ་རྣལ་མ་སྤྱི་ཚོགས་སུ་སྤེལ་རྒྱུ་ནི་སྤྱི་ཚོགས་ཧྲིལ་པོ་འགྱེད་ནས་ལངས་ཐུབ་པའི་སྔོན་འགྲོ་ཡིན། རྒྱུ་མཚན་ནི་ཁྱེད་ཀྱི་དངོས་རྒྱུད་ཀྱི་མྱོང་བ་དང་སྒེར་གྱི་སྤྱོད་པ། བསམ་བློའི་ཁ་ཕྱོགས་དང་ལྟ་བའི་ལངས་ཕྱོགས་སོགས་གང་ཞིག་ཡིན་ཡང་སྦ་གསང་མེད་པ་བརྗོད་ཚེ་གཞི་ནས་མི་རྣམས་ཀྱིས་སྤྱི་ཚོགས་ལ་ཁ་དོག་སྣ་ལྔ་དང་། མི་ལ་ཁ་དོག་ཀུན་ལྡན་ཡོད་པ་འཚོར་ཞིང་འཇིག་རྟེན་གྱི་གནས་ལུགས་དང་ལངས་ཕྱོགས་ཀུན་རྟོགས་པར་ཕན་ཐོགས་རྒྱ་ཆེན་ཡོད་ཅིང་། རྟོགས་ཏེ་ཚད་ལྡན་གྱི་སྤྱི་ཚོགས་དང་། གུ་ཡང་གི་སྤྱི་ཚོགས་ཤིག་སྐྲུན་ཞིང་གུ་ཡང་གི་ཁོར་ཡུག་ལས་དོན་མེད་ཀྱི་དཀག་རྒྱ་ཉུང་ཞིང་། བུས་ལྟ་བ་ཅི་ཞིག་བཟུང་ཡང་ཕས་རྒྱབ་སྐྱོར་ལས་དཀག་འགོག་མེད་ཅིང་། ཕས་གྲུབ་མཐའ་ཅི་ཞིག་ལ་དད་མོས་བྱས་ཀྱང་ནང་མའི་བརྩེ་བར་མི་གནོད་པའི་ཚད་མཐོའི་རང་བཞིན་ལྡན་པའི་ཁོར་ཡུག་ཅིག་དང་ཁྱིམ་ཚང་ཞིག་སྐྲུན་ཐུབ་ཅིང་། དེ་འདྲའི་རང་དབང་གི་ཁོར་ཡུག་ཁྲོད་དུ་མི་རྣམས་ཀྱིས་རང་དབང་གིས་བསམ་བློ་སྣ་ཚོགས་དང་སྣང་བ་སྣ་ཚོགས། ཀུན་སྤྱོད་སྣ་ཚོགས་སོགས་བཟུང་ཆོག་ཅིང་ཅི་འདོད་དུ་བརྗོད་ཆོག་པས་གསར་བཏོད་ཀྱི་དངོས་པོ་ཅི་འདོད་དུ་འབྱུང་། དེ་བརྟེན་བྱིས་པའི་སྐབས་སུ་གྲུབ་མཐའ་ག་གེ་མོ་ཞིག་གམ་ཆོས་ལུགས་ག་གེ་མོ་ཞིག་གིས་མི་རིགས་ཤིག་གི་བྱིས་པ་རྣམས་ཀྱི་ཀླད་པ་བཅོས་སྒྱུར་བྱེད་པ་ནི་མི་རིགས་དེའི་མདུན་སྐྱོད་དང་གསར་བཏོད་ལ་ཚོད་འཛིན་ཐེབས་ཤིང་། སྔ་གནས་སུ་སྐྱར་སྐོར་ཡང་སྐོར་བྱེད་པས་ནམ་ཡང་འཇིག་རྟེན་གྱི་ཕྱོགས་ཀུན་མཐོང་བའི་ཀག་ཏུ་གྱུར་ནས་ལྷག་ངེས་རེད། ཧོང་གོང་མི་མང་གིས་གནས་ལུགས་དེ་རྟོགས་པས་ངོ་རྒོལ་བྱས་པ་རེད། འོན་ཀྱང་། བཙན་བྱོལ་གྱི་སློབ་ཁག་ཏུ་དེ་ལས་ལྡོག་སྟེ་སློབ་ཚན་ཁྲོད་ནང་ཆོས་ཅི་འདོད་དུ་ཁྲིད་བཞིན་ཡོད་པ་ནི་དགེ་མཚན་དུ་འདོད་ཅིང་གོམས་གཤིས་རྒྱུན་འཇམ་དུ་ཕྱིན་པས་རྒྱུན་ལྡན་ཞིག་ཡིན་ཡང་། བོན་པོ་དང་ཆོས་ལུགས་ལ་དེ་ཙམ་འདོད་མོས་མེད་མཁན་གྱི་བོད་མི་རྣམས་ལ་མཚོན་ན་བྱིས་པའི་ཀླད་པ་བཅོས་སྒྱུར་བཏང་བྱེད་ཅིག་ཡིན་པ་མ་ཟད། བོད་མི་རྣམས་ཀྱིས་ནང་ཆོས་ལས་འཇིག་རྟེན་སྤྱི་ཡོངས་མཐོང་བར་འགོག་རྐྱེན་འཕྲད་པས་རབ་བྱུང་ན་གཞུང་གིས་སློབ་ཚན་ཁག་ཏུ་ནང་ཆོས་མ་ཁྲིད་ན་ལེགས། སྔོན་ཐོན་ཅན་གྱི་རྒྱལ་ཁབ་གཞན་ལྟར་ཆོས་ལུགས་ལ་དོ་སྣང་ཡོད་མཁན་ཚོར་མཐོ་སློབ་ཁག་ཏུ་ཡེ་ཤུ་དང་ནང་པ་། ཁ་ཆེ་དང་བོན་ཆོས་སོགས་ཀྱི་སྡེ་ཚན་ལོགས་སུ་གཙུགས་ན་ལེགས་པ་འདོད། དེ་ལྟར་སྨྲས་ཚེ་མི་ཁ་ཤས་ཀྱིས་སློབ་གྲྭ་ནི་ང་ཚོས་དཀའ་ལས་རྒྱབ་ནས་སྐྲུན་ཅིང་། ང་ཚོའི་དཀའ་ལས་མེད་ན་སློབ་གྲྭའང་ཡོང་ཐབས་མེད་པས་དེ་ག་འདྲ་བྱེད་མིན་ང་ཚོའི་ལག་ཏུ་ཡོད་པ་དགོངས་སྲིད་ཀྱང་ཁྱེད་ཚོའི་འབད་བརྩོན་ལས་གྲུབ་པའི་སློབ་གྲྭ་དེ་ནི་བོད་སྤྱི་ཡི་སླད་དུ་ཡིན་ན་སྒེར་གྱི་ལྟ་བ་སློབ་གྲྭར་མི་ཁྲིད་རྒྱུ་ནི་གནད་དུ་ཁུམས། དེ་ལྟར་ཡིན་ན། སློབ་གྲྭ་ནི་བོད་སྤྱི་ཡི་མིན་པ་སྐུ་ཉིད་ཀྱི་ལྟ་གྲུབ་སྦྱང་རྡར་བྱེད་སའི་ཁོར་ཡུག་ཅིག་ཏུ་འགྱུར་བས་གང་ཟག་ཅིག་གམ་ཚོགས་པ་ག་གེ་མོ་ཞིག་གི་གྲུབ་མཐའ་དང་། ལྟ་བ་སྦྱང་ས་ཞིག་ཏུ་འགྱུར་བས་བོད་མི་རྣམས་ཀྱིས་སྤྱི་འཇིག་རྟེན་གྱི་ཁ་དོག་སྣ་ལྔ་མཐོང་བ་འགོག་རྐྱེན་དུ་གྱུར་ཞིང་གྲུབ་མཐའ་རིང་ལུགས་པ་ཞིག་ཏུ་ཆགས་པས་འགྱེད་ས་ནས་ལངས་དཀའ་ཞིང་། ཁྱེད་ཚོའི་སྤྱོད་པའི་བོད་ཀྱི་སློབ་གྲྭ་ཞེས་བའི་མཚན་ཡང་བརྗེ་དགོས་འགྱུར་བའི་ཉེན་ཁ་ཡོད།
