མཁོ་སྤྲོད་པ། ཨ་རིག་འགྱུར་མེད།
ཟླ་སྔོན་མའི་ཕྱི་ཚེས་ ༢༨ ཉིན་ནས་ཟླ་འདིའི་ཚེས་ ༤ ཉིན་བར་ཏེ་ཉིན་བརྒྱད་རིང་ཝ་ཎ་མཐོ་སློབ་ཏུ་ཤེས་རིག་ལས་ཁུངས་ཀྱིས་གོ་སྒྲིག་འོག སྒྲིག་ཞུགས་མིན་པའི་ཉམས་ཞིབ་སློབ་མ་རྣམས་ལ་ “ཉམས་ཞིབ་གནང་ཕྱོགས་དང་འབྲེལ་བའི་ཟབ་སྦྱོང་” སྤྲད་ཡོད་ལ། དེ་རིང་ཉིན་མཐའ་མའི་ཉིན་གྱི་བོད་ནང་གི་ཆུ་ཚོད་ ༡༠ དང་སྐར་མ་ ༢༠ སྟེང་མདོ་སྨད་རེབ་གོང་ཆུ་མ་སྡེ་བརྒྱད་ཚོ་དགུའི་ཀླུ་གཤོང་སྡེ་བའི་རྒྱལ་གཅེས་དཔའ་བོ་ལྷུན་གྲུབ་ལགས་ཀྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་པ་ཐོས་འཕྲལ། ཟབ་སྦྱོང་གི་ཚོགས་ཐུན་གཉིས་པ་མགོ་འཛུགས་སྐབས་ཐོག་མར་རྒྱལ་གཅེས་དཔའ་བོ་ཁོང་ལ་དུས་ཡུན་སྐར་མ་གཅིག་རིང་མྱ་ངན་ངག་བཅད་ཞུས། དེ་རྗེས་ཕྱི་དྲོའི་ཆུ་ཚོད་ ༤ ཙམ་ལ་ཐེངས་འདིའི་ཉིན་བརྒྱད་རིང་གི་ཟབ་སྦྱོང་མཇུག་གྲུབ་རྗེས། ཉམས་ཞིབ་པ་རྣམས་ཝ་ཎ་མཆོད་རྟེན་འགྲམ་དུ་ཕྱིན་ཏེ་མཆོད་མེ་བརྒྱ་མཆོད་གཉིས་ཕུལ་ཏེ་བསྔོ་སྨོན་སྐྱབས་འཇུག་དང་མ་ཎི་གསོག་འདོན་བྱས་པ་མ་ཟད། འཁོར་ལྔ་སྡེའི་མདུན་དུ་བརྒྱ་མཆོད་གཉིས། བོད་དགོན་པར་བརྒྱ་མཆོད་གཅིག་དང་མཆོད་འབུལ་སྨོན་ལམ་ཆེད་ཧིན་སྒོར་ ༡༠༠༠ ཕུལ་བ་བཅས། རྒྱལ་གཅེས་དཔའ་བོ་རྡོ་རྗེ་ལྷུན་གྲུབ་ལགས་ཀྱིས་བོད་མི་རིགས་དང་རྒྱལ་ཁབ་ཀྱི་ཆེད་དུ་རང་ལུས་མེར་བསྲེགས་བཏང་བར་སྟོན་པ་སངས་རྒྱས་བཅོམ་ལྡན་འདས་ཀྱིས་བདེན་བཞིའི་ཆོས་འཁོར་དང་པོ་བསྐོར་བའི་གནས་ཁྱད་པར་ཅན་འདིར་བསྔོ་སྨོན་གནང་ཡོད་འདུག
ཧ་ཅང་གི་ཡག་པོ་འདུག མུ་མཐུད་དེ་ཤུགས་རྒྱོབས། ཁྲལ་མངོན་སླ་བཅོས་མ་བྱེད། ཁྱེད་རྣམས་ཀྱི་ཉམས་ཞིབ་
འགྲོ་སོང་ཚང་མ་སྐུ་སྒེར་ཡིག་ཚང་ནས་བཏང་བ་ཞིག་རེད། དེར་བརྟེན་ངེས་པར་དུ་གཟབ་གཟབ་གནང་དགིས།
ང་ཚོའི་འབུམ་རམས་པའང་དེར་ཕེབས་ནས་ལམ་སྟོན་རྒྱུས་སྟོན་གནང་ཡོད་འདུག་པས་དབྱིན་ཇིའི་ཉམས་ཞིབ་གནང་སྟངས་དེ་ཚོར་ལྟོས་དང་ལེགས་ཆ་མང་པོ་རེད།
