འཁྱམས་པོ།
མི་ལོ་བཅུ་གསུམ་གྱི་རྗེས་ནས།
ངས་རང་ཉིད་ཆེས་དགའ་བའི་སྔོ་ལྗང་གི་རྩ་ཐང་དང་།
ཕྲ་ཚོམ་མེ་ཏོག་གི་གསེབ་ན་བག་ཡངས་སུ་རྒྱུ་བའི་རྟ་ནོར་ལུག་གསུམ།
མངར་ཞིང་ཞིམ་པ་ཨ་མའི་བྱམས་བརྩེས་བཏགས་པའི་སྤྲང་དཀར་རྩམ་པ།
དཀར་ཞིང་གཙང་བ་ཁུ་ནུས་སེམས་ཀྱིས་དྲངས་པའི་འོ་ཇ་མངར་མོ།
ཡོད་ཚད་རྒྱབ་དུ་བཞག་ནས་རྨི་ལམ་ལྟ་བུའི་ལོ་ཟླ་དུ་མའི་དྲན་ཤིང་ལ།
མིག་ཆུ་རུམ་གང་གི་རྫོངས་པ་ཁུར་དེ།
གྱེས་ཕྱག་ཐེངས་གཉིས་པ་ཞིག་འགོ་ནས་བཟུང་དུས།
ཁ་ཆེམས་ཐ་ཐོར་ཞིག་གིས་ནུ་བོ་ལ་བཅོལ་དམ་བྱས་པའི་རེ་བ་འགའ་་་་་།
ཕ་མ་གཉིས་ནི་ངས་བཀལ་བའི་གྱེས་བྲལ་གྱི་གདུངས་པ།
ཉེས་ཆད་ལྗིད་པོ་འཁུར་མཁན།
ཉེས་མེད་ཉམས་ཆུང་དེ།
ང་ནི་ཁོང་ཚོ་ལ་མནར་གཅོད་དྲག་པོ་གཏོང་མཁན།
གཤེད་མ་སེམས་མེད་ཞིག་་་་་།
ནམ་ཡང་བཀྲུས་མ་མྱོང་པའི་ཨ་མའི་ངོ་གདོང་གི་གཉེར་སྲུབ་དེ།
དེ་རིང་མིག་ཆུས་ཐེངས་ཤིག་བཀྲུས་པ་དེའང་།
ང་སླེབས་པའི་དགའ་བསུ་འམ་ཡང་ན་ང་གྱེས་པའི་རིམ་བྲོ་ཡིན།
མིག་ཆུ་དང་མིག་ཆུའི་ཀློང་ན་་་།
མ་བུ་གསོན་བྲལ་གྱི་ངང་ཚུལ་ལ་བསམ་ན།
འཇིག་རྟེན་དབང་ཕྱུག་ལ་མིག་གསུམ་ཡོད་པའང་བདེན་ནམ་སྙམ།
ཁུ་ནུ་ཚོའི་བརྩེ་མདངས་ལ་བརྒྱུས་པའི་སྙིང་གཏམ་དམར་པོ།
བློས་མི་ཐོང་པའི་ཨ་མའི་མར་ལོ་བཞིན་ཤུལ་ཏུ་བཞགས།
ང་འདི་ལྟར་གྱེས་འགྲོ།
མིག་ཆུས་ལམ་ཁ་བཀྲི་བཞིན།
རང་ཉིད་ཀྱི་སྙིང་རྩ་དམར་ཟ་བྱེད་བཞིན།
ཐག་རིང་ཐག་རིང་གི་ས་དེར།
ཉི་མས་གླིང་བཞི་བསྐོར་ན་ཞག་གཅིག་གི་ཡུལ་དེར།
ང་ཆས་འགྲོ་་་་།
ངའི་ཡོོད་ཚད་ལས་དབང་ལ་བཀལ་ཏེ་ཆས་འགྲོ།
འོན་ཀྱང་ཁྱེད་རྣམས་ཀྱིས་ང་ལ་ཁང་ར་དང་གདུང་ཡུས་བྱེད་པ་ནི།
ངོ་མ་ཁག་ཡོད་ཁག་མེད་ཅིག་ལོས་ཡིན།
ཤིང་འཛམ་བུ་ཏྲིག་ཤའི་ཚལ་དུ་ཟས་སྐོམ་བཙལ་བཞིན་པའི།
བྱིའུ་ཆུང་འགྱུར་མོ་དག་བདེ་ལྷོད་བག་ཡངས་མེད་པར།
གུ་དོག་པའི་ཚོར་འདུ་སྐྱྱུར་མོ་ཞིག་གིས་ཡས་མར་དེེད་དེ།
བདེ་ལམ་སྙེགས་མི་འདོད་པ་ནི།
སུས་ཀྱང་འགོག་མི་ནུས་ཞིག་ལོས་ཡིན།།
ཁྱོད་གྱི་ལྷག་བསམ་དེ་དུང་ལས་དཀར་་་་་་ཡིན་ཀྱང་རྒྱ་གར་གནས་བཞུགས་བོད་མིང་ཚོ་ནི་ཕན་ཚུན་དགྲ་ལྟར་གནས་ཡོད་་་་་དུས་དང་རྣམ་པ་ཀུན་དུ་ཡིད་སྐྱོ་ཀྱང་་་་ཐབས་ཤེས་སུ་ལ་འང་མི་འདུག་་་་་་་་་ཨ་ཁ་ཁ་ཁ
གྲོགས་དག་ཕེབས་ནས་བསམ་ཚུལ་རེ་བརྗོད་དགའ་ཡོད་་་་་་་་་བླངས་དོར་གྱི་ལེགས་ཉེས་རེ་འབྱེད་པ་ནི་དྲ་གྲོགས་ཚོས་དཔྱད་བརྗོད་ལ་རག་ལས་པས་་་་་་་བཀའ་དྲིན་ཆེ།