ཤ་ཚ་ཁོ་རེ། རྒྱ་ཡིས་དམར་པོའི་སློབ་གསོ་སྤྲད་པ་དང་བོད་ཕྲུག་ལ་ནང་ཆོས་བསླབ་པ་གཉིས་གཅིག་པ་ག་ལ་ཡིན། འཛམ་གླིང་གི་རྒྱལ་ཁབ་ཆེ་ཆུང་གང་འདྲ་ཞིག་ཡིན་རུང་ཕྲུ་གུ་ལ་རང་གི་རིག་གཞུང་བསླབ་ཀྱི་ཡོད། དེ་ཙམ་ཧ་མི་གོ་བར་ཅིག་བཤད་ཁུལ་བྱེད་པ་ནི་རང་ཚོད་རང་གིས་མི་ཟིན་པ་རང་རེད།
རེད་ཨ་ནུ་གསུང་པ་རྒྱབ་སྐྱོར་ཞུ་དགོས་པར་མཐོང་། གང་ལགས་ཞུ་ན་ཆོས་ལུགས་སྦྱང་ན་ཆོས་དགེ་ཆོས་ལུགས་ཚང་མ་ནས་དགོས་གལ་ཆེ། དེ་མིན་དེང་སྐབས་སློབ་གྲྭ་ཁག་ལ་གཟིགས་དང་ཆོས་དགེ་ཚང་མ་ཆོས་ལུགས་བྱེ་བྲག་པ་གཅིག་ལས་མཐོང་རྒྱུ་མེད་པ་ནི་གང་ཟག་རེ་ཟུང་དང་ཆོས་ལུགས་བྱེ་བྲག་པས་དབང་སྒྱུར་བྱས་པས་རེད། དེས་ནི་ཨ་ནུའི་བསམ་ཚུལ་བཞིན་ཆོས་ལུགས་བྱེ་བྲག་པ་གཅིག་དང་གང་ཟག་རེ་ཟུང་གི་མངོན་འདོད་སྒྲུབ་རྒྱུ་ལས་དོན་འབྲས་སུ་སློབ་ཕྲུག་ཚོས་ཀླད་པར་ཆོས་ལུགས་འཐེན་འཁྱེར་གྱི་ལྟ་བ་ཅན་བསྐྲུན་རྒྱུ་ལས་གཞན་མེད་ཙང་རྒྱ་ནག་དང་མཚུངས་པ་མ་ཡིན་ནམ།
ཨ་ནུ་ཐང་ཞེས་པ་དེས་བོད་སློབ་ལ་ནང་ཆོས་སློབ་ན་ཤེས་པ་ཡར་རྒྱས་ཡོང་རྒྱུར་འགོག་རྐྱེན་ཡོང་གི་ཡོད་པ་བརྗོད་པ་ནི་ཐལ་ཆ་ཆེ་བའི་ཀླད་མེད་ཕྱོགས་གཅིག་པ་ཞིག་ཡིན་པ་འདྲ་། སློབ་གྲར་སློབ་གཞིའི་ནང་ཆོས་སློབ་རྒྱུ་ནི་ནང་པ་བྱ་དགོས་རྒྱུ་མཚན་མིན་ལ་མི་གཤིས་ཀུན་སྤྱོད་ཡར་རྒྱས་ཡོང་རྒྱུར་དམིགས་ཡུལ་ལས་ཐ་གཅིག་པ་ཕྱོགས་ལྷུངས་མིན་པ་བསམ་བློ་རྣལ་ལ་ཕབས་ནས་གཟིགས།
སློབ་ཕྲུག་ཚོར་ནང་ཆོས་སློབ་མིན་གང་ལྟར་ཡང་ཐོག་མར་རང་གི་བརྡ་སྤྲོད་སྐད་ཡིག་ལ་རང་སྐྱ་འཕེར་བ་ཞིག་བཟོ་ཐུབ་ན་ཅི་མ་རུང་ཨང་།
དེ་ལྟར་ཡིན་ན་བོད་པས་རང་དབང་དང་དམངས་གཙོའི་ཐོབ་ཐང་རྩོད་པ་དགོས་པ་ཅང་མེད་དེ། ཆོས་ལུགས་མི་དགོས་པས་རིག་གཞུང་མི་དགོས། རིག་གཞུང་མི་དགོས་པས་སྐད་ཡིག་མི་དགོས། དེ་མི་དགོས་པས་ང་ཚོ་ལ་འགྲོ་བ་མིའི་ཐོབ་ཐང་རྩོད་རྒྱུ་ཅང་ལྷག་མེད་ག །
ཨ་ནུ་ཐང་བསོད་ནམས་ཀྱིས་བཤད་པའི་སྐད་ཆ་དེ་ཙམ་བློ་ལ་བབ་མ་སོང་། གང་ཡིན་ཞེ་ན་སྤྱིར་ཆོས་ལུགས་དང་འགྲོ་བ་མིའི་འཚོ་གནས་ལ་འབྲེལ་བ་དམ་ཟབ་ཡོད། ལྷག་ཏུ་ནང་བསྟན་ཆོས་ལུགས་དང་བོད་མིའི་རིགས་གཞུང་དང་གོམས་གཤིས་སོགས་ལ་འབྲེལ་བ་ཧ་ཅང་ཟབ་མོ་ཡོད། དེ་ལྟར་ཡིན་དུས་རྒྱ་ནག་དམར་པོའི་སྲིད་གཞུང་གིས་འགོག་མིན་ལ་མི་ལྟོས་པར་བོད་ཕྲུག་ཚོས་གོ་སྐབས་གང་ཡོད་ལ་ནང་བསྟན་ཆོས་ལུགས་དང་འབྲེལ་ཆེ་བའི་བོད་ཀྱི་རིག་གཞུང་ལ་སློབ་སྦྱོང་བྱེད་རྒྱུ་གལ་ཆེ།
ཨ་ནུ་བས་་་་་ངོ་མས་གད་མོ་ཤོར་ཡ་རང་བྲིས་འདུག་་་་ཀླད་གསར་ཡིན་མདོག་ལ།
ཆོས་ལུགས་ཁྲིད་པས་་་་སློབ་ཕྲུག་ཚོའི་རྣམ་དཔྱོད་ལ་ཚོད་འཛིན་ཐེབས་ན་་་་ཆོས་ལུགས་མ་ཁྲིད་ན་སློབ་ཕྲུག་ཚོའི་རྣམ་དཔྱོད་འཕེལ་བའི་བདེན་ཚོད་ཁྱོད་ལ་ཅི་ཙམ་ཡོད་དམ།
སློབ་གྲྭ་ཁག་ནས་སློབ་མ་ཚང་མར་ཨ་ཁུ་དང་ཨ་ནེ་བྱེད་མ་དགོས་པར་ནང་ཆོས་ངོ་སྤྲོད་བྱེད་པ་ནི་ཆེ་དགའ་དགོས་བའི་གནས་ཚུལ་ཞིག་རེད། ས་དགེ་བཀའ་རྙིང་སོགས་ག་རེ་ངོ་སྤྲད་ན་ཡང་ཡག་པོ་རེད། ཡིན་ན་ཡང་རང་གི་བུ་ཕྲུག་་ས་སྐྱའི་སློབ་གྲྭར་བཏང་ན་སྐྱ་དང་དགེ་ལུགས་པའི་སློབ་གྲྭར་བཏང་ན་དགེ་ལུགས་ལས་སློབ་གྲྭ་གཅིག་ལ་དེ་དག་ཚང་མ་ཚང་དགོས་ཟེར་ན་མགོ་བོ་དཀྲུག་སྤྱེད་རང་རེད། སྐད་ཆ་དེ་ཕྱོགས་ཞེན་པ་ཞིག་གི་ངུ་སྐད་ཡང་རེད། སློབ་གྲྭ་གཅིག་གི་འཁོར་ཡུག་ན་ཆོས་ལུགས་གི་དབྱེ་བ་མེད་ན་ཡག་པ་རེད། ཆོས་ལུགས་ཀྱིས་བསམ་བློ་ལ་བཀག་རྒྱ་གཏོང་བ་ནི་བདེན་པ་རེད། འོན་ཀྱང་དེ་ནི་ཡ་རབས་ཀྱི་ཕྱོགས་སུ་ཡིན་པས་ན་དེ་འགྲིག་པ་མ་རེད་དམ་ཨ་ནུ་བསོད་ནམས་ལགས།
