དཀོན་མཆོག་གསུམ།
དགེ་འདུན་དཀོན་མཆོག་ནི་སྐྱེ་སྟོབས་ཀྱི་དཔལ་ཡོན་འབར་བའི་མེ་ཏོག་གི་ས་བོན་ཞིག་རེད།
ཆོས་དཀོན་མཆོག་ནི་ས་བོན་དེ་ལས་འབུས་པའི་བཀྲག་མདངས་འཚེར་བའི་ལྗང་མྱུག་ཅིག་རེད།
སངས་རྒྱས་དཀོན་མཆོག་ནི་ལྗང་མྱུག་དེའི་རྩེ་རུ་བཞད་པའི་ཡིད་དུ་འོང་བའི་མེ་ཏོག་གི་གང་བུ་ཞིག་རེད།
བདེན་པ་བཞི།
འགོག་བདེན་ནི་འཇིག་རྟེན་འདིར་འགྲན་ཟླ་དང་བྲལ་བའི་མེ་ཏོག་གི་སྐྱེད་ཚལ་ཞིག་རེད།
ལམ་བདེན་ནི་སྐྱེད་ཚལ་དེར་བགྲོད་སའི་ཀྱག་ཀྱོག་གི་ལམ་ཕྲན་ཞིག་རེད།
ཀུན ་འབྱུང་བདེན་པ་ནི་ལམ་ཕྲན་དེའི་སྟེང་དུ་ཡོད་པའི་མི་གཙང་བའི་ལྗན་ལྗིན་རེད།
སྡུག་བསྔལ་བདེན་པ་ནི་ལྗན་ལྗིན་དེ་དག་ལས་འཐུལ་བའི་དྲི་ངན་རེད།
བཀུར་འོས་རྩོམ་འབྲི་བ་ལགས
ཁྱེད་ཀྱིས་བྲིས་བ་དེ་ཆོས་ཉིད་ཀྱི་སྙན་ངག་ཡིན་མིན་མི་ཤེས་དེ། ཁྱེད་རང་གང་ལ་རྨོངས་བ་དེ་གསལ་བར་བཀོད་འདུག་
རེད་རེད། ནང་པའི་ཆོས་གཞུང་ལྟར་ན་ང་ཚོ་ཚང་མ་བདེན་བཞིའི་འཇུག་ལྡོག་ལ་རྨོངས་ནས་ད་ལྟ་བར་དུ་འཁོར་བར་འཁྱམས་པ་རེད། ང་ཚོ་ཚང་མ་རེད་ཡ།
ང་ཚོའི་གྲྭ་པ་དང་གྲྭ་ལོག་མང་པོ་ཞིག་གིས་ཀུན་རྫོབ་དང་དོན་དམ་པའི་སྐྱབས་གཉིས་དང་རྒྱུ་དང་འབྲས་བུའི་སྐྱབས་གཉིས་ཀྱི་ཁྱད་པར་དང་། བདེན་བཞིའི་མཚན་ཉིད་དང་དེའི་ཁྱད་ཆོས་མི་རྟག་སོགས་བཅུ་དྲུག་གི་གྲངས་འདྲེན་ལྟ་བུ་རེ་དང་། ཡང་བློ་གླིང་གིས་དམ་བཅའ་དེ་ལྟར་འཛིན་ན་སྒོ་མང་བས་ཐལ་བ་འདི་ལྟར་འཕེན་པའི་ཤགས་འགྱེད་རེ་བྱེད་ཐུབ་ན་ཡང་། དེ་ཙམ་ཞིག་གིས་ཐོག་མ་མེད་པའི་དུས་ནས་སྲ་ཞིང་མཁྲེགས་པར་བརྩིགས་པའི་འཁོར་བའི་མཁར་རྫོང་དེ་ལ་གཡོ་འགུལ་ཅི་ཡང་གཏོང་མ་ཐུབ་པ་རེད།