རླུང་འཚུབ་ཀྱི་རྣོ་ཟུར་ཐོགས་ཀྱིན་ཟུག་བཞིན། གནམ་ས་གང་ལའང་ཁ་ངོ་མེད་པའི་ས་རྡུལ་འགམ་བཞིན་མུད་ཀྱིན། སྨྲ་ལྕེ་ཁྲག་གིས་སྦག་པའི་ས་ནག་གི་ང་རོ། མཐོ་བ་ནམ་མཁའི་དབྱིངས་ཀྱི་ཉི་ཟླ་སྐར་གསུམ་མམ། དམའ་བ་དོག་མོ་ས་ཡི་རི་ཆུ་ལུང་གསུམ། གང་ཞིག་གི་རྣ་ཡིས་ཐོས་སོང་། མིག་ལ་ཐོགས་སོང་།
གསར་འགྱུར་གྱི་ཤེལ་ངོས་སུ་འབྱར་བའི་རང་བསྲེགས་ཀྱི་ཐལ་རྡུལ་དེ། སུ་ལའང་མི་མཁོ་ཞིང་གང་དུའང་མ་བྲིན་པར། གནམ་ལོ་ཧྲིལ་ཧྲིལ་ཞིག་གི་སྙིགས་ཟོམ་གྱི་ཞབས་ན་འགྱུ་ཞིང་ཁ་ན་འབོ་བའི་སྙིང་ནད་ཙམ་ཡིན་སོང་ཨང་།
དབུགས་རིང་བརྒྱ་ཙམ་ཞིག་སེམས་སུ་ཐུར་ནས་ཐུར་དུ་དཔྱངས་ཀྱང་། ཁྱེད་རང་ད་དུང་ཚ་ལམ་ལམ་དུ་ཡོད་ཚོད། མེ་རོ་དམར་ཐག་ཆོད་རེ་གདོང་ལ་མཐོ་ནས་མཐོ་རུ་འབར་ཡང་། ཁྱེད་རང་ད་དུང་གྲང་ཤུར་ཤུར་ཡིན་གྲང་།
སྡོད་བཟོད་དཀའ་བའི་མེ་འོབས་སུ། ཁྱེད་ཀྱི་ཡར་ངོ་མར་ངོ་ཡི་དཀར་ས་ནག་ས་ལ་ཅི་ཁྱད་དེ། འཁྲེལ་གཞུང་མེད་པའི་ཟླ་ངོ་བཅུ་གཉིས་འཕྲོ་མཐུད་ཀྱིོ་རྦ་རླབས་ཆིལ་ཆིལ་དུ་སེམས་ལ་བླུགས་སོང་ཞིང་། སེམས་སྡུག་བར་མེད་ཀྱི་ལོ་ཡི་འཁོར་མོ་བཙན་གྱིས་འཁྱོལ་དགོས་སོང་བ་དེས། ཁྱེད་ཀྱི་གནམ་ལ་རེ་ལྟོས་ཆད་སོང་། ཁྱེད་ཀྱི་ས་ལ་ཡི་ག་ལོག་སོང་།
གནམ་ས་གང་ལའང་ཐོགས་རེག་མེད་པའི་ཁྱེད། ཚེ་སྲོག་གི་ལ་རྒྱ་ཙམ་ཡང་མེད་པའི་བསྐལ་བ་འདི་ཡི་དུས་ལྷག་གི་བར་སྟོང་དེ་ཡིན་ནམ། དཔའ་སྐད་ལ་བྲག་ཅ་གོ་རྒྱུ་མེད་པའི་ཁྱེད། ཚེ་ཐོག་འདི་ཡི་ཨ་ལན་མེད་པའི་མནར་གཅོད་ཀྱི་གོ་རིམ་གཅིག་བུ་ཡིན་ནམ། ད་དུང་། བདེན་དོན་གླེང་མི་སྤོབས་པའི་སྡར་མ་ཝ་འདྲ་བ་ཁྱེད། དཔའ་སྙིང་མཐོང་མི་ཐུབ་པའི་ལོང་བ་ཁྱེད་་་་་་་་ཁྱེད་་་་་་
ཉིས་སྟོང་བཅུ་གཉིས། ཁྱེད་རང་འདི་ལྟར་བུད་སོང་ན་ཆོག་གམ། ཁྱེད་ཀྱིས་ད་དུང་འབར་གྱིན་པའི་མེ་གསད་རྒྱུ་ལུས་ཡོད་པ་མིན་ནམ། ཉིས་སྟོང་བཅུ་གཉིས། ཁྱེད་རང་འདི་ལྟར་འདའ་ཐུབ་པས་ཆོག་གམ། ཁྱེད་ཀྱིས་ད་དུང་སྡུག་ཡུས་ཀྱིས་ཡུག་གཅིག་ཏུ་བྱས་པའི་གནམ་ས་གོ་དབྱེ་རྒྱུ་ལྷག་ཡོད་པ་མིན་ནམ།
ང་ཡི་སེམས་སུ་ཁྱེད་ནི་ནམ་ཡང་འབར་གྱིན་པའི་མེ་ཡི་ཞལ་ངོ་ཞིག ང་ཡི་སྙིང་ན་ཁྱེད་ནི་གཏན་དུ་བཞེངས་ཟིན་པའི་ཁྲག་གི་ཞབས་རྗེས་ཤིག