བསོད་ནམས།
དེ་རིང་སྟེ་སྤྱི་ལོ༢༠༡༢/༡༠/༡༣/ཉིན་གུང་བོད་ནང་ཆུ་ཚོད་དང་བོ་ཡོལ་ཙམ་ལ་གཙོས་དགོན་པའི་གཡས་ངོས་ཀྱི་མཆོད་རྟེན་ཉེ་སར། གཙོས་ཁ་སོག་སྡེ་དྲུག་ནང་ཚན་འབྲོང་ལྕེ་སྡེ་བའི་རྒྱལ་གཅེས་དཔའ་བོ་རྟ་མགྲིན་རྡོ་རྗེ་ཡིས་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱས་ཏེ་སྐུ་གྲོངས་འདུག ད་ལྟ་གྲྭ་མང་གིས་སྨོན་ལམ་གསུངས་ཏེ་མང་ཚོགས་ཀྱིས་འདས་པོའི་སྐུ་ཕུང་ཕ་ཡུལ་དུ་གདན་འདྲེན་བཞིན་པའི་སྒང་རེད། འདས་པོ་ཁོང་ད་ལོ་རང་ལོ་༥༧ དང་། གུང་ཐང་སྐུ་ཕྲེང་བདུན་པའི་ཡུམ་ཆེན་གྱི་ཨ་ཕ་རེད་འདུག ས་གནས་ཡུལ་མིས་བརྗོད་པ་ལྟར་ན། ད་ལྟ་གཙོས་གྲོང་ཁྱེར་དང་གཙོས་དགོན་པ་སོགས་སུ་དམག་མི་དང་ཉེན་རྟོག་པ་ཧ་ཅང་མང་བོ་བཀྲམ་སྟེ་དམ་དྲག་ཤུགས་ཆེན་བྱས་ནས་ནང་ཁུལ་དུ་ཕན་ཚུན་ལ་དྲ་བ་དང་ཁ་པར་སོགས་བརྒྱུད་དེ་འབྲེལ་བ་བྱ་རྒྱུར་ཁག་ཙམ་འདུག་ཟེར་ནས་ལན་དང་གནས་ཚུལ་སོགས་ཅི་ཡང་འབྱོར་མ་སོང་། དེ་བས་འདིའི་གཞུག་གི་གནས་ཚུལ་ཅི་བྱུང་གོ་ཐོས་སུ་མ་གྱུར་པས་ག་ལེར་འབྱོར་ན་དུས་ལྟར་གཏོང་ངེས་ཡིན།
འདི་ལོའི་ཟླ་༨པའི་ཚེས་༧ཉིན་ཡང་གཙོས་ས་གནས་འདིར། བྱིས་པ་ལོ་ཆུང་གཉིས་ཀྱི་ཨ་མ་དཔའ་མོ་སྒྲོལ་དཀར་འཚོས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཏེ་དེ་མ་ཐག་སྐུ་གྲོངས་ཡོད་པ་དང་། འདིའི་སྐབས་དགོན་པའི་དགེ་འདུན་པ་ཞིག་ལ་ཉེས་མེད་ཉེས་འཛུགས་ཀྱིས་འཛིན་བཟུང་བྱས་ཏེ་ད་ལྟ་ཡང་གློད་གྲོལ་བཏང་མེད། སྤྱིར་འདིའི་སྐོར་གྱི་གནས་ཚུལ་དང་འདས་པོ་ཁོང་མེར་སྲེག་མ་བཏང་གོང་གི་གནས་སྟངས་དང་པར་སོགས་ཁ་ཚང་ཞིག་འཚོལ་བཞིན་ཡོད་མོད། བརྒྱུད་ལམ་ཁག་གང་སར་གནས་ཚུལ་ཁ་ཚང་མིན་ལ་མ་ལྟོས་པར་སྔ་གཞུག་བརྩད་དེ་ཐོན་དང་འཐོན་བཞིན་ཡོད་པས་འདིར་བསྡུས་པ་ཞིག་བསྐུར་བ་ཡིན། རིམ་གྱིས་གནས་ཚུལ་གསར་བ་དང་ཁ་གསལ་རེག་ན་དུས་ལྟར་སྤེལ་ངེས་ཡིན།