བཀྲིས་བདེ་ལེགས་སོ།།
ཧ་ཅང་གི་ཡག་པོ་འདུག བཀྲིན་ཆེ།
རྣམ་པ་ཚོར་ལེགས་སོ་ཞུ་རྒྱུ་རང་ཡིན། འོན་ཀྱང་ཁྱེད་རྣམ་པ་ཚོའི་ལས་འགུལ་དེ་ལས་གལ་ཆེ་བ་ནི་ཞིབ་འཇུག་གི་སྙན་ཐོ་དེ་འདྲ་འདོན་རྒྱུ་དེ་ཁ་ཚ་དགོས་གཏུགས་ཀྱི་ལས་དོན་ཞིག་ཏུ་སེམས་སོ།
གང་ལྟར་བྱེས་འཁོད་བོད་མི་ཡོངས་ཀྱིས་གཟབ་གཟབ་གནང་དགོས་ཀྱི་འདུག་མ་གཏོགས་ད་ལྟའི་བོད་ནང་གི་གནས་སྟངས་ལ་གཟིགས་ཞིབ་མཐིལ་ཕྱིན་པ་ཞིག་མ་གནང་བ་ཡིན་ན་འགྲིག་ཐབས་གཏན་ནས་མི་འདུག གང་ཡིན་ཟེར་ན་ཕར་ཕྱོགས་ནས་རང་སྲོག་འབེན་ལ་བཙུགས་ཏེ་ང་ཚོའི་བསམ་ཡུལ་ལས་འདས་པའི་ལས་འགུལ་སྤེལ་བ་དང་། འདི་ཕྱོགས་ནས་ལམ་སེང་མར་མེ་ཁྲོམ་སྐོར་ཞིག་དང་གཏམ་བཤད་ངར་མ་ཞིག་སྤེལ་ནས་མཇུག་རྫོགས་པ་འདྲ་པོ་མཐོང་གི་མི་འདུག་གམ། ངོས་ཀྱི་བསམ་ཚུལ་བྱས་ན་ལས་འགུལ་དེ་ཚོའི་ཐད་དངོས་ཡོད་གནས་ཚུལ་རྣམས་ཞིབ་ཚགས་པོའི་ཐོག་ནས་ཞིབ་འཇུག་བྱས་པ་བརྒྱུད་རྒྱལ་སྤྱི་ཙམ་མིན་པར་རྒྱ་དམར་སྲིད་གཞུང་རང་ལ་སྐད་ཆ་ཤོད་རྒྱུའི་ལས་གཞི་དེ་སྤྱི་སྒེར་ཚང་མས་གྲ་སྒྲིག་ཨང་གསར་བྱེད་དགོས་ཀྱི་འདུག་གོ།
ཞབས་འདྲེན་ཟེར་བ་དེ་རེད། བོད་ཀྱི་ཛ་དྲག་གི་གནས་སྟངས་ལ་ཞིབ་འཇུག་དང་། དེ་འབྲེལ་ཞིབ་འཇུག་རང་བཞིན་ལྡན་པའི་རྩོམ་ཡིག་སྤེལ་དགོས་ཤིང་། དེ་དང་ལྷན་དུ་ཧ་གོ་དགོས་ཡག་ཅིག་ཡོད་པ་ནི། བོད་ནང་གི་རང་ལུས་མེར་སྲེག་གཏོང་མཁན་སུ་གང་གིས་ཁོང་རྣམས་གྲོངས་རྗེས་མཆོད་འབུལ་ལ་རེ་བ་བྱས་མེད་པ་ཤེས་དགོས།
བོད་ནང་གི་རྒྱལ་དཔའ་བོ་ཚོས་རང་མེར་སྲེག་བཏང་བའི་གནས་ཚུལ་ཚབས་ཆེན་དེ་འདྲ་ཐོན་ཡང་རྒྱལ་སྤྱིའི་ནང་དགོས་ངེས་ཀྱི་དྲིལ་བསྒྲགས་དང་ནུས་པ་མ་ཐོན་པའི་རྐྱེན་རྩ་གང་ལ་ཐུག་མིན་ཞིབ་འཇུག་གནང་ནས་དེའི་གྲུབ་དོན་སྙན་ཐོ་འདོན་རྒྱུ་ཁ་ཚ་དགོས་གཏུགས་ཡིན་པས།ཁྱེད་ཚོ་ཞིབ་འཇུག་པ་ཡིན་པའི་ཆ་ནས་སྨོན་ལམ་འདོན་པ་ལས་སྐབས་བབ་གནད་དོན་འདི་དྲིལ་བྱེད་ཕྱོགས་ཀྱི་རྩོམ་ཡིག་རེ་བྲིས་ན་དེ་དགེ་ཆེ་བ་མཐོང་སོང་།།