ཆིངས་ཡིག

བསེ་རུ།

མཐའ་བཞི་རྒྱལ་ཁབ་རྒྱལ་ཕྲན་ཕན་ཚུན་འབྲེལ།།

རེས་རྒྱལ་རེས་ཕམ་ཐོབ་ཤོར་ལོ་ཟླ་རིང་།།

མི་གསོད་ཁྲག་དང་ཤ་རུས་ཕུང་པོ་བརྩིགས།།

འུ་ཐུག་ཐབས་ཟད་ཞི་འཇགས་ཆིངས་འདུམ་རྙེད།།

ས་གཞི་ཁྲག་གིས་ཚོས་ཤིང་མྱང་ངན་ལྕི།།

ཟུངས་ཁྲག་མཚོ་མོ་འཁྱིལ་ཞིང་མིག་ཆུ་བཞུར།།

དབུལ་ཕྱུག་མཐོ་དམན་སྐྱ་སེར་སྙིང་ག་གས།།

ཞི་འཇགས་ཆིངས་འདུམ་ཚེ་སྲོག་སྐྱོབ་པའི་མགོན།།

 

ས་མཚམས་རྒྱལ་མཚམས་རྡོ་རིང་མནའ་ཚིག་སོགས།།

ཕན་ཚུན་གཉིས་མོས་ལོ་རྒྱུས་རྡོ་རྗེའི་རྒྱ།།

ཚིག་ཐོག་དོན་ལ་གནས་པའི་ཁས་ལེན་མཆོག།།

ཡུལ་སྡེ་མི་སྡེ་བདེ་བའི་ཆིངས་འདུམ་མཁོ།།

 

ཁྲེལ་དང་ངོ་ཚ་བྲལ་བའི་ཟ་རྔམ་ཅན།།

ཕན་ཚུན་གཅིག་འོག་གཅིག་བསྡུའི་ངན་གཤོམ་འོག།།

གཉིས་མོས་ཆིངས་འདུམ་དམ་ཚིག་མདུད་བརྒྱ་རྣམས།།

ཁྲིམས་འགལ་རལ་གྲི་རྣོན་པོས་ཚལ་པར་གཏུབ།།

 

བོད་རྒྱ་མི་རིགས་འབྲེལ་བའི་གཏམ་རྒྱུད་མང་།།

ཁྱོད་རྫུན་ང་བདེན་གླེགས་བམ་དེ་བས་མང་།།

འཛམ་གླིང་མགོ་བོ་རྨོངས་པའི་ལོ་རྒྱུས་མང་།།

བཙན་རྒྱལ་གཤིན་རྗེའི་བྱས་ཉེས་དེ་ལས་མང་།།

 

ཆོས་ལྡན་ཞིང་ཁམས་གཤིན་རྗེའི་ཁྲིམས་རྭར་བསྒྱུར།།

གཞིས་བྱེས་བོད་མིའི་སྡུག་བསྔལ་རི་ལས་ལྕི།།

ལོ་རྒྱུས་ལོ་ཟླ་ནག་པོ་མུན་པར་འགྲོགས།།

ཆིངས་ཡིག་སྟོང་ཕྲག་བཞག་ཀྱང་དོན་གྱིས་སྟོངས།།

 

ནམ་ཞིག་བདེན་དོན་ཉི་མ་གཞོན་ནུ་ཞིག།།

མུན་གླིང་གངས་ཅན་འཛིན་མར་འཆར་གྱུར་ཅིག།།

གཞིས་བྱེས་ལྷན་འཛོམས་བསྐལ་བཟང་འོད་སྣང་འབུམ།།

ཆོས་ལྡན་མུན་པའི་གླིང་དེར་འཕྲོ་བར་སྨོན།།