རྒྱུ་ཡོད་ན་ཨ་ཕ་དཀར་ཡོལ་རེད། རྒྱུ་མེད་ན་དཀར་ཡོལ་ཁ་ཆག་རེད།

ནམ་མཁའ།

དུས་རབས་གཉིས་ཀྱི་ལག་དམར་ཧོའུ་ཅིན་ཐའོ་ཡིས་ལོ་བཅུ་ཡི་གདུག་རྩུབ་ལ། བོད་ཕྱི་ནང་གཉིས་ནས་དཔའ་ཞུམ་པའི་ལྡོག་ཕྱོགས་ལས་སྙིང་སྟོབས་ཀྱི་མེ་ལྕེ་བསྟུད་མར་ཁ་སང་འབར་ལ་། དེ་རིང་ཡང་འབར། སང་ཉིན་ཡང་འབར་ངེས་མོད། འོན་ཀྱང་འཛམ་གླིང་གི་གསར་འགོད་པ་དང་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱིས་བོད་ནང་གི་གནས་ཚུལ་དག་ནམ་ཡང་མུན་ནག་གི་དབྱིངས་སུ་བསྐྱུར་ཡོད། ང་ཚོ་བོད་མི་ཚོས་རང་གི་བུ་ཕྲུག་དང་ནང་མི་སྤུན་མཆེད་ཐ་ན་རང་ལུས་རིན་པོ་ཆེ་ཡང་བློས་བཏང་གིས་རང་དབང་འཐབ་རྩོད་བྱེད་བཞིན་ཡོད་ན་ཡང་། འཛམ་གླིང་སྟེང་གླེང་སློང་ཙམ་ཡང་མི་བྱེད་པར་གནས་ཚུལ་གསར་འགྱུར་ཡང་བོད་མི་རིགས་ཁོ་ནའི་ཡུལ་དུ་གྱུར་ཡོད་པ་འདི་ཅི་འདྲའི་ཡིད་སྐྱོ་བ་ཞིག་རེད་ཨང་།

སྰེ་རེ་ཡ་ཡི་མི་དམངས་ཀྱི་རང་དབང་འཐབ་རྩོད་ལ་ད་རུང་རྒྱལ་སྤྱིའི་སྟེང་ནུས་པ་ཆེན་པོ་ཞིག་ཐོན་མེད་ཀྱང་།འཛམ་གླིང་གསར་འགྱུར་ནང་རྒྱུན་ཏུ་གླེང་གི་ཡོད། གལ་སྲིད་དེ་རིང་སྰེ་རེ་ཡ་ནས་ས་སྣུམ་གྱི་ཐོན་ཁུངས་ཆེན་པོ་ཞིག་རྙེད་ཚེ། སྰེ་རེ་ཡ་ཡི་མི་དམངས་ཀྱིས་རྒྱལ་སྤྱིའི་སྟེང་རོགས་རམ་གྱི་འབོད་སྐུལ་ཞུ་མི་དགོས་བར་མ་སྐུལ་དངས་བླངས་ཀྱིས་ཨ་རི་དང་ཡོ་རུབ་གཙོ་བྱས་ཏེ་དྲག་དམག་མང་པོ་གཏོང་བ་ལ་ཐེ་ཚོམ་སུས་ཀྱང་བྱེད་མི་དགོས། ཐབས་སྐྱོ་བ་ཞིག་ལ་སྰེ་རེ་ཡ་ཡི་མི་དམངས་ཀྱི་ལས་དབང་དེ་ཡང་བོད་མིའི་ལས་དབང་དང་འདྲ་མཚུངས་ལྟ་བུ་ཞིག་ཏུ་གྱུར་ཏེ། ཁ་གཡར་ས་རྒྱ་གཞུང་དང་ར་ཤེ་ཡ་གཉིས་ཡོད་པས་རྒྱལ་སྤྱིས་རྒྱང་རིང་ཞིག་ནས་རྐུབ་སྐྱག་མཐོན་པོ་ཞིག་གི་སྟེང་ནས་བསྡད་དེ།ཉི་མ་རེ་ལ་མི་ག་ཚོད་ཞིག་གསོད་བཞིན་པ་གྲངས་ཀ་རྒྱབ་ནས་བསྡད་ཡོད། ཡིན་ཡང་རྒྱ་ནག་གི་མི་དམངས་མ་ཡིན་པའི་འཛམ་གླིང་མི་དམངས་ཀྱིས་མིག་མདུན་ལ་གསར་འགོད་པ་ཚོས་བསྟན་གྱི་ཡོད།

