༄༅། །བདག་གཞན་སྒྱུ་ལུས་ཀྱི་ཕུང་པོ་འདི། །
ན་ན་ན་སྟེ་ན་བས་དགའ། །
སྔར་བསགས་ཀྱི་ལས་ངན་འཛད་པ་ཡིན། །
ཆོས་སྤྱོད་ཀྱི་བྱ་བ་སྣ་ཚོགས་ཀྱང་། །
སྒྲིབ་གཉིས་སྦྱོང་བའི་ཆེད་དུ་ཡིན། །
ན་བ་མེད་ན་མེད་དེ་དགའ། །
ལུས་སེམས་བདེ་ན་དགེ་སྦྱོར་འཕེལ། །
མི་ལུས་དོན་ཆེན་བྱེད་པ་ཡང་། །
སྒོ་གསུམ་དགེ་ལ་སྦྱོར་བ་ཡིན། །
འབྱོར་པ་མེད་ན་མེད་དེ་དགའ། །
བསྲུང་གསོག་གི་བྱ་བྲེལ་དེ་ལ་མེད།
།འཐབ་རྩོད་ཀྱི་ཁྲོ་འཁྲུག་ཇི་སྙེད་པ།
།འཛིན་ཆགས་ཀྱི་ནོར་ལས་བྱུང་བར་ངེས། །
འབྱོར་པ་ཡོད་ན་ཡོད་དེ་དགའ། །
བསོད་ནམས་ཀྱི་དགེ་ཚོགས་སྤེལ་བས་ཆོག
།འཕྲལ་ཕུགས་ཀྱི་ཕན་བདེ་ཇི་སྙེད་པ། །
བསོད་ནམས་ཀྱི་འབྲས་བུ་ཡིན་པར་ངེས། །
མྱུར་དུ་ཤི་ན་ཤི་བས་དགའ། །
རྐྱེན་ངན་གྱི་བར་དུ་མ་ཆོད་ཅིང་། །
འཚམས་སྦྱོར་གྱི་བག་ཆགས་བཟང་འགྲོགས་པས། །
མ་ནོར་གྱི་ལམ་དུ་ཚུད་པར་ངེས། །
ཡུན་དུ་སོན་ན་གསོན་པས་དགའ། །
ཉམས་མྱོང་གི་ལོ་ཏོག་སྐྱེས་པ་ལ། །
གདམས་ངག་གི་རླན་དྲོད་མ་ཡལ་བར། །
ཡུན་དུ་བསྟེན་པས་སྨིན་པར་འགྱུར། །
ཞེས་གང་བྱུང་ལ་དགའ་བ་སྒོམ་པའི་མན་ངག་འདི་ནི་དཔལ་ས་སྐྱའི་ཡང་དགོན་ན་ནད་དྲག་པོས་བཏབ་པའི་རྟོགས་ལྡན་གཅིག་གིས་༸ རྒྱལ་བའི་སྲས་པོ་ཐོགས་མེད་བཟང་པོ་ལ་ན་ཚ་ལ་སོགས་ལམ་དུ་འཁྱེར་ན་ཇི་ལྟར་བྱེད་ཞུས་པའི་ལན་དུ་མཛད་པའི་མན་ངག་རྩ་ཆེ་ཞིག་ཡིན་ནོ།།
སྐལ་བཟང་ནས་མཁོ་སྤྲོད་བྱས།
གང་ལ་སེམས་ཀྱི་དམ་པ་རིན་ཆེན་དེ།།
སྐྱེས་པ་དེ་ཡི་སྐུ་ལ་ཕྱག་འཚལ་ཞིང་།།
གང་ལ་གནོད་པ་བྱས་ཀྱང་བདེ་འབྲེལ་བའི།།
བདེ་བའི་འབྱུང་གནས་དེ་ལ་སྐྱབས་སུ་མཆི།།