འཁྱམས་པོ།
ཨ་མ་རྒན་མོ་དེས་ཁ་མུར་མུར་ཁ་ཏོན་ཞིག་འདོན་བཞིན་་་ཏག་ཏག་ལོ་བཞི་དང་ཟླ་གསུམ་ལོན་མ་ཐག་པས་ཚ་བོ་ཉི་མའི་གདོང་ལ་ཅེར་ནས་མགོ་ལ་ལག་པས་བྱིལ་བྱིལ་འགའ་བྱེད་བཞིན་མིག་མཐའ་མཆི་མས་ཁེངས། ” འུ་ཚང་གི་#མཐོ་རུས་མ་ཁྱོད་ཀྱི་ཨ་མ་དང་ཕ་མཐོ་རིས་པོ་་་་ད་དུང་ཁྱོད་ཀྱི་ཨ་ཅེ་་་་དྲིན་ཆེན་ཁོང་ཚོ་ཡོད་དུས་ཁྱིམ་འདི་དྲོད་ཀྱིས་ཁེངས་ཞིང་ཡོད་ཚད་སྣུམ་ཅི་ལེར་ཡོད་པ་རེད། ད་ཤུལ་དུ་རྨོ་མོ་ང་ལ་འཆི་ཁའི་ལག་རྟེན་ཞིག་ལྷག་པ་ནི་བུ་ཆུང་ཁྱོད་རེད་་་་་་དཀོན་མཆོག་གིས་མཁྱེན་་་་་་ངའི་བུ་ཆུང་འདི་ཅིག་སྲུངས། ཁྱོད་ལའང་བདག་པོ་ཞིག་རྒྱག་ནི་ང་ལས་ལྷག་ཡོད་པ་མ་རེད། ད་ཅི་བྱ་ཅི་བྱ་་་་ཨ་མའི་གཅེས་ཕྲུག་་་་་་་འུ་མ་བུ་གཉིས་ཀྱི་སྐྱིད་སྡུག་འདི་་་་་རྒྱལ་བ་རིན་པོ་ཆེས་ཅིག་མཁྱེན། བོད་གངས་ཅན་ཚང་ལ་སྐྱིད་པའི་ཉི་མ་ཞིག་ཤར་རན་རེད། འ་་་་འ་འ་ད་འུ་ཚང་ཚིག་ནས་ཚར་ཐལ་་་་་་བོད་པ་ཚང་་་་་ཨོཾ་མ་ཎི་པདྨེ་ཧུཾཿ་་་་་་”ཞེས་མིག་ཟུང་དལ་གྱིས་བཙུམས་པ་ན་མིག་ཆུ་རྡོག་འཕྲེང་འགའ་མིག་མཐའི་གཉེར་སྲུབ་བརྒྱུད་དེ་སྣ་རྩེར་སླེབས་པ་ན་སྣ་ཆུ་དང་འདྲེས་ནས་ས་ལ་ཟགས། དེ་དུས་བུ་ཆུང་གིས་” ངའི་ཨ་ཕ་དང་ཨ་མ་་་་་ཨ་ཅེ་་་་་་ཕྱིར་ནམ་ཡོང་རྒྱུ་རེད། ཨ་མ་ལོ་ལོན་་་་ཁྱོད་ལ་མིག་ཆུ་ཐོན་བཞིན་འདུག ཁྱོད་ངུ་བ་ཡིན་ནམ་་་་་”
“ཨ་མ་རྒས་སོང་ཟིག་་་་རེད། ད་ཨ་མ་རྒས་སོང་ཟིག་་་་་་མེད་མེད་་་་་ཨ་མ་ངུ་བཞིན་མེད་་་་་ཨ་མའི་ལོ་ལོ་་་་ ཁོང་ཚོ་ཕྱིར་ཡོང་ཡོད་པ་མ་རེད། ཁོང་ཚོ་རྫུ་འཕྲུལ་གྱི་དུ་བ་སྔོན་པོའི་རྟ་མཆོག་ལ་བཅིབས་ནས་སྟེང་ལྷ་ཡུལ་ལ་ཕེབས་སོང་བ་རེད། ཕྱིར་ཡོང་ཐུབ་གི་མ་རེད་ལོ་ལོ་་་་་”
“ཨ་མ་་་་་་ཨ་མ་ལོ་ལོན་་་་དེ་ན་ཨ་མས་བཤད་ན་་་་མེ་དཔུང་གི་ནང་ན་རྫུ་འཕྲུལ་གྱི་དུ་བ་སྔོན་པོའི་རྟ་མཆོག་ཡོད་ལ་དེར་ཞོན་ནས་ལྷ་ཡུལ་ལ་སོང་ན་ངའི་ཨ་མ་དང་ཨ་ཕ་་་་་ཨ་ཅེ་ལ་ཐུག་གི་རེད་དམ། དེས་ན་ང་ཡང་དེར་འགྲོ་གི་ཡིན། ངས་ཨ་མ་དྲན་གི་་་ཨ་ཕ་དྲན་་གི་་་་ཨ་ཅེ་ཡང་དྲན་གི་་་་་་ངས་ཁོང་ཚོ་ངོ་མ་དྲན་གི་་་་་ཨ་མ་ལོ་ལོན་་་་་་ང་དེར་འགྲོ་ཆོག་གི་རེད་དམ་་་”
“་་མ་རེད་་་་མ་རེད་་་་་་ཨ་མའི་ལོ་ལོ་་་་ཁྱོད་ད་དུང་ལོ་ཆུང་བས་དུ་བ་སྔོན་པོའི་རྟ་མཆོག་ལ་ཞོན་ཐུབ་ནི་མ་རེད། རྟ་མཆོག་དེ་རྟ་མཆོག་རྒོད་པོ་ཞིག་ཡོད་པས་དེར་ཞོན་རྒྱུ་ནི་ལས་སླ་པོ་ཞིག་མ་རེད། ཨ་མའི་ལོ་ལོ་་་ ཉི་མ་ཞིག་ལ་ཁྱོད་ཕོ་རྒོད་སྟག་འདྲ་ཞིག་ཆགས་ན་་་་་དེ་དུས་ཁྱོད་ཀྱིས་ཀྱང་དུ་བ་སྔོན་པོའི་རྟ་མཆོག་དེ་ཞོན་ཐུབ་གི་རེད་ལ། ཁྱོད་ཀྱིས་ང་ཁྲིད་ནས་འུ་གཉིས་ཀ་སྟེང་ལྷ་ཡུལ་ལ་འགྲོ་་་་་འུ་ཚང་བཟའ་མི་ཚང་མ་དེར་ལྷན་འཛོམས་བྱེད་ཆོག་གི་རེད་་་་་་”
“་་་་རེད་རེད་་་་་་ཨ་མ་ལོ་ལོན་་་་་འུ་གཉིས་ཀ་འགྲོ་་་་་་ངས་ཉི་མ་དེ་ལ་སྒུག་ནས་འདུག་གི་ཡིན། ངས་ཨ་མ་དྲན་གི་་ ཨ་ཕ་དྲན་གི་་་ ཨ་ཅེ་ཡང་དྲན་གི་་་་ ང་ཁོང་ཚོ་ལ་ཐུག་ན་འདོད་་་་་་་”
# ཨ་མདོའི་འབྲོག་སྐད་དུ་ལྷ་ཡུལ་ནས་སྐྱེ་རྒྱུ་ཞེས་པའི་དོན།