དེ་བས་ཀྱང་ཐབས་སྐྱོ་ཞིག་ལ། ང་ཚོ་བོད་མི་རྣམས་ཀྱི་རང་དབང་འཐབ་རྩོད་ནི་འཛམ་གླིང་མི་དམངས་ཀྱིས་མཐོང་ཐུབ་ཀྱི་མེད་པར་བོད་རང་གི་ནང་ཁུལ་གྱི་གསར་འགྱུར་ཞིག་ཏུ་གྱུར་ཡོད་སྟབས།རྒྱལ་སྤྱིའི་སྟེང་ནུས་པ་ཞིག་ནམ་ཡང་ཐོན་ཐབས་བྲལ། ང་ཚོ་བོད་མི་དམངས་འདི་འགྲོ་བ་མི་ཞིག་གི་འདུ་ཤེས་འཛམ་གླིང་ཡོད་དམ་སྙམ་པའི་དོག་པ་སྐྱེས་མཁན་ཡང་ང་ལྟ་བུ་མང་པོ་ཡོད་སྲིད། རྒྱུ་མཚན་ནི་བོད་མི་དྲུག་བཅུ་ལྷག་གིས་རང་ལུས་མེ་བསྲེགས་ཀྱི་ལས་འགུལ་སྤེལ་ཡང་ནུས་པ་ཐོན་པ་ཞིག་ཕར་བཞག འཛམ་གླིང་གི་གསར་འགྱུར་གྲལ་དུ་ཡང་མི་ཚུད་པ་འདི་རྒྱུ་མཚན་ཅི་ཡིན་ནམ།
ཁ་ཆེ་ལུང་པ་ནས་མི་གཅིག་གིས་རང་ལུས་མེ་བསྲེགས་ལ་འཛམ་གླིང་ཧ་ལས་མདོག་ཧང་མདོག་ག་ཚོད་ཞིག་བྱས་སོང་། བོད་མི་དྲུག་བཅུའི་རང་ལུས་མེ་བསྲེགས་ལ་འཛམ་གླིང་སྟེང་གི་དབང་འཛིན་པ་ཚོར་གྲགས་འགུལ་མེད་པར་མ་ཟད། ཐ་ན་གསར་འགོད་པ་ཚོས་ཀྱང་སྣང་མེད་དུ་འཇོག་དོན་ཅི་ཡིན་ནམ།
ང་ཚོ་བོད་མི་དམངས་ཀྱི་ཚེ་སྲོག་འབར་ཚེ་རྩི་ཤིང་ཞིག་འབར་བ་བཞིན་གནས་ཚུལ་ཙམ་ཡང་འཛམ་གླིང་འདིའི་མི་དམངས་ཀྱི་མིག་མདུན་ན་མི་སྟོན་པའི་རྒྱུ་མཚན་ཅི་རེད། འཛམ་གླིང་གི་གསར་འགྱུར་གྲལ་དུ་མ་ཚུད་པ་འདི་བཙན་བྱོལ་དུ་ཡོད་པའི་བོད་མི་ཚོས་ཁྱབ་བསྒྲགས་ཀྱི་ནུས་པ་ཞིག་མ་འདང་བ་ཡིན་ནམ། ཡང་ན་འཛམ་གླིང་གི་གསར་འགོད་པ་ཚོ་རྒྱ་གཞུང་གིས་ཉོས་ཚར་བ་རེད། རྒྱུ་ཡོད་ན་ཨ་ཕ་དཀར་ཡོལ་རེད། རྒྱུ་མེད་ན་དཀར་ཡོལ་ཁ་ཆག་རེད། ཟེར་བའི་གཏམ་དཔེ་འདི་ནི་ཁ་སང་དེ་རིང་གི་བོད་མི་ཚོའི་གནས་སྟངས་རང་རེད།
གང་ལྟར་འཛམ་གླིང་གི་རྒྱལ་ཁབ་སོ་སོའི་འགྲོ་སྟངས་དང་།ཁྱིམ་ཚང་ཞིག་གི་འགྲོ་ལུགས་གཅིག་མཚུངས་རེད། ཁྱིམ་ཚང་དཔལ་འབྱོར་གཉོམ་ཆུང་ཅན་ཞིག་ལ།ཁྱིམ་མཚེས་གཡས་གཡོན་གྱིས་ཁ་ནས་སྙིང་རྗེ་ལབ་ཀྱང་ཁྱིམ་ཚང་རང་གི་ནང་མི་ཚོས་སྙིང་སྟོབས་དང་ནུས་པ་ཞིག་མ་ཐོན་ཚེ་རོགས་རམ་མི་བྱེད་པ་ཐག་གིས་ཆོད་པ་བཞིན།