སློབ་གྲྭ་ཁག་ནས་སློབ་མ་ཚང་མར་ཨ་ཁུ་དང་ཨ་ནེ་བྱེད་མ་དགོས་པར་ནང་ཆོས་ངོ་སྤྲོད་བྱེད་པ་ནི་ཆེ་དགའ་དགོས་བའི་གནས་ཚུལ་ཞིག་རེད། ས་དགེ་བཀའ་རྙིང་སོགས་ག་རེ་ངོ་སྤྲད་ན་ཡང་ཡག་པོ་རེད། ཡིན་ན་ཡང་རང་གི་བུ་ཕྲུག་་ས་སྐྱའི་སློབ་གྲྭར་བཏང་ན་སྐྱ་དང་དགེ་ལུགས་པའི་སློབ་གྲྭར་བཏང་ན་དགེ་ལུགས་ལས་སློབ་གྲྭ་གཅིག་ལ་དེ་དག་ཚང་མ་ཚང་དགོས་ཟེར་ན་མགོ་བོ་དཀྲུག་སྤྱེད་རང་རེད། སྐད་ཆ་དེ་ཕྱོགས་ཞེན་པ་ཞིག་གི་ངུ་སྐད་ཡང་རེད། སློབ་གྲྭ་གཅིག་གི་འཁོར་ཡུག་ན་ཆོས་ལུགས་གི་དབྱེ་བ་མེད་ན་ཡག་པ་རེད། ཆོས་ལུགས་ཀྱིས་བསམ་བློ་ལ་བཀག་རྒྱ་གཏོང་བ་ནི་བདེན་པ་རེད། འོན་ཀྱང་དེ་ནི་ཡ་རབས་ཀྱི་ཕྱོགས་སུ་ཡིན་པས་ན་དེ་འགྲིག་པ་མ་རེད་དམ་ཨ་ནུ་བསོད་ནམས་ལགས།
ད་ཡང་ངའི་མཆན་སྒོ་གཏད་འདུག
ངས་བལྟས་ན་གོང་གི་དཔྱད་རྩོམ་དེ་ལས་བསྟན་པ་ནི་སློབ་གྲྭའི་ནང་ཆོས་ལུགས་ཁྲིད་ན་ཡར་རྒྱས་ཀྱི་རྣམ་དཔྱོད་ལ་བཀག་རྒྱ་ཐེབས་རྒྱུ་དེ་མ་ཡིན་པར་ཆོས་ལུགས་ཁྲིད་སྟངས་ལ་ཕྱོགས་ཞེན་གྱིས་ཤུགས་རྐྱེན་ཐེབས་ནས་སློབ་མ་ཆུང་ཆུང་སྐབས་ནས་ཆོས་ལུགས་འཐེན་འཁྱེར་ཞིག་གི་ས་བོན་བཏབ་ནས་མཐར་ཆོས་ལུགས་ཐམས་ཅད་དག་སྣང་ཡོང་རྒྱུ་ཕར་ཞོག་ལྟ་བ་གྱོང་པོ་འཁུར་ནས་འཐེན་འཁྱེར་རྐྱང་རྐྱང་འཐམ་ནས་མགོ་རིལ་ཚོ་དང་འདྲ་སེ་ཞིག་ཆགས་རྒྱུ་ཡིན་པར་སྟོན་པ་དེ་ཡིན་སྙམ།
རྣམ་པ་ཚོས་དགོངས་ཚུལ་གསུངས་བ་ལེགས་ཀྱང་ཆོས་ལུགས་མེད་ན་བོད་ཀྱི་རིག་གཞུང་མེད་ཟེར་བ་ནི་གུང་ཁྲན་ཏང་མེད་ན་བོད་ལྗོངས་གསར་བ་མེད་ཟེར་བ་དང་གཅིག་མཚུངས་རེད། བོད་དང་ཆོས་གཉིས་ཐ་དད་རེད་ལ་གུང་ཁྲན་ཏང་དང་བོད་གཉིས་ཐ་དད་རེད། དེ་གཉིས་གཅིག་མཚུངས་སུ་འདོད་པ་ནི་རང་གི་རྣམ་དཔྱོད་ལ་གཞན་གྱིས་ཚོད་འཛིན་ཐེབས་པའི་དཔང་པོ་རེད་དེ། ནང་ཆོས་མ་དར་བའི་སྔོན་ནས་བོད་ཕན་ཚུལ་གོ་བརྡ་སྤྲོད་པའི་སྐད་དང་གྱོད་དོན་འདུམ་སྒྲིག་བྱེད་པའི་སྲོལ། སྒོ་ཕྱུགས་འཚོ་སྐྱོང་བྱེད་པའི་གོམས་སྲོལ་དང་ཞིང་ལས་ཐོན་བྱེད་པའི་ལུགས་སྲོལ། རྒྱལ་ཁབ་ཁྲིམས་ཀྱིས་སྐྱོང་བའི་ཐབས་ཇུས་དང་དཔལ་འབྱོར་འདུ་བགོ་བྱེད་པའི་རིག་གཞུང་། སྟོབས་ཤུགས་རྒྱ་སྐྱེད་བཏང་བའི་ཐབས་དང་དགྲ་བོའི་རང་སྲུང་བྱེད་པའི་གོམས་གཤིས་སོགས་བརྗོད་ཀྱིས་མི་ལངས་བ་ཞིག་ཡོད་པས་དེ་དག་ཆོས་ལུགས་མིན་ལ་ཆོས་ལུགས་དང་འབྲེལ་བ་གཏན་ནས་མེད། དེ་དག་བོད་ཀྱི་རིག་གནས་མིན་ན་ཅི་ཞིག་རེད། ཁ་ཤས་ཀྱིས་ནང་བསྟན་བོད་ཀྱི་རིག་གཞུང་དང་འབྲེལ་བ་ཡོད་པས་ངེས་བར་དུ་སློབ་དགོས་གསུངས་བ་ལྟར་ཡིན་ན་་་་ནུབ་ཕྱོགས་ཀྱི་སློབ་ཚན་ཀུན་ཏུ་ཡེ་ཤུའི་ཆོས་ལུགས་བཀོད་ཅིང་ངེས་བར་དུ་ནུབ་མི་ཀུན་གྱིས་སློབ་དགོས་ཤིང་། ཁོང་ཚོའི་རིག་གཞུང་ཡང་ལོ་ངོ་བརྒྱ་ཕྲག་མང་པོའི་རིང་ལ་ཡེ་ཤུ་དང་འབྲེལ་བ་གཏིང་ཟབ་ཡོད་ཀྱང་ཁོང་ཚོའི་སློབ་ཚན་དུ་ཆོས་ལུགས་བཀོད་ན་ཁྲིམས་འགལ་ཡིན་པ་ཅི་ཞིག་ཡིན་ནམ། འོན་ཀྱང་། རྒྱལ་རབས་དང་མཛེས་རྩལ་སོགས་ཆོས་ལུགས་དང་འབྲེལ་བ་ཤུགས་ཆེ་ཡོད་པ་རྣམས་བཙན་གྱིས་མཚམས་འཇོག་དགོས་དོན་མེད་པ་རྒྱུན་མཐུན་དུ་མི་རིགས་གཞན་ལྟར་བཞག་ན་ལེགས་ཀྱང་། གཞུང་གི་ངོས་ནས་སློབ་མ་རྣམས་ལ་ཆོས་ལུགས་ལ་སྐུལ་བའམ་ཆོས་ལུགས་ལ་དགག་པ་བྱེད་དུ་བཅུག་པ་སོགས་ནི་བྱིས་བའི་ཀླད་པ་བཅོས་སྒྱུར་བཏང་བའི་བྱ་སྤྱོད་ཡིན་པས་མི་རིགས་ཤིག་ལ་མཚོན་ན་གྱོང་གུད་ཚབས་ཆེན་ཡིན། དེ་བརྟེན་གཞུང་གི་སློབ་ཚན་ཁག་གི་ཆོས་ལུགས་ཀྱི་ལྟ་གྲུབ་རྣམས་ཕྱི་བསྡུ་གནང་ན་ལེགས། བོད་ཀྱི་བྱིས་པ་རྣམས་ཕྱོགས་གཅིག་མ་གཏོགས་མི་མཐོང་བའི་ཞ་ར་ཞིག་ཏུ་མི་བཟོས་བའི་རེ་བ་ཡོད།
