སྤོབས་པ་མཐའ་ཡས།
པེ་ཅིང་ཨོ་ལེམ་པིག་གི་རྩེད་འགྲན་གྲ་སྒྲིག་ནི་རྩེད་འགྲན་ཆེན་པོ་ཞིག་གྲ་སྒྲིག་བྱེད་བཞིན་པ་མི་འདྲ་བར་དམག་འཁྲུག་ཆེན་པོ་ཞིག་གྲ་སྒྲིག་བྱེད་བཞིན་པ་དང་མཚུངས། དེ་ལོས་ཡིན། པེ་ཅིང་ཨོ་ལེམ་པིག་ནི་དམག་འཁྲུགས་ལྟ་བུའི་རྙོགས་ཟིང་ཤ་སྟག་བརྒྱུད་ནས་འོངས་པ་ཞིག་ཡིན། པེ་ཅིང་གི་དམག་འཁྲུགས་གྲ་སྒྲིག་བྱེད་བཞིན་པ་དེ་ཡང་ཨོ་ལེམ་པིག་གི་རྩེད་འགྲན་གྱི་ཆ་ཤས་ཤིག་ཡིན་གྱི་རེད། ཁོང་ཚོའི་དྲག་ཤུགས་དེ་ལི་ཡུལ་ལམ་ཤར་ཏི་ཀི་སི་ཐན་པ་ལ་ངོམ་དགོས་ལ། ཨ་རིར་གནས་དབྱུངས་བཏང་ཟིན་པའི་ལི་ཡུལ་གྱི་ཨ་མ་རྒན་མོ་ལྕམ་ར་བྷི་ཡ་ཁ་རྡེར་ལ་ངོམ་དགོས། བོད་པ་ལ་ངོམ་དགོས། རྡ་རམ་ས་ལའི་ནགས་ཁྲོད་ན་བཞུགས་པའི་དགེ་སློང་བསྟན་འཛིན་རྒྱ་མཚོ་ལ་ངོམ་དགོས། ནང་སོག་པ་ལ་ངོམ་དགོས། ད་དུང་གནམ་བདེ་སྒོ་མོའི་ཐང་གི་མཐོ་སློབ་པའི་རྣམ་ཤེས་གཅེར་བུ་ཚོར་ངོམ་དགོས། མིའི་རིགས་ཀྱི་རང་དབང་དོན་གཉེར་མཁན་གྱི་ཚོགས་སྡེ་ཚོར་ངོམ་དགོས། ལྷག་པར་ཡང་པེ་ཅིང་ཨོ་ལེམ་པིག་ལ་རྒྱབ་སྐྱོར་དང་མཉམ་ཞུགས་བྱེད་མཁན་ཚང་མ་ལ་ངོམ་པ་རེད།
སྔོན་མ་བོད་རེ་བས་ཕུང་ཟེར་སྲོལ་ཡོད་པ་བཞིན་ད་ནི་འཛམ་གླིང་གི་ང་ཡིན་ཟེར་མཁན་མང་པོ་ཡང་རེ་བས་ཕུང་སོང༌། མདངས་དགོང་བརྙན་འཕྲིན་ལས་ཕྱི་རྒྱལ་གྱི་སྐུ་མགྲོན་ཚོར་པེ་ཅིང་གིས་ཆུ་ཚོད་ཉེར་བཞིའི་རིང་ལྐོག་ལྟ་བརྙན་ལེན་འཕྲུལ་ཆས་བཙུགས་འདུག་པས་དོག་མི་བདེ་བ་འདུག་ཟེར་ནས་སྡུག་སྨྲེ་འདོན་གྱིན་འདུག རྒྱ་ནག་དམར་གཞུང་གིས་ང་ཚོར་ལོ་དང་ལོ་བསྟུད་ནས་ལྐོག་ལྟ་ཙམ་མ་ཟད་མགོ་ཐོག་ན་དབྱུག་པ་ཞིག་ཀྱང་འཕྱར་འཕྱར་ནས་བསྡད་ཡོད་རེད། དེ་དང་བསྡུར་ན་ཁྱོད་ཚོའི་དཀའ་ངལ་དེ་བདུན་ཕྲག་ཁ་ཤས་རིང་གི་ལྐོག་ལྟ་ཙམ་ཡིན་པས་བཟོད་དགོས་ངེས་རེད། དེ་ཁྱོད་ཚོའི་མི་ཚེའི་ནང་གི་ཉམས་མྱོང་རྩ་བ་ཆེན་པོ་ཞིག་ཀྱང་རེད། ཁྱེད་ཚོས་པེ་ཅིང་རྩེད་མོར་རྒྱབ་སྐྱོར་ཤུགས་ཆེར་བྱེད་སྟངས་ལ་བལྟས་ན་ཁྱེད་ཚོར་ཉམས་མྱོང་དེ་དགོས་ཀྱི་ཡོད་པ་འདྲ། གལ་སྲིད་དོག་མི་བདེ་བ་ཡོད་ན་ད་ལྟ་རང་ཚུར་ལོག་ཤོག་དང་ཁྱོད་ཚོ་རང་བཙན་ལུང་པའི་མི་ཤ་སྟག་རེད། ངས་དེ་ཁོ་རང་ཚོའི་སྡུག་གྱོང་རེད་སྙམ། ནུབ་ཕྱོགས་པ་ཚོས་རྒྱ་ནག་ལ་དམངས་གཙོའི་སྦྱོང་བརྡར་སྤྲོད་དགོས་ཟེར་ནས་ཧོང་ཁོང་རྒྱ་ནག་ལ་བཙོངས་སོང༌། བཟོ་ཚོང་གི་ཁེ་ཕན་ཡོད་ཚད་རྒྱ་ནག་ལ་སྦྱིན་སོང༌། རྒྱ་ནག་གི་གཞིས་སྤོར་བ་ས་ཁར་མི་ཤོང་བ་ནང་འདྲེན་བྱས་སོང༌། ད་ནུབ་ཕྱོགས་པ་ཚོསརྒྱ་ནག་ལ་ཨོ་ལེམ་པིག་མགྲོན་བདག་གི་གོ་སྐབས་སྤྲད་པ་དེ་སྤྲད་པ་ཐམས་ཅད་ཀྱི་ཐ་མ་ཡིན་ནམ། ད་རྗེས་སུ་གང་ཞིག་སྤྲད་རྒྱུ་ཡིན།
