ནོར་གླིང་ས་གནས་མི་མང་གིས་མཆོད་འབུལ་སྨོན་ལམ་ཚོགས་པ།

གནས་ཚུལ་མཁོ་འདོན་པ། བཀྲ་དོན།

ཁ་སང་ཕྱི་དྲོའི་ཆུ་ཚོད་༥པའི་ཐོག་ནོར་གླིང་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་འོག བཙུན་དགོན་སྒྲོལ་མ་གླིང་གི་བཙུན་མ་དང་། ཁམས་སྤྲུལ་རིན་པོ་ཆེའི་དགོན་པ་འཆི་མེད་དགའ་ཚལ་གླིང་གི་དགེ་འདུན་པ་རྣམ་པས་གཙོས། ནོར་གླིང་དུ་གནས་བཞུགས་མི་མང་བཅས་སེར་སྐྱ་མི་གྲངས་བཞི་བརྒྱ་ལྷག་མཉམ་འཛོམས་ཀྱིས་ཕྱི་ཚེས་ ༡༢ ཉིན་བོད་མདོ་སྨད་ཨ་མཆོག་ནས་ཡིན་པ་རྒྱལ་གཅེས་དཔའ་བོ་ཚེ་རིང་བཀྲིས་ལགས་ཀྱིས་རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་་བྱས་ཏེ། རང་ལུས་མེར་བསྲེགས་གནང་རྗེས་ས་གནས་དེ་རང་ལ་འདས་གྲོངས་སུ་ཕྱིན་པ་དེ་ཉིད་ཀྱི་ཆེད་སྨོན་ལམ་མཆོད་འབུལ་དང་། ཤུལ་ལུས་ནང་མིར་གདུང་སེམས་མཉམ་སྐྱེད་ཆེད་ཀྱི་སྨོན་ཚོགས་ཤིག་ཆགས་ཡོད། ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་རྒྱལ་གཅེས་དཔའ་བོ་རིམ་བྱུང་དག་ལ་དུས་ནས་དུས་སུ་མཆོད་འབུལ་སྨོན་ལམ་ཞུ་སྒོ་ཆེད་གཉེར་ཞུས་དང་ཞུ་མུས་སུ་ཡོད་པ་བཅས།