མི་ཉག་དུང་བརྡ།
ཞོགས་པའི་གསེར་མདོག་གི་ཉི་འོད་ཀྱིས་ཡིན་ནམ།
བདག་གིས་ཕྱོགས་རིས་ཀྱིས་འདྲེན་པའི་སེམས་པས་ཡིན།
གང་ལྟར ངའི་མིག་རྐོང་ནས་གསལ་ལྷམ་མེར་འཚེར་བའི།
ཁྱེད་ཀྱི་དཀར་དམར་འདྲེས་པའི་ངོ་གདོང་འདི།
ནམ་ཡང་ཡལ་དཀའ་བའི ང་ལ་དབང་བའི་མེ་ཏོག་ཆུང་ཆུང་གཅིག
ཁྱེད་ལ་ཅི་ཞིག་བྱེད་འདོད་ཡོད་ན ཁྱེད་ལ་ཇི་ལྟར་བཤད་འདོད་ཡོད་ན།
བདག་གི་བྱམས་བརྩེའི་དྲོད་ཁོལ་གྱི་རླབས་རྒྱུན་ནས།
ཁྱེད་ལ་རང་དབང་དང་བདེ་སྐྱིད་ཀྱི་ཁོར་ཡུག་བསྐྲུན།
དེ་རིང་ ངས་ཁྱེད་ལ་སྐྱེལ་མ་བྱེད་ཁར།
དེ་རིང་ ངས་ཁྱེད་ཀྱི་རྐང་མཐིལ་ནས་སྐྲའི་ཉག་མ་རེ་རེའི་བར་མཐོང་སོང་
དེ་རིང་ ཁྱེད་སུ་ཞིག་གི་ཆེད་དུ་ལམ་ལ་བཞུད་རྒྱུ་ཡིན་ནམ།
དེ་རིང་ ཁྱེད་ངའི་དོན་དུ་ཆེས་ལྐོག་གྱུར་ལྐོག་གྱུར་ཞིག་གི་ལམ་ལ་འགྲོ་ཁུལ་བྱེད་བཞིན་ཡོད།
སྤྱི་སྤྱོད་རླངས་འཁོར་གྱི་ལྡིར་སྒྲ་དང་ འགྲུལ་པ་ཚོའི་འུ་སྒྲ་ཇི་ཙམ་ཆེ་ཡང་།
ངའི་ཐོས་འཛིན་གྱི་བུ་ག་རུ ཁྱེད་ཀྱི་སྐད་ངག་སྙན་མོ་ལས་གང་ཡང་མ་ཚོར།
འུ་གཉིས་འདི་ལྟར་གྱེས་ཁར
ཁྱེད་ཀྱིས་བདག་ལ་དམིགས་བསལ་གྱི་སྐད་ཆ་གང་ཡང་བཤད་མ་སོང་ལ།
ངས་ཀྱང་ཁྱེད་ལ་རྒྱུན་ལྡན་གྱི་སྐད་ཆ་ལས་འདས་པའི གླེང་སློང་གང་ཡང་བྱེད་མ་ཐུབ།
འདི་ནི་གཅིག་བྱས་ན་འུ་གཉིས་ཀྱི་སེམས་པ་དང་སེམས་པའི་བར་གྱི།
རིན་ཐང་གི་ལྟ་སྟངས་ཤིག་ཡིན་སྲིད།