ཆོས་དང་སྲིད་ཀྱི་ལམ་ལུགས་འདི་དག་དུས་དང་སྟུན་ནས་འགྱུར་ཞིང་དགོས་མཁོ་དང་སྟུན་ནས་བརྗེ་སྤོ་བྱེད་རྒྱུ་ལས་རྟག་བརྟན་ཐེར་ཟུག་ཏུ་འདོད་པ་ནི་རྨོངས་ཚང་ཡིན་པའི་ཀུན་སྤྱོད་ལས་ཅི་ཡང་མིན། རྒྱུ་མཚན་ནི་ཆོས་ལུགས་དང་ཆབ་སྲིད་གཉིས་མིའི་དགོས་མཁོ་སྒྲུབ་བྱེད་ཡིན་པ་ལས་མི་ཆོས་དང་ཆབ་སྲིད་ཀྱི་དགོས་མཁོ་སྒྲུབ་བྱེད་མིན་པས་འགྱུར་བ་བཏང་བའི་དབང་ཚད་ཆ་ཚང་མི་ལ་ཡོད། ཆོས་ལུགས་ནི་དགོན་སྡེ་ཁག་གམ་ཆོས་ལུགས་ཀྱི་སྡེ་ཚན་ཁག་ཏུ་ཁྲིད་རྒྱུ་ཞིག་ལས་མི་རིགས་ཤིག་གི་སློབ་ཆུང་གི་སློབ་ཚན་དུ་བཀོད་ནས་མི་རིགས་དེའི་མི་མང་ཀུན་ལ་ཁྲིད་པ་ནི་དུས་རབས་རྙིང་བའི་ཆོས་སྲིད་ཟུང་འབྲེལ་གྱི་བྱ་སྤྱོད་ལས་དེང་དུས་ཀྱི་སྔོན་ཐོན་རྒྱལ་ཁབ་ཀུན་གྱི་ཁྲིམས་ལུགས་སུ་བཀག་སྡོམ་བྱས་ཟིན་ཞིང་། དེ་ནི་མི་རིགས་དེ་འམ་རྒྱལ་ཁབ་དེ་ཕྱོགས་གཅིག་ལས་ཡོད་ཚད་མཐོང་བ་འགོག་སྐྱོན་ཕོགས་པས་རེད་ལ། ཆོས་ལུགས་ནི་མི་རིགས་ཤིག་གམ་སྒེར་བ་ཞིག་ལ་དབང་བ་མིན་པ་མི་རིགས་དང་རྒྱལ་ཁབ་ཀྱི་དབྱེ་བ་མེད་པས་རེད། འོན་ཀྱང་ཆོས་ལུགས་གང་ཞིག་ལ་འདོད་མོས་ཡོད་མཁན་ནམ་དོ་སྣང་ཡོད་མཁན་རྣམས་ལ་མཐོ་སློབ་དང་སློབ་ཆེན་གྱི་སྐབས་སུ་དམིགས་བསལ་གྱི་ཚན་ཁག་ཡོད་ཅིང་དེའི་ནང་མཉམ་ཞུགས་བྱེད་པའི་གོ་སྐབས་ཡོད། དེ་མིན་སློབ་མ་ཡོད་ཚད་ཀྱིས་ངེས་བར་དུ་ཆོས་ལུགས་སློབ་དགོས་པ་ནི་ཆེས་རྟག་མཐའ་ཆེ་བའི་ཆོས་ལུགས་ཐད་སྤྱོད་ཀྱི་ལུང་པ་ཁག་གི་ཁྱད་ཆོས་རེད་ལ། རྗེས་ལུས་ཀྱི་མཚོན་དོན་གལ་ཆེན་ཞིག་རེད། མ་ཟད་ཆོས་ལུགས་གཅིག་ལས་ཆོས་ལུགས་གཞན་གྱི་སློབ་ཚན་མེད་པ་ནི་དེ་བས་མི་རིགས་དེའི་གྲངས་ཉུང་ཆོས་ལུགས་པ་དག་ལ་དབྱེ་འབྱེད་དང་དམའ་འབེབ་བྱེད་པ་མཚོན་ཕྱིན་མི་རིགས་ཤིག་ལ་མཚོན་ན་ཡོད་ཚད་འདྲ་མཉམ་བྱེད་རྒྱུ་ནི་མི་རིགས་དེའི་ནུས་བ་གོང་མཐོ་བཏང་བའི་ཆ་རྐྱེན་ཡག་ཤོས་དེ་རེད། དེ་མིན་མཐུན་སྒྲིལ་དགོས་ཞེས་ག་ཚོད་ལབ་ཀྱང་ལག་ལེན་དུ་མེད་ན་རྒྱ་ནག་གི་འཆམ་མཐུན་གྱི་སྲིད་ཇུས་དང་མཚུངས་བས་ནུས་བ་ཐོན་དུ་དཀའ། ཡིན་ཏེ། མི་གཞན་ལྐུག་པ་མིན་ཞིང་ཁ་ནས་གང་བཤད་དང་ལག་ལེན་གང་བསྟར་གཉིས་ཀྱི་དབྱེ་བ་གསལ་པོ་ཤེས་བའི་ནུས་བ་ཡོད་པས་ཡིན། ཁེ་ཕན་ཡོད་ཚད་ང་ལ་དགོས་ཤིང་སྒྲུབ་ཚེ་ང་ཡི་ངག་ལ་ཉན་ནས་འཆམ་པོ་བྱོས་ཟེར་ན་ཡོང་ཐབས་མེད་པ་བཞིན་རེད། བོད་ཀྱི་རྗེས་ལུས་ཀྱི་ཁྱད་ཆོས་འདི་དག་རྒྱ་གཞུང་དགའ་བའི་གསོས་སུ་གྱུར་ཡོད་ལ་བོད་དང་སྐད་ཆ་བཤད་འདོད་མེད་པའི་རྒྱུ་རྐྱེན་ཞིག་ཆགས་ཡོད། དེ་སྔོན་འཐབ་ཕྱོགས་གཅིག་གྱུར་གྱི་ཚོགས་གཞོན་གྱིས་འཇར་མན་དུ་ཁ་གསལ་ངང་བོད་ནི་ཧོང་ཀོང་དང་བསྡུར་ཐབས་མེད་ཅིང་བོད་ལ་རང་དབང་སྤྲད་ན་བླ་མའི་ལམ་ལུགས་སུ་སྐྱར་ལོགས་བྱེད་ངེས་རེད། ཧོང་ཀོང་ནི་དེ་ལས་ལྡོག་སྟེ་མང་གཙོའི་འཚོ་བ་ལོངས་སུ་སྤྱད་མྱོང་ཡོད་པ་མ་ཟད་ཆབ་དཔལ་གང་གི་ཐོག་ནས་ཡར་རྒྱས་རེད་བཤད་ཡོད།
གནམ་འོག་འདིར་ཆོས་ལུགས་ཀྱི་ཤུགས་རྐྱེན་ཅི་ཙམ་ཆེ་བ་དེ་ཚོད་ཀྱི་རྗེས་ལུས་ཀྱི་མངོན་རྟགས་གསལ་བ་དེ་ག་རེ་ཡིན་ནམ། ཆོས་ལུགས་ཀྱི་རྣམ་པ་ཅི་ཙམ་འབུལ་དུ་ཐོན་ན་དེ་ཚོད་ཀྱི་མཁོན་འཁྲུགས་ཀྱི་གནས་བབ་ཛ་དྲག་ཆེ་བ་ག་རེ་ཡིན་ནམ། ཆོས་ལུགས་ཀྱི་སློབ་གསོས་ཅི་ཙམ་བཅུམ་ན་དེ་ཚོད་ཀྱི་གསར་གདོད་ཀྱི་ནུས་པ་ཞན་པ་ག་རེ་ཡིན་ན། ག་རེ་ཡིན་ན་????????????
