ཐེའུ་རང་གི་ཉིས་སྟོང་བརྒྱད་ལོ།
མཚོན་དང་ལྕགས་སྒྲོག་གིས་བཏུལ་དུ་མེད་པ།
འགྲོ་མི་སྤྱི་ལ་དབང་བའི་བདག་ཉིད་ཀྱི་སྨྲ་ལྕེའོ།།
—–<<ཁྲག་ཡིག>>བཀླགས་རྗེས། རླུང་ནག་འཚུབ་མ།
(༡)
རུས་པ་ཅན་གྱི་ཤ་གསེང་ནས་ཚིས་ཁུ་བཞིན་བཞུར་ཡོང་བ་ཁྲག་གི་ལོ་རྒྱུས་ཡིན་ལ།ཤ་ཁུ་བཞིན་མཆོད་ཡོང་བ་མེས་པོའི་
ཞབས་རྗེས་ལགས།རུས་པ་ཅན་གྱི་སེམས་ཁོང་ནས་ནམ་ཡང་རྒྱལ་མི་སྲིད་པ་བྱི་ལའི་རྗུན་ཚིག་ཡིན་ལ་།ནམཡང་ཕམ་མི་སྲིད་པ་བདེན་པའི་རང་སྒྲ་ལགས།རུས་པ་ཅན་གྱི་མིག་དབང་གིས་དྲངས་འོངས་པ་གང་ཞིག་མི་སེར་དཀྱུས་མའི་མིག་ཆུ་རྡོག་གཅིག་ཡིན་ལ།བསུས་འོངས་པ་གང་ཞིག་གསུབ་དཀའ་བའི་རྨ་ཁ་དང་དྲན་ཤིང་ལགས།རུས་པ་ཅན་གྱི་སྨྲ་སྒོ་ནས་ང་རྒྱལ་གྱིས་སྨྲ་འདོད་པ་གང་ཞིག་རིགས་རྒྱུད་གཅིག་གི་བདེ་སྡུག་དང་ཁེ་དབང་ཡིན་ལ།སྤོབས་སེམས་ཀྱིས་བརྗོད་འདོད་པ་གང་ཞིག་གདུང་རྒྱུད་གཅིག་གི་རེ་དོགས་དང་སྙན་གྲགས་ལགས།རུས་པ་ཅན་གྱི་སྨྱུག་འོག་ནས་ཆུ་མིག་བཞིན་བརྡོལ་བྱུང་བ་རིགས་རུས་གཙང་མའི་འགོ་ཁུངས་དབོར་མི་ཉན་པའི་བདེན་ལུགས་དེ་ཡིན་ལ།འོད་ཐིག་བཞིན་ཕོག་ཡོང་བ་དེ་རིང་གི་གསར་འགྱུར་ནི་བདེན་པའི་བླ་སྲོག་བོར་བའི་རལ་གྲི་ངོ་གཉིས་ཤིག་ཡིན་ན་སང་ཉིན་གྱི་ལོ་རྒྱུས་ནི་ཕྱི་སྲོག་ནང་སྲོག་ཆད་པའི་བཤན་པའི་བེམ་རོ་ཞིག་ཏུ་མི་འགྱུར་གྲང་སྙམ་པའི་སེམས་ཁྲལ་དང་དེ་དག་ལས་ཐོབ་པའི་བསླབ་བྱ་དང་སྐུལ་ལྕག་ལགས།
(༢)
ལར་སྤྱི་ལོ་ཉིས་སྟོང་བརྒྱད་ལོ་ནི་བརྒྱད་ཅུའི་བགྲེས་སོང་ནས་བརྒྱད་གཅིག་བྱིས་པ་ཚུན་ཆད་ལ་མཚོན་ན་མིག་གི་རིག་ས་དང་རྣ་བའི་གོ་ས་ནས་བློ་ཡུལ་དུ་ཤོང་དཀའ་བའི་དོན་རྐྱེན་ལུ་གུ་རྒྱུད་མཐོང་ཞིང་ཐོས་མྱོང་བའི་ལོ་ཟླ་ཁྱད་པར་བ་ཞིག་སྟེ།མི་ཆེ་ཆུང་དང་ས་ལ་ཐུར་མེད་པར་གང་ལ་གང་འཚམ་དེ་ལ་དེར་བསྟུན་གྱིས་གྲག་འགུལ་མི་ཆུང་བ་རེ་བཟོས་མོད།གནད་འགག་ལ་འཕྲད་དུས་སྤྱི་ཚོགས་ཀྱི་གདོང་ལེན་པ་དང་མང་ཚོགས་ཀྱི་སྣེ་ཁྲིད་པ་རུ་འབོད་པའི་ཤེས་ཡོན་ཅན་གྱི་སྡེ་ན་རུས་པ་སྲ་མོ་ཅན་གྱི་ཐེའུ་རང་ག་ཚོད་ཡོད།གནད་འགག་ལ་འཕྲད