བོད་ནང་གི་འཕྲིན་ཐུང་ཞིག བསོད་ནམས་ཀྱིས་མཁོ་སྤྲོད།

སྙིང་ཉེ་བའི་ཕྱི་བཞུགས་སྤུན་ཡོངས་ལ།

བོད་མདོ་སྨད་རྔ་བ་ཁུལ་ཁྱུང་མཆུ་རྫོང་དུ་དོ་ནུབ་སྦ་ཆེན་གྲོང་རྡལ་རྒྱ་དམག་གིས་བསྐོར་འདུག རྒྱ་དམག་ཡོངས་ཀྱི་ལག་ཏུ་དེང་རབས་ཀྱི་མཚོན་ཆ་སྣ་ཚོགས་བཟུང་སྟེ་གཉོམ་ཆུང་གི་ཡུལ་འདིའི་འབྲོག་མི་རྣམས་ལ་དྲག་པོས་གནའ་གནོན་དང་ཆད་གསོད་བྱེད་བཞིན་འདུག

གནམ་རྒན་མ་ད་ང་ཚོས་ག་རེ་བྱེད་དགོས་རེད་ཡ ཡུལ་འདིའི་ཡོད་ཚད་འཇིགས་སྐྲག་གི་འོག་ཏུ་གནས དོ་ནུབ་ཡུལ་འདིའི་མི་རྣམས་ནུབ་ཟས་ལ་ཡི་ག་མི་འདུག དོ་ནུབ་ནང་མི་དང་གྲོགས་པོ་བར་ལ་གཏམ་གླེང་མི་འདུག དོ་ནུབ་གཉིད་མི་ཁུག་པའི་བོད་མི་མང་འདིས་ཇི་ལྟར་བྱེད།

གནས་ལུགས་དང་དྲང་བདེན ཐོབ་ཐང་དང་རང་དབང་གང་ཡང་གླེང་ས་མེད་པའི་ཁོར་ཡུག་འདི་ནས་”དོན་མེད་དུ་འཚོ་བ་ལས དོན་ཡོད་དུ་འཆི་ན་འདོད་པའི་” དཔའ་རྒོད་ཁག་ཅིག་གི་རང་སེམས་ན་ཚོར་བ་གསང་བ་རེ།

བྱེས་བཞུགས་ཀྱི་སྤུན་ཟླ་རྣམས་ད་ང་ཚོ་ཇི་ལྟར་བྱེད།

བཙན་འོག་ན་གཉིད་མི་ཁུག་པའི་བོད་པ་ཞིག་གིས་བོད་ནས།