___བེ་རི་འཇིགས་མེད་དབང་རྒྱལ།
གཅིག་ ཕམ་ཁ།
གཏན་ཚིགས་རིག་པ་ལ་ཤིན་ཏུ་མཁས་པའི་དགེ་བཤེས་ཤིག་གིས་ཧུན་སོར་(J)གྲོང་སྡེ་བདུན་པའི་ཚན་རིགས་ཚོང་ཁྲོམ་དུ། ཞོག་ཁོག་ཀི་ལོ་གང་རེ་ལ་གོང་ཚད་དུ་རེད་དྲིས་པས། “ཧིན་སྒོར་ལྔ་རེད་”ཟེར། “འོ་ན་གུ་རུ་བྷུ་རའི་ཚལ་རིགས་ཚོང་ཁྲོམ་དུ་་་་་་་?” “བཞི་རེད་”ཟེར། དགེ་བཤེས་དེས་སྒོར་མོ་གཅིག་གིས་རིན་གོང་ཆུང་བའི་ཞོག་ཁོག་ཀི་ལོ་གང་ཉོ་བའི་ཆེད་དུ། རི་ཤལ་ལ་སྒོར་མོ་ལྔ་གླ་ཆ་སྤྲད་དེ་གུ་རུ་བྷུ་ར་ལ་གཤེགས།།
གཉིས། རྫུན་རྐུབ།
གསེར་མཁར་རུ་ཁག་ལྔ་པ་བེ་རིའི་ངལ་རྩོལ་བ་པདྨ་འཚོས་རང་གི་བུ་ལ།
“ཁྱོད་སོང་ནས་རུ་ཁག་འགོ་འཁྲིད་ཅཱ་ཅིང་ལ་ཨ་མ་ན་གི་འདུག ཉིན་གུང་རྒྱབ་ནད་དགོངས་གནང་རོགས་ཞུས་ཤོག ཨ་མ་ན་ནས་ཡོས་བརྔོ་དགོས་ཀྱི་འདུག་”
ཅེས་མངགས། བུ་འགོ་འཁྲིད་སར་སོང་ནས་
“ཨ་མ་ཉིན་གུང་རྒྱབ་ནད་དགོངས་གནང་རོགས། ཡོས་བརྔོ་དགོས་ཀྱི་འདུག”
ཅེས་ཇི་མ་ཇི་བཞིན་ལབ།
གསུམ། རྨོངས་ཞེན།
རླུང་ བསིལ་གྱིས་ཡོམ་ཡོམ་གཡོ་བའི་ལྗང་ལོ་རྣམས་གཡུ་མཚོ་སྔོན་མོའི་རྦ་རླབས་རྩེན་པ་ དང་འདྲ་བའི་དབྱར་གཞུང་གི་ནམ་ཟླའི་ལང་ཚོའི་འཛུམ་ཞལ་ལྷུམ་མེར་གསལ་བའི་ཉིན་ དེར། ཚེ་རིང་གི་ནང་མིས་དུས་རབས་ཀྱི་སྒྲ་སྡུད་རླུང་འཕྲིན་ལས་འཛམ་གླིང་གི་གསར་འགྱུར་ཉན་ནས་རང་ཁྱིམ་དུ་སྡོད་ཡོད། ཅུང་མ་འགོར་བར་ཨ་ཁུ་རྒྱ་མཚོ་བཀྲ་ཤིས་ཧད་དེ་ནང་ལ་འཛུལ་བྱུང༌།
“ཨ་ཧ། ཐན་ཕྲུག འདྲེ་ཕྲུག་ཚོ། འདི་འདྲེ་མ་རེད་དམ། ཁ་མེད་མགོ་མེད་གཅིག་གིས་མི་སྐད་ཧྲག་ཧྲག་རྒྱག་པ་འདི་གདུག་འདྲེ་གསོན་པོ་མིན་ན་ཅི་རེད། མགྱོག་པར་ཕར་ཞོགས། ལྷ་མོ་ལ་ཕོག་ཐུག་འགྲོ་འོང༌། ཨ་རོ། ཕྱིན་ཆད་འདི་ངའི་མཐོང་དང་ཐོས་ས་ཁུར་མ་འོང་མ་གཏོགས། ངས་ཇོ་བོ་རིན་པོ་ཆེ་ལ་ཚད་བཙུགས། ཧྲུག་ཧྲུག་བཟོ་རྒྱུ་ཡིན”་
ཟེར། ཨ་ཁུ་རྒྱ་མཚོ་བཀྲ་ཤིས་སྐུ་རླུང་ཚ་བ་དང་ཁོང་ཚོའི་ཨ་ཁུ་དངོས་ཡིན་སྟབས་ཁ་ལན་སློག་མ་ནུས་པར་འཇམ་ཐིང་མེར་བསྡད། ཨ་ཁུ་བཀྲ་རྒྱམ་སྣ་གཉེར་ཞིག་དང་འབྲེལ་གཉེར་མའི་ཁ་རག་ཆེན་པོ་གཉིས་སྨིན་མཚམས་སུ་བསྡུས་ཏེ། མགོ་བོ་འཕྲེད་དུ་གཡུག་གཡུག་བྱེད་ཀྱིན་ཇི་མི་སྙམ་པའི་རྙིང་ཞེན་དང་རྣམ་རྟོག་གི་སྣ་ཐག་རིང་པོ་ཞིག་གིས་འཁྲིད་དེ་ཕྱི་ལ་འཐོན་སོང༌།
