རྔ་བ་ཀུན་བཟང་སྒྲོལ་མ།
ང་དགུའི་སྔོན་གྱི་ཁ་བའི་ལྗོངས་འདིར།།
བདེ་སྐྱིད་ཉིན་མ་ཀུན་ནས་འཕྲོ་བས།།
ཆོས་ལྡན་གངས་ལྗོངས་བྷོ་ཏའི་ཡུལ་ཞེས།།
འཛམ་གླིང་སུམ་གཉིས་ཁྱོན་ལ་གྲགས་སོང་།།
འོན་ཏེ་དུས་ངན་རླུང་ནག་འཚུབ་པས།།
ཁ་བའི་བདེ་སྐྱིད་ཉི་མ་ནུབ་ཐལ།།
ཤ་ཁྲག་གཅིག་པའི་སྤུན་ཟླས་སྡུག་ཡུས།།
དམར་པོ་མེ་ལྕེའི་རྩེ་ནས་བུད་ཐལ།།
མགོ་ནག་ས་ཡ་དྲུག་གི་བདེ་སྡུག།
གཅེས་སྲོག་རང་ལུས་མེ་ལྕེའི་རྩེ་ནས།།
དལ་འབྱོར་མི་ལུས་འཐོབ་པར་དཀའ་ཡང།།
འཕངས་མེད་དཔའ་བོས་སྐད་ཅིག་བསྲེགས་ཐལ།།
བླ་མ་སངས་རྒྱས་སེམས་དཔའ་རྣམ་གསུམ།།
ཁ་བའི་དཔའ་བོས་རང་ལུས་བསྲེགས་ཐལ།།
མཐོ་སྒང་བོད་ཀྱི་མཛེས་སྡུག་ཡལ་སོང།།
སྐྱབས་གསུམ་ཐུགས་རྗེས་གཟིགས་པ་མ་ཆུང་།།
སྐྱབས་གནས་དཀོན་མཆོག་གསུམ་དང་ཡི་དམ།།
སྲུང་མ་མཐུ་རྩལ་ཆེ་བ་བདེན་ན།།
བོད་མི་ས་ཡ་དྲུག་པོ་རྫོགས་ཐལ།།
གནས་མཆོག་ཁ་བ་ཁྲག་གིས་བརྫིས་སོང་།།
ཁྱོད་ལ་སྐྱབས་པའི་རེ་བ་རྫོགས་ཐལ།།
ཁྱོད་ལ་གསོ་པའི་ཡུ་ག་བཞུད་སོང་།།
སྔོན་བྱོན་བདེན་པའི་བཀའ་ལུང་ཡོད་ན།།
མཐུ་རྩལ་ནུས་པའི་དུས་ལ་སླེབས་འདུག།
འཛམ་གླིང་མི་ལ་མིག་ཅིག་ཡོད་ན།།
ཉམ་ཆུང་གངས་ཅན་བོད་མིར་གཟིགས་དང།།
དཔའ་བོ་ང་གཅིག་རང་ལུས་འབར་བ།།
ས་ཡ་དྲུག་གི་བདེན་པའི་ངར་སྐད།།
ཨེ་མ་བདག་གིས་འགྲིམ་ལམ་ཡངས་པོར།།
སྙན་པའི་ཚིག་འགར་འགོག་མེད་ཤོར་ཐལ།།
བདག་མེད་ས་ཡ་དྲུག་གི་མཆི་གསོན།།
དུས་ལ་སླེབས་སོ་སྤུན་ཟླས་ཉོན་ཅིག།
༢༠༡༢ ལོའི་སྤྱི་ཟླ ༩ ཚེས་ཉིན་བྲིས།
ཧ་ཅང་གི་སྙན་མོ་འདུག། གལ་སྲིད་ཁྱོད་རང་བུད་མེད་སྨྱུག་ཐོག་པ་ཞིག་ཡིན་ན་དངོས་གནས་ཡག་པོ་འདུག། མུ་མཐུད་དུ་ཡིན་ད་ཨ་མའི་བུ་མོ
ཧ་ཅང་སྙན་མོ་འདུག།
ཤིན་ཏུ་ལེགས། ལྷག་པར་དུ་མོ་རང་ལོ་མང་པོའི་རིང་ཕྱུགས་རྫི་ཞིག་ཡིན་པ་དང་། ༢༠༠༦ ལོར་གཞི་ནས་ཀ་ཁའི་སྦྱོར་ཀློག་མགོ་རྩོམ་མཁན་ཞིག་ཡིན་པའི་ལོ་རྒྱུས་ཤེས་མཁན་ཞིག་ཡིན་ཕྱིན་དེ་བས་ཀྱང་སྙན་ངག་གི་རོ་བྲོ་སྨྲ་མི་ཤེས་པ་ཞིག་མྱོང་ཐུབ། མུ་མཐུད་ཅིག སྤོབས་པ་བསྐྱེད་ཅིག