གླུ་ཡིས་བསུ་བའི་མྱ་ངན་དགོང་ཚོགས།

རེབ་ཐོག་མདའ།

སྡུག་གི་མགོ་བོ་གླུ་ཡིས་གནོན་པའི་མྱ་ངན་ཚོགས་འདུར་བདག་མི་ཁོམ།།
རྡོ་རིང་འཁྱེར་ནས་བསྡུ་རུབ་བྱེད་པའི་ཞལ་འདེབས་དེ་ཡང་ང་ལ་མེད།།
མིག་ཆུ་ཞིག་གི་སེམས་པ་རུམ་པའི་གངས་རིའི་ལས་དབང་འཚོལ་བཞིན་དུ།།
མེ་ལ་འཐིམ་པའི་ཕུ་ནུའི་གཞུག་ལ་ཡིག་གེ་དྲུག་མས་སྐྱེས་མ་མཆོག།

ཡ་ཁོག་དཀྱིལ་ན་སེམས་ཤིག་ཡོད་ན་ཁ་ལྕེ་བདར་ནས་གླུ་མ་ལེན།།
མཐོ་སྒང་ཞིག་གི་ལྷན་འཛོམས་བསམ་ན་རང་དོན་ཁོ་ནའི་རྗེས་མ་བསྙེགས།།
མི་བུ་ལྔ་བཅུར་དུངས་ཞེན་ཡོད་ན་མིག་ཟུང་བཙུམ་ནས་འདང་ཞིག་རྒྱོབས།།
ཁྱོ་མེད་ཨ་མའི་སྡུག་དེ་རྟོགས་ན་ཁ་སེམས་བར་ནས་མ་ཎི་བགྲོངས།།

རྡོ་ཡི་ཀ་བ་ཡར་ལ་བསླངས་ཀྱང་སྒང་བ་བོད་ལ་དགེ་ཕན་གང་།།
དགའ་བཞིན་སྤྲོ་བཞིན་གླུ་གར་འཁྲབ་ན་དཔའ་རྒོད་ཁོང་ཚོར་ཕན་ཐོགས་ཅི།།
ཞལ་འདེབས་སློང་བའི་མི་བུའི་སེམས་པའི་དཀར་ནག་ཁ་དོག་སུ་ཡིས་ཤེས།།
བདུན་བཞི་མ་འགོར་རྡ་སའི་རི་ན་གླུ་གར་རོལ་དབྱངས་འཚང་ཁ་རྒྱག།

དཔའ་བོའི་སྐུ་ལུས་མེ་ལ་འཐིམ་ཀྱང་རྣམ་ཤེས་ཚོང་རྫས་མ་བྱེད་ཅིག།
གོ་སྐབས་འཚོལ་བའི་ཁེ་ལས་པ་ཚོ་སྒེར་སྤྱི་གང་ཡིན་མི་གསལ་བས།།
ཤི་བོ་དེ་དང་གསོན་པོ་དེ་ལ་གདུང་སེམས་མཉམ་དུ་བྱེད་འདོད་ན།།
ཡབ་མེས་དམ་པའི་ཞབས་རྗེས་གཙང་མར་ནག་ནོག་དྲི་སྙིགས་མ་བྱུག་ཅིག།

གཞིས་ལུས་བོད་མིའི་རྣ་བས་གོ་ན་ཁ་གསལ་ལན་ཞིག་སུ་ཡིས་སྤྲོད།།
སྡུག་གིས་ཁེངས་པའི་ཨ་མས་ཉན་ན་འདི་ལས་ན་ཟུག་གང་ན་ཡོད།།
འཆི་གསོན་གཉི་ཀའི་དགེ་རྩ་བྱེད་པར་ལྷ་དང་བླ་མའི་མཆོད་པ་ལས།།
འཆི་བའི་རྗེས་སུ་གླུ་སྐད་སང་སང་བོད་པའི་སྲོལ་རྒྱུན་མིན་པ་འདྲ།།

ཁ་བ་བོད་ལ་དུངས་སེམས་ཡོད་ན་གསལ་བྱེད་སུམ་ཅུར་བདག་པོ་རྒྱོབས།།
འཆི་བའི་མྱི་ལ་མྱ་ངན་བྱེད་ན་སྐྱབས་མགོན་བླ་མའི་བཀའ་གསུང་བརྩིས།།
སྤུར་རྒྱལ་བུ་ཡི་ཁ་ཆེམས་ཟབ་མོ་མི་མཐོང་མི་གོ་ཕོ་རྒོད་ཚོས།།
གླུ་གཞས་འཁྲབ་པའི་ཚོགས་ར་དེ་ནས་ད་དུང་བགད་དེ་འདུག་ཐུབ་བམ།།

ཕྱི་ལོ ༢༠༡༢ ལོའི ༡༠ ཚེས ༡༩ ཉིན་དཔའ་བོ་དཔའ་མོ་དག་གི་ཆེད་དུ་འཚང་ཁ ཤིག་ཤིག་གི་འཚོག་ལ་ཉེ་བའི་མྱ་ངན་དགོང་ཚོགས་ལ།