___བེ་རི་འཇིགས་མེད་དབང་རྒྱལ།
ཞོགས་རླུང་འུར་འུར་དུ་ལྡང་བའི་སྔ་དྲོ་ཞིག་ལ་ང་རང་དྲོད་ཁོག་ན་ནས་འུ་ཐུག་སོང༌། ལས་ ཁུངས་དབུ་འཛིན་སྐུ་ངོ་དབང་ཆེན་ལགས་སར་ཨ་ར་དང་ཨ་ཚའི་སྡུག་སྐད་ཤོར་གིན་ལག་པ་ སྟོང་པ་ཟུང་གཅིག་གིས་དྲོད་ཁོག་སྐྱོར་བཞིན་སྒོ་ལ་དཔུང་གདོང་གིས་ཕུད་ཕྱགས་ རྒྱག་ཐེངས་གཅིག་གིས་ནང་ལ་འཛུལ་དེ་ནད་དགོངས་ཞུས། སྐུ་ངོ་དབང་ཆེན་ལགས་ཀྱིས་ཨིག་ཀ་སྣ་ཚ་བ་ཞིག་དང་ཨ་སྟོང་ཡིད་ཚིམ་པ་ཞིག་བྱེད་ཞོར། ཕར་འཁྱོར་ཚུན་འཁྱོར་གྱིས་ཡར་ལངས་ནས་འཐུང་འཕྲོ་ཅུང་ཟད་ལུས་པའི་ཨ་རག་དམ་བུ་དེ་ཐད་ཀར་ངའི་ཐོག་ཏུ་གཡུགས། ཁ་ནས་ཆང་དྲི་དང་སྐྱུར་དྲི་འཐུལ་བཞིན།
“དགོངས་པ་ཡོད་མ་རེད་”
ཟེར་ནས་ཉལ་ཁྲིའི་ཐོག་ཕྱིར་རེངས་སོང༌།
ཕྱི་ ནང་གི་མི་རྣམས་སྟོན་ཀའི་སྤྲིན་ལྟར་འདུ་ལོང་ཆེ་བའི་དབྱར་གཞུང་གི་ནམ་ཟླའི་ ཉིན་ཞིག་ལ་ང་རྫབ་ཆེ་བའི་ནག་ཚོང་ཞིག་གི་དོན་དུ་དུས་ཚོད་ཀྱིས་མ་འདང་ནས་སླར་ ཡང་སྐུ་ངོ་དབུ་འཛིན་སར་བཅར། ལས་ཤག་གི་སྒོ་དལ་དལ་བུར་བརྡུངས་རྗེས་ག་ལེར་ནང་ལ་འཛུལ་ཏེ། ཐ་མག་དང༌། སྦི་རག སྦི་སི་ཀོཊ་ཀྱི་འབུལ་ཚན་རྣམས་མདུན་ཅོག་སྟེང་དུ་བཞག་ནས། ལྕེ་ནར། མགོ་འཕུར། རྐུབ་འཕྲུག་གིན་
“ང་གཟའ་འཁོར་གཅིག་གི་རིང་དགོངས་པ་གནང་རོགས། ལས་་་་ལས་ཀ་ཞིག་ཡོད།”
སྐུ་ངོ་ལགས་ཀྱིས་མདུན་ཅོག་ཐོག་ཏུ་མིག་ཞགས་ཤིག་འཕངས་ཤིང་ངའི་ལུས་ངག་གི་རྣམ་འགྱུར་ལ་གཅིག་བལྟས་ནས།
“ཨཱ་༌། ཡིན་དང་ཡིན། ཁག་མེད། ཛ་དྲག་གི་ལས་ཀ་ཡིན་ན་གཟའ་འཁོར་གཅིག་གིས་ཚར་མི་འོང༌། ཟླ་བ་གཅིག་ཏག་ཏག་དགོངས་པ་སྤྲོད་ཆོག ད་དུང་་་༌།”
“… …”
“… …”
1995/ 5/28/ མཚན་མོར་བྲིས། <<ནོར་ལྡེ་>>འདོན་ཐེངས་བདུན་པའི་ཐོག་བཀོད།”