ཨ་ནུ་ཐང་གིས་གསུངས་པ་ལ་རྒྱུ་མཚན་ངེས་ཅན་འདུག་པས་རྒྱབ་སྐྱོར་ཡོད། རང་མི་རིགས་ཀྱི་སྐད་བརྡ་ཙམ་ལའང་རྨོངས་པའི་སློབ་ཕྲུག་ཚོར་གང་ཞིག་གལ་ཆེར་འཛིན་དགོས་པ་རང་གཞུང་ཤེས་རིག་ལས་ཁུངས་སོགས་ནས་དགོངས་པ་རྒྱ་ཆེར་བཞེས་དགོས་ངེས་རེད།
སེམས་ཁྲལ་མེད་པའི་སེམས་ཁྲལ་རེད། སློབ་གྲྭ་ཁག་ནང་ལ་ཆོས་དགེ་རེ་ཡོད་ཀྱང་། ཁོང་ཚོས་སློབ་རྒྱུ་ནི་ཞལ་འདོན་ཙམ་ལས་ཆོས་ཀྱི་ལྟ་གྲུབ་གང་ཡང་སློབ་ཀྱི་ཡོད་ཚོད་མི་འདུག རྟགས་གསལ་སློབ་པ་ལ་ཟེར་བ་ཡིན་ན་དེ་ནི་རིག་པ་ཡར་རྒྱས་གཏོང་བྱེད་ཙམ་ལས་ཆོས་ལུགས་སློབ་པ་མ་རེད་དོ།
ཧ་ཧ་་་་་་་ཨ་ནུ་ཅོལ་ཆུང་ཁོ་རྒྱ་ནག་དམར་པོའི་ལྟ་བ་ལ་དགའ་དྲགས་ནས་རྒྱ་གཞུང་གི་འཐབ་ཕྱོགས་གཅིག་གྱུར་གྱི་ཚོགས་གཞོན་ཁོའི་སྐད་ཆ་དེ་ལུང་འདྲེན་ཁུལ་བྱས་འདུག ཨ་ནུ་ལོ་ལོ་ཁོས་སྐད་ཆ་དེ་ལ་ཡིད་ཆེས་རྒྱུ་ཡོད་ནི་མ་རེད།
་་་་་ བོད་དུ་རྒྱ་ནག་གིས་མེས་རྒྱལ་དང་ཏང་ལ་དགའ་ཞེན་གྱི་སློབ་ཚན་སྣ་ཚོགས་ཁྲིད་བཞིན་ཡོད་པ་ལྟར་རྒྱ་གར་བཙན་བྱོལ་བོད་ཀྱི་སྒྲིག་འཛུགས་ཀྱིས་ཀྱང་རང་གི་མངོན་འདོད་ལྟར་ནང་ཆོས་སློབ་ཚན་ཁག་ཏུ་ཅི་འདོད་དུ་ཁྲིད་བཞིན་ཡོད། ་་་་་་ ཟེར།
་་་་ སྔོན་ཐོན་ཅན་གྱི་རྒྱལ་ཁབ་གཞན་ལྟར་ཆོས་ལུགས་ལ་དོ་སྣང་ཡོད་མཁན་ཚོར་མཐོ་སློབ་ཁག་ཏུ་ཡེ་ཤུ་དང་ནང་པ་། ཁ་ཆེ་དང་བོན་ཆོས་སོགས་ཀྱི་སྡེ་ཚན་ལོགས་སུ་གཙུགས་ན་ལེགས་པ་འདོད། ་་་ ཟེར།
ཨ་ནུ་ཐང་བསོད་ནམས་ལགས་ཀྱིས་ག་རེ་གསུངས་འདོད་པ་ཡིན་ནམ། ངས་ནི་ཅང་ཤེས་ཐུབ་མ་སོང་བས། ད་དུང་དེ་ལས་རྒྱས་ཙམ་དང་། དེ་གསལ་ཙམ་བྲིས་ན་ཅི་མ་རུང་སྙམ་མོ། །
ངེད་ཚོའི་འདིར་ཡང་མཐོ་འབྲིང་ཁག་ནང་ཆོས་ལུགས་ཀྱི་བསླབ་ཚན་ཞིག་འདུག དེར་ཞུགས་མ་ཞུགས་སློབ་མ་ཚོ་རང་རང་གི་འདོད་པ་རེད། སློབ་ཁྲིད་བྱེད་སྟངས་ནི་ཁ་ཆེ། ཡེ་ཤུ།ཇོའུ། ནང་ཆོས་སོགས་ལ་མཁས་པའི་དགེ་རྒན་རེས་མོས་ཀྱིས་གདན་ཞུ་བྱས་ཏེ་ཆོས་ལུགས་དེ་དང་དེའི་ལྟ་གྲུབ་སྐོར་སློབ་ཁྲིད་གནང་གི་འདུག
སློབ་ཁྲིད་སྐབས་ཆོས་ལུགས་རེ་རེ་ནས་རང་གི་ལྟ་གྲུབ་དེ་སློབ་མ་ཚོའི་བློ་རྒྱུད་ལ་འཇགས་ཐུབ་པར་འབད་ཀྱི་མི་འདུག་པར་གཙོ་བོ་དེ་སློབ་མ་རེ་རེ་ལ་རང་སྐྱ་ཐུབ་པའི་བསམ་བློ་དང་རང་ཉིད་ཀྱི་ངོས་ནས་དཔྱད་པ་གཏོང་ཐུབ་པའི་ནུས་པ་ཞིག་བསྐྲུན་པར་འབད་ཀྱི་འདུག
སྤྱིར་དོན་དག་ཆེ་ཆུང་གང་ཞིག་ཡིན་ཡང་མཐོ་འབྲིང་ཙམ་མིན་པར་སློབ་ཆུང་ནས་བཟུང་སློབ་མ་ཆུང་ཆུང་ཞིག་ཡིན་ནའང་རྒྱ་ཆེ་ཆུང་དང་གཏིང་ཟབ་ཚད་ལ་མ་ལྟོས་པར་རང་ཉིད་ལ་རང་གི་བསམ་ཚུལ་དང་ལྟ་བ་ཡོད་པ་དང་དེ་ཞེད་སྣང་དང་འཚེར་ནང་མེད་པར་སུ་ལའང་བརྗོད་ཐུབ་པའི་ནུས་པ་ཞིག་བསྐྲུན་ཡོད་པ་རེད།
རང་གི་ཕ་མ་དེ་རང་ལ་ཕན་ཐོགས་ཆེ་བ་ལྟར། རང་གི་ཕ་མའི་ཆོས་དེ་ཡང་རང་ལ་ཕན་ཆེ་བགྱིད་རེད། དེས་ན་རང་གི་ཆོས་དེ་རང་ལ་ཕན་ཆེ་བ་དང་། རང་གི་རིག་གནས་དེ་རང་ལ་ཕན་ཆེ་བ། རང་གི་ལུང་དེ་རང་གི་ཡིན་ཙང་རང་ལ་སྐྱིད་པ་འཚོར་བ། རང་གི་མི་རིགས་དེ། རང་དང་ཉེ་བར་འཚོར་བ། རང་གི་གོམས་གཤིས་དེ་རང་ཡག་ག་ཡིན་པ་ཙམ་།
མ་ཟད་རང་ལ་གང་ཡོད་དེ་སྲུང་དགོས་ན་རང་གིས་བསྲུངས་ན་མ་གཏོགས་གཞན་སུ་ཞིག་གིས་སྲུང་ཐུབ་བམ། དཔེར་ན། བོད་ཡིག་དང་བོད་སྐད་འདི་བོད་པས་འཛིན་སྐྱོང་སྤེལ་གསུམ་མ་བྱས་ན། སུས་བྱེད་མཁན་ཅིག་ཡོང་ངམ། དེ་ལྟར་བྱེད་མཁན་གཞན་ཅིག་མི་འོང་བར་ཐག་བཅད་ནས་རིགས་་པའགྲིམ་ནས། བློ་སྤོབས་བསྐྱེད་ནས། དགོས་དོན་ཤེས་ནས་ཐབས་སྣ་ཚོགས་ཀྱི་སྒོ་ནས་བོད་ཆོས་དང་། བོད་སྐད་བོད་ཡིག་ལ་སློབ་སྦྱོང་བྱ་དགོས་པ་དེ། གོ་ལ་འདི་ཡི་ནང་ལ་བོད་རིགས་རང་གི་ལས་འགན་ཡིན་པ་ཤེས་པར་གྱིས་ཤིག །