་དུས་སྐབས་དོན་གྱི་ཆབ་སྲིད་དང་དངོས་དོན་གྱི་ལོ་རྒྱུས།མི་རིགས་ཀྱི་གནད་དོན་སོགས་གླེང་བའི་རྩོམ་དེབ༼སྤུས་ཀ་དང་དཔེ་རྟགས༽ཆ་འཛོམས་དག་གི་ཁྲོད་ན་སྨྲ་བརྗོད་ལ་རང་དབང་འབྱོར་བའི<<ཁྲག་ཡིག>>ག་ཚོད་ཡོད།གནད་འགག་འཕྲད་དུས་འུ་ཅག་གི་བླ་ཆེན་དང་དཔོན་ཆེན།རྒྱུ་ཆེན་དང་ངོ་ཆེན།དབང་ཆེན་དང་ངོམ་ཆེན་སོགས་ཆེན་པོ་མཐོན་པོར་འབོད་པ་དག་གི་ཁྲོད་ན་རུས་པ་སྲ་མོ་ཅན་གྱི་ཐེའུ་རང་ག་ཚོད་ཡོད།གནད་འགག་ལ་འཕྲད་དུས་དེ་དག་གི་མིང་བྱང་རྫིག་པོ་བརྗིད་པོ་དག་གི་གསེབ་ན་ངེས་པ་དོན་གྱི<<ཁྲག་ཡིག>>ག་ཚོད་ཡོད།གནད་འགག་ལ་འཕྲད་དུས་དེ་དག་གི་ཞབས་ཀྱིས་བཅགས་ཤིང་བྱིན་གྱིས་བརླབས་མྱོང་བའི<<ཁྲག་ཡིག>>ག་ཚོད་ཡོད།
(༣)
བདག་གིས་ནི་དེ་ལྟར་བསམ་གྱིན་བསམ་གྱིན་ཚོད་ཚོད་ལ་འབྲོང་གི་མི་རབས་ཤིག་དྲན་འོངས་ལ།<<འབྲོང་དྲན་པའི་ཟིན་ཐོ>>ཞིག་ཀྱང༼ཁ་བའི་མེ་ཏོག༽བཞིན་ལྷོད་ཀྱིས་ངག་གི་དབྱངས་རྟ་རུ་འདྲེན་དགོས་བྱུང་།ཤེས་ཚོད་ལ༼འབྲོང་ནི་རང་གི་སྤུན་ཟླའི་རྨ་ཁྲག་ལ་གདུང་འབོད་བྱེད་མཁན་ཞིག་རེད།འབྲོང་ནི་སོང་ས་བསྡད་ས་གང་དུའང་རང་བཙན་གྱི་རི་དྭགས་ཤིག་རེད།གནད་འགག་ལ་འཕྲད་དུས་འབྲོང་ནི་ངའོ་སྙམ་ནས་སྡོད་ཅིང་།ཁྱོད་ལ་འདང་སྤུ་ཙམ་མི་རྒྱག་པར།བསམ་ཡུལ་ལས་འདས་པའི་ཨ་ལན་སྟེར་ངེས།གནད་འགག་ལ་འཕྲད་དུས་འབྲོང་གིས་ད་གཟོད་བྲོ་འཁྲབ་རྒྱུ་རེད།འབྲོང་གི་བྲོ་འཁྲབ་པ་ནི་ཁྱོད་ཀྱི་ཐོག་ཏུ་རྒྱུག་རྩིས་ཡིན།སྐུ་ཞབས་ལགས་ལ་ངོ་སྐལ་ཨེན་ཙམ་ཡང་སྦྱིན་མི་སྲིེད།འབྲོང་ལ་རང་ཉིད་ལས་ལྷག་པའི་དད་པ་བྱེད་ས་མེད༽ཅེས་པ་ལྟར།གནད་འགག་ལ་འཕྲད་དུས་འབྲོང་གི་བུ་རྒྱུད་དུ་འབོད་ཆོག་ཆོག་གི་ཐེའུ་རང་ལ་ཐེའུ་རང་ལས་ལྷག་པའི་དད་པ་བྱེད་ས་ལོགས་སུ་མེད་ལ།གནད་འགག་ལ་འཕྲད་དུས༼བོད་འབངས་སྡུག་བསྔལ་ལས་སྐྱོབ་པའི་འབོད་སྒྲ༽ལྟ་བུའི<<ཁྲག་ཡིག>>ལའང་ཐིག་བརྒྱད་ལོ་ལས་ལྷག་པའི་ཁྲག་རྗེས་ཕབ་ས་གུད་ན་མེད།དེ་བས།སྙན་ངག་པས་སྨྱུག་རྩེ་ནས་འབྲི་མ་ནུས་པའི་ཉིས་སྟོང་བརྒྱད་ལོ།ཐེའུ་རང་གི༼དམྱལ་ཁམས་ཀྱི་ཟིན་ཐོ༽རུ་འབོད་པའི