གངས་དཀར་རྒྱལ་སྲས།
ལོ་བཅུ་གྲངས་སྔོན་ནས་འབར་མྱོང་བའི་རང་ལུས་མེར་སྲེག་གི་ཚ་རླབས་འདི། དེང་སྐབས་གློ་བུར་ཏུ་ཕྱོགས་ནས་ཕྱོགས་སུ་མཆེད་དེ་བོད་ཁམས་གང་སར་ཁྱབ། དྲང་ལྡོག་གཉིས་ཀ་ནས་འགྲེལ་བཤད་སྣ་ཚོགས་རྒྱག་གིན་ཡོད་པ་བཞིན་ངོས་འཛིན་བྱེད་སྟངས་ཀྱང་ཁ་ཁ་སོ་སོ་རེད། མེར་སྲེག་གི་བྱ་འགུལ་འདི་དུས་ཚོད་ངེས་ཅན་ཞིག་འགོར་ན་འདིའི་ངོ་བོ་འགྱུར་ནས་དྲག་སྤྱོད་ཅན་དུ་འགྱུར་རྒུའི་ཉེན་ཁ་ཡོད་པ་ནི་ཆོས་ཉིད་འགྱུར་མེད་ཅིག་གི་གཏན་ཚིགས་རེད། རྒྱུ་མཚན་ནི་མི་ནི་ཉོན་མོངས་གིས་ཀུན་ནས་བཅངས་པའི་སྲོག་ལྡན་རིགས་ཤིག་ཡིན་པས། ཉོན་མོངས་གི་རིགས་དེ་ལ་ཅི་ཙམ་བསྟུན་ཤེས་བྱས་ན་དེ་ཙམ་འཕེལ་ནས་ནམ་ཞིག་ཚོད་འཛིན་དཀའ་བའི་ཚད་དུ་སླེབས་ངེས་པ་ཞེ་སྡང་དང་གཏི་མུག་སོགས་ལས་གསལ་བོར་ཤེས་པ་དེ་རེད། ཉིན་ཞིག་ལག་འགུལ་བའི་དུས་ཚོད་ཅིག་ཤར་བ་ཡིན་ན་དེའི་སྐབས་ཀྱི་དོན་རྐྱེན་སྣ་ཚོགས་དང་དེའི་མཇུག་འབྲས་སོགས་ནི་བློ་ཡུལ་ལ་མི་ཤོང་བ་ཞིག་ཡིན་སྲིད། ང་ཚོ་འཚོ་བཞུགས་པ་དག་གིས་ཉེན་ཁ་ཆེ་ཞིང་མཇུག་འབྲས་བློ་ཡུལ་ལ་ཤོང་དཀའ་བའི་དོན་དག་སྣ་ཚོགས་མི་འབྱུང་བའི་ཆེད་དུ་ལས་ཀ་ཅི་ཞིག་སྒྲུབ་ན་ལེགས་པ་སོགས་ལ་ད་ལྟ་ནས་བསམ་བློ་གཏོང་རན་རེད། ང་ཚོ་འཚོ་བཞུགས་མི་ཉུང་བ་ཞིག་ལ་་བོད་ནང་འབར་བའི་མེ་ལྕེ་དེ་དག་གིས་རང་ཉིད་ཀྱང་དྲོས་ཡོང་བ་འདྲ་བའི་སྣང་བ་ཞིག་སྐྱེས་པའི་མོད་ལ་ཚེ་སྲོག་ཅིག་གིས་སྣོན་པ་རྒྱག་འདོད་ཀྱི་བསམ་བློ་རེའང་འཁོར་ཡོད་ངེས་ལ། སྐབས་དེ་དག་ཏུ་ཆུང་མ་བུ་ཕྲུག་ཕ་མ་དང་གྲོགས་པོ་སོགས་ཡིད་ལ་འཁོར་ནས་ཚོར་བ་དེ་རིམ་གྱིས་ཡལ་སོང་བའང་ཡོད་སྲིད། ཡང་ན། བཟའ་ཚང་ཁ་འཐོར་གྱི་སེམས་སྡུག་གམ་བརྩེ་དུང་གི་སྡུག་ཡུས་མ་ཐེགས་པ། ད་དུང་མངོན་འདོད་མང་བོ་ཞིག་མ་འགྲུབ་པའི་མི་དེ་དག་ལའང་མེ་དྲོད་དེ་དག་གི་འོད་སྣང་ཉེ་སར་སླེབས་པ་འདྲ་བའི་ཚོར་བ་ཡོང་མྱོང་ཡོད་སྲིད་གི་རེད། སྐབས་དེ་དག་ཚོར་བའི་འོག་ཏུ་ལམ་ལ་བུད་ནས་ལག་བསྟར་བྱས་ཟིན་པ་དང་བྱ་འདོད་ཀྱི་ཆོད་སེམས་ཁོག་ལ་ཉར་ནས་དུས་ཚོད་ཅིག་དང་མངོན་འདོད་ཅིག་ལ་སུ་ཞིག་གིས་གང་ཞིག་ན་བསྒུག་ཡོད་མེད་ཁོ་རང་ཉིད་དག་ལས་གཞན་སུས་ཀྱང་མི་ཤེས་པས་ཚེ་སྲོག་གི་ཞལ་འདེབས་བྱེད་འདོད་མཁན་ཚོས་ལག་བསྟར་མ་བྱས་པའི་སྔོན་ནས་བློས་ཐུབ་སུ་ཞིག་གམ་ལར་ཞེན་ཅན་སུ་ཞིག་ལ་སེམས་གཏམ་བཤད་དེ་པར་རྒྱག་པ་དང་བརྙན་ཕབ་དུ་འཇུག་རྒྱུ་ནི་ཁྱོད་རང་འགྲོ་ཁའི་གལ་ཆེ་བའི་སྒྲུབ་བྱ་ཉག་ཅིག་ཡིན། གལ་ཏེ་དེ་ལྟར་མ་བྱས་ན་ཁྱོད་རང་རྡོ་གོར་མོ་ཞིག་གི་རིན་ཐང་ཡང་མེད་པར་འཇིག་རྟེན་དང་འབྲལ་རྒྱུའི་ཉེན་ཁ་ཡོད་ནི་རེད། དཔེར་ན། མི་རིགས་ཀྱི་ཆེད་དུ་གཤེགས་ཟིན་ཡང་མིང་ཙམ་ལས་བརྙན་ཕབ་ཅིག་གང་ན་ཡོད་འདྲ་པར་ཞིག་མ་རེག་དེ་འདྲ་འདུག་པ་ནི་ད་ལྟའི་དངོས་ཡོད་གནས་ཚུལ་ལས་ཤེས་ཐུབ་པ་དེ་འདྲ་རེད། དེའི་རྐྱེན་གྱིས་འདི་ཕྱི་གང་ནས་ཀྱང་གྲ་སྒྲིག་ཡག་པོ་ཞིག་བྱེད་རོགས་གནང་རྒྱུ་ཧ་ཅང་གི་གལ་ཆེན་ཞིག་རེད།
བདེ་ཅོག་ཅོག་ཅིག་ལབ་འདུག