ལུང་རྟོགས་ཀྱིས་བཙན་བྱོལ་བོད་སློབ་གྲྭ་ཁག་ཏུ་ཆོས་ལུགས་དེ་ཙམ་ཁྲིད་ཀྱི་མེད་ཚུལ་དགོངས་ཀྱིན་ཡོད་ཀྱང་དེ་ནི་བདེན་པ་མིན་ཏེ། ལས་འབྲས་ཀྱི་ཆོས་སྐོར་དང་བདེན་པ་བཞི། ལྷག་པ་གསུམ་དང་རྟེན་འབྲེལ་ཡན་ལག་བཅུ། བློ་རིག་སོགས་ཅི་འདོད་དུ་སློབ་ཚན་དུ་ཡོད་པས་དེ་དག་ནང་ཆོས་མིན་ན་དེ་ལས་ལྷག་གི་ནང་ཆོས་ཤིག་འཇོག་ཏུ་དཀོན་པས་བདེན་དུ་མ་མཐོང་། ངས་ཞུ་འདོད་པ་ནི་སློབ་ཆུང་སྐབས་སུ་མཛེས་རྩལ་དང་སྐད་ཡིག བརྡ་སྤྲོད་དང་རྩིས་རིག ས་ཁམས་དང་དངོས་ཁམས་སོགས་ཀྱི་སློབ་ཁྲིད་བྱེད་རྒྱུ་ལས་ཆོས་ལུགས་སློབ་ཁྲིད་བྱེད་རྒྱུ་མིན། སློབ་ཆུང་ཚར་ཞིང་མཐོ་འབྲིང་དང་མཐོ་སློབ། སློབ་གྲྭ་ཆེན་མོའི་སྐབས་སུ་རང་ཉིད་གང་ལ་མོས་ན་དེ་ཡི་སློབ་ཚན་འདེམས་ཆོག་ཅིང་དཔེར་ན་དཔལ་འབྱོར་དང་རྫས་འགྱུར། ཚན་རིག་དང་གློག་ཀླད། ཚད་མཐོའི་རྩིས་རིག་དང་སྨན། ཆོས་ལུགས་དང་སྤྱི་ཚོགས་ཚན་རིག ལོ་རྒྱུས་དང་ཁྲིམས་ལུགས། རོལ་མོ་སོགས་ཀྱི་ཚན་ཁག་གམ་སྡེ་ཚན་འདེམས་ཆོག་ཅིང་དེའི་སྟེང་དུ་ཆེད་སྦྱང་བྱེད་ན་ལེགས་པ་མཐོང་། བདེན་ཏེ་བཙན་བྱོལ་གྱི་སློབ་གྲྭ་རྣམས་ཀྱིས་གང་ཐུབ་ཀྱིས་དེ་ལྟར་བྱེད་ཀྱིན་ཡོད་ཀྱང་ཆོས་ལུགས་གཞུང་གི་སློབ་གཞིའི་ཁྲོད་དུ་བཅུག་ནས་ཐམས་ཅད་ཀྱིས་ངེས་བར་དུ་སློབ་ཏུབཅུག་པ་ནི་སློབ་མའི་རྣམ་དཔྱོད་འཕེལ་བ་ཀག་ཏུ་འགྲོ་བ་གོང་བཀོད་ཀྱི་རྒྱུ་མཚན་ལྟར་ཡིན། ཕ་མེས་ཀྱི་ཅ་དངོས་ཐམས་ཅད་ལེན་བྱ་ཡིན་ན་འཇིག་རྟེན་འདིར་གསར་བཏོད་དང་བཅོས་སྒྱུར། ལེགས་བཅོས་སོགས་དགོས་དོན་མེད་པས་མ་ངེས་བ་མ་ཟད། ཕ་མའི་བཀའ་དྲིན་ཆེ་བའི་རྒྱུ་མཚན་ལ་བརྟེན་ནས་ཕ་མས་ཀྱིས་སྒྲུབ་པ་ལྟར་བྱེད་དགོས་ཚེ་ཚུལ་ལེན་དང་རིག་གསར་སོགས་དེ་བས་ཕན་མེད་དུ་ཆགས་ཤིང་ཡབ་མེས་ཀྱི་ཆོས་ལུགས་བོན་ཆོས་བྱེད་ཡ་ཁོ་ནར་འགྱུར། དེ་ལྟར་བྱས་ཀྱང་བོན་ཆོས་ཀྱི་སྔོན་གྱི་ཕ་མེས་ལ་ཆོས་ལུགས་མེད་པས་ཆོས་མེད་རིང་ལུགས་པ་བྱེད་དགོས་འགྱུར་བས་ཁས་ལེན་བྱེད་ཐབས་དཀའ་བ་འདོད།
ཕྲན་གྱིས་གོང་དུ་བཤད་ཟིན་པ་ལྟར་ཆོས་ལུགས་དང་གོམས་གཤིས། རིག་གཞུང་དང་སྐད་ཡིག་སོགས་ལོགས་སུ་ཡོད་ཅིང་ཕན་ཚུན་ཐ་དད་ཡིན་པས་དེ་རྣམས་གཅིག་ཏུ་འདོད་པ་ནི་མི་འོས་ཤིང་རྨོངས་ཚང་ཡིན་པས་ངོས་ལེན་མེད། ལྷག་པར་དུ་སྐད་ཡིག་ནི་རིག་གཞུང་གི་རྩ་བ་ཡིན་ཞིང་སྐད་ཡིག་གིས་མི་རིགས་དེའི་རིག་གཞུང་དང་གོམས་གཤིས་ཀུན་འཛིན་བྱེད་ཀྱི་ཡོ་བྱད་ཡིན་པས་དེ་མི་རིགས་ཀྱི་ཆགས་འཇིག་དང་འབྲེལ་བ་དམ་ཟབ་ཡོད་པས་ནམ་ཡང་རྒྱུན་འཛིན་བྱེད་དགོས་བ་མ་ཟད། མ་ཤི་བར་དུ་དམ་འཛིན་བྱེད་དགོས། ཡིན་ཏེ། སྐད་ཡིག་གིས་བོད་མི་ཕན་ཚུན་གོ་བརྡ་སྤྲོད་ཅིང་ཕན་ཚུན་གྱི་འབྲེལ་བ་དམ་ཟབ་ཏུ་བཏང་བ་མ་ཟད་བོད་འདི་ཐུན་མོང་མ་ཡིན་པ་ཞིག་ཏུ་བཟོ་བྱེད་ཀྱི་རྩ་བའི་རྒྱུ་རྐྱེན་པས་བྱིས་བ་རྣམས་ལ་བོད་ཡིག་སློབ་རྒྱུ་འདི་མི་རིགས་འདིའི་ཆགས་འཇིག་དང་འབྲེལ་བ་ཡོད། རང་སྐད་ཀྱི་སྒང་དུ་སློབ་ཁྲིད་གང་ཞིག་བྱས་ཀྱང་བྱིས་པ་རྣམས་ཀྱིས་གོ་བདེ་བ་མ་ཟད་བློ་ལ་ངེས་བ་ཕན་ཐོགས་ཡོད་པས་བྱིས་བ་རྣམ་དཔྱོད་ཡར་རྒྱས་འགྲོ་བ་ཕན་ཐོགས་བླ་མེད་དུ་ཡོད་པ་སྐད་ཡིག་ཉམས་ཞིབ་ཚོས་བརྗོད་གསལ་ལྟར་རེད། རྒྱུ་མཚན་ནི་བྱིས་བ་རྣམས་ལ་རང་སྐད་ལས་ཆ་རྒྱུས་ཆེ་བའི་སྐད་ཡིག་ཅིག་མེད་པས་དེས་གོ་བརྡ་སྤྲད་ན་ནང་དོན་ཅི་ཞིག་ཡིན་ཡང་གོ་བརྡ་འཕྲོད་སླ་བས་རེད། དེ་མིན་བྱིས་བ་རྣམས་ལ་སྐད་གཞན་ཞིག་གི་ཐོག་ཁྲིད་ན་ནང་དོན་གོ་བ་ལྟ་ཅི་ཕན་ཚུན་གོ་བརྡ་མ་འཕྲོད་པས་རྒྱུན་རིང་ལྷག་ཅིང་འཐོམ་དུ་བཅུག་པས་རྣམ་དཔྱོར་ཡར་རྒྱས་ལ་འགོག་རྐྱེན་ཐེབས་བས་རེད།
བཙན་བྱོལ་དུ་ཐོག་མར་ཕེབས་དུས་སྲིད་བློན་ནེ་རོས་གོང་ས་མཆོག་ལ་བོད་པའི་ཕྲུ་གུ་རྣམས་ལ་ཤེས་ཡོན་གལ་ཆེན་ཡིན་སྐོར་ལམ་སྟོན་གནང་ཡོད་པ་དང་། དུས་དེ་ནས་བཟུང་དེང་དུས་ཀྱི་བཙན་བྱོལ་སློབ་གྲྭ་ཁག་གི་ཤེས་ཡོན་གྱི་སྤུས་ཚད་ཡག་པོར་ཆགས་ཡོད་པ་སྨོས་མེད་རེད་དེ། ཡིན་ཡང་བོད་ནང་དང་བསྡུར་ན་རང་གི་སྐད་ཡིག་དང་རིག་གཞུང་ཉམས་ཆག་ཏུ་ཕྱིན་ཡོད་པ་བཤད་མ་དགོས་པ་རེད། སློབ་དཔོན་ཨ་ནུ་ཐང་སེམས་ཁྲལ་བྱེད་དགོས་དོན་མི་འདུག །བོད་པའི་རྩ་དོན་ངོ་མ་ནི་རང་གི་སྐད་ཡིག་དང་རིག་གཞུང་མི་ཉམས་པའི་ཆེད་དུ་རེད། དེ་ཉམས་སོང་ན་བོད་པའི་རྩ་དོན་བརླགས་ཚར་བ་རེད། ང་ཚོས་རྩ་དོན་གྱི་གནད་འགག་གང་ཡིན་ངོས་མ་ཟིན་པར་དེང་དུས་ཀྱི་ཤེས་ཡོན་གཅིག་བུ་ནི་འགག་རྩར་ཐུག་ཡོད་པ་མ་རེད། དཔེར་ན་ལྗེའུ་མི་རིགས་ལྟ་བུ་རེད། ཁོང་ཚོས་རང་གི་ཆོས་ལུགས་ལ་ཁ་གཏོང་གི་མ་རེད། ང་ཚོ་བོད་པས་རང་གི་ཆོས་ལུགས་ལ་ཁ་གཏོང་བ་འདི་བོད་པ་འཐོར་ཤིག་ཏུ་འགྲོ་བའི་ཐན་ལྟོས་རེད། བྱས་ཙང་དེང་དུས་ཀྱི་ཤེས་ཡོན་གཅིག་བུས་ཁུངས་འཁྱོལ་ཐུབ་ཀྱི་ཡོད་ནི་མ་རེད། བོད་པའི་ཆོས་དང་རིག་གཞུང་སྐད་ཡིག་གསུམ་པོ་ནམ་ཡང་ཁ་འབྲལ་དུ་མེད་པ་སྟེ། སྐད་ཡིག་རིག་གཞུང་དང་འབྲེལ། རིག་གཞུང་ནི་ཆོས་ལུགས་ལ་ཏིལ་ལ་ཏིལ་མར་དང་ཆུ་ལ་ཆུ་བཞག་གི་ཚུལ་དུ་འབྲེལ་ནས་ཡོད་པ་རེད། མངོན་སུམ་རྟགས་ཀྱིས་གྲུབ་ཟིན་པས་འདི་ནི་བོད་པའི་བླ་སྲོག་ཡིན་ཏེ། འདི་མེད་སོང་ན་བོད་པ་མེད།
ལེགས་བཤད་ཀྱིས་གསུངས་བ་ཧ་ཅང་ལེགས་ཤིང་ཕྲན་གྱིས་སྐད་ཆ་འདི་ལྟར་བཤད་ཚེ་མི་མང་པོ་ཞིག་ལ་དེ་དོན་གྱི་དྲི་བ་རང་བཞིན་སླེབས་ངེས་ཤིང་། ཁོ་བོས་གནད་དོན་འདི་དག་ལ་འགྲེལ་བཤད་བྱ་སྐབས་དེའི་སྐོར་གྱི་དྲི་བ་མང་དུ་སླེབས་ཀྱང་མང་བ་དོགས་ནས་བཀོད་མེད། ཞིབ་མོ་དཔྱད་ན་རྗོའུ་ཆོས་ལུགས་དང་ནང་ཆོས་གཉིས་ནི་ཆོས་ལུགས་ཡིན་པ་འདྲ་ཡང་ཞིབ་ཏུ་ལྟས་ན་མི་མཐུན་པ་མང་དུ་ཡོད། གཙོ་བོ་ཞིག་ནི་རྗོའུ་ཆོགས་ལུགས་ཀྱི་མི་རིགས་དེའི་ངོ་བོའི་ཁོ་ན་མཚོན་ཞིང་དེ་ལས་ལྷག་གི་རྒྱོའུ་མི་རིགས་རྣམས་གཅིག་བསྡུ་བྱེད་ཀྱི་ཐ་སྙད་ཅིག་མེད་ཀྱང་ཨེ་སི་རལ་གྱི་རྒྱལ་ཁབ་བཙུགས་སྐབས་ཆོས་མིང་ཡུལ་ལ་བཏགས་ན་མི་འོངས་བ་མཐོང་ནས་མ་བཏགས་པ་མ་ཟད། རྒྱོའུ་ཆོས་ལུགས་ཀྱིས་བོད་ཀྱི་ནང་ཆོས་ལྟར་དྲག་ཤུགས་དང་དཔལ་འབྱོར་ལ་མི་གནོད་པ་མ་ཟད་མི་འབོར་འཕེལ་རྒྱལ་ལ་དེ་བས་མི་གནོད་པས་དེ་གཉིས་བསྡུར་བ་ནི་ཞྭ་དང་ལྷམ་གཉིས་བསྡུར་བའི་དཔེ་ལས་མ་འདས། ལྷག་པར་དུ་བོད་ལ་མི་རིགས་ཀྱི་ངོ་བོ་མཚོན་བྱེད་དང་གཅིག་སྒྲིལ་བཟོ་བྱེད་ཀྱི་”བོད”ཅེས་བའི་ཀྱི་ཚིག་འདི་ཡོད་བཞིན་དུ་ནང་བསྟན་གྱི་ངོ་བོར་བཙན་ཤུགས་ཀྱིས་འགྲེལ་དགོས་དོན་མེད་དེ། བོད་ཅེས་བའི་ཚིག་འདི་ལས་ལྷག་གི་བོད་མི་རྣམས་གཅིག་སྒྲིལ་བཟོ་བྱེད་ཀྱི་ཐ་སྙད་ཅིག་མེད་པས་སོ། མེད་དེ། ནང་བསྟན་ཟེར་ན་བོད་མི་རིགས་ལ་མི་གོ་བ་ནི་ཀ་ཁ་རེད།
རྒྱོའུ་ཆོས་ལུགས་པས་རྒྱོའུ་ཆོས་ལུགས་ལ་ཁ་མི་བཏང་གསུངས་བ་ནི་དངོས་ཡོད་དང་བར་ཐག་རིང་ཞིང་འཛམ་གླིང་དམག་ཆེན་དང་པོ་དང་གཉིས་པའི་སྐབས་སུ་རྒྱོའུ་ཤིས་མི་རིགས་ས་ཡ་མང་པོ་དཀའ་ངལ་དང་མནར་གཅོད་ཕོགས་པའི་ཉེར་ལེན་གྱིས་ཆོས་ལུགས་ཀྱི་སྡོམ་ཚིག་མང་པོ་དངོས་ཡོད་ཀྱིས་གྲོལ་ནས་རྒྱོའུ་ཤིས་ཁྲི་སྟོང་མང་པོ་ཆོས་མེད་རིང་ལུགས་དང་ཆོས་ལུགས་གཞན་ལ་སྐྱབས་འཛིན་རིང་ལུགས་པ་གྱུར་ཡོད། དེ་དག་ལས་དཔེ་མཚོན་ལེགས་ཤོས་ཤིག་ནི་མཛམ་གླིང་གི་ཚན་རིག་གི་དད་དཔོན་ཨེན་སི་ཐན་ཡིན་ཞིང་ཁོང་ནི་རྒྱོའུ་མི་རིགས་ཡིན་ཡང་རྒྱོའུ་ཆོས་ལུགས་ཀྱི་འཇིག་རྟེན་བཀོད་པ་པོ་དཀོན་མཆོག་ལ་ཡིད་ཆེས་མེད་ཅེས་གསུངས་ཡོད། ཁོང་ནི་རྒྱོའུ་མི་རིགས་ཀྱི་བླ་སྲོག་དང་ཨེ་སི་རལ་རང་བཙན་གྱི་རྒྱལ་ཁབ་ཐོབ་པར་རྒྱལ་པོ་ཡིན་ཡང་ཁོང་གིས་རང་གི་ཆོས་ལུགས་ལ་མཐོང་ཆེན་གནང་མེད། དེ་འདྲའི་དཔེ་བརྗོད་བརྒྱ་ཕྲག་མང་པོ་ཡོད་ཀྱང་དེ་ནི་ཉིད་ཀྱི་དོགས་པ་དཔེ་བརྗོད་ཡག་ཤོས་ཤིག་རེད་སྙམ།
གཞན་ཡང་ཆོས་དང་རིག་གཞུང་། སྐད་ཡིག་རྣམས་ཕན་ཚུལ་འབྲེལ་ཞིང་ཁ་བྲལ་ཐབས་མེད་པས་ངེས་བར་དུ་དངས་ལེན་བྱེད་དགོས་གསུངས་བའི་གནད་དོན་ལ་ཐད་པ་མེད་དེ། དེ་ལྟར་བྱས་ན་འཇིག་རྟེན་འདིར་ཕན་ཚུན་མ་འབྲེལ་ཞིང་རང་སྐྱ་འཕེལ་བའི་དངོས་པོ་ཞིག་མེད་པས་ཐམས་ཅད་ལེན་དགོས་འགྱུར་བ་མ་ཟད། སྔོན་རྒྱལ་ཁབ་རྣམས་ཀྱི་གནའ་བོའི་རིག་གཞུང་ཡང་ཆོས་དང་འབྲེལ་བས་གཞུང་གི་སློབ་གཞིའི་ངོས་སུ་ཆོས་ལུགས་བཀག་དགོས་དོན་མེད་ཀྱང་ཁྲིམས་ལུགས་ཀྱིས་བཀག་སྡོམ་བྱེད་ཡོད་པའི་གནས་ཚུལ་གོང་བཀོད་ལྟར་ཡིན།
དྲ་གྲོགས་ཨ་ནུ་ལགས།