་ཁྲག་གི་ཡི་གེ་ཞིག།གསར་འགོད་པས་གསར་འགྱུར་བརྒྱུད་ལམ་ནས་བདེན་པ་ར་སྤྲོད་མ་ཐུབ་པའི་ཉིས་སྟོང་བརྒྱད་ལོ།ཐེའུ་རང་གི༼བདེན་པའི་གཏུག་བཤེར༽དུ་འབོད་པའི་ཁྲག་གི་ཡི་གེ་ཞིག།གཞས་པ་ཚོས་མགྲིན་པ་ལས་དཀྲོལ་མ་ཐུབ་པའི་ཉིས་སྟོང་བརྒྱད་ལོ་།ཐེའུ་རང་གི༼ང་ཡི་བོད༽དུ་འབོད་པའི་ཁྲག་གི་ཡི་གེ་ཞིག།ལོ་རྒྱུས་སྨྲ་བ་ཚོས་སེམས་ཁོང་ནས་བསྐྱུར་མི་སྤོབས་པའིཉིས་སྟོང་བརྒྱད་ལོ་།ཐེའུ་རང་གི༼རྣམ་ཤེས་ཀྱི་དབྱིངས༽སུ་འབོད་པའི་ཁྲག་གི་ཡི་གེ་ཞིགགང་ལྟར༼པ་པོ་བ་བོ་མ་མོ༽སོགས་བདག་པོའི་སྒྲ་ཡི་བདག་ཉིད་ཅན་དང་སྙན་པའི་སྒྲ་ཡི་ཅོད་པན་དག་གིས་ཅི་ཡང་བཤད་མ་ཕོད་ཅིང་གང་ཡང་སྒྲུབ་མ་ནུས་པའི་ཉིས་སྟོང་བརྒྱད་ལོ།ཐེའུ་རང་གི༼སེམས་ཀྱི་དམར་མཆོད༽སོགས་དོན་ཚན་ལྔ་དང་དོན་གནད་ལྔ་བརྒྱ་ཡི་བདག་ཉིད་ཅན་དུ་འབོད་པའི་ཁྲག་གི་ཡི་གེ་ཞིག
(༤)
མདོར་ན།བརྒྱ་བཤད་ཚིག་གི་རྩ་བ་དང་སྟོང་དཀྲུག་འོ་མའི་མར་ལོ།མི་རེ་བ་ཅན་ལ་རེ་བཞགགོས་རི་མོ་ཅན་ལ་རྒྱང་བལྟས་ཟེར་བ་ལྟར།གང་ན་ཐེའུ་རང་ཡོད་ན་དེ་ན་ཐེའུ་རང་ལྟ་བུའི་གླེང་གཞི་དང་གྲག་འགུལ་མི་ཆུང་བ་རེ་ཡོད་ངེས་ལ།གང་ན<<ཁྲག་ཡིག>>ཡོད་ན་དེ་ན་ཟུངས་ཁྲག་དྲོན་མོ་ལྟ་བུའི་བོད་མི་ས་ཡ་དྲུག་གི་ཁྲག་རྗེས་དང་དུག་ཆུ་ཁོལ་མ་ལྟ་བུའི་ཞེ་སྡང་གི་རྨ་་ཁ་མི་ཆུང་བ་རེ་ཕབ་ཡོད་ངེས།དེ་བས།ཐེའུ་རང་གི་ཉིས་སྟོང་བརྒྱད་ལོ་ནི་ལེགས་ན་ཐེའུ་རང་འདྲ་བའི་མི་བུ་སྤོབས་སེམས་ཅན་དང་རུས་པ་སྲ་མོ་ཅན་དག་གི་ཉིས་སྟོང་བརྒྱད་ལོ་ཡིན་ཆོག་ལ།ཉེས་ན་ཐེའུ་རང་དང་མི་འདྲ་བའི་ལྷ་བུ་སྒལ་ཚིགས་བོར་བ་དང་སྒལ་རུས་འཐོར་བ་དག་གི་ཉིས་སྟོང་བརྒྱད་ལོ་ཡིན་ལགས།ཡང་ན།ཐེའུ་རང་གི་ཉིས་སྟོང་བརྒྱད་ལོ་ནི་ཆེ་ས་ནས་ཐེའུ་རང་ཐེ་བའི་བོད་མི་ས་ཡ་དྲུག་གི་ཉིས་སྟོང་བརྒྱད་ལོ་ཡིན་དགོས་ལ།ཆུང་ས་ནས་ཉིས་སྟོང་བརྒྱད་ལོའི་ལོ་ཟླ་རེ་རེ་ཁྲག་དང་རྔུལ་ཆུའི་ཡིག་ཕྲེང་ལ་བརྒྱུས་པའི<<ཁྲག་ཡིག>>གི་ཐེའུ་རང་ཡིན་དགོས།
དགོངས་དག གོང་གི་མཆན་འདི་འགོད་ས་ནོར་སོང་། དྲ་དཔོན་གྱིས་གཟིགས་ན་བསུབ་རོགས་ཞུ།