མེ་ཡིས་སྦར་བའི་ ་་་ ་་་ ་ཕུ་ནུ་མིང་སྲིང་ཚོ་དྲན་པ།

རེབ་ཐོག་མདའ།

མཉམ་འབྲེལ་རྒྱལ་ཚོགས།

མི་བུ་ལྔ་བཅུ་མེ་རུ་བསྒྲོན་ཀྱང་ཁྱོད་ཀྱི་མིག་ཟུང་བཙུམ་ནས་གདའ།།
བྱང་ཕྱོགས་རི་བོ་མིག་ཆུས་བརླན་ཡང་ཁྱོད་རང་ད་དུང་བགད་ནས་འདུག།
དྲང་བདེན་ཟེར་བ་ཉོ་རྒྱུ་ཡོད་པའི་རྒྱལ་སྤྱིའི་ཆབ་སྲིད་སྟེགས་བུའི་སྟེང་།།
གངས་ཅན་བོད་པའི་བདེན་པའི་ངོ་རིས་མཐོང་བའི་མིག་ལྡན་ཅི་ཙམ་ཡོད།།

རྒྱ་ནག་དམར་པོའི་བཀའ་ལུང་སླེབས་ན་ཁྱོད་རང་དེ་ལྟར་སྐྲག་དོན་ཅི།།
སྒང་བ་བོད་པའི་བདེན་པར་མི་བལྟ་ཁྱོད་རང་གང་ལ་ཡིབ་ནས་ཡོད།།
ཁ་སང་བསྲེག་པའི་མི་བུའི་མེ་དེས་ས་སྒང་རིལ་མོ་སྒུལ་ན་ཡང་།།
ལུས་སྲོག་སྦར་བའི་གནས་སྟངས་འཇལ་བྱེད་དྲང་བདེན་རྒྱ་མ་གང་ན་ཡོད།།

ཨ་རི་དང་ཡུ་རོབ།

ཆབ་སྲིད་སྟེགས་བུའི་སྒང་ལ་བུད་ན་ཁྱོད་ཀྱི་ཁ་ཤོམ་གཞན་ལས་མཐོ།།
ཁེ་ཕན་མང་བའི་ཟམ་ཆེན་སྟེང་ན་ཁྱོད་ནི་ཚོང་དཔོན་རྒྱགས་པ་ཞིག།
ས་ཡ་དྲུག་གི་བདེ་སྡུག་གླེང་དུས་ཁྱོད་ཀྱིས་ལག་ཟུང་སྐུམ་བཞིན་དུ།།
ཁ་ཁོག་བར་ནས་ཚིག་མདའ་ཙམ་གྱི་་གར་ལ་ཞུགས་འདི་ཅི་ཡིས་ཉེས།།

ཨ་མ་མེད་པའི་དྲྭ་ཕྲུག་དེ་ལ་ཁྱོད་ཀྱིས་སྙིང་རྗེ་མི་བྱེད་ལ།།
བུ་ཆུང་བོར་བའི་ཨ་མ་དེ་ཡི་སེམས་པ་ཁྱོད་ཀྱིས་མ་མཐོང་བས།།
རྒྱ་ཡི་གྲོང་ལ་མྱུལ་ཐེངས་རེ་ལ་ཁྱོད་ཀྱིས་ཁ་ལྕེ་བརྡར་ན་ཡང་།།
རང་ཉིད་འཚོ་བའི་སྒེར་དོན་ཆེད་དུ་བོད་པའི་བདེན་པ་བོར་ཡོད།།

རྒྱ་གར།

རྒྱལ་རབས་ལོ་རྒྱུས་ཞིབ་ཏུ་བཀླགས་ན་ཁྱོད་རང་བོད་ལ་དྲིན་ཆེན་ཡིན།།
ལོ་ངོ་དྲུག་ཅུའི་ཕྱིར་མིག་ཁྲོད་ན་ཁྱོད་རང་ཅུང་ཙམ་གཡོན་ནས་ཡོད་།།
ལྟ་བ་མཁྲེགས་བཟུང་སེམས་ལ་ཉར་བའི་དེ་རིང་ཉི་མ་ཚུན་ཆད་དུ།།
མི་འདོད་གཉའ་གནོན་གབ་ནས་སླེབས་པ་ཁྱོད་ཀྱིས་ཉོས་པའི་སྡུག་གྱོང་རེད།།

རང་བཙན་ཡིན་པའི་བདེན་དཔང་གཙང་མ་ཁྱོད་ཀྱི་ཁོག་ན་སྦྲུམ་ཡོད་ཀྱང་།།
རྒྱ་ཁོངས་ཡིན་པར་ཁས་ལེན་མཛད་པའི་ནག་ཉེས་ཞྭ་མོ་ནག་པོ་དེས།།
དྲང་བདེན་ཞིག་གི་སྣེ་ན་ལྷག་པའི་ས་ཡ་དྲུག་གི་བོད་པའི་ཚོགས།།
མེ་ལྕེ་དམར་པོ་ལུས་ལ་གྱོན་བཞིན་ཁྱོད་ལ་རེ་སྐུལ་ཞུ་བཞིན་བདའ།།