བཞི། ལམ་སྲོལ།
ཁུ་བྱུག་སྔོན་མོས་མཐའ་མཇུག་གི་རྒྱང་གླུ་ལྷང་ལྷང་སྒྲོག་པའི་དབྱར་མཐའི་མར་ངོས་ཞོགས་པ་ཞིག་ལ། གོ་ལོ་ནང་པའི་ཨ་ཕ་དད་ལྡན་མགོན་པོའི་གདོང་ངོས་ནས་འཛུམ་ཞིག་ལངས་ནས་ཨ་ལགས་བྱང་འདྲེན་སར་འཛུལ་བྱུང༌།
“ཁ་རྩང་གནང་བརྡ་བཞེས་པ་ལྟར་དེ་རིང་ཨ་ཁུ་ང་ཚོའི་ཁྱིམ་ལ་ཕེབས་རོགས།”
ཞུས། བྱང་འདྲེན་གྱིས་
“ཡྀན་དང་ཡིན་”
གསུངས་ནས་རྟ་ཐོག་ཏུ་ཨ་ཕ་དད་ལྡན་གྱི་ཁྱིམ་དུ་ཕེབས། ཞབས་རིམ་གྱི་མགོ་འཛུགས་ཁར་ཨ་ཕ་དད་ལྡན་གྱིས
་”ཨ་ཁུ་བྱང་འདྲེན་དབྱར་གནས་ལ་བཞུགས་ཡོད་བཞིན་དུ་ང་ཚོས་ཚོགས་ངན་བསགས་སོང་”
ཞུས་པས། བྱང་འདྲེན་འཚབ་འཚུབ་ངང༌།
“སྐྱོན་མེད། སྐྱོན་མེད། ངས་ད་ནངས་དབྱར་སྡོམ་ཀ་བ་ལ་བཅོལ་ཡོད”ཅེས་ལན་བཏབ།
“དབྱར་སྡོམ་་་༌། ཀ་བ་་་་༌། བཅོལ་་༌། ཨ་ཅི་་་༌། ཇི་ལྟ་་་་?”
ཨ་ཕ་དད་ལྡན་མགོན་པོ་སེམས་ཁམས་ཀྱི་མེ་ལོང་ངོས་སུ་ཤོང་ཐབས་མེད་པའི་དྲི་རྟགས་ཆེན་པོ་ཞིག་ཤར།
1998<<ལྡུམ་ར་>>དུས་དེབ་ཐོག་དཀོད།
གཏན་ཚིགས་རིག་པ་ལ་ཤིན་ཏུ་མཁས་པའི་དགེ་བཤེས་ཤིག་གིས་ ཞེས་པ་དང་ དགེ་བཤེས་དེས་སྒོར་མོ་གཅིག་གིས་རིན་གོང་ཆུང་བའི་ཞོག་ཁོག་ཀི་ལོ་གང་ཉོ་བའི་ཆེད་དུ། རི་ཤལ་ལ་སྒོར་མོ་ལྔ་གླ་ཆ་སྤྲད་དེ་གུ་རུ་བྷུ་ར་ལ་གཤེགས་ཞེས་པ་གཉིས་ཤིན་ཏུ་ནས་མི་ཐུན་པར་སྣང་བས་ དགེ་བཤེས་ཞེས་པ་ནི་ དཀོན་མཆོག་གསུམ་ཚང་བའི་གང་ཟག་ཞིག་སྟེ་ མཆོག་གསུམ་ནམ་དུ་ཡང་བཀུར་འདེབས་ཀྱི་བྱ་བ་རྩོམ་པ་ནི་ཧ་ཅང་བླུན་པའི་ལས་ཤིག་ཏུ་སྣང་ངོ་།
ཧ་ཧ་་་་་སྙན་རྩོམ་བྲིས་ནའང་འགྲིག་གི་རེད་་་་་་ཡིན་ནའི་དཔེ་བཞག་ས་དེ་སྐྱོ་བ་ལ་ཨ། དགེ་བཤེས་་་་་ལ་མཐོང་ཆུང་གི་ཚིག་ཟུར་ཐོན་པ་དེ་་་་ཁྱོད་གྲ་པ་གཅིག་གི་ངོས་ནས་བཤད་ན་དཔེ་མི་སྲིད་ཞབས་འདྲེན་ཞུས་ཤག །གྲ་པ་ལོག་ཚར་བ་ཡིན་ན་ནི་གནས་ཚུལ་ཁག་ཁག་རེད་་་་གྲ་ལོག་གྲ་པར་སྡང་ཞེས་ཡོངས་གྲགས་རེད།