ལོ་སར་བཀྲ་ཤིས་བདེ་ལེགས། སྐྱོ་བྲག་དགའ་དབང་།

ལོ་སར་ལ་བཀྲ་ཤིས་བདེ་ལེགས་ཞུ་བ་ནི། ལོ་གསར་པའི་ནང་སེམས་ཅན་གྱི་རེ་སྨོན་བདེ་སྐྱིད་ཡོང་བའི་རྟེན་འབྲེལ་བསྒྲིགས་པ་སྟེ། འཇིག་རྟེན་འདིར་ནམ་གནས་རིང་ཞི་བདེའི་འཚོ་བ་ལ་རོལ་ཐུབ་ན་སྙམ་པའི་རེ་སྨོན་ཕྱིར་མངོན་པ་ཡིན་ཕྱིར། ཚིག་འདིས་ཀྱང་སེམས་ཅན་གྱི་བདེ་སྡུག་ལ་དོ་ཁུར་བྱ་མཁན་ཚོར་སེམས་ཚོར་དམིགས་བསལ་བ་རེ་བསྐྱེད་ཀྱིན་ཡོད། སེམས་ཀྱི་ཆོས་ཉིད་དུ་ཡོད་པའི་ཚོར་བའི་དབང་གིས་བདེ་སྡུག་འདོར་ལེན་བྱེད་ལ། བདེ་སྡུག་ཅི་ཞིག་འབྱུང་མིན་ནི་རྒྱུ་རྐྱེན་བཟང་ངན་ལ་རག་ལུས་ཤིང་། རྒྱུ་རྐྱེན་བཟང་ངན་ནི་རང་གིས་བསྒྲུབས་པ་ཉག་གཅིག་ཡིན་པས་ན་བླང་དོར་བྱ་དགོས། བླ་དོར་ཞིབ་ཕྲ་ནང་ཆོས་སུ་ཡོད་ཕྱིར་སེམས་ཅན་ཚང་མ་དོན་གྱིས་ནང་ཆོས་ཉམས་ལེན་བྱ་མཁན་ཤ་སྟག་ཡིན་པ་ལ་དགོངས་ནས། འདི་ན་སྣོད་མིན་སེམས་ཅན་གང་ཡང་མེད། །ཅེས་གསུངས། འོན་ཏེ་སེམས་ཅན་ཕལ་མོ་ཆེས་ནང་ཆོས་མ་བསྒྲུབས་པ་ནི་སྒྲུབ་མི་དགོས་པས་མིན་པར་སྒྲུབ་མ་ཤེས་པའི་དབང་གིས་ཡིན། 

ཡང་ན། ལོ་གསར་ལ་བཀྲ་ཤིས་བདེ་ལེགས་ཞུ་བ་ནི། ཚེ་ཇེ་ཐུང་དུ་སོང་བ་ལ་བཀྲ་ཤིས་བདེ་ལེགས་ཞུ་བཞིན་ཡོད། ཚེ་ཇེ་ཐུང་དུ་སོངས་ཟེར་བ་ནི། ཁོང་ཁྲོ་སློང་བའི་དམོད་མོ་ཐུ་གྲས་ཤིག་ཡིན། 

ང་ཚོའི་བློ་ཡུལ་དུ་རུང་བའི་ཤེས་བྱ་གང་ཞིག་ཡིན་ནའང་བཟང་ངན་རིས་སུ་ཆད་པ་མེད་པ་ནི་རྟེན་འབྲེལ་གྱི་དབང་གིས་ཏེ། གལ་ཏེ་བཟང་ངན་གང་རུང་དུ་ཞེན་ཕུར་འདེབས་ན་ད་དུང་ཤེས་བྱ་ལ་བློ་སྒོ་ཡག་པོ་མ་བྱེ་བའི་རྟགས་ཡིན།