བོད།

གླང་དར་བཀྲོངས་པའི་ནག་ཉེས་དེ་ནི་གངས་ཅན་བོད་པའི་གྱོང་གུན་ཡིན།།
ཆིག་སྒྲིལ་ལག་ཟུང་རྡང་དམ་པོ་མེད་པ་ཁ་བ་རི་བའི་འཐུས་ཤོར་ཡིན།།
རྒྱབ་མདུན་མཐོང་བའི་དམ་པ་མང་པོས་མ་འོངས་བརྡ་ཞིག་བཏང་ན་ཡང་།།
སྲོལ་རྒྱུན་མཐུག་པོའི་སེམས་པ་ཅན་ཚོས་མཐོ་སྒང་རི་བོ་སྔས་སུ་བྱས།།

མ་འོངས་བོད་པའི་དར་རྒུད་བསྣོལ་བའི་ལམ་ཆེན་ཞིག་གི་བཞི་མདོ་ན།།
རེ་བའི་མིག་ཟུང་རྒྱང་ལ་བསྲིངས་པའི་ཁ་བ་བོད་པའི་ཕུ་ནུ་ཚོ།།
ཡ་ཆུང་སེམས་པ་སྡུག་གིས་ཁེངས་ཀྱང་རང་ལུས་འདོམ་གང་སྦར་བཞིན་དུ།།
རང་དབང་བོར་བའི་ཡ་ས་དྲུག་ལ་མ་འདུག་ལོངས་ཞེས་སྐུལ་གྱིན་འདུག།

བཙན་བྱོལ།

བཅུ་ཕྲག་ལྔ་ཡི་ཚེ་སྲོག་དེ་ལ་རིན་ཐང་མི་འཇོག་ངེད་ཚང་གི།།
ཉིན་མཚན་དབྱེར་མེད་སྒེར་དོན་བསམ་པའི་དམིགས་ཡུལ་ཞིག་གི་སྣེ་མོ་ན།།
ནུབ་ལ་ཕྱོགས་པའི་འདུར་རྒྱུག་ཁྲོད་ན་འགུལ་ཞིང་སྐྱོམས་པའི་ཐང་འདི་ན།།
ས་ཡ་དྲུག་གི་མདུན་ལམ་བསམ་མཁན་གངས་རིའི་བུ་ཕྲུག་ག་ཚོད་ཡོད།།

ལོ་ངོ་དུ་མའི་མེ་ལྕེ་དམར་པོས་གངས་རིའི་ཁ་དོག་བསྒྱུར་ན་ཡང་།།
དཔལ་བོ་དཔའ་མོའི་ལྷག་བསམ་དཀར་པོས་གངས་རིའི་ལས་དབང་གླེང་ན་ཡང་།།
རྡ་སའི་རི་ན་ཕ་ཡུལ་བོར་བའི་སྐྱབས་བཅོལ་མིང་གི་ཚོགས་སྤྱི་ཞིག།།
གཉིད་དུ་ཡུར་བའི་གཏམ་རྒྱུད་དེ་ལ་མགོ་སེར་བུ་མོ་ཧད་དེ་འདུག།།

མདོ་དབུས་ཁམས་གསུམ་སྦར་ནས་སོང་ཡང་ཕྱི་རོལ་བོད་པའི་མ་མཐོང་ཐལ།།
ཞལ་ཆེམས་དྲོན་མོ་ཕྱི་ལ་བཀྲམས་ཀྱང་བོད་ཡིག་ཀློག་འདོན་མི་ཤེས་གི།
དབྱིན་ཇི་སྦྱོང་བཞིན་བོད་སེམས་བོར་བཞིན་མི་ཚེ་ཕྱི་ན་རྫོགས་འགྲོ་བས།།
མི་རབས་ཤིག་གི་གཏམ་རྒྱུད་རིང་མོ་ང་ཚོའི་གདོང་ན་བརྐོས་ནས་འདུག།

མཇུག་བསྡུ་བ།

མགོ་ནག་སྐྱིད་སྡུག་གཞན་ལ་རེ་བའི་ཁ་བ་རི་བའི་ཕུ་ནུ་ཚོ།།
དྭ་ཕྲུག་བུ་ཡི་ངུ་སྐད་དེ་དང་སེམས་རྩ་འཁྱག་པའི་ཨ་མ་དེ།།
དམག་སྒར་ལྟ་བུའི་སློབ་གྲྭ་དེ་དང་བཙོན་ར་ལྟ་བུའི་དགོན་པ་དེ།།
ཉི་ཟླའི་འོད་སྣང་སླར་ཡང་འཆར་བའི་སྨོན་ལམ་ཞིག་གི་ཕ་རོལ་ནས།།
ཀ་ཁ་སུམ་ཅུའི་ཤི་གསོན་གླེང་བཞིན་བོད་པའི་ངོ་བོ་མ་བོར་ཅིག།

ཕྱི་ལོ་ ༢༠༡༢ ལོའི་ ༡༠ ཚེས་ ༤ ལ་རི་ཁ་བ་ཅན་གི་དཔའ་བོ་དཔའ་མོ་དག་ལ་གདུང་སེམས་མཉམ་བསྐྱེད་ ཆེད་རྡ་སའི་རི་གྲོང་ནས།