—ཕ་ཡུལ་དུ་ཁ་བརྡ་ཞིག་བྱས་རྗེས།
རླུང་བུ།
འདི་ནས་ལྷོ་ཕྱོགས་ཀྱི་ཡུལ་ན།།མ་འདྲིས་ཨ་ཇོ་ཞིག་ཡོད་ཅིང་།།
ཨ་ཇོ་ས་མཐའ་ལ་ཕྱིན་ནས།།ལོ་ཟླ་གང་མང་ཞིག་འགོར་ཟེར།།
ཨ་ཕའི་ཀི་གསུམ་གྱི་མགོ་མ།།ཨ་མའི་འོ་མཆོད་ཀྱི་ཐོག་མ།།
ཨ་ཇོའི་སྐྱེས་ལྷ་ལ་བོས་ནས།།གེགས་དང་བར་ཆད་ལས་སྐྱོབ་ཟེར།།
མཚར་སྡུག་མེ་ཏོག་གི་ལང་ཚོ།།དྲུག་ཅུའི་ལོ་རྒན་གྱིས་བཅོམ་ཡང།།
མ་ཎི་གྲངས་གསོག་གི་ལས་འདི།།ཨ་ཇོའི་ཞབས་བརྟན་རང་ཡིན་ཟེར།།
སྟག་རྩལ་འབྲོང་སྙིང་གི་ཕོ་རྒོད།།གསར་སྐྱེས་མེ་ཏོག་གི་སྨན་ཤར།།
ཨ་ཇོའི་བཀའ་གསུང་ཞིག་ཡིན་ཕྱིན།།ཅི་ནུས་འགན་ཁུར་གྱིས་བསྒྲུབ་ཟེར།།
ཀ་ཁའི་ཡིག་ཕྲེང་གི་སྣེ་མོ།།བེའུ་ལུག་རྩེད་མཚར་ལ་མཐུད་པའི།།
ལོ་ཆུང་སློབ་ཆུང་གི་ཚོགས་ཀྱང།།ཨ་ཇོའི་གཏམ་རྒྱུད་ལ་འཁྲེང་འདུག།།
དབེན་དགོན་ཆུང་ཆུང་གི་བཙུན་པ།།ཕྱི་གཙང་ནང་གཙང་གི་རྣམ་ཐར།།
ཨ་ཇོའི་སྐྱིད་སྡུག་གི་བྱུང་བ།།མིག་ཆུའི་ཕྲེང་ཐག་ལ་བརྒྱུས་ཡོང།།
ནམ་ཟླ་དཔྱིད་དཔལ་གྱི་རྒྱལ་མོ།།རླུང་ནག་འཚུབ་མ་དང་འགྲོགས་ནས།།
སྐྱོ་བའི་ཤུགས་རིང་དེ་གྱེར་དུས།།ཨ་ཇོ་ཐོལ་ཐོལ་དུ་དྲན་ཟེར།།
ལྡེམ་ལྡེམ་འཁྲི་ཤིང་གི་ཡལ་ག།།དམར་ཆུང་ཁུ་བྱུག་གིས་བསྒུལ་ཏེ།།
དབྱར་གྱི་དཔལ་མོ་དེ་འབོད་དུས།།ཨ་ཇོ་གསལ་གསལ་དུ་དྲན་ཟེར།།
གསེར་མདོག་ཞིང་ཁ་ཡི་འབྲས་བཟང།།རོང་མོའི་ཞིང་གླུ་དང་ལྷན་ཅིག།།
སྟོན་རླུང་བསིལ་བསིལ་གྱིས་སྐྱོམ་དུས།།ཨ་ཇོ་ཡང་ཡང་དུ་དྲན་ཟེར།།
སྣོད་དེ་འཁྱགས་པ་ཡིས་བསྡམས་དུས།།བཅུད་དེ་ཁ་བ་ཡིས་མནན་དུས།།
གྲང་འཁྱགས་བུ་ཡུག་གི་གདོང་ནས།།ཨ་ཇོ་དྲན་ཚོད་ཅིག་མེད་ཟེར།།
ཨ་ཇོ་དྲན་རབས་ཤིག་གླེང་ན།།སྐུ་དྲག་ལོ་རྒྱུས་ལས་རིང་ང།།
ད་ལྟ་དེ་ཙམ་ཞིག་བྱས་ནས།།མི་རིང་མཇལ་འཛོམས་ལ་སྒུག་ཟེར།།
མི་ལུས་རིན་ཆེན་ཞིག་ཡིན་པའི།།གཏམ་རྒྱུད་ཡང་ཡང་དུ་གོ་ཡང།།
ཨ་ཇོར་མཇལ་འཛོམས་ཤིག་མེད་ན།།རིན་གོ་ཆོད་པ་དེ་མི་འདུག།།
ཨ་ཇོར་མ་འདྲེས་ཀྱང་འགྲིག་ག།།ལས་དང་སྨོན་ལམ་གྱིས་སྦྲེལ་ཡོད།།
ཨ་ཇོ་མ་མཐོང་ཡང་ཆོག་ག།།ཐུགས་དང་སེམས་པ་དེ་འདྲེས་ཡོད།།
མ་བསྐུལ་སེམས་ཁོང་ནས་བརྡོལ་བྱུང།།མ་བཅོས་མགྲིན་པ་ལས་བབས་སོང་།།
ཐོལ་བྱུང་སྙན་ངག་གི་མཆོད་པ།།ཚིག་གི་མཆོད་སྟེགས་ལ་བཏེགས་ཡོད།།