བོད་མི་རིགས་རང་གིས་སྙིང་སྟོབས་དང་ཆིག་སྒྲིལ་གྱིས་ནུས་པ་ཞིག་མ་ཐོན་ཚེ།རྒྱལ་ཁབ་གཞན་ཞིག་དང་མི་རིགས་གཞན་ཞིག་གིས་རོགས་པ་མི་བྱེད་པ་ཐག་གཅོད་རེད། ཡིན་ཡང་ཐབས་སྐྱོ་བ་ཞིག་ལ།
བཙན་བྱོལ་ནང་གི་མི་དམངས་དང་གཞུང་གི་བར་ན་དབུ་མའི་ལམ་དང་རང་བཙན་འཐབ་རྩོད་གཉིས་ཀྱི་དོགས་སློང་དང་འགྲེལ་བརྗོད་ལ་གོ་བརྡ་མ་འཕྲོད་པར་གྲོས་ཆོད་ནས་གྲོས་ཆོད་བཞག་སྟེ་ལུས་ཡོད། རང་ལུས་མེ་བསྲེགས་འཐབ་རྩོད་ཀྱི་ངོ་བོ་འདི་ཐབས་ལམ་གཞན་ཞིག་ལ་བསྒྱུར་ཐབས་དང་། དེའི་ཕྱོགས་སུ་བསམ་གཞིགས་ཙམ་ཡང་བྱས་མེད་པ་འདྲ། དེ་རིང་ཡང་བསྐྱར་བསམ་གཞིགས་ཞིག་བྱས་ཚེ། རང་ལུས་མེ་བསྲེགས་ལས་འགུལ་གྱི་ངོ་བོ་འདི་བོད་ཕྱི་ནང་གཉིས་ཀྱིས་བཀའ་ཁྲི་ཟུར་བ་ཟམ་གདོང་བླ་མའི་བདེན་པའི་ཨུ་ཚུགས་ཀྱི་ལམ་ཁ་ལ་འགྲོ་ཐུབ་ན་ཤིན་ཏུ་ལེགས་སྙམ། བདེན་པའི་ཨུ་ཚུགས་དེ་ཡང་འགོ་གླིང་ཚ་རྡོ་རྗེ་ཡིས་བརྩམས་ཟིན་པ་རེད། ངས་གླིང་ཚ་རྡོ་རྗེ་ཡི་འཐབ་རྩོད་དེ་བདེན་པའི་ཨུ་ཚུགས་ཀྱི་ལམ་རེད་འདོད། འོན་ཀྱང་ཟམ་གདོང་བླ་མས་དེ་བདེན་པའི་ཨུ་ཚུགས་ཞིག་ཏུ་ཁས་ལེན་མིན་མི་ཤེས། གང་ལྟར་ཀྱང་རང་ལུས་མེ་བསྲེགས་ཀྱི་འཐབ་རྩོད་འདིའི་ངོ་བོ་གཞན་ཞིག་ལ་ལམ་སྟོན་རེ་གནང་མཁན་ཡོད་ཚེ་བསམ་ཚུལ་རེ་སྤེལ་བའི་འབོད་སྐུལ་ཡང་ཞུ་བཞིན་ཡོད།
༢༣/༡༠/༢༠༡༢ལ་ཡོ་རུབ་ནས་བྲིས།