མྱི་ལྟིག
དེ་དུས་ནི་གདོད་མ་ཞིག་གཏན་ནས་མིན་ཏེ་ང་བྱིས་དུས་རེད། དེ་དུས་ནི་དབྱར་ས་དགུན་ས་ཟེར་བའི་ས་རྟགས་ཤིག་ཡོད་རབས་མི་འདུག་ལ། ཁྱོད་ས་ངའི་ས་ཟེར་བའི་ལྕགས་ར་ཞིག་ཀྱང་ཡེ་ནས་ཡོད་རབས་མེད། དེ་དུས་ནི་རྫི་བོ་ཚོ་ལྷན་དུ་འཛོམས་ཏེ་དམངས་གླུ་ཡིས་རྟ་ནོར་ལུག་གསུམ་གྱི་ཁ་ཕྱོགས་བསྒྱུར་ཞིང་། ལ་གཞས་ཀྱིས་མི་ཚེའི་གཏན་འདུན་གྱི་ཁ་ཕྱོགས་རྙེད་རབས་ཡོད། དེ་དུས་ནི་དེ་རིང་གི་སྐྱ་ཆད་ལེར་འདི་འདྲ་ཞིག་གཏན་ནས་མིན་ཏེ་རྒྱུ་མཚན་ཡོད་ཚད་ནེམ་འཁྱིལ་ལེར་ཡོད།
དེ་དུས་ནི་ཁ་སང་དེ་རིང་གི་ཕྱི་གླིང་བ་ཚོས་འཚོལ་གྱིན་པའི་མཛེས་སྡུག་དེ་ངའི་ཕ་ཡུལ་དུ་ནེམ་གྱི་ལེར་ཡོད་ལ། དེ་དུས་ནི་ངའི་སྤོ་བོ་དང་རྨོ་མོ་ཚོས་ཚ་བོ་དང་ཚ་མོ་ཚོའི་ལག་ཏུ་ལྟ་ན་སྡུག་པའི་ཡུལ་ལྗོངས་འདི་ལྗང་ལྷེམ་ལྷེམ་བཞག་པའི་ཡིད་ཆེས་ཀྱང་ཡོད་ག་ལ་མ་མྱོང་། དེ་དུས་ནི་སྦྲ་ནག་དང་སྦྲ་གུར་གྱི་མཁའ་དབུགས་ཀྱིས་ངའི་ཕུ་ནུ་ཚོའི་ལུས་སེམས་གཉིས་ལ་ནག་ནོག་གི་དྲི་མ་ཅི་ཡང་བགོས་མ་མྱོང་། དེ་དུས་ནི་ངའི་ཕུ་ནུ་མིང་སྲིོང་ཚོས་རི་ཀླུང་གི་འཚོ་བར་རོལ་ཞོར་རི་ཆུ་ཡི་གཏམ་རྒྱུད་འགོད་ཞོར་དངོས་གནས་ཞོད་འཇགས་ཡིན།
དེ་དུས་ནི་རུ་ཁ་ཁྱིམ་མཚེས་ཚོ་མགྲོན་དུ་སྐྱ་མི་དང་རྐང་ཐང་ཡིན་ཏེ་བདེ་འཇགས་ཀྱིས་བརྡབ་སྐྱོན་ངོ་མི་ཤེས་ཟེར་ཆོག དེ་དུས་ནི་ཁོ་ཚོས་རྩྭ་སའི་བཟང་ངན་དང་ཕྱུགས་ཟོག་གི་ཤ་ཤེད་མ་གཏོགས་མི་གླེང་ལ། ཁོ་ཚོས་ཞི་བདེ་བག་ཕེབས་ཀྱི་འཚོ་བ་ལས་ཅི་ཡང་ཧམ་སེམས་ཀྱིས་སྒོམ་མ་མྱོང་། དེ་དུས་ནི་ངའི་ཕ་ཡུལ་གྱི་ས་བཅུད་ཤོར་མེད་ལ་ཤྭ་འོད་དང་རང་བྱུང་གི་གནོད་འཚེ་ཡང་དེ་རིང་དང་བསྡུར་ཐབས་ག་ལ་ཡོད། དེ་དུས་ནི་ཁ་སང་དེ་རིང་གི་ངེད་ཚང་གི་རྒྱབ་རི་མགོ་རྗེན་དེའང་ནགས་ཚལ་སྟུག་པོ་སྟུག་པོ་ཞིག་ཡིན་པ་ངས་མནའ་བསྐྱལ་ཆོག
ཕྱིར་དྲན་གྱི་ཀློང་ནས་རྙེད་པའི་སྐྱོ་སེམས་དང་འཁང་ར། སྔོན་རབས་པ་ཚོའི་སྐབས་ཀྱི་ཞི་བདེ་བག་ཕེབས་ཀྱི་འཚོ་བ་ལ་ཡིད་སྨོན་སྐྱེས་ཤིང་ད་ལྟའི་འཐེན་འཁྱེར་ཕྱོགས་ལྷུང་དང་ཐུབ་ཚོད་ཚད་མེད་སོགས་ཀྱི་གནས་བབ་ལ་ཁོ་ཆད་ཀྱིས་ས་མཐར་ལྷུང་བའི་ཁྱོད་ཀྱི་ཕྱིར་དྲན་དེ་ནམ་ཡང་ཕྱིར་ལྡོག་མེད། འདི་ནི་དུས་ཚོད་ཀྱིས་སྤྲད་པའི་ཕམ་ཁ་མིན་པར་གནས་བབ་ཀྱིས་སྤྲད་པའི་ཕམ་ཁ་ཡིན།