ཁྱེད་ཀྱིས་རྩོམ་དེ་བམ་ཀློག་ཅིག་པ་ལས་མཆན་རྣམས་ཀློག་ཁོམ་མ་བྱུང་། འོན་ཀྱང་ཁྱེད་ཀྱིས་བྲིས་པས་དེ་ད་རྒྱུ་མཚན་མཐོང་གིན་ཡོད་ཀྱང་། ང་ཚོའི་སྤྱི་ཚོགས་འདི་ད་རུང་དེ་འདྲ་སྨྲ་བའི་དུས་ལ་བབ་མེད་པའམ། སྨྲས་པས་ལམ་ལོན་པའི་ཚོད་ལ་སླེབས་མེད་པར་སྙམ། རེ་འགས་ཆོས་ལུགས་དང་བཟང་སྤྱོད་གཅིག་པར་འགྲེལ་བ་དེས་ཆོས་ལུགས་མེད་ན་འཚོ་མི་ཐུབ་པར་བསམ་གྱིན་ཡོད་པ་ལས་དོན་དུ་ཆོས་ལུགས་དང་འཚོ་བ་གཅིག་ཤོས་མེད་ན་གཅིག་མེད་པའི་འགྲེལ་བ་ཞིག་མེད།
ང་ཚོའི་ཆོས་ལུགས་ཀྱིས་ཇི་ལྟར་འཆད་པ་དཔེ་མཚོན་ཙམ་བཀོད་ན། སྲིད་པ་མཐའ་དག་ལ་སྐྱོ་བ་བསྐྱེད་ནས་སྲིད་པ་ལས་གྲོལ་བའི་ཐར་བ་རང་གི་དོན་དུ་ཐོབ་བྱས་ཏེ། ་ཞེས་དང་། སྲིད་པའི་བདེ་ལ་མ་ཆགས་ཤིང་། །སྡིག་པའི་ལས་ལས་ལྡོག་བདག་ཉིད །ཞེས་སོགས་སྲིད་པའི་བདེ་ལ་རྒྱབ་ཕྱོགས་དགོས་པའི་དམིགས་ཡུལ་དེ་ཆེས་གལ་ཆེ་ཤོས་སུ་འཛིན་བཟུང་ཡོད། འོན་ཀྱང་ཡེ་ཤེས་དང་རྗིའུ། ཁ་ཆེ་སོགས་ཀྱི་ཆོས་གཞུང་ལས་ཇི་ལྟར་འཆད་ཀྱི་ཡོད་པ་ངའི་མ་ཤེས། དངོས་སུ་ཁས་ལེན་དགོས་པ་ནི། ཆོས་ལུགས་ཀྱི་ཤུགས་རྐྱེན་ཅི་ཙམ་ཆེ་བ་དེ་ཚོད་ཀྱིས ། དཔལ་འབྱོར་དང་ལག་རྩལ་རྗེས་ལུས། ཡིན་པ་མ་ཟད། ས་ཁུལ་དང་སྤྱི་ཚོགས་གང་ཡིན་ཡང་བདེ་འཇགས་ཀྱི་རྣམ་པ་དམིགས་ཤིག་མཐོང་རྒྱུ་མེད་ཁར་ས་ཁུལ་འགའ་ཞིག་ཏུ་འཁོན་འཁྲིགས་དང་ཟང་ཟིང་གི་རྣམ་པ་མངོན་གསལ་ཡིན་པ་སུས་ཀྱང་བསྙོན་དུ་མེད།
དོན་གནད་འདིའི་ཐད་༼ idealistic༽་སེམས་གཙོ་དང་༼realistic ༽་དངོས་གཙོའི་ཁྱད་པར་སྟེ། སེམས་སྔོན་དུ་འགྲོ་བ་ཅན་གྱི་བྱ་དངོས་གང་ཞིག་ཡིན་རུང་སེམས་མ་དུལ་བའི་དབང་གིས་སྡུག་བསྔལ་བརྒྱུད་མར་མྱོང་ལུགས་འདི་ཐར་བ་འདོད་པའི་གང་ཟག་ལ་གཞིར་བཞག་ནས་བཤད་པ་ཡིན། ཐར་བ་མི་འདོད་པའི་གང་ཟག་ལ་བཤད་པ་མིན། །ལམ་རིམ་མཇུག་རྩོམ་དུ། ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང་།།ཞེས་དང་། སྲིད་པའི་བདེ་ལ་མ་ཆགས་ཤིང་། །སྡིག་པའི་ལས་ལས་ལྡོག་བདག་ཉིད། ཅེས་པའི་དགོངས་པ་ཡིན། དངོས་གཙོ་ནི་དཔལ་འབྱོར་དང་ལག་རྩལ་གཅིག་བུ་མིན་པར་སེམས་གཙོ་དང་འབྲེལ་ནས་ཡོད་པ་སྟེ། འཛམ་གླིང་གི་ཡར་ཐོན་ཅན་མང་པོ་ཞིག་ལ་སེམས་ཀྱི་དཀའ་ངལ་དང་དོན་མེད་ཀྱིས་མི་གསོད་པ་སོགས་སེམས་མ་དུལ་བའི་དབང་གིས་སྤྱི་ཚོགས་བརྡབ་གསིག་གཏོང་བ་དང་། སྤྱི་ཚོགས་ཞབས་འདེགས་ཀྱི་ལས་རིགས་གཉེར་བ་ཚང་མ་ནང་གི་ཀུན་སློང་གལ་ཆེན་ཡིན་པ་ནི་དངོས་གཙོ་དང་འབྲེལ་བའི་བདེ་འཇགས་ལ་ཐུག་ཡོད།
ཨ་མཆོག་འཇམ་དཔལ་གྱིས་གསུངས་བ་བདེན་པ་རེད། དྲ་གྲོགས་ཁ་ཤས་ཀྱིས་ཆོས་ལུགས་མེད་ན་བཟང་སྤྱོད་མེད་པ་འདོད་ཀྱི་ཡོད་ཀྱང་དེ་ནི་ད་ལྟའི་ཚན་རིག་མཁས་བ་དང་བསམ་བློ་པ་དག་གི་དགོངས་ཚུལ་རྣལ་མ་མ་རྟོགས་པའི་སྐྱོན་དུ་རེད་ལ། ཆོས་མེད་རིང་ལུགས་ཀྱི་གྲོགས་པོ་ཡག་པོ་དང་མ་འཕྲད་པའི་སྐྱོན་དེ་བས་རེད། ཕྲན་གྱིས་ཀྱང་དེ་སྔོན་ཆོས་ལུགས་ཁས་མི་ལེན་མཁན་གྱི་མི་རྣམས་ནི་ཡ་རབས་སྤྱོད་བཟང་དང་བྲལ་ཞིང་སྙིང་རྗེ་མེད་མཁན་ཞིག་རེད་སྙམ་ཡང་དོན་དོན་དེ་ལས་ལྡོག་ཕྱོགས་རེད། ཆོས་ལུགས་ཁས་མི་ལེན་གྱི་མི་ལ་མཆོག་དམན་དང་བཟང་ངན་གྱི་དབྱེ་བ་དེ་ཙམ་མེད་པ་མ་ཟད། ལྟ་གྲུབ་གང་ཞིག་ཡིན་ཡང་སོ་སོའི་ཁམས་དང་མཐུན་ཞིང་རྒྱུ་མཚན་མཐོང་ན་ཤེས་ཡོན་ཏུ་འདོད་ནས་ལེན་རྐྱང་རེད་ལ། ཚོད་ལྟའི་ཆེད་དུ་གང་ཐུབ་ཀྱིས་སྦྱང་བའམ་དོ་སྣང་བྱེད་རྐྱང་རེད། འོན་ཀྱང་། ཆོས་ལུགས་པ་ཞིག་ལ་མཚོན་ན་རང་ཉིད་མོས་སའི་ཆོས་ལུགས་དེ་ཡི་བཀའ་དགོངས་སམ་དེ་མཐུན་གྱི་ལྟ་གྲུབ་ཁས་ལེན་བྱེད་རྒྱུ་ལས་གཞན་གྱི་ལྟ་གྲུབ་ཁས་ལེན་བྱེད་རྒྱུ་ཁག་པོ་རེད།
སྟོང་ལོ་གསར་བའི་འཇིག་རྟེན་གྱི་མི་ཆོས་ལས་གོང་ས་མཆོག་གིས་་་་ཡ་རབས་སྤྱོད་བཟང་ནི་ཆོས་ལུགས་ག་གེ་མོ་ཞིག་གི་སྟེང་ནས་དར་སྤེལ་བཏང་བ་ལས་འཇིག་རྟེན་གྱི་མི་ཆོས་སྒང་ནས་དར་སྤེལ་བཏང་ན་ལེགས་ཞེས་གསུངས་ཡོད།
ཚན་རིག་གི་དེད་དཔོན་ཨན་ཡི་སི་ཐན་གྱིས་་་་བཟང་སྤྱོད་ནི་གདུང་སེམས་མཉམ་སྐྱེད་དང་ཤེས་ཡོན། སྤྱི་ཚོགས་ཀྱི་འབྲེལ་བ་དང་དགོས་མཁོ་བཅས་ཀྱི་སྒང་ནས་དར་སྤེལ་བཏང་རྒྱུ་ལས་ཆོས་ལུགས་ཀྱིས་དར་སྤེལ་རྒྱུ་གནད་དུ་མ་མཐོང་ཞེས་གསུངས་ཡོད། ཁོང་ནི14, 3, 1879-18, 4, 1955 བར་གྱི་མི་ཞིག་ཡིན།