བོང་སྟག་རི་ལུ།
ཐོག་མར་མི་ལུས་ཐོབ་པར་དགའ་སྣང་ཞིག་སྐྱེས་ཀྱང༌།།
བར་དུ་མི་ཡུལ་འགྲིམས་པའི་ངལ་དུབ་ཀྱིས་གཟིར་བ།།
ཐ་མར་མི་སེམས་དཀྲུགས་པའི་སྡུག་བསྔལ་ཞིག་སྐྱེས་པས།།
མི་ཡུལ་མི་ཡུལ་ཞེས་པར་ཞེན་ཆགས་ཤིག་མ་སྐྱེས།།
མི་རྣམས་མཐོང་ན་བྱ་ཚོགས་ཀྱུག་ཀྱུག་གིས་འཕུར་ཞིང༌།།
མི་སྐད་ཐོས་ནས་རི་དྭགས་ཕྱོགས་བཞི་རུ་འབྲོ་ལ།།
མི་ལུས་མཐོང་ན་ཨ་བྲ་ཙག་ཙག་གིས་གྲག་པས།།
མི་འདི་འཇིགས་སུ་རུང་བའི་གཅན་གཟན་དང་འདྲ་འདུག།
མགོན་མེད་རི་དྭགས་བསད་ནས་རི་རབ་ཅིག་བརྩིགས་ཤིང༌།།
སྐྱབས་མེད་གཡང་ཟོག་བཤས་ནས་ཁྲག་མཚོ་ཞིག་བསྐྱིལ་བ།།
རང་གི་དོན་ལ་གཞན་སྲོག་ཕངས་མེད་དུ་གཏོར་བའི།།
སེམས་མེད་མི་འདི་སྲིན་པོ་ངོ་མ་ཞིག་ཡིན་འདུག།
མི་ལུས་བླངས་ནས་འཇིག་རྟེན་ལྟད་མོ་ལ་ཕེབས་ཀྱང༌།།
མགོ་བོ་མཐོ་ཡང་མི་ཉན་ང་རྒྱལ་ཞེས་སྨོད་ལ།།
མགོ་བོ་དམའ་ཡང་མི་ཉན་ཉམ་ཆུང་ཞེས་སྡིག་པའི།།
མི་ཡུལ་འདི་ནས་མི་ངོར་བལྟ་ཚུལ་ཡང་མི་ཤེས།།
ཕ་རྒྱུད་གང་ནས་མཆེད་པ་རང་ཉིད་ཀྱིས་མི་ཤེས།།
མ་རྒྱུད་གང་དུ་འཐེན་པའི་ལམ་བུ་ཡང་མི་ཤེས།།
རང་དབང་རང་འཐད་ཟེར་བཞིན་གཉེན་སྒྲིག་རེ་བྱེད་དུས།།
མི་འདི་ནགས་གསེབ་རྒྱུ་བའི་སྤྲེའུ་ལས་སྡུག་པ།།
ལྟོ་བ་རྒྱགས་དུས་ཕན་ཚུན་ཕྲ་མ་རེ་འཕེན་ཞིང༌།།
ཕུ་ནུའི་ནང་དམེ་བྱེད་དུས་ལྟད་མོ་རེ་བལྟས་ནས།།
ཕམ་ཁ་ཉོ་དུས་ཕྱག་དང་བསྐོར་བ་རེ་བྱས་ཏེ།།
དཀོན་མཆོག་གསུམ་ལས་ལྷག་པའི་རེ་ས་ཞིག་མི་འདུག།
ཝ་མོ་ཇི་བཞིན་འོང་ནས་མགོ་བསྐོར་རེ་གཏོང་ཞིང༌།།
སྲིན་པོ་ཇི་བཞིན་འཇབ་ནས་གཞན་སྲོག་རེ་འཕྲོག་པ།།
སྤྲེའུ་ཇི་བཞིན་སྒུར་ནས་ངོ་དགའ་རེ་བྱེད་དུས།།
མི་ལུས་མ་གཞི་རྫུན་གྱི་འཁོར་ལོ་ཞིག་ཡིན་འདུག།
རྣ་བ་གཤོག་ཟུང་མེད་ཀྱང་ལྐོག་ཉན་ལ་མཁས་ཤིང༌།།
མིག་ཟུང་རྐང་ལག་མེད་ཀྱང་མཛེས་མའི་རྗེས་བསྙེགས་ནས།།
མཆུ་ཏོར་འགན་བབ་མེད་ཀྱང་ཕྲ་མ་རེ་རྒྱག་གི།
མི་ལུས་རིན་ཆེན་འདི་ལ་ཁོམ་པ་ཤིག་མ་བྱུང༌།།
ཕྱི་ནས་བལྟས་ན་མཛེས་མཛེས་ཡག་ཡག་ཅིག་འདུག་ཀྱང༌།།
ནང་དུ་ཞེ་སྡང་སྦྲུལ་གྱི་ལྕེ་ནག་དེ་བསྲིངས་ནས།།
དོན་ལྔ་སྣོད་དྲུག་ཡོད་ཚད་བསྲེག་ལ་ཁད་བྱེད་དུས།།
དལ་འབྱོར་མི་ལུས་ཐོབ་པར་དགའ་སྣང་ཞིག་མ་སྐྱེས།།
སྔ་དྲོ་གོང་མས་བཀའ་ལྟར་སྟོད་སྨད་དུ་རྒྱུག་ཅིང༌།།
ཕྱི་དྲོ་ཆུང་མས་ཆ་བཞག་ཆུ་ལེན་ལ་རེམ་པ།།
ཉི་མ་སུམ་བརྒྱ་དྲུག་ཅུའི་དུས་ཚོད་ཀྱི་རིང་ལ།།
ངལ་དུབ་མ་སོས་ཡུལ་འདིར་སྡུག་བསྔལ་ཞིག་མྱངས་སོང༌།།
བོད་ནང་གི་རྩོམ་འབྲི་བ་ཚོར་བློས་གཏོང་གི་སྙིང་སྟོབས་ཤིག་འདུག་