སྤྱི་ལོ་ ༢༠༡༢ ཟླ་བ་ ༡༡ ཚེས་ ༡༡ ཉིན་ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་འཆི་མེད་དགའ་ཚལ་གླིང་གི་དགེ་འདུན་པ་དང་བཙུན་དགོན་སྒྲོལ་མ་གླིང་གི་དགེ་འདུན་པའི་གཙོས་ནོར་གླིང་ས་ཁུལ་གྱི་བོད་རིགས་སེར་སྐྱ་ཐུན་མོང་ནས་འཆི་མེད་དགའ་ཚལ་གླིང་དགོན་པར། སྤྱི་ཚེས་ ༡༠ ཉིན་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མཆོད་མེར་ཕུལ་བའི་རྒྱལ་གཅེས་དཔའ་བོ་མགོན་པོ་ཚེ་རིང་ལགས་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་ཡོད།
མཆོད་འབུལ་གྲུབ་རྗེས་བོད་མི་མང་སྤྱི་འཐུས་སྒྲོལ་དཀར་སྐྱབས་ལགས་ནས། བོད་ནང་གི་རང་ལུས་མེར་བསྲེགས་ཀྱི་ལས་འགུལ་གྱི་འབྱུང་རྐྱེན་དེ་བོད་ནང་གི་བོད་མི་རྣམས་ལ་རང་དབང་དང་། འགྲོ་བ་མིའི་ཐོབ་ཐང་མེད་པ་ཙམ་དུ་མ་ཟད། རྒྱ་གཞུག་གི་དྲག་གནོན་འོག་ཚད་ལས་འདས་པའི་གནར་གཅོད་ཕོག་བཞིན་ཡོད་པར་བརྟེན་ནས་བྱུང་བ་ཞིག་ཡིན་པ་དང་། ད་བར་བོད་ནང་རྒྱལ་གཅེས་དཔའ་བོ་དཔའ་མོ་བདུན་བཅུ་ལྷག་གིས་རང་ལུས་མེར་བསྲེགས་བཏང་ཡོད་པ་དང་། དེ་དག་གི་ཁྲོད་ནས་མང་དག་ཅིག་གིས་རང་ཉིད་ཀྱི་ཤ་ནས་མཆེད་པའི་ཕྲུ་གུ་དང་བཅས་པ་བློས་གཏོང་གིས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མཆོད་མེར་ཕུལ་བ་སྙིང་སྟོབས་བསྔགས་བརྗོད་གནང་ཡོད་པ་དང། བོད་ཀྱི་འཐབ་རྩོད་ཀྱི་འཕེལ་རིམ་དང་ཁྱབ་ཚད་སྐོལ་ལ་ཡང་བཀའ་སློབ་གནང་ཡོད་པ་རེད། དེ་བཞིན་ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཞོན་བཀྲིས་དོན་གྲུབ་ལགས་ནས་མི་མང་ལ་བོད་ཀྱི་འཐབ་རྩོད་ཀྱི་ལས་འགུལ་ནང་མི་མང་ཚང་མས་མཉམ་བཞུགས་བྱེད་དགོས་པའི་འབོད་སྐུལ་ཞུལ་ཡོད་པ་དང་། གཞན་ཡང་འདི་ཟླའི་ནང་རང་ལུས་མེར་བསྲེག་གིས་འདས་གྲོངས་ཕྱིན་པ་རིམ་དུ་བྱུང་བ་དག་ལ་སྐབས་མཚམས་སུ་མཆོད་འབུལ་སྨོན་ལམ་ཚུགས་ཡོད་པ་བཅས།
ནོར་གླིང་ས་གནས་བོད་རིགས་སྤྱི་མཐུན་ཚོགས་པ་ནས།