ནོར་གླིང་ས་གནས་བོར་རིགས་སྤྱི་མཐུན་ཚོགས་པས་གོ་སྒྲིག་འོག དེ་རིང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་གཙོས་རྒྱལ་གཅེས་དཔའ་བོ་དཔའ་མོ་དག་གི་རྒྱལ་གཅེས་སྙིང་སྟོབས་ལ་གོང་བཀུར་དང་། ཁོང་རྣམས་ཀྱིས་ལུས་སྲོག་རིན་པོ་ཆེ་རྒྱལ་ཁབ་དང་མི་རིགས་ཀྱི་ཆེད་དུ་བློས་གཏོང་གནང་བར་རྗེས་དྲན་གྱི་མར་མེའི་མཆོད་སྐོར་ཞིག་གོ་སྒྲིག་ཞུས་པར། འཆི་མེད་དགའ་ཚལ་གླིང་དགོན་པ་དང་། བཙུན་དགོན་སྒྲོལ་མ་གླིང་། ནོར་གླིང་དང་འདབས་འབྲེལ་གནས་སྡོད་མི་མང་བཅས་མི་གྲངས་ལྔ་བརྒྱ་མ་ཟིན་ཙམ་འཆི་མེད་དགའ་ཚལ་གླིང་དགོན་པའི་མདུན་ཐང་དུ་འཛོམས་ནས། དགོན་པའི་གཙུག་ལག་ཁང་ལ་སྐོར་བ་བྱེད་བཞིན་བྱང་ཆུབ་སེམས་མཆོག་སྐྱོར་ཏེ་མར་མེའི་ཁྲོམ་སྐོར་བྱས་ཤིང་། ཚོགས་པའི་ཚོགས་གཙོ་ལམ་བཟང་ལགས་ཀྱིས་རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་ཀྱི་ལོ་རྒྱས་སྙིང་བསྡུས་སྙན་སྒྲོན་དང་། བོད་ནང་གི་གནས་སྟངས་ཉིན་རེ་ལས་ཉིན་རེར་ཛ་དྲག་ཇེ་ཆེར་འགྲོ་བཞིན་ཡོད་པར། ང་རང་ཚོའི་ངོས་ནས་ཀྱང་སོ་སོ་གནས་ཡུལ་གྱི་གནས་སྟངས་ལ་དཔག་པའི་མཆོད་འབུལ་དང་། རྗེས་དྲན་ལས་འགུལ་སོགས་ཀྱི་ལམ་ནས་གཞིས་ལུས་རྒྱ་ཆེའི་མི་མང་ལ་གདུང་སེམས་མཉམ་བསྐྱེད་བྱེད་དགོས་པ་ནི་ལས་འགན་ཞིག་ཆགས་ཀྱི་ཡོད་པའི་ཆ་ནས། ནོར་གླིང་དང་ས་གནས་མི་མང་ཚང་མ་ངེས་པར་ལས་འགུལ་རིགས་ལ་མཉམ་ཞུགས་ཡོང་བ་ནས། ནོར་གླིང་གི་ལས་ཀྱི་སྣེ་མོ་བ་ཚང་མ་མཉམ་ཞུགས་བྱེད་དགོས་པའི་འབོད་སྐུལ་ཡང་བྱས། མཇུག་ཏུ་སྐར་མ་གཅིག་རིང་ངག་བཅད་མྱ་ངན་དང་། ཚད་མེད་ཡོན་ཏན་གདངས་སུ་དྲངས་ནས་་སྐྱོར་འདོན། བོད་རྒྱལ་ཁབ་ཆེན་པོའི་རྒྱལ་གླུ་གཏོང་བ་བཅས་ཀྱི་ལམ་ནས་དེ་རིང་གི་ལས་འགུལ་མཇུག་སྒྲིལ་ཞུས་ཡོད།
ནོར་གླིང་ས་གནས་བོད་རིགས་སྤྱི་མཐུན་ཚོགས་པས།
ཕྱི་ལོ་༢༠༡༢་ཟླ་༡༠་ཚེས་༢༣་ཉིན།