ད་དུང་དཔའ་བོ་རྟ་མགྲིན་རྡོ་རྗེ་ལགས་ཀྱི་གནས་ཚུལ་ཞིག་འབྲི་རྒྱུ་ལུས་འདུག གཞུག་ནས་ག་ལེར་གནས་ཚུལ་གསལ་བོ་ཤེས་རྟོགས་བྱུང་བ་ལྟར་ན། ཁོང་མེར་སྲེག་གི་ནངས་མོར་དེར། ཁོང་ཁྱིམ་ནས་ཐོན་ཁར་ལག་ཏུ་འགྱིག་དམ་རྒྱ་མ་ཉི་ཤུ་ཅན་ཞིག་བཟུང་སྟེ་འབྲོང་ལྕེ་སྡེ་བ་ནས་ཐོན་སོང་ཟེར། དེ་ནས་དགོན་པར་འགྲོ་ན་ངེས་པར་དུ་གཙོས་གྲོང་ཁྱེར་བརྒྱུད་དེ་འགྲོ་དགོས་པས་གྲོང་ཁྱེར་ནང་ནས་ས་སྣུམ་ཉོས་ཏེ་གཙོས་དགོན་པའི་ནང་སོང་འདུག དགོན་པའི་ནང་ནས་མཆོད་མཇལ་བྱས་ཏེ་སྨོན་ལམ་དང་སྐྱབས་འཇུག་ཞུས་རྗེས། དགོན་པའི་གཡས་ངོས་ཀྱི་མཆོད་རྟེན་ཉེ་སར་སོང་ནས་རང་གི་གྱོན་གོས་ལེགས་པོར་བལྟབས་ཏེ། རྗེས་སུ་རང་ཉིད་ངོས་འཛིན་ཐུབ་ཆེད་ལུས་སྟེང་དུ་སྲིད་གཞུང་གིས་བཟོས་པའི་ཐོབ་ཐང་ལག་ཁྱེར་བཞག་ནས་འུ་ཚོའི་ཆེད་དམ་རང་རེའི་བོད་རྒྱལ་ཁབ་སླར་གསོའི་ཕྱིར་དུ་གཤེགས་ཟིན་པའི་རྒྱལ་གཅེས་དཔའ་བོ་དཔའ་མོ་ཚོ་རྗེས་སུ་གདོས་བཅས་ཕུང་བོ་མེ་ལྷའི་ཞལ་སྒོར་ཕུལ་ཏེ་བདེན་དོན་བསྒྲགས་ནས་སྐུ་གྲོངས་པ་དེ་རེད།
ང་ལ་འབྲེལ་བ་བྱེད་སའི་ཁ་བྱང་། shungpa_sonam@yahoo.co.inའདི་ཡིན།
བསོད་ནམས་ཀྱིས།
ཉེ་ལམ་ལྕགས་མོ་མཚོའི་ངོ་དེབ་ཐོག་ཏུ་གོང་གི་པར་དེ་དཔའ་བོ་རྟ་འགྲིན་རྡོ་རྗེ་ཡིན་མིན་གྱི་དོགས་སློང་ཞིག་འདུག་པས་འདིར་བལྟས་ཡོང་དུས་གོང་གི་སྐུ་པར་དེ་དཔའ་བོ་ཁོང་གི་པར་ཡིན་ཚོད་རེད། དེ་བཞིན་བདག་གིས་ཉེ་ལམ་ལྕགས་མོའིམཚོའི་ངོ་དེབ་ཐོག་ཏུ་སྐད་ཆ་བདེན་པར་མིན་ན་གང་བྱུང་མ་བཀོད་རོགས་ཞེས་རང་ཉིད་ཀྱིས་ཧ་གོ་ལ་མ་གོ་ལ་བྱས་ནས་གཤེ་གཤེ་བཏང་པར་དྲ་གྲོགས་ལྕགས་མོ་མཚོ་གཙོས་ཀློགས་པ་པོ་བྱིངས་ལ་དགོངས་དག་ཞུ།
དཔའ་རྒོད་ལ་གུས་འདུད་ཞུ།
རྒྱལ་གཅེས་དཔལ་པོ་རྟ་མགྲིན་རྡོ་རྫེས་མཆོག་ལསྙིང་ནས་གུས་འདུད་ཞུ།
རྒྱལ་གཅེས་དཔལ་པོ་རྟ་མགྲིན་རྡོ་རྫེས་མཆོག་ལསྙིང་ནས་གུས་འདུད་ཞུ། ད་ཡིན་ན་ང་ཚོ་ཕྱི་ལ་ཡོད་པའི་བོད་པ་ཚོའི་ག་རེ་བྱེད་།སྐད་ཆ་རེ་བཤད་རྒྱུ་མ་གཏོགས་ག་རེ་འཇོན།
བོད་ཁ་བ་ཅན་པའི་དཔའ་རྒོད་ཡ། དུས་ནམ་ཡང་མི་བརྗེད།