ཨ་མེ་རི་མངའ་སྡེ་གཅིག་སྒྲིལ་གྱི་གསང་ལས་ཁང་གིས་གྲང་དམག་སྐབས་ཨོ་རུ་སུའི་རྒྱ་སྐྱེད་འགོག་པར་རློམ་ནས་དབུས་ཤར་ཨེ་ཤ་ཡ་དང་ཨབ་གྷནགྱི་ཁ་ཆེའི་ཆོས་ལུགས་ཐལ་སྤྱོད་རིང་ལུགས་པ་ལ་རོགས་དངུལ་གྱི་ཆར་ཕབ་ཕབ་པའི་ཐ་མ་དེ་རིང་ཨ་རི་བས་དཀའ་སྡུག་གིས་བསག་བསག་པའི་དངུལ་ཡོད་ཚད་དམག་འཁྲུགས་ཀྱི་འགྲོ་སོང་ལ་བསྐྱལ་དགོས་པ་བྱུང་སོང་ནས་སྐྱོན་བརྗོད་བྱེད་མཁན་འདུག དེ་བཞིན་དམངས་གཙོ་བའི་གཞུང་སྒེར་ཚོས་རྒྱ་ནག་ལ་དམངས་གཙོའི་སྦྱོང་བརྡར་སྤྲོད་ཆེད་དུ་བཏང་བའི་འགྲོ་སོང་བཏང་བཏང་བ་དེ་དག་རྒྱ་ནག་དམར་པོའི་གཞུང་གི་དྲག་ཤུགས་དང་གདུག་རྩུབ་ལ་རྒྱབ་སྐྱོར་དང༌། གཡོ་རྒྱུ་རྫུན་སྒྲིག་གི་གོ་སྐབས་སྤྲད་པ་ཁོ་ན་ལས་མེད་སྟབས་ལྡོག་ཕྱོགས་གྲུབ་འབྲས་ཤིག་སྨིན་རྒྱུ་རེད། དེ་ལ་ཁ་གཏད་གཅོག་པའི་འགྲོ་སོང་དེ་སུས་གཏོང་རྒྱུ་ཡིན་ནམ། ཨོ་ལེམ་པིག་འཛིན་སྐྱོང་ཚོགས་པས་འགན་ཆེ་ཤོས་ཤིག་འཁུར་དགོས་ངེས་རེད།
ཨོ་ལེམ་པིག་གི་རྗེས་སུ་བོད་མི་གཙོས་པའི་རང་དབང་དོན་གཉེར་གྱི་ལས་འགུལ་སྤེལ་མཁན་ཚོར་བཟོ་ལྟ་སྤྲོད་པའི་ཨོ་ལེམ་པིག་གཉིས་པ་ཞིག་ཚུགས་རྒྱུ་རེད། དེ་དུས་ཁྱོད་ཚོ་སྔོན་ཐོན་པ་ཚོ་རྒྱ་ནག་ནང་དུ་སྐུ་མགྲོན་དུ་ཕེབས་རྒྱུ་ཡིན་ནམ་རྩེད་མོ་རྒྱང་ནསལྟ་རྒྱུ་ཡིན། ངས་བསམ་ན་ཁྱེད་ཚོས་རྒྱང་ནས་རྩེད་མོ་ལྟ་རྒྱུ་རེད་སྙམ། ཁ་སང་པེ་ཅིང་གི་ཟ་ཁང་ཞབས་ཞུ་བ་ཞིག་གིས་ངའི་ཟས་སྣ་ཐོ་དེབ་ནི་སྤྱན་གཟིགས་སེམས་ཅན་གླིང་ཁ་ཞིག་ཡིན་ཞེས་ཕྱི་རྒྱལ་གྱི་སྐུ་མགྲོན་ཚོར་ངོམ་ངོམ་བྱེད་ཀྱིན་འདུག་ཟེར། དེ་བཞིན་ད་ལྟའི་ཨོ་ལེམ་པིག་གི་རྗེས་སུ་འབྱུང་རྒྱུའི་ཨོ་ལེམ་པིག་གཉིས་པ་དེའི་སྐབས་ཀྱི་ཟས་སྣ་ཐོ་དེབ་དེ་ཤར་ཏིར་ཀི་སིཐན་པ་དང་བོད་པ་གཉིས་གཙོས་པའི་རང་དབང་དོན་གཉེར་མཁན་གྱི་མིའི་གླིང་ཁ་ཞིག་ཡིན་ངེས་རེད། དེའི་སྐུ་མགྲོན་ལ་རྒྱ་དམར་དྲག་དཔུང་མ་གཏོགས་ཁྱོད་ཚོ་ཕེབས་འདོད་ཀྱང་ཕེབས་ག་ལ་ཐུབ།
hey guys!!!!
i am really happy to see and read this site. never give up!!!!