འདི་ཟླའི་ཚེས་ ༥ ་རེས་གཟའ་ཟླ་བའི་ཉིན་ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་རྒྱལ་གཅེས་དཔའ་བོ་རྡོ་རྗེ་ལྷུན་གྲུབ་ལགས་ཀྱི་ཆེད་དུ་མཆོད་འབུལ་ཞིག་བྱས་ཡོད།
དེ་ཡང་སྤྱི་ལོ་ ༢༠༡༢ ཟླ་བ་ ༡༡ ཚེས་ ༤ ནིན་ཚོུད་ ༡༠ དང་སྐར་མ་ ༣༠ སྟེང་། རེབ་གོང་ཆུ་མ་སྡེ་བརྒྱད་ཚོ་དགུའི་གྲས་ཀླུ་གཤོང་སྡེ་བ་ནས་ཡིན་པ་རྡོ་རྗེ་ལྷུན་འགྲུབ་ལགས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གྱིས་སྐུ་གྲོངས་པའི་གནས་ཚུལ་བྱུང་ཡོད་པར་འདི་ག་ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་རྒྱལ་གཅེས་དཔའ་བོ་རྡོ་རྗེ་ལྷུན་གྲུབ་ལགས་ཀྱི་ཆེད་དུ་འཆི་མེད་དགའ་ཚལ་གླིང་གི་དགེ་འདུན་པ་དང་བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་གི་བཙུན་མ། ་དེ་བཞིན་ནོར་གླིང་ས་ཁུལ་གྱི་སེར་སྐྱ་མི་མང་༣༠༠ལྷག་མཉམ་འཛོམས་ཀྱིས་འཆི་་མེད་དགའ་ཚལ་གླིང་དགོན་པར་བསྔོ་བ་སྨོན་ལམ་གསུང་པ་དང་མ་ཎི་གསོག་སྒྲུབ་བྱས་ཡོད་པ་དང་། སྨོན་ལམ་གྲུབ་རྗེས་གོ་སྒྲིག་ཚོགས་ཆུང་གི་ཚོགས་གཙོ་བཀྲིས་ལམ་བཟང་ལགས་ནས་དཔའ་བོ་རྡོ་རྗེ་ལྷུན་གྲུབ་ལགས་ཀྱི་རང་ལུས་མེར་བསྲེགས་ཀྱི་ལས་འགུལ་དང་སྐུ་ཕུང་ཞུགས་འབུལ་གྱི་བརྒྱུད་རིམ་ངོ་སྤྲོད་བྱས་པ་མ་ཟད། བོད་ནང་དམག་མི་དང་ཉེན་རྟོག་པའི་དམ་དྲག་ཧ་ཅང་ཤུགས་ཆེ་ནའང་གདོང་ལེན་གྱིས་དཔའ་བོའི་སྐུ་ཕུང་གདན་ཞུ་སོགས་ཀྱི་ལས་འགུལ་ལ་བོད་མི་སྟོང་ཕྲག་དང་ཁྲི་ཕྲག་བརྒལ་བ་མཉམ་འཛོམས་ཐུབ་ཀྱི་ཡོད་པས། ང་ཚོ་རང་དབང་ལུང་པར་ཡོད་པ་ཚོས་ལས་འགུལ་ལ་མཉམ་ཞུགས་བྱེད་པའི་གྲངས་འབོར་དེ་ཧ་ཅང་ཉུང་ཉུང་ཆགས་ཡོད་སྟབས། ནོར་གླིང་ས་ཁུལ་གྱི་བོད་རིགས་ཚོས་སྔར་རྒྱུན་བཞིན་བོད་བསྟན་སྲིད་ཀྱི་ཆེད་དུ་ལས་འགུལ་ཆེ་ཕྲ་ཆུང་གསུམ་གང་ཡིན་ཡང་མཉམ་འགན་ཁུར་ལེན་གྱིས་མཉམ་བཞུགས་གནང་དགོས་པའི་འབོད་སྐུལ་ཞུས་ཡོད་པ་རེད། མཐར་བོད་རྒྱལ་ཁབ་དང་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་དག་གི་ཆོད་སེམས་དང་སྙིང་སྟོབས་ལ་རྗེས་དྲན་དང་། འདས་གྲོངས་སུ་སོང་བའི་དཔའ་བོ་དཔའ་མོ་རྣམས་ལ་ངག་བཅད་ཀྱིས་མྱ་ངན་གུས་འདུད་ཞུས་པ་དང་བོད་རྒྱལ་ཁབ་ཆེན་པོའི་རྒྱལ་གླུ་བཏང་ནས་སྨོན་ལམ་གྱི་ལས་འགུལ་གྲུབ་ཡོད་པ་རེད།
ནོར་གླིང་ས་གནས་བོད་རིགས་མཐུན་ཚོགས་པ་ནས།
མཉམ་དུ་ངག་བཅད་ངང་མྱ་ངན་གུས་འདུད་ཞུ།